ಉತ್ತರ ಕನ್ನಡ (ದಾಂಡೇಲಿ): ಕಾಳಿ ನದಿಯಲ್ಲಿ ಮೊಸಳೆಗಳ ಉಪಸ್ಥಿತಿ ಮತ್ತು ಜೀವಕ್ಕೆ ಅಪಾಯ ಆಗುಬಹುದೆಂದು ಅರಣ್ಯ ಇಲಾಖೆ, ತಾಲೂಕು ಆಡಳಿತ, ಪೊಲೀಸ್ ಇಲಾಖೆ ಹಾಗೂ ಗ್ರಾಮ ಪಂಚಾಯಿತಿಗಳು ನಿರಂತರ ಎಚ್ಚರಿಕೆ ನೀಡುತ್ತಿದ್ದರೂ ಜನರು ನದಿಗೆ ಇಳಿಯುವುದನ್ನು ನಿಲ್ಲಿಸದಿರುವುದು ಆತಂಕಕ್ಕೆ ಕಾರಣವಾಗಿದೆ.
ಸೂಪಾ ಜಲಾಶಯದಿಂದ ನೀರು ಬಿಡುವುದನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿರುವ ಪರಿಣಾಮ ಕಾಳಿ ನದಿಯ ನೀರಿನ ಮಟ್ಟ ಗಣನೀಯವಾಗಿ ಕುಸಿದಿದೆ. ನದಿಯ ಹಲವೆಡೆ ನೀರಿನ ಪಾತ್ರಗಳು ಬರಿದಾಗಿದ್ದು, ನೀರಿನೊಳಗಿದ್ದ ಕಲ್ಲುಗಳು ಹೊರಗೆ ಕಾಣಿಸುತ್ತಿವೆ. ಕೆಲವು ಪ್ರದೇಶಗಳಲ್ಲಿ ಮೊಣಕಾಲಿನ ಮಟ್ಟದ ನೀರು ಮಾತ್ರ ಉಳಿದಿರುವುದರಿಂದ ಜನರು ಅಪಾಯವನ್ನು ಲೆಕ್ಕಿಸದೇ ನದಿಯೊಳಗೆ ಇಳಿಯುತ್ತಿದ್ದಾರೆ.
ಸ್ಥಳೀಯರ ಪ್ರಕಾರ, ಕೆಲವರು ಮೀನು ಮತ್ತು ಏಡಿ ಹಿಡಿಯುವ ಉದ್ದೇಶದಿಂದ ನದಿಯ ಒಂದು ದಂಡೆಯಿಂದ ಮತ್ತೊಂದು ದಂಡೆಗೆ ತೆರಳುತ್ತಿದ್ದರೆ, ಇನ್ನೂ ಕೆಲವರು ಮನರಂಜನೆ ಹಾಗೂ ಸಾಹಸದ ಅನುಭವಕ್ಕಾಗಿ ನದಿಗೆ ಇಳಿಯುತ್ತಿದ್ದಾರೆ. ಅಪಾಯದ ಬಗ್ಗೆ ಅರಿವಿದ್ದರೂ ಎಚ್ಚರಿಕೆಯನ್ನು ನಿರ್ಲಕ್ಷಿಸುತ್ತಿರುವುದು ಅಧಿಕಾರಿಗಳ ಚಿಂತೆಗೆ ಕಾರಣವಾಗಿದೆ.
ಕಾಳಿ ನದಿಯ ವಿವಿಧ ಭಾಗಗಳಲ್ಲಿ ಮೊಸಳೆಗಳ ಉಪಸ್ಥಿತಿ ಕುರಿತು ಈಗಾಗಲೇ ಹಲವು ಬಾರಿ ಎಚ್ಚರಿಕೆ ನೀಡಲಾಗಿದೆ. ನದಿ ತೀರಗಳಲ್ಲಿ ಎಚ್ಚರಿಕಾ ಫಲಕಗಳನ್ನು ಅಳವಡಿಸಲಾಗಿದ್ದು, ಸಾರ್ವಜನಿಕರಿಗೆ ಜಾಗೃತಿ ಮೂಡಿಸುವ ಕಾರ್ಯವೂ ನಡೆದಿದೆ. ಆದಾಗ್ಯೂ ಜನರ ನಿರ್ಲಕ್ಷ್ಯದ ಮನೋಭಾವದಲ್ಲಿ ಯಾವುದೇ ಬದಲಾವಣೆ ಕಂಡುಬಂದಿಲ್ಲ.
ಅರಣ್ಯ ಇಲಾಖೆ ಮೂಲಗಳ ಪ್ರಕಾರ, ನೀರಿನ ಮಟ್ಟ ಕಡಿಮೆಯಾಗಿದೆ ಎಂಬ ಕಾರಣಕ್ಕೆ ಅಪಾಯ ಕಡಿಮೆಯಾಗಿದೆ ಎಂದು ಭಾವಿಸುವುದು ತಪ್ಪು. ಮೊಸಳೆಗಳು ಆಳವಾದ ಗುಂಡಿಗಳು, ನೀರು ನಿಂತಿರುವ ಪ್ರದೇಶಗಳು ಹಾಗೂ ನದಿ ತೀರದ ಭಾಗಗಳಲ್ಲಿ ಅಡಗಿರುವ ಸಾಧ್ಯತೆ ಇರುವುದರಿಂದ ಯಾವುದೇ ಕ್ಷಣದಲ್ಲಿ ಅಪಾಯ ಸಂಭವಿಸಬಹುದು.
ಸ್ಥಳೀಯ ಆಡಳಿತವು ಸಾರ್ವಜನಿಕರು ಅನಗತ್ಯವಾಗಿ ನದಿಯೊಳಗೆ ಇಳಿಯದಂತೆ ಮನವಿ ಮಾಡಿದ್ದು, ಜೀವಭದ್ರತೆಯ ದೃಷ್ಟಿಯಿಂದ ಎಚ್ಚರಿಕೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಸೂಚಿಸಿದೆ. ಸಂಭವನೀಯ ಅನಾಹುತಗಳನ್ನು ತಪ್ಪಿಸಲು ಅಪಾಯಕಾರಿ ಪ್ರದೇಶಗಳಲ್ಲಿ ನಿಗಾವನ್ನು ಮತ್ತಷ್ಟು ಹೆಚ್ಚಿಸುವ ಅಗತ್ಯವೂ ವ್ಯಕ್ತವಾಗಿದೆ.
ಎಚ್ಚರಿಕೆ ಫಲಕಗಳು, ಜಾಗೃತಿ ಕಾರ್ಯಕ್ರಮಗಳು ಮತ್ತು ಅಧಿಕಾರಿಗಳ ಮನವಿಗಳ ನಡುವೆಯೂ ಜನರು ನಿರ್ಲಕ್ಷ್ಯ ತೋರುತ್ತಿರುವುದು ಕಾಳಿ ನದಿಯ ತೀರ ಪ್ರದೇಶಗಳಲ್ಲಿ ಜೀವಾಪಾಯದ ಭೀತಿಯನ್ನು ಮತ್ತಷ್ಟು ಹೆಚ್ಚಿಸಿದೆ.
