ಲೇಖನ : ಚಂದ್ರಶೇಖರ ಚುಳಕೀಮಠ (ಐಟಿ ಸೇವಾ ತಜ್ಞ) ✍
ನವದೆಹಲಿ: ಕೃತಕ ಬುದ್ಧಿಮತ್ತೆ (AI) ಮೂಲಕ ಸೃಷ್ಟಿಯಾಗುತ್ತಿರುವ ಚಿತ್ರ, ವಿಡಿಯೊ ಹಾಗೂ ಆಡಿಯೊಗಳ ನೈಜತೆಯನ್ನು ಪರಿಶೀಲಿಸುವುದು ದಿನದಿಂದ ದಿನಕ್ಕೆ ಸವಾಲಾಗುತ್ತಿರುವ ನಡುವೆಯೇ ಗೂಗಲ್ ಮಹತ್ವದ ಹೆಜ್ಜೆಯೊಂದನ್ನು ಇಟ್ಟಿದೆ. AI ಮೂಲಕ ಸೃಷ್ಟಿಸಲಾದ ಅಥವಾ AI ಬಳಸಿ ಬದಲಾಯಿಸಲಾದ ಮಾಧ್ಯಮಗಳಲ್ಲಿ ಅಡಗಿರುವ ಡಿಜಿಟಲ್ ವಾಟರ್‌ಮಾರ್ಕ್ ಪತ್ತೆಹಚ್ಚುವ SynthID Detector ಅನ್ನು ಇತ್ತಿಚೆಗೆ ಸಾರ್ವಜನಿಕ ಬಳಕೆಗೆ ಬಿಡುಗಡೆ ಮಾಡಲಾಗಿದೆ.
ಈ ಸೇವೆ ಜಾಗತಿಕವಾಗಿ ಇಂಗ್ಲಿಷ್‌ನಲ್ಲಿ ಲಭ್ಯವಾಗಿದ್ದು, ಬಳಕೆದಾರರು ಚಿತ್ರ, ವಿಡಿಯೊ ಅಥವಾ ಆಡಿಯೊ ಫೈಲ್‌ಗಳನ್ನು ಅಪ್‌ಲೋಡ್ ಮಾಡಿ ಪರಿಶೀಲಿಸಬಹುದು. ಗೂಗಲ್ ಡೀಪ್‌ಮೈಂಡ್ ಅಭಿವೃದ್ಧಿಪಡಿಸಿರುವ SynthID ತಂತ್ರಜ್ಞಾನವು ಮಾನವನ ಕಣ್ಣಿಗೆ ಅಥವಾ ಕಿವಿಗೆ ಸಾಮಾನ್ಯವಾಗಿ ಗೋಚರಿಸದ ಅದೃಶ್ಯ ಡಿಜಿಟಲ್ ವಾಟರ್‌ಮಾರ್ಕ್ ಅನ್ನು AI ಮೂಲಕ ಸೃಷ್ಟಿಯಾಗುವ ಮಾಧ್ಯಮದಲ್ಲಿ ಅಳವಡಿಸುತ್ತದೆ.
ವಿಶೇಷವೆಂದರೆ, ಚಿತ್ರವನ್ನು ಕ್ರಾಪ್ ಮಾಡುವುದು, ಫಿಲ್ಟರ್‌ಗಳನ್ನು ಬಳಸುವುದು, ವಿಡಿಯೊದಲ್ಲಿ ಕೆಲವು ಬದಲಾವಣೆ ಮಾಡುವುದು ಅಥವಾ ಆಡಿಯೊವನ್ನು MP3 ರೀತಿಯಲ್ಲಿ ಕಂಪ್ರೆಸ್ ಮಾಡುವಂತಹ ಸಾಮಾನ್ಯ ಸಂಪಾದನೆಗಳ ಬಳಿಕವೂ ವಾಟರ್‌ಮಾರ್ಕ್ ಪತ್ತೆಯಾಗುವಂತೆ ತಂತ್ರಜ್ಞಾನವನ್ನು ವಿನ್ಯಾಸಗೊಳಿಸಲಾಗಿದೆ.
ಹೊಸ SynthID Detector ಗೂಗಲ್‌ನ AI ಕಂಟೆಂಟ್ ಮಾತ್ರವಲ್ಲದೆ, SynthID ವ್ಯವಸ್ಥೆಯನ್ನು ಅಳವಡಿಸಿಕೊಂಡಿರುವ ಇತರ ಕಂಪನಿಗಳ AI ಕಂಟೆಂಟ್‌ಗಳನ್ನೂ ಪರಿಶೀಲಿಸುವ ಸಾಮರ್ಥ್ಯ ಹೊಂದಿದೆ. ಸದ್ಯ Google, OpenAI, NVIDIA ಮತ್ತು Kakao ಸೇರಿದಂತೆ ಪಾಲುದಾರರ ವಾಟರ್‌ಮಾರ್ಕ್‌ಗಳನ್ನು ಪತ್ತೆಹಚ್ಚಬಹುದು. ಮುಂದಿನ ದಿನಗಳಲ್ಲಿ Appleಗೂ ಬೆಂಬಲ ನೀಡುವ ಯೋಜನೆಯನ್ನು ಗೂಗಲ್ ಪ್ರಕಟಿಸಿದೆ.
