IPL 2027:ಮುಂದಿನ ಐಪಿಎಲ್ ಋತುವಿಗೂ ಮುನ್ನ ಆಟಗಾರರ ಅದಲು-ಬದಲು ಪ್ರಕ್ರಿಯೆ ಭರದಿಂದ ಸಾಗಿದ್ದು, ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಅಭಿಮಾನಿಗಳಲ್ಲಿ ಹೊಸ ಆಸೆಯೊಂದು ಚಿಗುರಿದೆ. ಹೈದರಾಬಾದ್ ವೇಗಿ ಮೊಹಮ್ಮದ್ ಸಿರಾಜ್ ಮತ್ತೆ ಬೆಂಗಳೂರು ತಂಡವನ್ನು ಸೇರಲಿದ್ದಾರೆ ಎಂಬ ವದಂತಿಗಳು ಕ್ರಿಕೆಟ್ ವಲಯದಲ್ಲಿ ಭಾರಿ ಸಂಚಲನ ಮೂಡಿಸಿವೆ.
ವಿರಾಟ್ ಕೊಹ್ಲಿಯ ಆಪ್ತ ಗೆಳೆಯ ‘ಮಿಯಾ’ ಎಂದೇ ಖ್ಯಾತರಾದ ಸಿರಾಜ್, ಆರ್ಸಿಬಿ ಜೊತೆ ದೀರ್ಘಕಾಲದ ಬಾಂಧವ್ಯ ಹೊಂದಿದ್ದಾರೆ. ರಿಷಭ್ ಪಂತ್ ತಮ್ಮ ಹಳೆಯ ತಂಡವಾದ ಡೆಲ್ಲಿಗೆ ಮರಳಿದ ಮಾದರಿಯಲ್ಲೇ, ಸಿರಾಜ್ ಕೂಡ ತವರಿಗೆ ಮರಳುವ ಸಾಧ್ಯತೆಗಳಿವೆ ಎನ್ನಲಾಗುತ್ತಿದೆ. ಹೊಸ ಚೆಂಡಿನೊಂದಿಗೆ ಎದುರಾಳಿಗಳನ್ನು ನಡುಗಿಸುತ್ತಿದ್ದ ಸಿರಾಜ್ ಅಬ್ಬರವನ್ನು ಮತ್ತೆ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನೋಡಲು ಅಭಿಮಾನಿಗಳು ಕಾಯುತ್ತಿದ್ದಾರೆ.
ಆದರೆ, ಈ ವಿಷಯದಲ್ಲಿ ಅಭಿಮಾನಿಗಳಲ್ಲಿ ಭಿನ್ನಾಭಿಪ್ರಾಯವೂ ಇದೆ. ತಂಡದಲ್ಲಿ ಈಗಾಗಲೇ ಇರುವ ರಸಿಕ್ ದಾರ್ ಅದ್ಭುತವಾಗಿ ಬೌಲಿಂಗ್ ಮಾಡುತ್ತಿದ್ದು, ಭುವನೇಶ್ವರ್ ಕುಮಾರ್ ಜೊತೆಗೂಡಿ ಯಶಸ್ವಿ ಜೋಡಿಯಾಗಿದ್ದಾರೆ. ಹೀಗಿರುವಾಗ ಸಿರಾಜ್ ಅನಿವಾರ್ಯವೇ ಎಂಬ ಪ್ರಶ್ನೆಯೂ ಕೆಲವರಿಂದ ಕೇಳಿಬರುತ್ತಿದೆ. ಸದ್ಯಕ್ಕೆ ಇದು ಕೇವಲ ಊಹಾಪೋಹವಾಗಿದ್ದು, ಅಧಿಕೃತ ಹರಾಜು ಪ್ರಕ್ರಿಯೆ ಅಥವಾ ಫ್ರಾಂಚೈಸಿಗಳ ಘೋಷಣೆಯ ನಂತರವಷ್ಟೇ ಸಿರಾಜ್ ಅವರ ‘ಮನೆ ವಾಪಸಾತಿ’ ಬಗ್ಗೆ ಸ್ಪಷ್ಟ ಚಿತ್ರಣ ಸಿಗಲಿದೆ.
