ಮನೆ ಬಿಟ್ಟುಕೊಡದ ಮಾಸ್ಟರ್‌ಜಿ: ಮನೋಜ್ ಬಾಜಪಾಯಿ ನಟನೆಯ ‘ಲಾಸ್ಟ್ ಮ್ಯಾನ್ ಇನ್ ಟವರ್’ ಈ ವಾರ OTTಗೆ
ಮುಂಬೈ: ಬಾಲಿವುಡ್‌ನ ಪ್ರತಿಭಾವಂತ ನಟರಾದ ಮನೋಜ್ ಬಾಜಪಾಯಿ, ದಿವ್ಯಾ ದತ್ತ ಮತ್ತು ಬೋಮನ್ ಇರಾನಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ‘ಲಾಸ್ಟ್ ಮ್ಯಾನ್ ಇನ್ ಟವರ್’ (Last Man in Tower) ಸಿನಿಮಾ ಇದೀಗ ಡಿಜಿಟಲ್ ಪ್ರೇಕ್ಷಕರನ್ನು ತಲುಪಲು ಸಿದ್ಧವಾಗಿದೆ. ನವೆಂಬರ್ 6, 2026ರಿಂದ ZEE5 ಓಟಿಟಿ ವೇದಿಕೆಯಲ್ಲಿ ಈ ಸಿನಿಮಾ ಪ್ರಥಮ ಪ್ರದರ್ಶನ ಕಾಣಲಿದೆ.
ಮನೆ, ಹಣ ಮತ್ತು ಸಂಬಂಧಗಳ ನಡುವಿನ ಸಂಘರ್ಷ : ಮುಂಬೈನ ಹಳೆಯ ವಸತಿ ಕಟ್ಟಡವೊಂದರಲ್ಲಿ ನಡೆಯುವ ಕಥೆ ಇದಾಗಿದೆ. ನಿವೃತ್ತ ಶಾಲಾ ಶಿಕ್ಷಕ ಯೋಗೇಶ್ ಮಿಶ್ರಾ ಅಲಿಯಾಸ್ ಮಾಸ್ಟರ್‌ಜಿ ಪಾತ್ರದಲ್ಲಿ ಮನೋಜ್ ಬಾಜಪಾಯಿ ಕಾಣಿಸಿಕೊಂಡಿದ್ದಾರೆ. ಕಟ್ಟಡವನ್ನು ತೆರವುಗೊಳಿಸಿ ಹೊಸ ಐಷಾರಾಮಿ ಕಟ್ಟಡ ನಿರ್ಮಿಸಲು ಮುಂದಾಗುವ ರಿಯಲ್ ಎಸ್ಟೇಟ್ ಉದ್ಯಮಿ ಧರ್ಮೇನ್ ಶಾ ಪಾತ್ರವನ್ನು ಬೋಮನ್ ಇರಾನಿ ನಿರ್ವಹಿಸಿದ್ದಾರೆ.
ಕಟ್ಟಡದ ನಿವಾಸಿಗಳಿಗೆ ತಮ್ಮ ಮನೆಗಳನ್ನು ಖಾಲಿ ಮಾಡಿದರೆ ದೊಡ್ಡ ಮೊತ್ತದ ಹಣ ನೀಡುವ ಆಮಿಷ ಒಡ್ಡಲಾಗುತ್ತದೆ. ಬಹುತೇಕ ನಿವಾಸಿಗಳು ಈ ಪ್ರಸ್ತಾಪಕ್ಕೆ ಒಪ್ಪಿಗೆ ಸೂಚಿಸಿದರೂ, ಮಾಸ್ಟರ್‌ಜಿ ಮಾತ್ರ ತಾನು ವಾಸಿಸುವ ಮನೆಯನ್ನು ಬಿಟ್ಟುಕೊಡಲು ನಿರಾಕರಿಸುತ್ತಾರೆ. ಆ ಮನೆಯಲ್ಲಿ ಬೆಸೆದುಕೊಂಡಿರುವ ನೆನಪುಗಳು, ಬದುಕಿನ ಅನುಭವಗಳು ಮತ್ತು ಭಾವನಾತ್ಮಕ ಸಂಬಂಧಗಳು ಅವರಿಗೆ ಹಣಕ್ಕಿಂತ ಮುಖ್ಯವಾಗಿರುತ್ತವೆ.
ಆದರೆ ಅವರ ನಿರ್ಧಾರದಿಂದ ಇತರ ನಿವಾಸಿಗಳ ಆಸೆಗಳಿಗೆ ಅಡ್ಡಿಯಾಗುತ್ತದೆ. ಹೀಗಾಗಿ ನೆರೆಹೊರೆಯವರ ನಡುವಿನ ಸಂಬಂಧಗಳು ಹದಗೆಡುತ್ತವೆ. ಒಬ್ಬ ವ್ಯಕ್ತಿಯ ಹಠ, ಮತ್ತೊಬ್ಬರ ಆರ್ಥಿಕ ಆಸೆ ಮತ್ತು ಕಟ್ಟಡದ ಪುನರ್‌ನಿರ್ಮಾಣದ ಪ್ರಸ್ತಾಪದ ನಡುವೆ ಸಂಘರ್ಷ ತೀವ್ರಗೊಳ್ಳುತ್ತದೆ.
