ಕಲಬುರಗಿ: ರೈಲು ಆಗಮನದ ಬಗೆಗಿನ ಮಾಹಿತಿಯನ್ನು ರೈಲ್ವೆ ಸಿಬ್ಬಂದಿ ಮೈಕ್ ನಲ್ಲಿ ಪ್ರಕಟಣೆ ಮಾಡದೆ ನಿರ್ಲಕ್ಷ ತೋರಿದ್ದರಿಂದ
ನೂರಾರು ಪ್ರಯಾಣಿಕರು ರೈಲು ತಪ್ಪಿಸಿಕೊಂಡು ಪರದಾಡಿದ ಪ್ರಸಂಗ ರವಿವಾರ ಬೆಳಿಗ್ಗೆ ಕಲಬುರಗಿ ರೈಲ್ವೆ ನಿಲ್ದಾಣದಲ್ಲಿ ನಡೆದಿದೆ.
ಹುಬ್ಬಳ್ಳಿಯಿಂದ ಸಿಕಿಂದ್ರಾಬಾದ್ ಗೆ ಹೋಗುವ ರೈಲು (ಟ್ರೈನ್ ನಂಬರ್ 17319) ಬೆಳಿಗ್ಗೆ 6ಕ್ಕೆ ಕಲ್ಬುರ್ಗಿ ನಿಲ್ದಾಣಕ್ಕೆ ಬರಬೇಕಿತ್ತು. ಫಲಕದಲ್ಲಿ 6:32ಕ್ಕೆ ಬರುತ್ತದೆ ಎಂದು ನಮೂದಿಸಲಾಗಿತ್ತು.
ಅದರಂತೆ ಸಿಕಿಂದ್ರಾಬಾದ್ ಗೆ ತೆರಳಲು ಹಲವಾರು ಪ್ರಯಾಣಿಕರು ಮೊದಲನೇ ಪ್ಲಾಟ್ ಫಾರ್ಮ್ ನಲ್ಲಿ ಕಾಯುತ್ತಾ ನಿಂತಿದ್ದರು.
ಆದರೆ ರೈಲು ಬರುವ ಬಗ್ಗೆ ಮತ್ತು ಯಾವ ಪ್ಲಾಟ್ಫಾರ್ಮ್ ಗೆ ಬರುತ್ತದೆ ಎಂಬ ಬಗ್ಗೆ ಕರ್ತವ್ಯದಲ್ಲಿದ್ದ ಸಿಬ್ಬಂದಿ ಮಾಹಿತಿಯ ಪ್ರಕಟಣೆಯನ್ನೇ ಮಾಡಲಿಲ್ಲ.
ಅಷ್ಟರಲ್ಲೇ ರೈಲು 2ನೇ ಪ್ಲಾಟ್ ಫಾರ್ಮ್ ಗೆ ಬಂದು ಕೆಲ ಹೊತ್ತು ನಿಂತು ಸಿಕಂದರಾಬಾದಿಗೆ ತೆರಳಿತು.
ಇದನ್ನು ಅರಿತ ಪ್ರಯಾಣಿಕರು ರೈಲ್ವೆ ಸ್ಟೇಷನ್ ವ್ಯವಸ್ಥಾಪಕರ ಕಚೇರಿಗೆ ತೆರಳಿ ಈ ಬಗ್ಗೆ ಪ್ರಶ್ನಿಸಿ ವಾಗ್ವಾದ ನಡೆಸಿದರು. ಆಗ ರೈಲ್ವೆ ವ್ಯವಸ್ಥಾಪಕರು ಮತ್ತು ಇತರೆ ಸಿಬ್ಬಂದಿ ತಬ್ಬಿಬ್ಬಾದರು.
ಸುಮಾರು 60 ಪ್ರಯಾಣಿಕರು ಮುಂಗಡ ಟಿಕೆಟ್ ಅನ್ನು ಕಾಯ್ದಿಸಿದ್ದರು. ಅವರೂ ಪರದಾಡಿದರು. ಅದೃಷ್ಟವಶಾತ್ ಅದೇ ವೇಳೆಗೆ ಹುಸೇನ್ ಸಾಗರ್ ಎಕ್ಸ್ ಪ್ರೆಸ್ ರೈಲು ಬಂದಿತು. ಬಳಿಕ
ಎಲ್ಲ ಪ್ರಯಾಣಿಕರನ್ನು ಆ ರೈಲಿನ ಮೂಲಕ ಕಳಿಸಿಕೊಡಲಾಯಿತು.
“ಕರ್ತವದಲ್ಲಿದ್ದ ನಮ್ಮ ಸಿಬ್ಬಂದಿ ರೈಲು ಬರುವ ಬಗ್ಗೆ ಮಾಹಿತಿಯನ್ನು ಮೈಕನಲ್ಲಿ ಅನೌನ್ಸ್ ಮಾಡದ್ದರಿಂದಲೇ ಈ ಸಮಸ್ಯೆ ಎದುರಾಯಿತು. ಸಿಬ್ಬಂದಿಗಳ ನಡುವಿನ ಸಂವಹನದ ಕೊರತೆಯೇ ಇದಕ್ಕೆ ಕಾರಣ.
ಈ ಅಚಾತುರ್ಯದ ಬಗ್ಗೆ ಪರಿಶೀಲಿಸಿ ಕ್ರಮ ಕೈಗೊಳ್ಳುತ್ತೇವೆ” ಎಂದು ಕಲಬುರಗಿ ರೈಲ್ವೆ ನಿಲ್ದಾಣ ವ್ಯವಸ್ಥಾಪಕ ಪಿ.ಎ. ನರಗುಂದಕರ್ ಸಂಯುಕ್ತ ಕರ್ನಾಟಕ ಕ್ಕೆ ತಿಳಿಸಿದರು.
