ಬೆಂಗಳೂರು: ರಾಜ್ಯದ ನೈಜ ಆಡಳಿತಾತ್ಮಕ ಸಮಸ್ಯೆಗಳಿಗೆ ತಂತ್ರಜ್ಞಾನ ಆಧಾರಿತ ಪರಿಹಾರಗಳನ್ನು ಕಂಡುಕೊಳ್ಳಲು ಕರ್ನಾಟಕ ಸರ್ಕಾರವು ‘Government First’ ಎಂಬ ಹೊಸ ಉಪಕ್ರಮವನ್ನು ಜಾರಿಗೆ ತಂದಿದೆ.
ಮಾಹಿತಿ ತಂತ್ರಜ್ಞಾನ, ಎಲೆಕ್ಟ್ರಾನಿಕ್ಸ್ ಮತ್ತು ಜೈವಿಕ ತಂತ್ರಜ್ಞಾನ (IT-BT), ಕೆ-ಟೆಕ್ ಹಾಗೂ ಸ್ಟಾರ್ಟ್ಅಪ್ ಕರ್ನಾಟಕ ಇಲಾಖೆಗಳ ಮೂಲಕ ಈ ಕಾರ್ಯಕ್ರಮವನ್ನು ಅನುಷ್ಠಾನಗೊಳಿಸಲಾಗುತ್ತಿದ್ದು, ಸರ್ಕಾರವೇ ನವೀನ ಸ್ಟಾರ್ಟ್ಅಪ್ಗಳಿಗೆ ಮೊದಲ ಗ್ರಾಹಕವಾಗುವ ಉದ್ದೇಶ ಹೊಂದಿದೆ.
ಈ ಉಪಕ್ರಮದ ಮೊದಲ ಹಂತದಲ್ಲಿ ಪ್ರಜಾ ಸೇವಾ ಮೂಲಕ ನಾಗರಿಕ ಕೇಂದ್ರಿತ ಆಡಳಿತ ಮತ್ತು ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ಮೂಲಕ ನಗರ ನೀರಿನ ನಿರ್ವಹಣೆಗೆ ಸಂಬಂಧಿಸಿದ ಸಮಸ್ಯೆಗಳಿಗೆ ಪರಿಹಾರ ನೀಡುವ ಸ್ಟಾರ್ಟ್ಅಪ್‌ಗಳಿಂದ ಅರ್ಜಿ ಆಹ್ವಾನಿಸಲಾಗಿದೆ.
ಆಯ್ಕೆಯಾಗುವ ಸಂಸ್ಥೆಗಳಿಗೆ ತಮ್ಮ ತಂತ್ರಜ್ಞಾನವನ್ನು ಸರ್ಕಾರಿ ವ್ಯವಸ್ಥೆಯಲ್ಲಿ ನೈಜವಾಗಿ ಪರೀಕ್ಷಿಸುವ ಹಾಗೂ ನಿಯೋಜಿಸುವ ಅವಕಾಶ ದೊರೆಯಲಿದೆ. ಪ್ರಜಾ ಸೇವಾ ವಿಭಾಗದಲ್ಲಿ AI ಆಧಾರಿತ ದೂರು ನಿರ್ವಹಣೆ ಮತ್ತು ಪರಿಹಾರ ವ್ಯವಸ್ಥೆ, AI ಆಧಾರಿತ ಏಕೀಕೃತ ನಾಗರಿಕ ಕಾಲ್ ಸೆಂಟರ್, AI ಆಧಾರಿತ ಇ-ಆಫೀಸ್ ಹಾಗೂ ಅಧಿಕಾರಿಗಳ ಏಕೀಕೃತ ವರ್ಕ್‌ಫ್ಲೋ, ನಾಗರಿಕರಿಗೆ ಒದಗಿಸುವ ಸರ್ಕಾರಿ ಐಟಿ ಸೇವೆಗಳ ನಿರಂತರ ಲಭ್ಯತೆ ಸೇರಿದಂತೆ ಹಲವು ಕ್ಷೇತ್ರಗಳನ್ನು ಗುರುತಿಸಲಾಗಿದೆ.
ಇನ್ನು BWSSB ವ್ಯಾಪ್ತಿಯಲ್ಲಿ ನೀರಿನ ಸೋರಿಕೆ ಮತ್ತು Non-Revenue Water ಕಡಿತಕ್ಕೆ AI ಬಳಕೆ, ಸಂಸ್ಕರಿಸಿದ ತ್ಯಾಜ್ಯ ನೀರಿನ ಮರುಬಳಕೆ ಯೋಜನೆ, ಬುದ್ಧಿವಂತ ಆಸ್ತಿ ನಿರ್ವಹಣೆ, GIS ಆಧಾರಿತ ಆದಾಯ ಮತ್ತು ಕಾರ್ಯಾಚರಣೆ ವಿಶ್ಲೇಷಣೆ ಹಾಗೂ ಡಿಜಿಟಲ್ ಟ್ವಿನ್‌ಗಳ ಮೂಲಕ ಸಮಗ್ರ ನೀರಿನ ನಿರ್ವಹಣೆ ಮುಂತಾದ ಸವಾಲುಗಳಿಗೆ ಪರಿಹಾರ ಹುಡುಕಲಾಗುತ್ತಿದೆ.
