ಹುಬ್ಬಳ್ಳಿ: ವಸಂತದ ಸೊಗಡಿನಲ್ಲಿ ಸಾಂಸ್ಕೃತಿಕ ವೈಭವವನ್ನು ಹೊತ್ತು ತರುವ ‘ವಸಂತ ಋತುಗಾನ–ಕಲಾಯಾನ’ ಕಲೋತ್ಸವಕ್ಕೆ ಹುಬ್ಬಳ್ಳಿ ಸಜ್ಜಾಗಿದೆ. ಏಪ್ರಿಲ್ 17ರಿಂದ ಆರಂಭವಾಗಲಿರುವ ಈ ಭವ್ಯ ಉತ್ಸವವು ನಗರವನ್ನು ಕಲಾ ಸಂಭ್ರಮದಲ್ಲಿ ತೇಲಿಸುವ ನಿರೀಕ್ಷೆ ಮೂಡಿಸಿದೆ.
ಸಂಯುಕ್ತ ಕರ್ನಾಟಕ ವತಿಯಿಂದ ಆಯೋಜಿಸಲ್ಪಡುವ ವಸಂತ ಋತುಗಾನ- ಕಲಾಯಾನ ಕಲೋತ್ಸವ ಈ ಮಹತ್ವಾಕಾಂಕ್ಷಿ ಕಾರ್ಯಕ್ರಮವು ಹುಬ್ಬಳ್ಳಿಯ ಸಿದ್ಧಾರೂಢಮಠದಲ್ಲಿ ಆರಂಭವಾಗಲಿದೆ. ಸಿದ್ಧಾರೂಢ ಮಠ ಟ್ರಸ್ಟ್ ಹಾಗೂ ಕನ್ನಡ ಸಂಸ್ಕೃತಿ ಇಲಾಖೆ ಸಹಯೋಗದೊಂದಿಗೆ ಈ ಉತ್ಸವವನ್ನು ಭವ್ಯವಾಗಿ ರೂಪಿಸಲಾಗಿದೆ.
ಈ ಕಲೋತ್ಸವದಲ್ಲಿ ಜಾನಪದ ಮತ್ತು ಶಾಸ್ತ್ರೀಯ ಗಾಯನ, ಯಕ್ಷಗಾನ, ನೃತ್ಯ ರೂಪಕ, ನಾಟಕ ಪ್ರದರ್ಶನಗಳ ಜೊತೆಗೆ ಮಲ್ಲಕಂಬ ಮತ್ತು ಸಾಹಸ ಪ್ರದರ್ಶನಗಳು ಜನರನ್ನು ಆಕರ್ಷಿಸಲಿವೆ.
ದಾಲಪಟಾ ಕಲೆಗೆ ವಿಶೇಷ ವೇದಿಕೆ : ಉತ್ಸವದ ಪ್ರಮುಖ ಆಕರ್ಷಣೆಯಾಗಿ ಉತ್ತರ ಕರ್ನಾಟಕದ ಅಪರೂಪದ ಸಮರ ಕಲೆ ದಾಲಪಟಾ (ದಾಲ್ ಪಟ) ಪ್ರದರ್ಶನವೂ ಇರಲಿದೆ. ಕತ್ತಿ (ಕೈಗತ್ತಿ) ಮತ್ತು ಗುರಾಣಿ (ದಾಲ್) ಬಳಸಿ ಸಾಹಸಮಯ ಪಟ್ಟುಗಳನ್ನು ಪ್ರದರ್ಶಿಸುವ ಈ ಕಲೆಯು ಶೌರ್ಯ ಮತ್ತು ನಿಖರತೆಯ ಸಂಕೇತವಾಗಿದೆ.
ಈ ಕಲೆಯನ್ನು ಉಳಿಸಿ ಬೆಳೆಸುತ್ತಿರುವ ಹಿರಿಯ ಕಲಾವಿದ ಕೃಷ್ಣಾ ಗೋಪನಕೊಪ್ಪ ಮತ್ತು ಅವರ ತಂಡ ಈ ಉತ್ಸವದಲ್ಲಿ ಭಾಗವಹಿಸಲಿದ್ದಾರೆ. ಅವರ ಪ್ರದರ್ಶನಗಳು ಸಾಹಸಮಯ ಕೌಶಲ್ಯ, ನಿಖರತೆ ಮತ್ತು ಪುರಾತನ ಸಮರ ಪಟ್ಟುಗಳಿಂದ ಪ್ರೇಕ್ಷಕರನ್ನು ರೋಮಾಂಚನಗೊಳಿಸುತ್ತವೆ.
ಏಪ್ರಿಲ್ 17ರಂದು ಬೆಳಗ್ಗೆ 9:30ಕ್ಕೆ, ಶ್ರೀ ಸಿದ್ಧಾರೂಢ ಮಠದ ದ್ವಾರದಿಂದ ದಾಲಪಟಾ ಕಲಾವಿದ ಕೃಷ್ಣಾ ಮತ್ತು ಅವರ ತಂಡದ ಮೆರವಣಿಗೆಯ ಮೂಲಕ ಕಾರ್ಯಕ್ರಮಕ್ಕೆ ಭರ್ಜರಿ ಚಾಲನೆ ನೀಡಲಾಗುತ್ತದೆ. ಈ ಮೆರವಣಿಗೆಯ ವೇಳೆ ಕೊಪ್ಪಳ ಶ್ರೀಗಳಿಗೆ ವಿಶೇಷ ಸ್ವಾಗತ ಕೋರಲಾಗುತ್ತದೆ.
