ಶಾಶ್ವತ ಉದ್ಯೋಗ ಹೊರಗುತ್ತಿಗೆ ವಿರೋಧಿಸಿ ಎಸ್ಬಿಐ ನೌಕರರ ರಾಷ್ಟ್ರವ್ಯಾಪಿ ಪ್ರತಿಭಟನೆ : ಮೇ 25-26 ರಾಷ್ಟ್ರವ್ಯಾಪಿ ಮುಷ್ಕರ ಎಚ್ಚರಿಕೆ
ನವದೆಹಲಿ: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ (SBI) ನೌಕರರು ತಮ್ಮ ಹಲವು ದೀರ್ಘಕಾಲದ ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಮೇ 25 ಮತ್ತು 26ರಂದು ಎರಡು ದಿನಗಳ ರಾಷ್ಟ್ರವ್ಯಾಪಿ ಮುಷ್ಕರ ನಡೆಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.
ನೇಮಕಾತಿ ಕೊರತೆ, ಶಾಶ್ವತ ಉದ್ಯೋಗಗಳ ಹೊರಗುತ್ತಿಗೆ, ಪಿಂಚಣಿ ಸಮಸ್ಯೆಗಳು ಹಾಗೂ ಅಂತರ-ವೃತ್ತ ವರ್ಗಾವಣೆ ಸೇರಿದಂತೆ ಹಲವು ವಿಷಯಗಳನ್ನು ಮುಂದಿಟ್ಟುಕೊಂಡು ಈ ಹೋರಾಟಕ್ಕೆ ಕರೆ ನೀಡಲಾಗಿದೆ.
ಈ ಮುಷ್ಕರಕ್ಕೆ All India State Bank of India Staff Federation (AISBISF) ಕರೆ ನೀಡಿದ್ದು, ಸಮಸ್ಯೆಗಳ ಪರಿಹಾರಕ್ಕಾಗಿ ಕೇಂದ್ರ ಸರ್ಕಾರ ಹಾಗೂ ಸಂಸದರು ಮಧ್ಯಸ್ಥಿಕೆ ವಹಿಸಬೇಕು ಎಂದು ಆಗ್ರಹಿಸಿದೆ.
ಇದನ್ನೂ ಓದಿ: ವಿನೇಶ್ ಫೋಗಟ್ ಪ್ರಕರಣದಲ್ಲಿ WFIಗೆ ಹೈಕೋರ್ಟ್ ತರಾಟೆ
ಬ್ಯಾಂಕ್ ಶಾಖೆಗಳು ಮತ್ತು ಕಚೇರಿಗಳಲ್ಲಿ ಸಾಕಷ್ಟು ಸಿಬ್ಬಂದಿ ನೇಮಕಾತಿ ಸೇರಿದಂತೆ ಹಲವಾರು ಬೇಡಿಕೆಗಳನ್ನು ಈಡೇರಿಸಲು ಪ್ರಸ್ತಾವಿತ ಮುಷ್ಕರಕ್ಕೆ ಕರೆ ನೀಡಲಾಗಿದ್ದು. ಈ ತಿಂಗಳ ಕೊನೆಯಲ್ಲಿ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ನಲ್ಲಿ ಬ್ಯಾಂಕಿಂಗ್ ಕಾರ್ಯಾಚರಣೆಗಳು ವ್ಯತ್ಯಯಗೊಳ್ಳುವ ಸಾಧ್ಯತೆ ಇದೆ.
