ಬೆಂಗಳೂರು: ನಟ ಮತ್ತು ನಿರ್ಮಾಪಕ ದಿಲೀಪ್ ರಾಜ್ ಅಕಾಲಿಕ ನಿಧನವು ಇಡೀ ಕರ್ನಾಟಕವನ್ನು ದಿಗ್ಭ್ರಮೆಗೊಳಿಸಿದೆ. 47 ವರ್ಷದ ದಿಲೀಪ್ ರಾಜ್ ಅತ್ಯಂತ ಶಿಸ್ತಿನ ಜೀವನ ನಡೆಸುತ್ತಿದ್ದರು. ಪ್ರತಿನಿತ್ಯ ಜಿಮ್, ಕಟ್ಟುನಿಟ್ಟಿನ ಆಹಾರ ಕ್ರಮ (ಡಯಟ್) ಮತ್ತು ಸದಾ ಚಟುವಟಿಕೆಯಿಂದ ಇರುತ್ತಿದ್ದ ವ್ಯಕ್ತಿ ಹೃದಯಾಘಾತಕ್ಕೆ ಬಲಿಯಾಗಿರುವುದು ಈಗ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಇದು ಕೇವಲ ಒಬ್ಬ ನಟನ ಸಾವಲ್ಲ, ಬದಲಿಗೆ ಆರೋಗ್ಯದ ಬಗ್ಗೆ ಅತಿಯಾದ ಕಾಳಜಿ ವಹಿಸುವ ಪ್ರತಿಯೊಬ್ಬರಿಗೂ ಎದುರಾಗಿರುವ ದೊಡ್ಡ ಪ್ರಶ್ನೆಯಾಗಿದೆ.
ಸರಣಿ ಸಾವುಗಳ ಆಘಾತ: ಕನ್ನಡ ಚಿತ್ರರಂಗದಲ್ಲಿ ಈ ರೀತಿಯ ಘಟನೆಗಳು ಹೊಸದೇನಲ್ಲ. ಇದಕ್ಕೂ ಮುನ್ನ ಅತ್ಯಂತ ಫಿಟ್ ಆಗಿದ್ದ ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್, ಯುವ ನಟ ಚಿರಂಜೀವಿ ಸರ್ಜಾ ಹಾಗೂ ಬಾಡಿ ಬಿಲ್ಡರ್ ರಾಕೇಶ್ ಪೂಜಾರಿ ಇವರುಗಳ ಸಾವು ಕೂಡ ಇದೇ ಮಾದರಿಯಲ್ಲೇ ಸಂಭವಿಸಿತ್ತು. ಇವರೆಲ್ಲರೂ ದೈಹಿಕ ಕಸರತ್ತು ಮತ್ತು ಫಿಟ್ನೆಸ್ಗೆ ಹೆಸರಾದವರು. ಆದ್ರು ಇಷ್ಟು ಸಣ್ಣ ವಯಸ್ಸಿನಲ್ಲಿ ಹೃದಯಾಘಾತ ಸಂಭವಿಸುತ್ತಿರುವುದು ದೈಹಿಕ ಕಸರತ್ತು ಮಾತ್ರವೇ ದೀರ್ಘಾಯುಷ್ಯಕ್ಕೆ ಗ್ಯಾರಂಟಿ ಅಲ್ಲವೇ ಎಂಬ ಅನುಮಾನವನ್ನು ಹುಟ್ಟುಹಾಕಿದೆ.
ಮುಖ್ಯ ಕಾರಣಗಳೇನು?: ವೈದ್ಯಕೀಯ ತಜ್ಞರ ಪ್ರಕಾರ, ಅತಿಯಾದ ದೈಹಿಕ ಶ್ರಮ (Extreme Workout) ಮತ್ತು ಮಾನಸಿಕ ಒತ್ತಡವು ಹೃದಯದ ಮೇಲೆ ಭಾರೀ ಪರಿಣಾಮ ಬೀರುತ್ತದೆ. ಚಿತ್ರರಂಗದಲ್ಲಿ ಇರುವವರಿಗೆ ಸಮಯಕ್ಕೆ ಸರಿಯಾದ ನಿದ್ದೆ ಇಲ್ಲದಿರುವುದು, ಸತತ ಕೆಲಸದ ಒತ್ತಡ ಮತ್ತು ಆಂತರಿಕವಾಗಿರುವ ಹೃದಯದ ಸಮಸ್ಯೆಗಳನ್ನು ನಿರ್ಲಕ್ಷಿಸುವುದು ಪ್ರಾಣಾಪಾಯಕ್ಕೆ ಕಾರಣವಾಗಬಹುದು. ದಿಲೀಪ್ ರಾಜ್ ವಿಷಯದಲ್ಲಿ ತಿಳಿದುಬಂದಂತೆ, ಅವರಿಗೆ ಇತ್ತೀಚೆಗೆ ಎದೆನೋವು ಕಾಣಿಸಿಕೊಳ್ಳುತ್ತಿತ್ತು. ಇಂತಹ ಸಣ್ಣ ಲಕ್ಷಣಗಳನ್ನು ಕೇವಲ ಗ್ಯಾಸ್ಟ್ರಿಕ್ ಅಥವಾ ಸಾಮಾನ್ಯ ನೋವು ಎಂದು ನಿರ್ಲಕ್ಷಿಸುವುದು ಅಪಾಯಕಾರಿ ಎನ್ನುತ್ತಾರೆ ವೈದ್ಯರು.
ಓದುಗರ ಗಮನಕ್ಕೆ: ನಟರು ಅಥವಾ ಸಾಮಾನ್ಯ ಜನರು ಜಿಮ್ಗೆ ಹೋಗುವುದು ಒಳ್ಳೆಯದೇ ಆದ್ರೂ, ತಮ್ಮ ವಯಸ್ಸು ಮತ್ತು ದೇಹದ ಸಾಮರ್ಥ್ಯಕ್ಕೆ ತಕ್ಕಂತೆ ವ್ಯಾಯಾಮ ಮಾಡುವುದು ಮುಖ್ಯ. ನಿಯಮಿತವಾಗಿ ಸಂಪೂರ್ಣ ದೇಹದ ತಪಾಸಣೆ (Full Body Checkup) ಮಾಡಿಸಿಕೊಳ್ಳುವುದು ಅನಿವಾರ್ಯವಾಗಿದೆ. ದಿಲೀಪ್ ರಾಜ್ ವೈದ್ಯರ ಅಪಾಯಿಂಟ್ಮೆಂಟ್ ಪಡೆದಿದ್ದರೂ, ಅಲ್ಲಿಗೆ ತಲುಪುವ ಮೊದಲೇ ವಿಧಿ ಆಟವಾಡಿದೆ. ಶಿಸ್ತಿನ ಜೀವನದ ಜೊತೆಗೆ ದೇಹ ನೀಡುವ ಸಣ್ಣ ಸಣ್ಣ ಮುನ್ಸೂಚನೆಗಳನ್ನು ಗಮನಿಸುವುದು ಪ್ರಾಣ ಉಳಿಸಿಕೊಳ್ಳಲು ಇರುವ ಏಕೈಕ ದಾರಿ ಎಂಬುದನ್ನು ಈ ಘಟನೆಗಳು ನೆನಪಿಸುತ್ತಿವೆ.