ಕೃಷ್ಣಾ ಗೋಪನಕೊಪ್ಪ ಮೂಲತಃ ಹಾವೇರಿ ಜಿಲ್ಲೆಯ ಹಾನಗಲ್ ತಾಲೂಕಿನ ಗೋಪನಕೊಪ್ಪ ಗ್ರಾಮದವರು. ತಮ್ಮ ಗ್ರಾಮದ ಹೆಸರನ್ನೇ ಗುರುತಾಗಿ ಹೊಂದಿರುವ ಇವರು, ದಾಲಪಟಾ ಕಲೆಯನ್ನು ಪರಂಪರೆಯಾಗಿ ಉಳಿಸಿಕೊಂಡು ಬಂದಿದ್ದಾರೆ. ಕೃಷ್ಣಾ ಗೋಪನಕೊಪ್ಪ ಅವರ ಪ್ರದರ್ಶನಗಳು ಕೇವಲ ಮನರಂಜನೆಯಲ್ಲ, ಅವು ಸಾಹಸದ ಪರಾಕಾಷ್ಠೆಯಾಗಿರುತ್ತವೆ.
ಸಾಹಸಮಯ ವರಸೆಗಳು: ಕೈಗತ್ತಿ (ಕತ್ತಿ) ಮತ್ತು ದಾಲ್ (ಗುರಾಣಿ) ಹಿಡಿದು ಇವರು ಮಾಡುವ ಪಟ್ಟುಗಳು ನೋಡುಗರನ್ನು ಬೆರಗುಗೊಳಿಸುತ್ತವೆ. ಕಣ್ಣಿಗೆ ಗಟ್ಟಿಯಾಗಿ ಬಟ್ಟೆ ಕಟ್ಟಿಕೊಂಡು, ನೆಲದ ಮೇಲಿಟ್ಟಿರುವ ಅತೀ ಸಣ್ಣ ನಿಂಬೆಹಣ್ಣನ್ನು ಕತ್ತಿಯಿಂದ ಸೀಳುವುದು ಇವರ ಅತ್ಯಂತ ಪ್ರಸಿದ್ಧ ಸಾಹಸ. ಪುರಾತನ ಸಮರ ಕಲೆಗಳಾದ ಎದುರು ಬದರು ವರಸೆ, ಸುತ್ತು ವರಸೆ ಮುಂತಾದ ಪಟ್ಟುಗಳಲ್ಲಿ ನಿಷ್ಣಾತರು.
ಕಲೆಯ ಸಂರಕ್ಷಣೆ ಮತ್ತು ಪ್ರಚಾರ : ಕೃಷ್ಣಾ ಗೋಪನಕೊಪ್ಪ ಸ್ವತಃ ತಂಡವೊಂದನ್ನು ಕಟ್ಟಿಕೊಂಡು ರಾಜ್ಯದಾದ್ಯಂತ ಪ್ರದರ್ಶನ ನೀಡುತ್ತಿದ್ದಾರೆ. ಅಳಿವಿನ ಅಂಚಿನಲ್ಲಿರುವ ಈ ಕಲೆಯನ್ನು ಮುಂದಿನ ಪೀಳಿಗೆಗೆ ದಾಟಿಸಲು ಯುವಕರಿಗೆ ಮತ್ತು ಮಕ್ಕಳಿಗೆ ತರಬೇತಿ ನೀಡುತ್ತಿದ್ದಾರೆ. ಹಂಪಿ ಉತ್ಸವ, ಕಡಲೆಕಾಯಿ ಪರಿಷೆ ಮತ್ತು ವಿವಿಧ ಕೃಷಿ ಮೇಳಗಳಲ್ಲಿ ಇವರ ತಂಡದ ಪ್ರದರ್ಶನಗಳು ಕಣ್ಮನ ಸೆಳೆಯುತ್ತವೆ.
ದಾಲಪಟಾ ಕಲೆಯು ಮುಖ್ಯವಾಗಿ ಅಲೆಮಾರಿ ಸಮುದಾಯಗಳಿಗೆ ಸೇರಿದ್ದಾಗಿದ್ದು, ಕೃಷ್ಣಾ ಗೋಪನಕೊಪ್ಪ ಮತ್ತು ಅವರ ತಂಡ ಅಂತಹ ಸಮುದಾಯಗಳ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ಇಂದಿನ ಸಮಾಜಕ್ಕೆ ಪರಿಚಯಿಸುವಲ್ಲಿ ದೊಡ್ಡ ಕೊಂಡಿಯಾಗಿದ್ದಾರೆ. ಈ ಮೂಲಕ ದಾಲಪಟಾ ಕಲೆಯಂತಹ ಅಳಿವಿನಂಚಿನಲ್ಲಿರುವ ಪರಂಪರೆಯ ಕಲೆಗೆ ಮತ್ತೆ ಜೀವ ತುಂಬುವ ಪ್ರಯತ್ನ ಮಾಡಲಾಗುತ್ತಿದೆ. ಯುವಕರಿಗೆ ತರಬೇತಿ ನೀಡುವ ಮೂಲಕ ಈ ಕಲೆಯನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಕಾರ್ಯವೂ ನಡೆಯುತ್ತಿದೆ.
