ಕಠ್ಮಂಡು: ಒಂದು ಕ್ಷಣದ ಜಲಪ್ರಳಯ… ಕಣ್ಣೆದುರೇ ಕೊಚ್ಚಿಹೋದ ಬದುಕು… ಎಲ್ಲವನ್ನೂ ಕಳೆದುಕೊಂಡು ಬೀದಿಗೆ ಬಂದ ಸಾವಿರಾರು ಮಂದಿ… ಸಾವಿನ ಸುಳಿಯಲ್ಲಿ ಸಿಲುಕಿ ಬದುಕಿನ ಆಸೆಯನ್ನೇ ಕಳೆದುಕೊಂಡವರ ನಡುವೆ, ಒಬ್ಬ ಕಾರ್ಮಿಕನ ಬದುಕು ಮಾತ್ರ ಪವಾಡದಂತೆ ಮರಳಿ ಬಂದಿದೆ!
ನೇಪಾಳದಲ್ಲಿ ವಿನಾಶಕಾರಿ ಹಠಾತ್ ಪ್ರವಾಹ ಸಂಭವಿಸಿ ಬರೋಬ್ಬರಿ 9 ದಿನಗಳ ಬಳಿಕ ಸುರಂಗವೊಂದರಲ್ಲಿ ಸಿಲುಕಿದ್ದ ಕಾರ್ಮಿಕನನ್ನು ರಕ್ಷಣಾ ಪಡೆಗಳು ಜೀವಂತವಾಗಿ ಹೊರತೆಗೆದಿರುವ ಘಟನೆ ಇಡೀ ದೇಶದ ಗಮನ ಸೆಳೆದಿದೆ.
ತ್ರಿಶೂಲಿಯ 3ಎ ಜಲವಿದ್ಯುತ್ ಯೋಜನೆಯಲ್ಲಿ ಕೆಲಸ ಮಾಡುತ್ತಿದ್ದ 30 ವರ್ಷದ ಸಂಜಯ್ ಸಾಹ್ ಎಂಬ ಕಾರ್ಮಿಕನೇ ಸಾವಿನ ಬಾಗಿಲು ತಟ್ಟಿ ಮತ್ತೆ ಬದುಕಿಗೆ ಮರಳಿದ ಅದೃಷ್ಟಶಾಲಿ. ನೇಪಾಳದ ಮಾಧೇಶ್ ಪ್ರಾಂತ್ಯದ ಸಪ್ತಾರಿ ಜಿಲ್ಲೆಯ ಮೂಲದವರಾದ ಸಂಜಯ್, ಜಲಪ್ರಳಯದ ಬಳಿಕ ಸುರಂಗದಲ್ಲಿ ಸಿಲುಕಿಕೊಂಡಿದ್ದರು.
ಹೊರಗೆ ಪ್ರಪಂಚವೇ ಪ್ರವಾಹದ ಅಬ್ಬರಕ್ಕೆ ತತ್ತರಿಸಿದ್ದರೆ, ಇತ್ತ ಕತ್ತಲೆಯ ಸುರಂಗದೊಳಗೆ ಸಂಜಯ್ ಅವರ ಹೋರಾಟ ಮುಂದುವರಿದಿತ್ತು. ಒಂದು ದಿನವಲ್ಲ… ಎರಡು ದಿನವಲ್ಲ… ಸತತ 9 ದಿನಗಳು! ಹಸಿವು, ಬಾಯಾರಿಕೆ, ಕತ್ತಲೆ, ಭಯ… ಯಾವ ಕ್ಷಣದಲ್ಲಾದರೂ ಜೀವ ಕೈತಪ್ಪಬಹುದು ಎಂಬ ಆತಂಕ. ಆದರೂ ಬದುಕುವ ಭರವಸೆಯನ್ನು ಅವರು ಕೈಬಿಡಲಿಲ್ಲ.
‘ಹರೇ ಕೃಷ್ಣ’ ಜಪವೇ ಬದುಕಿನ ಆಸರೆ: ರಕ್ಷಣೆಯ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಸಂಜಯ್, ಕಳೆದ 9 ದಿನಗಳಿಂದ ತಾವು ‘ಹರೇ ಕೃಷ್ಣ’ ಎಂದು ಜಪಿಸುತ್ತಲೇ ಇದ್ದೆ ಎಂದು ಹೇಳಿದ್ದಾರೆ.
