BBK13: ‘ಬಿಗ್ ಬಾಸ್ ಮನೆಯಲ್ಲಿ ದಿನಕ್ಕೊಂದು ಹೊಸ ಗಲಾಟೆ, ವಿವಾದಗಳು ಮುನ್ನೆಲೆಗೆ ಬರುತ್ತಿವೆ. ಇದೀಗ ಮನೆಯಿಂದ ಸ್ವಯಂಪ್ರೇರಿತರಾಗಿ ಹೊರನಡೆಯುವ ಇಚ್ಛೆಯನ್ನು ವ್ಯಕ್ತಪಡಿಸುವ ಮೂಲಕ ನಟ ಗಗನ್ ಚಿನ್ನಪ್ಪ ವೀಕ್ಷಕರಿಗೆ ಹಾಗೂ ಸಹ-ಸ್ಪರ್ಧಿಗಳಿಗೆ ದೊಡ್ಡ ಶಾಕ್ ನೀಡಿದ್ದಾರೆ.
ಇತ್ತೀಚೆಗೆ ನಡೆದ ‘ಗಂಧರ್ವರು ಮತ್ತು ರಾಕ್ಷಸರು’ ಟಾಸ್ಕ್ ವೇಳೆ ವಾತಾವರಣ ತೀವ್ರ ಗಂಭೀರ ರೂಪ ಪಡೆದುಕೊಂಡಿತ್ತು. ಈ ಆಟದ ಸಂದರ್ಭದಲ್ಲಿ ಸ್ಪರ್ಧಿ ಗಾನವಿ ಗೌಡ, ಗಗನ್ ಚಿನ್ನಪ್ಪ ವಿರುದ್ಧ ‘ಕುನ್ನಿ’ ಎಂಬ ಪದ ಬಳಸಿ ನಿಂದಿಸಿದ್ದರು. ಈ ನಿಂದನೆ ಗಗನ್ ಮನಸ್ಸಿಗೆ ತೀವ್ರ ಆಘಾತವನ್ನುಂಟುಮಾಡಿದ್ದು, ತಮ್ಮ ಆತ್ಮಗೌರವಕ್ಕೆ ಧಕ್ಕೆಯಾಗಿದೆ ಎಂದು ತೀವ್ರವಾಗಿ ಆಕ್ರೋಶಗೊಂಡಿದ್ದಾರೆ.
ಟಾಸ್ಕ್ ಮುಗಿದ ಬಳಿಕ ತೀವ್ರ ಭಾವುಕರಾದ ಗಗನ್, ತಮ್ಮ ಆಪ್ತ ಸ್ಪರ್ಧಿ ತಾಂಡವ್ ರಾಮ್ ಬಳಿ ತಮ್ಮ ನೋವನ್ನು ಹಂಚಿಕೊಂಡಿದ್ದಾರೆ. ಈ ವಿಚಾರವನ್ನು ಇತರರ ಮುಂದೆ ವ್ಯಕ್ತಪಡಿಸಿದ ತಾಂಡವ್, “ಗಗನ್‌ಗೆ ಆ ಪದದಿಂದ ತುಂಬಾ ನೋವಾಗಿದೆ. ಸೆಲ್ಫ್ ರೆಸ್ಪೆಕ್ಟ್ ಹಾಳಾಗುವಂತೆ ಇಂತಹ ಅಸಹ್ಯ ಆಟ ಆಡಲು ಸಾಧ್ಯವಿಲ್ಲ, ಶೋ ಬಿಟ್ಟು ಹೋಗುತ್ತೇನೆ ಎಂದು ಗಗನ್ ಹೇಳಿದ್ದಾನೆ. ಈ ಟಾಸ್ಕ್‌ನಿಂದ ತೀರಾ ಮಾನಸಿಕವಾಗಿ ಕುಗ್ಗಿದ್ದಾನೆ” ಎಂದು ತಿಳಿಸಿದ್ದಾರೆ.
ಗಗನ್ ಚಿನ್ನಪ್ಪ ನಿಜವಾಗಿಯೂ ಬಿಗ್ ಬಾಸ್ ಶೋ ತೊರೆಯುತ್ತಾರಾ ಅಥವಾ ಮುಂಬರುವ ವಾರಾಂತ್ಯದ ‘ಕಿಚ್ಚನ ಪಂಚಾಯಿತಿ’ಯಲ್ಲಿ ನಿರೂಪಕ ಸುದೀಪ್ ಈ ಸಮಸ್ಯೆಯನ್ನು ಬಗೆಹರಿಸಿ ಗಗನ್‌ಗೆ ಧೈರ್ಯ ತುಂಬಿ ಆಟದಲ್ಲಿ ಮುಂದುವರಿಯುವಂತೆ ಮಾಡುತ್ತಾರಾ ಎಂಬುದನ್ನು ವೀಕ್ಷಕರು ಕುತೂಹಲದಿಂದ ಕಾಯುತ್ತಿದ್ದಾರೆ.