ಖ್ಯಾತ ಕಾದಂಬರಿ ಆಧಾರಿತ ಸಿನಿಮಾ : ‘ಲಾಸ್ಟ್ ಮ್ಯಾನ್ ಇನ್ ಟವರ್’ ಸಿನಿಮಾ ಬೂಕರ್ ಪ್ರಶಸ್ತಿ ವಿಜೇತ ಲೇಖಕ ಅರವಿಂದ್ ಅಡಿಗ ಅವರ 2011ರಲ್ಲಿ ಪ್ರಕಟವಾದ ಇದೇ ಹೆಸರಿನ ಕಾದಂಬರಿಯನ್ನು ಆಧರಿಸಿದೆ. ಬೆನ್ ರೇಖಿ ನಿರ್ದೇಶನದ ಈ ಚಿತ್ರಕ್ಕೆ ಸೂನಿ ತಾರಾಪೊರೆವಾಲಾ ಚಿತ್ರಕಥೆ ಬರೆದಿದ್ದು, ಜೂಹಿ ಚತುರ್ವೇದಿ ಸಂಭಾಷಣೆಗಳನ್ನು ರಚಿಸಿದ್ದಾರೆ. ರಾಣಾ ದಗ್ಗುಬಾಟಿ ಅವರ ಸ್ಪಿರಿಟ್ ಮೀಡಿಯಾ ಸಂಸ್ಥೆಯು ಚಿತ್ರದ ನಿರ್ಮಾಣದಲ್ಲಿ ಪ್ರಮುಖ ಪಾತ್ರ ವಹಿಸಿದೆ.
ದಿವ್ಯಾ ದತ್ತ ಅವರು ಸಂಗೀತಾ ಪುರಿ ಅಲಿಯಾಸ್ ಮಿಸೆಸ್ ಪುರಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಮನೋಜ್ ಬಾಜಪಾಯಿ ಮತ್ತು ಬೋಮನ್ ಇರಾನಿ ಮೊದಲ ಬಾರಿಗೆ ತೆರೆ ಹಂಚಿಕೊಂಡಿರುವುದು ಚಿತ್ರದ ಮತ್ತೊಂದು ವಿಶೇಷ. ಸುಕಾಂತ್ ಗೋಯಲ್, ಹರೀಶ್ ಖನ್ನಾ, ಚಂದನ್ ರಾಯ್ ಸನ್ಯಾಲ್ ಸೇರಿದಂತೆ ಹಲವು ಕಲಾವಿದರು ಪೋಷಕ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಚಿತ್ರಮಂದಿರದ ಬಳಿಕ ಓಟಿಟಿಗೆ : ಈ ಸಿನಿಮಾ 2026ರ ಸೆಪ್ಟೆಂಬರ್ 11ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿತ್ತು. ಇದೀಗ ಚಿತ್ರಮಂದಿರದ ಪ್ರದರ್ಶನದ ಬಳಿಕ ನವೆಂಬರ್ 6ರಿಂದ ZEE5 ಮೂಲಕ ಡಿಜಿಟಲ್ ವೀಕ್ಷಕರಿಗೆ ಲಭ್ಯವಾಗಲಿದೆ. ಚಿತ್ರವು ಮನೆ, ಸಮುದಾಯ, ನಗರಾಭಿವೃದ್ಧಿ, ಹಣದ ಆಮಿಷ ಮತ್ತು ವೈಯಕ್ತಿಕ ಮೌಲ್ಯಗಳ ನಡುವಿನ ಸಂಘರ್ಷವನ್ನು ಚರ್ಚಿಸುತ್ತದೆ.
ಮನೋಜ್ ಬಾಜಪಾಯಿ ಅವರ ಗಂಭೀರ ಅಭಿನಯ, ಬೋಮನ್ ಇರಾನಿ ಅವರ ಉದ್ಯಮಿ ಪಾತ್ರ ಮತ್ತು ದಿವ್ಯಾ ದತ್ತ ಅವರ ಸಂಕೀರ್ಣ ಪಾತ್ರದ ಮೂಲಕ ಗಮನ ಸೆಳೆದಿರುವ ಈ ಸಿನಿಮಾ ಓಟಿಟಿಯಲ್ಲಿ ಯಾವ ರೀತಿಯ ಪ್ರತಿಕ್ರಿಯೆ ಪಡೆಯಲಿದೆ ಎಂಬ ಕುತೂಹಲ ಮೂಡಿದೆ.
