ಭಾರತಕ್ಕೆ 4 ಚಿನ್ನ ಗೆದ್ದ ಥ್ರೋಬಾಲ್ ಆಟಗಾರ ತರಕಾರಿ ಮಾರಾಟ: ಅಮರ್ದೀಪ್ ನೆರವಿಗೆ ಬಂದ ಸಿಎಂ ಸೊರೆನ್
ರಾಂಚಿ: ದೇಶಕ್ಕಾಗಿ ನಾಲ್ಕು ಅಂತಾರಾಷ್ಟ್ರೀಯ ಚಿನ್ನದ ಪದಕಗಳನ್ನು ಗೆದ್ದ ಜಾರ್ಖಂಡ್ನ 29 ವರ್ಷದ ಥ್ರೋಬಾಲ್ ಆಟಗಾರ ಅಮರ್ದೀಪ್ ಕುಮಾರ್ ಅವರ ಸಂಕಷ್ಟದ ಜೀವನದ ಸುದ್ದಿ ಇದೀಗ ದೇಶದ ಗಮನ ಸೆಳೆದಿದೆ. ಕ್ರೀಡಾ ಸಾಧನೆಗಳ ಹೊರತಾಗಿಯೂ ಸರ್ಕಾರಿ ಉದ್ಯೋಗ ದೊರೆಯದೆ, ಕುಟುಂಬ ನಿರ್ವಹಣೆಗಾಗಿ ಅವರು ರಾಂಚಿಯ ಅರ್ಗೋರಾ ಚೌಕ್ನಲ್ಲಿ ತರಕಾರಿ ಮಾರಾಟ ಮಾಡುವುದರ ಜೊತೆಗೆ ಕ್ಯಾಬ್ ಕೂಡ ಓಡಿಸುತ್ತಿದ್ದಾರೆ.
ಅಮರ್ದೀಪ್ ಅವರು ಭಾರತ ಪರ 2015ರಲ್ಲಿ ಮಲೇಷ್ಯಾದಲ್ಲಿ ನಡೆದ ಏಷ್ಯನ್ ಜೂನಿಯರ್ ಥ್ರೋಬಾಲ್ ಚಾಂಪಿಯನ್ಶಿಪ್ನಲ್ಲಿ ಮೊದಲ ಅಂತಾರಾಷ್ಟ್ರೀಯ ಚಿನ್ನದ ಪದಕ ಗೆದ್ದಿದ್ದರು. ಬಳಿಕ 2017ರಲ್ಲಿ ಕಠ್ಮಂಡುವಿನಲ್ಲಿ ನಡೆದ ಇಂಡೋ-ನೇಪಾಳ ಥ್ರೋಬಾಲ್ ಚಾಂಪಿಯನ್ಶಿಪ್, 2019ರಲ್ಲಿ ಬೆಂಗಳೂರಿನಲ್ಲಿ ನಡೆದ ಸೌತ್ ಏಷ್ಯನ್ ಥ್ರೋಬಾಲ್ ಚಾಂಪಿಯನ್ಶಿಪ್ ಹಾಗೂ 2026ರಲ್ಲಿ ರಾಂಚಿಯಲ್ಲಿ ನಡೆದ ಇದೇ ಚಾಂಪಿಯನ್ಶಿಪ್ನ ಎರಡನೇ ಆವೃತ್ತಿಯಲ್ಲಿ ಚಿನ್ನದ ಪದಕ ಗೆದ್ದಿದ್ದಾರೆ.
ಆದರೆ ಈ ಸಾಧನೆಗಳು ಅವರಿಗೆ ಆರ್ಥಿಕ ಭದ್ರತೆ ಅಥವಾ ಸರ್ಕಾರಿ ಉದ್ಯೋಗ ತಂದುಕೊಡಲಿಲ್ಲ. ಅಂತಾರಾಷ್ಟ್ರೀಯ ಟೂರ್ನಿಗಳಲ್ಲಿ ಭಾಗವಹಿಸಲು ಹಲವು ಬಾರಿ ಸಾಲ ಮಾಡಬೇಕಾಗಿತ್ತು ಎಂದು ಅಮರ್ದೀಪ್ ಹೇಳಿದ್ದಾರೆ. ಆ ಸಾಲಗಳನ್ನು ತೀರಿಸುವುದರ ಜೊತೆಗೆ ಕುಟುಂಬದ ಖರ್ಚು ನಿಭಾಯಿಸಲು ತರಕಾರಿ ಮಾರಾಟ ಮತ್ತು ಕ್ಯಾಬ್ ಚಾಲನೆ ಮಾಡುತ್ತಿದ್ದಾರೆ. ರಾತ್ರಿ ಕ್ಯಾಬ್ ಓಡಿಸಿದ ಬಳಿಕ ಬೆಳಗ್ಗೆ ತರಬೇತಿಗೆ ಹಾಜರಾಗುವುದು ಕೂಡ ಅವರಿಗೆ ಕಷ್ಟವಾಗುತ್ತಿದೆ.