2023ರಲ್ಲಿ SynthID ಪರಿಚಯಿಸಿದ ಬಳಿಕ ಇದುವರೆಗೆ 180 ಬಿಲಿಯನ್‌ಗೂ ಅಧಿಕ ಚಿತ್ರಗಳು ಮತ್ತು ವಿಡಿಯೊಗಳಿಗೆ ವಾಟರ್‌ಮಾರ್ಕ್ ಅಳವಡಿಸಲಾಗಿದೆ ಎಂದು ಗೂಗಲ್ ತಿಳಿಸಿದೆ. ಇದರ ಜೊತೆಗೆ ಸುಮಾರು 2.4 ಲಕ್ಷ ವರ್ಷಗಳಷ್ಟು ಆಡಿಯೊ ವಿಷಯಕ್ಕೂ SynthID ವಾಟರ್‌ಮಾರ್ಕ್ ಮಾಡಲಾಗಿದೆ. ಗೂಗಲ್ ಸರ್ಚ್, Gemini ಮತ್ತು Chrome ಸೇರಿದಂತೆ ಅದರ ವಿವಿಧ ಸೇವೆಗಳಲ್ಲಿರುವ ಪರಿಶೀಲನಾ ವ್ಯವಸ್ಥೆಗಳು ಈಗ ದಿನಕ್ಕೆ 10 ಲಕ್ಷಕ್ಕೂ ಹೆಚ್ಚು ಪರಿಶೀಲನಾ ವಿನಂತಿಗಳನ್ನು ನಿರ್ವಹಿಸುತ್ತಿವೆ.
ಗೂಗಲ್ ಡೀಪ್‌ಮೈಂಡ್‌ನ ಪುಷ್‌ಮೀತ್ ಕೊಹ್ಲಿ ಅವರ ಪ್ರಕಾರ, ಆನ್‌ಲೈನ್‌ನಲ್ಲಿ ಎದುರಾಗುವ AI ಮಾಧ್ಯಮದ ಮೂಲದ ಬಗ್ಗೆ ಜನರಿಗೆ ಹೆಚ್ಚಿನ ಮಾಹಿತಿ ನೀಡುವುದು, ಅವರು ಯಾವ ವಿಷಯವನ್ನು ನಂಬಬೇಕು ಎಂಬುದರ ಕುರಿತು ಉತ್ತಮ ನಿರ್ಧಾರ ತೆಗೆದುಕೊಳ್ಳಲು ನೆರವಾಗುತ್ತದೆ. ಹೀಗಾಗಿ SynthID Detector ಅನ್ನು ಸಾರ್ವಜನಿಕರಿಗೆ ತೆರೆಯುವುದು AI ವಿಷಯದಲ್ಲಿ ಪಾರದರ್ಶಕತೆ ಮತ್ತು ವಿಶ್ವಾಸ ಹೆಚ್ಚಿಸುವ ಪ್ರಯತ್ನದ ಪ್ರಮುಖ ಹೆಜ್ಜೆ ಎಂದು ಹೇಳಬಹುದು.
ಆದರೆ SynthID Detector ಅನ್ನು ಸಾರ್ವತ್ರಿಕ AI ಡಿಟೆಕ್ಟರ್ ಎಂದು ಪರಿಗಣಿಸಲು ಸಾಧ್ಯವಿಲ್ಲ. SynthID ವಾಟರ್‌ಮಾರ್ಕ್ ಬಳಸದೇ ಇರುವ ಇತರ AI ವ್ಯವಸ್ಥೆಗಳಿಂದ ಸೃಷ್ಟಿಯಾದ ಕಂಟೆಂಟ್ ಅನ್ನು ಇದು ಪತ್ತೆಹಚ್ಚದೇ ಇರಬಹುದು. ಹೀಗಾಗಿ ಯಾವುದೇ ಮಾಧ್ಯಮದಲ್ಲಿ SynthID ಪತ್ತೆಯಾಗಿಲ್ಲ ಎಂದರೆ ಅದು ಖಂಡಿತವಾಗಿಯೂ ಮಾನವರೇ ಸೃಷ್ಟಿಸಿದ ಕಂಟೆಂಟ್ ಎಂಬ ಅರ್ಥವಲ್ಲ.
