ಮಲಯಾಳಂ ಚಿತ್ರರಂಗದ ನಟಿಯರಾದ ರೇವತಿ ಮತ್ತು ಪದ್ಮಪ್ರಿಯಾ AMMA ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದಾರೆ. ಮಹಿಳೆಯರ ಸುರಕ್ಷತೆ, ಸಮಾನತೆ, ಹೊಣೆಗಾರಿಕೆ ಹಾಗೂ ಸಂಘದ ಕಾರ್ಯವೈಖರಿ ಕುರಿತು ಜಂಟಿ ಹೇಳಿಕೆಯಲ್ಲಿ ಅವರು ತಮ್ಮ ನಿರ್ಧಾರದ ಕಾರಣಗಳನ್ನು ವಿವರಿಸಿದ್ದಾರೆ.
ಕೊಚ್ಚಿ: ಮಲಯಾಳಂ ಚಿತ್ರರಂಗದಲ್ಲಿ ಮತ್ತೊಮ್ಮೆ ಮಹತ್ವದ ಬೆಳವಣಿಗೆಯೊಂದು ನಡೆದಿದ್ದು, ಹಿರಿಯ ನಟಿ ರೇವತಿ ಮತ್ತು ನಟಿ ಪದ್ಮಪ್ರಿಯಾ ಅವರು ಮಲಯಾಳಂ ಚಲನಚಿತ್ರ ಕಲಾವಿದರ ಸಂಘ (AMMA)ದ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದಾರೆ. ಈ ಕುರಿತು ಇಬ್ಬರೂ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಜಂಟಿ ಹೇಳಿಕೆ ಬಿಡುಗಡೆ ಮಾಡಿ, ತಮ್ಮ ನಿರ್ಧಾರದ ಹಿಂದಿನ ಕಾರಣಗಳನ್ನು ವಿವರಿಸಿದ್ದಾರೆ.
ಇಬ್ಬರೂ ನಟಿಯರು ವುಮೆನ್ ಇನ್ ಸಿನಿಮಾ ಕಲೆಕ್ಟಿವ್ (WCC) ಸಂಸ್ಥೆಯ ಸ್ಥಾಪಕ ಸದಸ್ಯರಾಗಿದ್ದು, ಕಳೆದ ಹಲವು ವರ್ಷಗಳಿಂದ ಮಲಯಾಳಂ ಚಿತ್ರರಂಗದಲ್ಲಿ ಮಹಿಳೆಯರ ಸುರಕ್ಷತೆ, ಸಮಾನತೆ ಮತ್ತು ಕೆಲಸದ ಸ್ಥಳದಲ್ಲಿ ಗೌರವಯುತ ವಾತಾವರಣಕ್ಕಾಗಿ ಹೋರಾಟ ನಡೆಸುತ್ತಿದ್ದಾರೆ.
