ಬೆಂಗಳೂರು: ಕನ್ನಡ ಚಿತ್ರರಂಗದ ಹಿರಿಯ ನಟ ಅನಂತ್ ನಾಗ್ ಅವರಿಗೆ ಅಭಿನಯವೆಂದರೆ ಕೇವಲ ವೃತ್ತಿಯಲ್ಲ, ಅದು ಜೀವನದ ಅವಿಭಾಜ್ಯ ಅಂಗ. ಐದು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿರುವ ಅವರು, ನಾಯಕನಿಂದ ಹಿಡಿದು ಪೋಷಕ ನಟನವರೆಗೆ ವಿಭಿನ್ನ ಪಾತ್ರಗಳಿಗೆ ಜೀವ ತುಂಬಿ ಕನ್ನಡ ಸಿನಿಪ್ರೇಕ್ಷಕರ ಮನದಲ್ಲಿ ವಿಶಿಷ್ಟ ಸ್ಥಾನ ಪಡೆದಿದ್ದಾರೆ.
ರಂಗಭೂಮಿಯಿಂದ ಬಣ್ಣದ ಲೋಕಕ್ಕೆ: ರಂಗಭೂಮಿಯಿಂದ ಅನಂತ್ ನಾಗ್ ಅವರ ಕಲಾ ಪಯಣ ಆರಂಭವಾಯಿತು. ರಂಗಭೂಮಿಯ ಅನುಭವವೇ ಮುಂದೆ ಬೆಳ್ಳಿತೆರೆಯಲ್ಲಿ ಅವರ ಅಭಿನಯಕ್ಕೆ ಗಟ್ಟಿಯಾದ ಅಡಿಪಾಯವಾಯಿತು. ಸಹಜ ಅಭಿನಯ, ಸರಳ ಸಂಭಾಷಣೆ ಮತ್ತು ಪಾತ್ರದ ಒಳಹೊಕ್ಕು ನಟಿಸುವ ಶೈಲಿ ಅವರ ವೈಶಿಷ್ಟ್ಯವಾಯಿತು.
1970ರ ದಶಕದಲ್ಲಿ ಚಿತ್ರರಂಗ ಪ್ರವೇಶಿಸಿದ ಅನಂತ್ ನಾಗ್, ಕನ್ನಡ ಮಾತ್ರವಲ್ಲದೆ ಹಿಂದಿ, ಮರಾಠಿ, ಮಲಯಾಳಂ ಸೇರಿದಂತೆ ಹಲವು ಭಾಷೆಗಳ ಸಿನಿಮಾಗಳಲ್ಲೂ ನಟಿಸಿದ್ದಾರೆ. ಆರಂಭಿಕ ದಿನಗಳಲ್ಲಿ ನಾಯಕ ನಟನಾಗಿ ಗುರುತಿಸಿಕೊಂಡ ಅವರು, ನಂತರ ವಯಸ್ಸಿಗೆ ತಕ್ಕಂತೆ ತಂದೆ, ಹಿರಿಯ, ಅಧಿಕಾರಿಯಂತಹ ಹಲವು ಬಗೆಯ ಪಾತ್ರಗಳತ್ತ ಯಶಸ್ವಿಯಾಗಿ ಹೆಜ್ಜೆ ಹಾಕಿದರು.
ಕನ್ನಡ ಚಿತ್ರರಂಗದಲ್ಲಿ ಹೊಸ ಅಲೆಯ ಸಿನಿಮಾಗಳಿಗೆ ಕೊಡುಗೆ: ಕನ್ನಡದ ಸಮಾನಾಂತರ ಮತ್ತು ಹೊಸ ಅಲೆಯ ಸಿನಿಮಾಗಳ ಬೆಳವಣಿಗೆಯ ಅವಧಿಯಲ್ಲಿ ಅನಂತ್ ನಾಗ್ ಅವರ ಅಭಿನಯ ಗಮನ ಸೆಳೆಯಿತು. ನಿರ್ದೇಶಕ-ನಟರ ವಿಭಿನ್ನ ಪ್ರಯೋಗಗಳಿಗೆ ಅವರು ಸಾಥ್ ನೀಡಿದರು. ನಾಟಕೀಯತೆಯ ಬದಲು ಸಹಜ ಅಭಿನಯಕ್ಕೆ ಆದ್ಯತೆ ನೀಡಿದ ಅವರ ಶೈಲಿ, ಆ ಕಾಲದ ಸಿನಿಮಾಗಳಿಗೆ ಹೊಸ ಆಯಾಮ ನೀಡಿತು.
ನಾಯಕನಾಗಿ ಮಿಂಚಿದ ಅನಂತ್ ನಾಗ್: ನಾಯಕ ನಟನಾಗಿ ಅನಂತ್ ನಾಗ್ ಹಲವು ಯಶಸ್ವಿ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಪ್ರೇಮಕಥೆ, ಕೌಟುಂಬಿಕ ಕಥಾನಕ, ಸಾಮಾಜಿಕ ಸಮಸ್ಯೆ, ಗಂಭೀರ ಕಥಾವಸ್ತು ಸೇರಿದಂತೆ ವಿಭಿನ್ನ ಪ್ರಕಾರದ ಸಿನಿಮಾಗಳಲ್ಲಿ ಅವರು ತಮ್ಮ ಅಭಿನಯದ ಛಾಪು ಮೂಡಿಸಿದ್ದಾರೆ.
