ರೋಣದ ರಾಜಕೀಯ ಕುಟುಂಬದ ಹಿರಿಯ ನಾಯಕ ಜಿ.ಎಸ್. ಪಾಟೀಲಗೆ ವಿಧಾನಸಭೆ ಅಧ್ಯಕ್ಷ ಸ್ಥಾನ
ಬೆಂಗಳೂರು: ನಾಲ್ಕು ದಶಕಗಳಿಗೂ ಹೆಚ್ಚು ಕಾಲದ ರಾಜಕೀಯ ಅನುಭವ ಹೊಂದಿರುವ ರೋಣ ಶಾಸಕ ಜಿ.ಎಸ್. ಪಾಟೀಲ ಅವರು ಶುಕ್ರವಾರ ಕರ್ನಾಟಕ ವಿಧಾನಸಭೆಯ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದರು.
1948ರ ಏಪ್ರಿಲ್ 10ರಂದು ರೋಣದ ಪ್ರತಿಷ್ಠಿತ ಪಾಟೀಲ ಕುಟುಂಬದಲ್ಲಿ ಜನಿಸಿದ ಗುರುಪಾದಗೌಡ ಸಂಗನಗೌಡ ಪಾಟೀಲ ಅವರು ಧಾರವಾಡದ ಸೇಂಟ್ ಜೋಸೆಫ್ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ ಪಡೆದು, ಕರ್ನಾಟಕ ಕಾಲೇಜಿನಲ್ಲಿ ಪದವಿ ಶಿಕ್ಷಣ ಪೂರ್ಣಗೊಳಿಸಿದರು. 1974ರಲ್ಲಿ ಅನ್ನಪೂರ್ಣದೇವಿಯವರನ್ನು ವಿವಾಹವಾದ ಅವರು 1983ರಲ್ಲಿ ಸಕ್ರಿಯ ರಾಜಕೀಯಕ್ಕೆ ಪ್ರವೇಶಿಸಿದರು.
ರೋಣ ಪಟ್ಟಣ ಪಂಚಾಯಿತಿ ಹಾಗೂ ಸವಡಿ ಕ್ಷೇತ್ರದ ಎಪಿಎಂಸಿ ಚುನಾವಣೆಯಲ್ಲಿ ಸ್ಪರ್ಧಿಸಿ ಗೆಲುವು ಸಾಧಿಸುವ ಮೂಲಕ ರಾಜಕೀಯ ಪಯಣ ಆರಂಭಿಸಿದ ಜಿ.ಎಸ್. ಪಾಟೀಲ, 1989ರಲ್ಲಿ ಮೊದಲ ಬಾರಿಗೆ ರೋಣ ವಿಧಾನಸಭಾ ಕ್ಷೇತ್ರದಿಂದ ಶಾಸಕರಾಗಿ ಆಯ್ಕೆಯಾದರು. ಬಳಿಕ 1999, 2013 ಹಾಗೂ 2023ರಲ್ಲಿಯೂ ಗೆಲುವು ಸಾಧಿಸಿ ವಿಧಾನಸಭೆಯಲ್ಲಿ ತಮ್ಮ ರಾಜಕೀಯ ಛಾಪು ಮೂಡಿಸಿದ್ದಾರೆ.
ಶಿಕ್ಷಣಕ್ಕೆ ವಿಶೇಷ ಆದ್ಯತೆ ನೀಡಿದ ಅವರು ತಮ್ಮ ಮೊದಲ ಅವಧಿಯಲ್ಲೇ ರೋಣ ಕ್ಷೇತ್ರದಲ್ಲಿ ಸರ್ಕಾರಿ ಶಾಲೆ ನಿರ್ಮಾಣ ಸೇರಿದಂತೆ ಹಲವು ಅಭಿವೃದ್ಧಿ ಕಾರ್ಯಗಳಿಗೆ ಒತ್ತು ನೀಡಿದ್ದರು. ರೋಣ ಪಟ್ಟಣದಲ್ಲಿ ಕಲಾ ಮತ್ತು ವಿಜ್ಞಾನ ಮಹಾವಿದ್ಯಾಲಯ ಸ್ಥಾಪನೆಗೂ ಅವರು ಪ್ರಯತ್ನಿಸಿದ್ದರು.
ರಾಜಕೀಯ ಕುಟುಂಬದ ಹಿನ್ನೆಲೆಯನ್ನೂ ಹೊಂದಿರುವ ಜಿ.ಎಸ್. ಪಾಟೀಲ ಅವರ ಹಿರಿಯ ಸಹೋದರ ಆರ್.ಎಸ್. ಪಾಟೀಲ ಬಾಗಲಕೋಟೆ ಲೋಕಸಭಾ ಕ್ಷೇತ್ರದ ಸಂಸದರಾಗಿದ್ದರೆ, ಮತ್ತೊಬ್ಬ ಸಹೋದರ ಕರ್ನಾಟಕ ಸರ್ಕಾರದಲ್ಲಿ ಮುಖ್ಯ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದ್ದಾರೆ. ಕಿರಿಯ ಸಹೋದರ ಐ.ಎಸ್. ಪಾಟೀಲ ಬೀಜ ನಿಗಮದ ನಿರ್ದೇಶಕ ಹಾಗೂ ಕೆಸಿಸಿ ಬ್ಯಾಂಕ್ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ.
ಇದೀಗ ದೀರ್ಘ ರಾಜಕೀಯ ಅನುಭವದೊಂದಿಗೆ ಕರ್ನಾಟಕ ವಿಧಾನಸಭೆಯ ಅಧ್ಯಕ್ಷರಾಗಿ ಜಿ.ಎಸ್. ಪಾಟೀಲ ಹೊಸ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಅವರ ಅಧಿಕಾರ ಸ್ವೀಕಾರಕ್ಕೆ ರಾಜಕೀಯ ವಲಯದಿಂದ ಶುಭಾಶಯಗಳು ವ್ಯಕ್ತವಾಗಿವೆ.
- ಚಿತ್ರದುರ್ಗದಲ್ಲಿ ವಿಜಯೇಂದ್ರ: ಹರಿಪ್ರಸಾದ್ ವಿರುದ್ಧ ವಾಗ್ದಾಳಿ, ‘ಮಾದಿಗ ಮುನ್ನಡೆ-2’ ಸಮಾವೇಶಕ್ಕೆ ಚಾಲನೆ
- ಮೈಸೂರಿನಲ್ಲಿ ಸೂಪರ್ಸ್ಟಾರ್ ರಜನಿಕಾಂತ್: ಚಾಮುಂಡೇಶ್ವರಿ ತಾಯಿಯ ದರ್ಶನ ಪಡೆದ ತಲೈವಾ
- KRIDL AEE ಪರ್ವೇಜ್ ನಾಪತ್ತೆ: ಭೋಪಾಲ್ನಲ್ಲಿ CCTV ಸುಳಿವು
- ಅಮೆರಿಕ ಸರ್ಕಾರದ Digital ಹೆಜ್ಜೆ: 29,000 ವೆಬ್ಸೈಟ್ಗಳಿಗೆ ಒಂದೇ ತಾಣ
- ಬಿಗ್ ಬಾಸ್ನಿಂದ ಔಟ್ ಬೆನ್ನಲ್ಲೇ ಆಸಿಯಾ ವಿರುದ್ಧ ಸಿಡಿದೆದ್ದ ವೈಷ್ಣವಿ: ಡ್ರಾಮಾ, ವಿಕ್ಟಿಮ್ ಕಾರ್ಡ್ ಆರೋಪ!