ಜಾರ್ಖಂಡ್ನ ಕ್ರೀಡಾ ನೀತಿಯಡಿ ಸರ್ಕಾರಿ ಉದ್ಯೋಗ ಹಾಗೂ ನಗದು ಬಹುಮಾನಕ್ಕಾಗಿ ಹಲವು ವರ್ಷಗಳಿಂದ ಅರ್ಜಿ ಸಲ್ಲಿಸಿದ್ದರೂ ಯಾವುದೇ ಸ್ಪಷ್ಟ ಫಲಿತಾಂಶ ಸಿಕ್ಕಿಲ್ಲ ಎಂದು ಅಮರ್ದೀಪ್ ತಿಳಿಸಿದ್ದಾರೆ. 2020ರಿಂದ ಉದ್ಯೋಗಕ್ಕಾಗಿ ಪ್ರಯತ್ನಿಸುತ್ತಿದ್ದು, ಕೋವಿಡ್ ಅವಧಿಯ ಬಳಿಕ 2022ರಿಂದ ಮತ್ತೆ ನಿರಂತರವಾಗಿ ಅಧಿಕಾರಿಗಳನ್ನು ಸಂಪರ್ಕಿಸುತ್ತಿದ್ದಾರೆ. ಇತರ ರಾಜ್ಯಗಳ ತಮ್ಮ ಸಹ ಆಟಗಾರರಿಗೆ ಸರ್ಕಾರಿ ಉದ್ಯೋಗ ದೊರೆತಿರುವುದನ್ನು ಉಲ್ಲೇಖಿಸಿರುವ ಅವರು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೇಶವನ್ನು ಪ್ರತಿನಿಧಿಸುವ ಕ್ರೀಡಾಪಟುಗಳಿಗೆ ಸಮಾನ ಅವಕಾಶ ಸಿಗಬೇಕು ಎಂದು ಹೇಳಿದ್ದಾರೆ.
ಸಿಎಂ ಸೊರೆನ್ ಸ್ಪಂದನೆ : ಅಮರ್ದೀಪ್ ಅವರ ಸಂಕಷ್ಟದ ಕುರಿತು ವರದಿಗಳು ಪ್ರಕಟವಾದ ಬೆನ್ನಲ್ಲೇ ಜಾರ್ಖಂಡ್ ಮುಖ್ಯಮಂತ್ರಿ ಹೇಮಂತ್ ಸೊರೆನ್ ಅವರು ಪ್ರಕರಣವನ್ನು ಗಮನಕ್ಕೆ ತೆಗೆದುಕೊಂಡಿದ್ದಾರೆ. ಕ್ರೀಡಾ ಇಲಾಖೆಗೆ ತಕ್ಷಣ ವಿಷಯವನ್ನು ಪರಿಶೀಲಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸೂಚಿಸಿದ್ದಾರೆ.
ಇದರ ಬೆನ್ನಲ್ಲೇ ರಾಜ್ಯ ಕ್ರೀಡಾ ಸಚಿವ ಸುದಿವ್ಯ ಸೋನು, ಪ್ರಸ್ತುತ ಕ್ರೀಡಾ ನೀತಿಯಡಿ ಅಮರ್ದೀಪ್ ಅವರಿಗೆ ಉದ್ಯೋಗ ಕಲ್ಪಿಸುವ ಸಾಧ್ಯತೆಗಳನ್ನು ಸರ್ಕಾರ ಪರಿಶೀಲಿಸುತ್ತಿದೆ ಎಂದು ತಿಳಿಸಿದ್ದಾರೆ. ಇತರ ಉದ್ಯೋಗಾವಕಾಶಗಳ ಬಗ್ಗೆಯೂ ಚಿಂತನೆ ನಡೆಸಲಾಗುತ್ತಿದೆ. ಜಾರ್ಖಂಡ್ ಮಿಲ್ಕ್ ಫೆಡರೇಷನ್ (Medha) ಕೂಡ ಅಮರ್ದೀಪ್ ಅವರಿಗೆ ಉದ್ಯೋಗಾವಕಾಶ ಕಲ್ಪಿಸುವ ಸಾಧ್ಯತೆಯನ್ನು ಪರಿಶೀಲಿಸಲು ಮುಂದಾಗಿದೆ.
ದೇಶಕ್ಕೆ ಪದಕ ತಂದುಕೊಟ್ಟ ಕ್ರೀಡಾಪಟುವೊಬ್ಬರು ಜೀವನೋಪಾಯಕ್ಕಾಗಿ ತರಕಾರಿ ಮಾರಾಟ ಮತ್ತು ಕ್ಯಾಬ್ ಚಾಲನೆ ಮಾಡುತ್ತಿರುವ ಘಟನೆ, ಕ್ರೀಡಾಪಟುಗಳ ಸಾಧನೆಯ ಬಳಿಕ ಅವರಿಗೆ ದೊರೆಯಬೇಕಾದ ಉದ್ಯೋಗ ಹಾಗೂ ಆರ್ಥಿಕ ಭದ್ರತೆಯ ಕುರಿತು ಮತ್ತೊಮ್ಮೆ ಚರ್ಚೆ ಹುಟ್ಟುಹಾಕಿದೆ. ಇದೀಗ ಸರ್ಕಾರದ ಸ್ಪಂದನೆಯಿಂದ ಅಮರ್ದೀಪ್ ಅವರಿಗೆ ಸೂಕ್ತ ಉದ್ಯೋಗ ಮತ್ತು ನೆರವು ದೊರೆಯುತ್ತದೆಯೇ ಎಂಬುದು ಕುತೂಹಲ ಮೂಡಿಸಿದೆ.
ಪ್ರತಿ ಹೊಸ ಅಪ್ಡೇಟ್ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್ಡೇಟ್ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