‘ಬೆಳುವಲದ ಮಡಿಲಲ್ಲಿ’, ‘ಮಿಂಚಿನ ಓಟ’, ‘ಬರ’, ‘ಗಣೇಶನ ಮದುವೆ’ ಸೇರಿದಂತೆ ಹಲವು ಚಿತ್ರಗಳು ಅವರ ವೃತ್ತಿಜೀವನದ ಪ್ರಮುಖ ಹಂತಗಳಾಗಿವೆ. ವಿಶೇಷವಾಗಿ ಮಣಿರತ್ನಂ ನಿರ್ದೇಶನದ ಸೇರಿದಂತೆ ಹಲವು ಚಿತ್ರಗಳು ಅವರ ಅಭಿನಯದ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸಿವೆ.
ತಲೆಮಾರು ಬದಲಾದರೂ ಪಾತ್ರಗಳಲ್ಲಿ ಹೊಸತನ: ಕಾಲ ಬದಲಾದಂತೆ ಅನಂತ್ ನಾಗ್ ಕೂಡ ತಮ್ಮ ಪಾತ್ರಗಳ ಸ್ವರೂಪವನ್ನು ಬದಲಿಸಿಕೊಂಡರು. ನಾಯಕನ ಸ್ಥಾನದಿಂದ ಪೋಷಕ ಪಾತ್ರಗಳಿಗೆ ಬಂದರೂ ಅವರ ಬೇಡಿಕೆ ಮಾತ್ರ ಕಡಿಮೆಯಾಗಲಿಲ್ಲ. ತಂದೆ, ಮಾವ, ಹಿರಿಯ ಅಧಿಕಾರಿ, ರಾಜಕಾರಣಿ ಸೇರಿದಂತೆ ಹಲವು ಪಾತ್ರಗಳಲ್ಲಿ ಅವರು ಕಾಣಿಸಿಕೊಂಡರು.
ಯುವ ನಟರೊಂದಿಗೆ ತೆರೆ ಹಂಚಿಕೊಂಡ ಸಂದರ್ಭಗಳಲ್ಲೂ ತಮ್ಮದೇ ಆದ ಅಭಿನಯದ ಛಾಪು ಮೂಡಿಸಿರುವ ಅವರು, ಪಾತ್ರದ ಗಾತ್ರಕ್ಕಿಂತ ಅದರ ಮಹತ್ವಕ್ಕೆ ಆದ್ಯತೆ ನೀಡುವ ಕಲಾವಿದರಾಗಿ ಗುರುತಿಸಿಕೊಂಡಿದ್ದಾರೆ.
ದೂರದರ್ಶನದಲ್ಲೂ ಜನಪ್ರಿಯತೆ: ಬೆಳ್ಳಿತೆರೆಯ ಜತೆಗೆ ಕಿರುತೆರೆಯಲ್ಲೂ ಅನಂತ್ ನಾಗ್ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ. ಧಾರಾವಾಹಿಗಳಲ್ಲಿನ ಅವರ ಅಭಿನಯವೂ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಹೀಗಾಗಿ ಹಲವು ದಶಕಗಳ ಕಾಲ ನಿರಂತರವಾಗಿ ಪ್ರೇಕ್ಷಕರೊಂದಿಗೆ ಸಂಪರ್ಕದಲ್ಲಿರುವ ಅಪರೂಪದ ಕಲಾವಿದರಲ್ಲಿ ಅನಂತ್ ನಾಗ್ ಕೂಡ ಒಬ್ಬರು.
ಪ್ರಶಸ್ತಿಗಳ ಕಿರೀಟ: ಅನಂತ್ ನಾಗ್ ಅವರ ಸುದೀರ್ಘ ಕಲಾ ಸೇವೆಗೆ ಹಲವು ಪ್ರಶಸ್ತಿ-ಪುರಸ್ಕಾರಗಳು ಸಂದಿವೆ. ಕರ್ನಾಟಕ ರಾಜ್ಯ ಸರ್ಕಾರ ನೀಡುವ ಅತ್ಯುತ್ತಮ ನಟ ಪ್ರಶಸ್ತಿಯನ್ನು ನಾಲ್ಕು ಬಾರಿ ಹಾಗೂ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ಅವರು ಪಡೆದಿದ್ದಾರೆ. ಫಿಲ್ಮ್ಫೇರ್ ಪ್ರಶಸ್ತಿಗೂ ಹಲವು ಬಾರಿ ಭಾಜನರಾಗಿದ್ದಾರೆ.
ಇತ್ತೀಚೆಗೆ ಭಾರತ ಸರ್ಕಾರ ದೇಶದ ಮೂರನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ ಪದ್ಮಭೂಷಣವನ್ನು ನೀಡಿ ಅನಂತ್ ನಾಗ್ ಅವರ ಕಲಾ ಸೇವೆಯನ್ನು ಗೌರವಿಸಿದೆ. ಈ ಮೂಲಕ ಕನ್ನಡದ ಹಿರಿಯ ನಟನ ದೀರ್ಘಕಾಲದ ಚಿತ್ರರಂಗದ ಪಯಣಕ್ಕೆ ರಾಷ್ಟ್ರಮಟ್ಟದ ಗೌರವವೂ ದೊರೆತಂತಾಗಿದೆ.