“ಇದು ಆತುರದ ನಿರ್ಧಾರವಲ್ಲ” : ಜಂಟಿ ಹೇಳಿಕೆಯಲ್ಲಿ ಮಾತನಾಡಿರುವ ನಟಿಯರು, “ನಮ್ಮ ರಾಜೀನಾಮೆ ಯಾವುದೋ ಒಂದು ಘಟನೆಗೆ ಪ್ರತಿಕ್ರಿಯೆಯಾಗಿ ಅಥವಾ ಆತುರದಲ್ಲಿ ತೆಗೆದುಕೊಂಡ ನಿರ್ಧಾರವಲ್ಲ. ಕಳೆದ ಹಲವು ವರ್ಷಗಳಿಂದ ನಾವು ಅನುಭವಿಸಿದ ಪರಿಸ್ಥಿತಿಗಳು ಮತ್ತು ಸಂಘದ ಕಾರ್ಯವೈಖರಿಯನ್ನು ಗಮನಿಸಿ ಈ ತೀರ್ಮಾನಕ್ಕೆ ಬಂದಿದ್ದೇವೆ” ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಪದ್ಮಶ್ರೀ ಪುರಸ್ಕೃತ, ‘ಬ್ರಿಡ್ಜ್ ಮ್ಯಾನ್’ ಖ್ಯಾತಿಯ ಗಿರೀಶ್ ಭಾರದ್ವಜ್ ನಿಧನ
AMMA ಎಲ್ಲಾ ಕಲಾವಿದರಿಗೂ ಸಮಾನ ಅವಕಾಶ ಮತ್ತು ಧ್ವನಿಯನ್ನು ಒದಗಿಸುವ ವೇದಿಕೆಯಾಗಬೇಕಿತ್ತು. ಆದರೆ ಕಾಲಕ್ರಮೇಣ ಪಿತೃಪ್ರಭುತ್ವದ ಮನೋಭಾವ ಮತ್ತು ಅಧಿಕಾರ ರಾಜಕೀಯ ಸಂಘದ ಮೂಲ ಉದ್ದೇಶಗಳನ್ನು ದುರ್ಬಲಗೊಳಿಸಿದೆ ಎಂದು ಅವರು ಆರೋಪಿಸಿದ್ದಾರೆ.
“ಇದು ಸೋಲಲ್ಲ, ಸ್ವಾಭಿಮಾನ” : “ಈ ಹಂತದಲ್ಲಿ ಸದಸ್ಯತ್ವ ತ್ಯಜಿಸುವುದು ಸೋಲಲ್ಲ, ಅದು ಸ್ವಾಭಿಮಾನದ ನಿರ್ಧಾರ” ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ. ಸುರಕ್ಷಿತ ಕೆಲಸದ ಸ್ಥಳ, ಗೌರವಯುತ ವರ್ತನೆ, ಹೊಣೆಗಾರಿಕೆ ಮತ್ತು ಸಮಾನ ಅವಕಾಶಗಳು ಪ್ರತಿಯೊಬ್ಬ ಕಲಾವಿದನ ಮೂಲಭೂತ ಹಕ್ಕುಗಳಾಗಿವೆ. ಇಂತಹ ಕನಿಷ್ಠ ಮೌಲ್ಯಗಳಿಗಾಗಿ ಸುಮಾರು ಒಂದು ದಶಕದಿಂದ ಹೋರಾಟ ನಡೆಸುತ್ತಿದ್ದೇವೆ ಎಂದು ಇಬ್ಬರೂ ನಟಿಯರು ತಿಳಿಸಿದ್ದಾರೆ.
“ಮೌನವೇ ಬೆಲೆಯಾಯಿತು” : ಈ ಬೇಡಿಕೆಗಳನ್ನು ಮುಂದಿಟ್ಟ ಪರಿಣಾಮವಾಗಿ ಸಹೋದ್ಯೋಗಿಗಳು, ಸ್ನೇಹಿತರು ಮತ್ತು ತಮಗೆ ಮನೆಯಂತಿದ್ದ ಚಿತ್ರರಂಗದಿಂದ ದೂರವಾಗಬೇಕಾದ ಪರಿಸ್ಥಿತಿ ನಿರ್ಮಾಣವಾಯಿತು ಎಂದು ಅವರು ಹೇಳಿದ್ದಾರೆ. “ನಮ್ಮ ಹೋರಾಟಕ್ಕೆ ಮೌನ ಮತ್ತು ಹೊರಗಿಡುವಿಕೆಯೇ ಬೆಲೆಯಾಯಿತು. ಆದರೂ ಬದಲಾವಣೆ ಸಾಧ್ಯ ಎಂಬ ಭರವಸೆಯಿಂದ ನಾವು ಹೋರಾಟ ಮುಂದುವರಿಸಿದ್ದೇವೆ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ: ‘PDO ಕಿರುಕುಳದಿಂದ ಬೇಸತ್ತು ಆತ್ಮಹತ್ಯೆ’– ಡೆತ್ನೋಟ್ನಲ್ಲಿ ಆರೋಪ
ಹೇಮಾ ಸಮಿತಿ ವರದಿ ಉಲ್ಲೇಖ : ನ್ಯಾಯಮೂರ್ತಿ ಹೇಮಾ ಸಮಿತಿ ವರದಿ ಬಹಿರಂಗವಾದ ಬಳಿಕ ಮಲಯಾಳಂ ಚಿತ್ರರಂಗದಲ್ಲಿ ನಡೆದ ಬೆಳವಣಿಗೆಗಳನ್ನು ಉಲ್ಲೇಖಿಸಿರುವ ನಟಿಯರು, ಆ ಸಂದರ್ಭದಲ್ಲಿ ಕೆಲವು ಪದಾಧಿಕಾರಿಗಳು ರಾಜೀನಾಮೆ ನೀಡಿದ್ದರೂ, ಅದು ಹೊಣೆಗಾರಿಕೆಯನ್ನು ಒಪ್ಪಿಕೊಳ್ಳುವ ಕ್ರಮವಾಗಿರದೆ, ಜವಾಬ್ದಾರಿಯಿಂದ ತಪ್ಪಿಸಿಕೊಳ್ಳುವ ಪ್ರಯತ್ನವಾಗಿತ್ತು ಎಂದು ಟೀಕಿಸಿದ್ದಾರೆ.
ಅಧಿಕಾರ ವ್ಯವಸ್ಥೆ ತನ್ನನ್ನು ರಕ್ಷಿಸಿಕೊಳ್ಳಲು ಹೊಸ ಮಾರ್ಗಗಳನ್ನು ಹುಡುಕುತ್ತದೆ. ಮುಖಗಳು ಬದಲಾಗಬಹುದು, ಆದರೆ ಅಸಮಾನತೆಯನ್ನು ಉಳಿಸಿಕೊಳ್ಳುವ ವ್ಯವಸ್ಥೆ ಇನ್ನೂ ಬದಲಾಗಿಲ್ಲ ಎಂದು ಅವರು ಹೇಳಿದ್ದಾರೆ.
ಬದಲಾವಣೆಯ ಭರವಸೆ ಇನ್ನೂ ಜೀವಂತ : ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದರೂ, ಮಲಯಾಳಂ ಚಿತ್ರರಂಗದಲ್ಲಿ ಸಮಾನತೆ ಮತ್ತು ಸುರಕ್ಷಿತ ವಾತಾವರಣ ನಿರ್ಮಾಣವಾಗಲಿದೆ ಎಂಬ ನಂಬಿಕೆ ತಮಗಿದೆ ಎಂದು ಇಬ್ಬರೂ ನಟಿಯರು ಹೇಳಿದ್ದಾರೆ. “ಮುಂದಿನ ಪೀಳಿಗೆಯ ಮಹಿಳಾ ಕಲಾವಿದರು ಇದೇ ಹೋರಾಟವನ್ನು ಮತ್ತೆ ನಡೆಸಬೇಕಾಗದಂತಹ ಚಿತ್ರರಂಗ ನಿರ್ಮಾಣವಾಗಬೇಕು. ಆ ನಂಬಿಕೆ ನಮ್ಮ ಸದಸ್ಯತ್ವವನ್ನು ಅವಲಂಬಿಸಿಲ್ಲ” ಎಂದು ಅವರು ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಈ ಬೆಳವಣಿಗೆ ಮಲಯಾಳಂ ಚಿತ್ರರಂಗದಲ್ಲಿ ಮತ್ತೆ AMMA ಸಂಘದ ಕಾರ್ಯವೈಖರಿ, ಮಹಿಳಾ ಸುರಕ್ಷತೆ ಹಾಗೂ ಆಡಳಿತದ ಕುರಿತು ಚರ್ಚೆಗೆ ಕಾರಣವಾಗಿದೆ.
