BBK13: ‘ಬಿಗ್ ಬಾಸ್ ಕನ್ನಡ ಸೀಸನ್ 13’ರ ಆಟ ದಿನದಿಂದ ದಿನಕ್ಕೆ ಕಾವು ಪಡೆದುಕೊಳ್ಳುತ್ತಿದ್ದು, ಈ ವಾರ ಸ್ಪರ್ಧಿ ಮಂಜು ಮನೆಯಿಂದ ಹೊರಬೀಳುತ್ತಾರಾ ಎಂಬ ಬಿಸಿಬಿಸಿ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ಶುರುವಾಗಿದೆ. ಇದಕ್ಕೆ ಮುಖ್ಯ ಕಾರಣ ಟಾಸ್ಕ್ ವೇಳೆ ಅವರು ನಡೆದುಕೊಂಡ ಅಸಭ್ಯ ವರ್ತನೆ ಮತ್ತು ಬಳಸಿದ ಬೀಪ್ ತರಹ ಅವಾಚ್ಯ ಶಬ್ದಗಳು.
ಇತ್ತೀಚೆಗೆ ನಡೆದ ‘ರಾಕ್ಷಸರು ವರ್ಸಸ್ ಗಂಧರ್ವರು’ ಟಾಸ್ಕ್‌ನಲ್ಲಿ ಮಂಜು ಹಾಗೂ ಯಶಸ್ ನಡುವೆ ತೀವ್ರ ವಾಕ್ಸಮರ ನಡೆದಿತ್ತು. ಆರಂಭದಲ್ಲಿ ರಾಕ್ಷಸನಾಗಿದ್ದ ಮಂಜು, ಯಶಸ್ ಅವರನ್ನು ‘ಸ್ತ್ರೀ ವ್ಯಾಮೋಹ ಇರುವ ಕಳ್ಳನಾಯಿ’ ಎಂದು ನಿಂದಿಸಿದ್ದರು. ಆ ಬಳಿಕ ತಂಡಗಳು ಬದಲಾದಾಗ, ಯಶಸ್ ಕೂಡ ಮಂಜು ಅವರನ್ನು ‘ನಾಯಿ’ ಎಂದು ಹಂಗಿಸಲು ಆರಂಭಿಸಿದರು. ಇದನ್ನು ಸಹಿಸದ ಮಂಜು ಒಂದು ಹಂತದಲ್ಲಿ ಆನೆಕಟ್ಟು ಒಡೆದಂತೆ ಸಿಡಿದೆದ್ದರು.
ಕೋಪದ ಕೈಗೆ ಬುದ್ಧಿ ಕೊಟ್ಟ ಮಂಜು ಬಿಗ್ ಬಾಸ್ ಮನೆಯ ಪ್ರಾಪರ್ಟಿಗಳನ್ನು ನಾಶ ಮಾಡಿದ್ದಲ್ಲದೆ, ಯಶಸ್ ಅವರನ್ನು ‘ಕಾಮುಕ’ ಎಂದು ಕರೆದು ಅತಿಯಾದ ಅಶ್ಲೀಲ ಪದಗಳಿಂದ ನಿಂದಿಸಿದರು. ಅವರ ಮಾತುಗಳು ಎಷ್ಟರಮಟ್ಟಿಗೆ ಗಡಿ ದಾಟಿದ್ದವೆಂದರೆ, ವಾಹಿನಿಯು ಸುದೀರ್ಘ ಸಮಯ ಬರೀ ‘ಬೀಪ್’ ಶಬ್ದವನ್ನಷ್ಟೇ ಪ್ರಸಾರ ಮಾಡಬೇಕಾಯಿತು. ಟಾಸ್ಕ್ ಮುಗಿದ ಮೇಲೆಯೂ ಅವರ ಆಕ್ರೋಶ ತಗ್ಗಲಿಲ್ಲ.
ಹಿಂಸೆ ಅಥವಾ ಹಲ್ಲೆಷ್ಟೇ, ಈ ರೀತಿ ಅತಿಯಾದ ಅಸಭ್ಯ ಭಾಷೆ ಬಳಸಿ ವೀಕ್ಷಕರಿಗೆ ಅಸಹ್ಯ ಹುಟ್ಟಿಸುವುದು ಕೂಡ ಬಿಗ್ ಬಾಸ್ ನಿಯಮಗಳ ಉಲ್ಲಂಘನೆಯಾಗಿದೆ. ಹೀಗಾಗಿ, ಈ ಶನಿವಾರದ ‘ವಾರದ ಕಥೆ’ಯಲ್ಲಿ ನಿರೂಪಕ ಕಿಚ್ಚ ಸುದೀಪ್ ತಮ್ಮ ವಿಶೇಷ ಅಧಿಕಾರವನ್ನು ಬಳಸಿ ಮಂಜು ಅವರನ್ನು ರೆಡ್ ಕಾರ್ಡ್ ನೀಡಿ ನೇರವಾಗಿ ಎಲಿಮಿನೇಟ್ ಮಾಡಬೇಕು ಎಂದು ನೆಟ್ಟಿಗರು ಒತ್ತಾಯಿಸುತ್ತಿದ್ದಾರೆ.