ಸತತ ಐದು ದಿನಗಳ ಸೇವಾ ವ್ಯತ್ಯಯ ಸಾಧ್ಯತೆ : ಮುಷ್ಕರ ನಡೆದರೆ, ಗ್ರಾಹಕರು ಸತತ ಐದು ದಿನಗಳವರೆಗೆ ಸೇವಾ ಅಡಚಣೆಗಳನ್ನು ಅನುಭವಿಸಬಹುದು ಏಕೆಂದರೆ ಮೇ 23 ನಾಲ್ಕನೇ ಶನಿವಾರ ಮತ್ತು ಮೇ 24 ಭಾನುವಾರ, ಎರಡೂ ನಿಯಮಿತ ಬ್ಯಾಂಕ್ ರಜಾದಿನಗಳು. ಮೇ 25 ಮತ್ತು 26ರಂದು ಎರಡು ದಿನಗಳ ರಾಷ್ಟ್ರವ್ಯಾಪಿ ಮುಷ್ಕರ ಹಾಗೂ ಇದಲ್ಲದೆ, ಹಲವಾರು ರಾಜ್ಯಗಳು ಮೇ 27 ರಂದು ಈದ್ ಅಲ್-ಅಧಾ ಕಾರಣದಿಂದಾಗಿ ರಜಾದಿನವನ್ನು ಆಚರಿಸುವ ನಿರೀಕ್ಷೆಯಿದೆ.
ನೇಮಕಾತಿ ಇಲ್ಲದೆ ಮೂರು ದಶಕ : AISBISF ಎತ್ತಿಹಿಡಿದಿರುವ ಪ್ರಮುಖ ವಿಚಾರಗಳಲ್ಲಿ ಒಂದು ಸಂದೇಶವಾಹಕರ ನೇಮಕಾತಿ. ಶಾಖೆಗಳ ನಡುವೆ ನಗದು, ದಾಖಲೆಗಳು ಮತ್ತು ಪ್ರಮುಖ ಪ್ಯಾಕೇಜ್ಗಳನ್ನು ಸಾಗಿಸುವ ಕೆಲಸ ಮಾಡುವ ಸಂದೇಶವಾಹಕರ ನೇಮಕಾತಿ ಕಳೆದ ಸುಮಾರು 30 ವರ್ಷಗಳಿಂದ ನಡೆದಿಲ್ಲ ಎಂದು ಒಕ್ಕೂಟ ಹೇಳಿದೆ.
ಇದನ್ನೂ ಓದಿ: KPS ಶಿಕ್ಷಣ ದೇಶಕ್ಕೇ ಮಾದರಿ : 52 ಸಾವಿರ ಅತಿಥಿ ಶಿಕ್ಷಕರ ನೇಮಕಕ್ಕೆ ಚಾಲನೆ
“ದೇಶದ ಅತಿದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಉದ್ಯೋಗಾವಕಾಶಗಳನ್ನು ಕಡಿಮೆ ಮಾಡುತ್ತಿರುವುದು ರಾಷ್ಟ್ರೀಯ ಮಟ್ಟದ ಕಳವಳಕಾರಿ ವಿಚಾರ” ಎಂದು ಒಕ್ಕೂಟ ಅಭಿಪ್ರಾಯಪಟ್ಟಿದೆ.
ಮೇ 25 ಮತ್ತು 26ರಂದು ನಡೆಯಲಿರುವ ಮುಷ್ಕರದಿಂದ ದೇಶದಾದ್ಯಂತ ಎಸ್ಬಿಐ ಬ್ಯಾಂಕಿಂಗ್ ಸೇವೆಗಳಲ್ಲಿ ವ್ಯತ್ಯಯ ಉಂಟಾಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಈ ಮದ್ಯೆ ಮುಷ್ಕರವನ್ನು ತಪ್ಪಿಸಲು, ಮುಖ್ಯ ಕಾರ್ಮಿಕ ಆಯುಕ್ತರ ಕಚೇರಿಯು ಮೇ 23 ರಂದು ಒಕ್ಕೂಟ ಮತ್ತು ಎಸ್ಬಿಐ ಆಡಳಿತ ಮಂಡಳಿಯ ಪ್ರತಿನಿಧಿಗಳೊಂದಿಗೆ ರಾಜಿ ಸಭೆ ನಡೆಸುವ ನಿರೀಕ್ಷೆಯಿದೆ.