ಆಯ್ಕೆಯಾಗುವ ಸ್ಟಾರ್ಟ್ಅಪ್‌ಗಳ ಪರಿಹಾರಗಳನ್ನು ಮೊದಲು ಸರ್ಕಾರಿ ಇಲಾಖೆಗಳ ನೈಜ ಪರಿಸರದಲ್ಲಿ ಪೈಲಟ್ ಯೋಜನೆಯಾಗಿ ಪರೀಕ್ಷಿಸಲಾಗುತ್ತದೆ. ಕಾರ್ಯಕ್ಷಮತೆ, ವೆಚ್ಚದ ಪರಿಣಾಮಕಾರಿತ್ವ, ಬಳಕೆದಾರರ ಸ್ವೀಕಾರ, ವಿಸ್ತರಣಾ ಸಾಮರ್ಥ್ಯ ಮತ್ತು ಸಾರ್ವಜನಿಕ ಸೇವೆಯ ಮೇಲೆ ಬೀರುವ ಪರಿಣಾಮ ಸೇರಿದಂತೆ ವಿವಿಧ ಮಾನದಂಡಗಳ ಆಧಾರದ ಮೇಲೆ ಅವುಗಳನ್ನು ಮೌಲ್ಯಮಾಪನ ಮಾಡಲಾಗುತ್ತದೆ.
ಯಶಸ್ವಿಯಾಗುವ ಪರಿಹಾರಗಳನ್ನು ಮುಂದಿನ ಹಂತದಲ್ಲಿ ಸರ್ಕಾರಿ ಖರೀದಿ ಹಾಗೂ ಹೆಚ್ಚಿನ ಪ್ರಮಾಣದಲ್ಲಿ ಅಳವಡಿಕೆಗೆ ಪರಿಗಣಿಸಲಾಗುತ್ತದೆ. ಈ ಯೋಜನೆಯಡಿ ಆಯ್ಕೆಯಾಗುವ ಅರ್ಹ ಸ್ಟಾರ್ಟ್ಅಪ್ಗಳಿಗೆ ಪ್ರತಿ ಯೋಜನೆಗೆ ಗರಿಷ್ಠ ₹25 ಲಕ್ಷದವರೆಗೆ ಪೈಲಟ್ ನೆರವು/ಕೆಲಸದ ಆದೇಶದ ಅವಕಾಶವಿದೆ.
ಒಟ್ಟಾರೆ ‘Government First’ ಕಾರ್ಯಕ್ರಮಕ್ಕೆ ₹25 ಕೋಟಿ ಅನುದಾನ ಮೀಸಲಿಡಲಾಗಿದ್ದು, ಮೂರು ವರ್ಷಗಳಲ್ಲಿ ಸುಮಾರು 100 ಸ್ಟಾರ್ಟ್ಅಪ್ಗಳಿಗೆ ಬೆಂಬಲ ನೀಡುವ ಗುರಿ ಹೊಂದಲಾಗಿದೆ. ಈ ಕಾರ್ಯಕ್ರಮವು ಕರ್ನಾಟಕ ಸ್ಟಾರ್ಟ್ಅಪ್ ನೀತಿ 2025–30ರ ಅಡಿಯಲ್ಲಿ ರೂಪುಗೊಂಡಿದ್ದು, ಕರ್ನಾಟಕ ಇನ್ನೋವೇಶನ್ ಅಂಡ್ ಟೆಕ್ನಾಲಜಿ ಸೊಸೈಟಿ (KITS) ಮೂಲಕ ಅನುಷ್ಠಾನಗೊಳ್ಳಲಿದೆ.
ಈಗ ಮೊದಲ ಹಂತದ ಅರ್ಜಿಗಳಿಗೆ ಅಕ್ಟೋಬರ್ 23, 2026ರ ಸಂಜೆ 5 ಗಂಟೆಯವರೆಗೆ ಅವಕಾಶವಿದೆ. ನೈಜ ಸರ್ಕಾರಿ ಸಮಸ್ಯೆಗಳಿಗೆ ಅನುಷ್ಠಾನಗೊಳಿಸಲು ಸಿದ್ಧವಾಗಿರುವ ತಂತ್ರಜ್ಞಾನ ಹೊಂದಿರುವ ಸ್ಟಾರ್ಟ್ಅಪ್‌ಗಳು ಮತ್ತು ನಾವೀನ್ಯಕಾರರು ಈ ಅವಕಾಶವನ್ನು ಬಳಸಿಕೊಳ್ಳಬಹುದಾಗಿದೆ.
ಸರ್ಕಾರದ ಉದ್ದೇಶ ಕೇವಲ ಅನುದಾನ ನೀಡುವುದಲ್ಲ: ಉತ್ತಮ ಪರಿಹಾರಗಳನ್ನು ನೈಜ ಪರಿಸರದಲ್ಲಿ ಪರೀಕ್ಷಿಸಿ, ಯಶಸ್ವಿಯಾದರೆ ಅವುಗಳನ್ನು ಸರ್ಕಾರಿ ಸೇವೆಗಳಲ್ಲಿ ವಿಸ್ತರಿಸುವ ವ್ಯವಸ್ಥೆ ರೂಪಿಸುವುದಾಗಿದೆ.