ಸಾವು ಸುತ್ತುವರಿದ ಕತ್ತಲೆಯ ಸುರಂಗದಲ್ಲಿ ದೇವರ ನಾಮವೇ ಅವರಿಗೆ ಧೈರ್ಯವಾಗಿತ್ತು. ಪ್ರತಿಕ್ಷಣವೂ ಬದುಕಿನ ನಿರೀಕ್ಷೆಯಲ್ಲೇ ಕಳೆದಿತ್ತು. ಕೊನೆಗೂ ಆ ಪ್ರಾರ್ಥನೆ ಫಲಿಸಿತು. ಅದೂ ಕೃಷ್ಣ ಜನ್ಮಾಷ್ಟಮಿಯಂದೇ!
ಕೃಷ್ಣನ ಜನ್ಮದಿನದಂದೇ ಸಂಜಯ್ಗೆ ಸುರಂಗದ ಕತ್ತಲೆಯಿಂದ ಬದುಕಿನ ಬೆಳಕು ಕಂಡಂತಾಗಿದೆ. ಹೀಗಾಗಿ ಈ ರಕ್ಷಣೆ ಅವರಿಗೆ ಮಾತ್ರವಲ್ಲ, ಇಡೀ ರಕ್ಷಣಾ ತಂಡಕ್ಕೂ ಭಾವನಾತ್ಮಕ ಕ್ಷಣವಾಗಿ ಪರಿಣಮಿಸಿದೆ.
ಸುರಕ್ಷಿತವಾಗಿ ಹೊರತೆಗೆದ ಬಳಿಕ ಸಂಜಯ್ಗೆ ಸ್ಥಳದಲ್ಲೇ ಪ್ರಾಥಮಿಕ ಚಿಕಿತ್ಸೆ ನೀಡಲಾಯಿತು. ಬಳಿಕ ಅವರನ್ನು ತ್ರಿಶೂಲಿಯ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಆರೋಗ್ಯ ಸ್ಥಿರವಾಗಿದೆ ಹಾಗೂ ಯಾವುದೇ ಗಂಭೀರ ಸಮಸ್ಯೆ ಇಲ್ಲ ಎಂದು ತಿಳಿದುಬಂದಿದೆ.
ಜಲಪ್ರಳಯಕ್ಕೆ ನಲುಗಿದ ನೇಪಾಳ: ನೇಪಾಳ-ಟಿಬೆಟ್ ಗಡಿಯ ಸಮೀಪ ಹಿಮಪಾತದಿಂದ ಉಂಟಾದ ಹಠಾತ್ ಪ್ರವಾಹ ಭೀಕರ ಅನಾಹುತ ಸೃಷ್ಟಿಸಿದೆ. ಪ್ರವಾಹದ ಅಬ್ಬರಕ್ಕೆ 1,250ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, 4,700ಕ್ಕೂ ಅಧಿಕ ಜನರು ನಾಪತ್ತೆಯಾಗಿದ್ದಾರೆ ಎನ್ನಲಾಗಿದೆ.
ಸಾವಿರಾರು ಕುಟುಂಬಗಳು ಮನೆ-ಮಠ, ಆಸ್ತಿ-ಪಾಸ್ತಿ ಕಳೆದುಕೊಂಡು ಬೀದಿಗೆ ಬಂದಿವೆ. ಇನ್ನೂ ಹಲವರು ತಮ್ಮವರಿಗಾಗಿ ಕಣ್ಣೀರಿನಲ್ಲಿ ಹುಡುಕಾಟ ನಡೆಸುತ್ತಿದ್ದಾರೆ.
ಇಂತಹ ಭೀಕರ ದುರಂತದ ನಡುವೆಯೇ, 9 ದಿನಗಳ ಕಾಲ ಸಾವಿನ ನೆರಳಿನಲ್ಲಿ ಹೋರಾಡಿ ಬದುಕುಳಿದ ಸಂಜಯ್ ಸಾಹ್ ಅವರ ಕಥೆ ಮಾತ್ರ ಎಲ್ಲರ ಕಣ್ಣಲ್ಲೂ ಭರವಸೆಯ ಕಿರಣ ಮೂಡಿಸಿದೆ.
ಕತ್ತಲೆಯ ಸುರಂಗದಲ್ಲಿ 9 ದಿನಗಳ ಕಾಲ ಮೊಳಗಿದ ‘ಹರೇ ಕೃಷ್ಣ’ ಜಪಕ್ಕೆ ಜನ್ಮಾಷ್ಟಮಿಯಂದು ಉತ್ತರ ಸಿಕ್ಕಿದೆ… ಸಂಜಯ್ ಸಾಹ್ ಅವರಿಗೆ ನಿಜಕ್ಕೂ ಇದು ಮತ್ತೊಂದು ಜನ್ಮವೇ ಸರಿ!
