SK Home Ad
Home ಸಿನಿ ಮಿಲ್ಸ್ IFFI ಅಂಗಳದಲ್ಲಿ ಕನ್ನಡದ ಕಂಪು: ‘ಕಾಂತಾರ’ ಸೇರಿ ನಾಲ್ಕು ಚಿತ್ರಗಳ ಪಯಣ

IFFI ಅಂಗಳದಲ್ಲಿ ಕನ್ನಡದ ಕಂಪು: ‘ಕಾಂತಾರ’ ಸೇರಿ ನಾಲ್ಕು ಚಿತ್ರಗಳ ಪಯಣ

0
41
ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಕನ್ನಡದ ಕಂಪು: ‘ಕಾಂತಾರ’ ಸೇರಿ ನಾಲ್ಕು ಕನ್ನಡ ಚಿತ್ರಗಳ ಆಯ್ಕೆ; ತುಳು ಚಿತ್ರಕ್ಕೂ ಮನ್ನಣೆ

ಕನ್ನಡ-ತುಳು ಸಿನಿಮಾಗಳ ವೈವಿಧ್ಯತೆಗೆ ರಾಷ್ಟ್ರೀಯ ವೇದಿಕೆ: ಕಾಸರವಳ್ಳಿ ಅವರಿಗೆ 50ರ ಗೌರವ

ಗೋವಾ: ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ (IFFI) 57ನೇ ಆವೃತ್ತಿಯಲ್ಲಿ ಕನ್ನಡ ಚಿತ್ರರಂಗಕ್ಕೆ ವಿಶೇಷ ಮನ್ನಣೆ ದೊರೆತಿದೆ. ರಿಷಬ್ ಶೆಟ್ಟಿ ನಿರ್ದೇಶಿಸಿ ನಟಿಸಿರುವ ‘ಕಾಂತಾರ: ಎ ಲೆಜೆಂಡ್ – ಚಾಪ್ಟರ್ 1’, ಪಿ. ಶೇಷಾದ್ರಿ ನಿರ್ದೇಶನದ ‘ರೂಬಿ-ಕ್ಯೂಬ್’, ‘ದಿ ಹಗ್ ಆಫ್ ಎಂಪ್ಟಿನೆಸ್’ ಹಾಗೂ ಅಭಿಷೇಕ್ ನಿರ್ದೇಶನದ ‘ಉಳಿದಿದ್ದು ಸಂಪಿಗೆ ಮಾತ್ರ’ ಚಿತ್ರಗಳು ಭಾರತೀಯ ಪನೋರಮಾ ವಿಭಾಗದಲ್ಲಿ ಸ್ಥಾನ ಪಡೆದಿವೆ. ಇದರ ಜತೆಗೆ ತುಳು ಭಾಷೆಯ ‘ಪಿಲಿ ಚನ್ನೆ’ ಚಿತ್ರವೂ ಆಯ್ಕೆಯಾಗಿದ್ದು, ಪ್ರಾದೇಶಿಕ ಭಾಷಾ ಸಿನಿಮಾಗಳ ವೈವಿಧ್ಯಕ್ಕೆ ಉತ್ಸವ ವೇದಿಕೆಯಾಗುತ್ತಿದೆ.

ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಪತ್ರಿಕಾ ಮಾಹಿತಿ ಕಚೇರಿ (PIB) ನವೆಂಬರ್ 17ರಂದು ಬಿಡುಗಡೆ ಮಾಡಿದ ಅಧಿಕೃತ ಪ್ರಕಟಣೆಯಲ್ಲಿ ಕನ್ನಡ ಮತ್ತು ತುಳು ಚಿತ್ರಗಳ ಆಯ್ಕೆಯನ್ನು ವಿವರಿಸಿದೆ. ನವೆಂಬರ್ 20ರಿಂದ 28ರವರೆಗೆ ಗೋವಾದಲ್ಲಿ ನಡೆಯಲಿರುವ 57ನೇ IFFIಯಲ್ಲಿ ದೇಶದ ವಿವಿಧ ಭಾಷೆಗಳ ಚಿತ್ರಗಳು ಪ್ರದರ್ಶನಗೊಳ್ಳಲಿವೆ.

‘ಕಾಂತಾರ’ಕ್ಕೆ ಎರಡು ವಿಭಾಗಗಳಲ್ಲಿ ಅವಕಾಶ : ರಿಷಬ್ ಶೆಟ್ಟಿ ನಿರ್ದೇಶನದ ಜತೆಗೆ ನಾಯಕನಾಗಿಯೂ ನಟಿಸಿರುವ ‘ಕಾಂತಾರ: ಎ ಲೆಜೆಂಡ್ – ಚಾಪ್ಟರ್ 1’ ಚಿತ್ರ ಕದಂಬರ ಕಾಲಘಟ್ಟದ ಹಿನ್ನೆಲೆಯಲ್ಲಿ ರೂಪುಗೊಂಡಿದೆ. ಅರಣ್ಯವಾಸಿ ಸಮುದಾಯಗಳ ಮೇಲೆ ನಡೆಯುವ ಅನ್ಯಾಯದ ವಿರುದ್ಧ ಹೋರಾಡುವ ಬರ್ಮೆ ಎಂಬ ಯುವಕನ ಕಥೆಯನ್ನು ಚಿತ್ರ ಒಳಗೊಂಡಿದೆ.

ಜನಪದ, ನಂಬಿಕೆ, ಅರಣ್ಯ ಸಮುದಾಯಗಳ ಬದುಕು ಹಾಗೂ ನ್ಯಾಯಕ್ಕಾಗಿ ನಡೆಯುವ ಹೋರಾಟವನ್ನು ಈ ಸಿನಿಮಾ ತೆರೆದಿಡುತ್ತದೆ. ವಿಶೇಷವೆಂದರೆ, ಚಿತ್ರವು ಭಾರತೀಯ ಪನೋರಮಾದ ಮುಖ್ಯವಾಹಿನಿ ಸಿನಿಮಾ ವಿಭಾಗದ ಜತೆಗೆ ಅಂತಾರಾಷ್ಟ್ರೀಯ ಸ್ಪರ್ಧಾ ವಿಭಾಗದಲ್ಲಿಯೂ ಸ್ಥಾನ ಪಡೆದಿದೆ.

ವಿಭಿನ್ನ ಕಥಾಹಂದರದ ಮೂರು ಕನ್ನಡ ಚಿತ್ರಗಳು : ಪಿ. ಶೇಷಾದ್ರಿ ನಿರ್ದೇಶನದ ‘ರೂಬಿ-ಕ್ಯೂಬ್’ ಚಿತ್ರವು ಪ್ರವಾಸಕ್ಕೆ ತೆರಳುವ ಕುಟುಂಬದ ಮೂರು ತಲೆಮಾರುಗಳ ಕಥೆಯನ್ನು ಹೊಂದಿದೆ. ರಜೆಯ ಹಿನ್ನೆಲೆಯಲ್ಲಿ ಗಿರಿಧಾಮಕ್ಕೆ ತೆರಳುವ ಕುಟುಂಬದ ಸದಸ್ಯರ ನಡುವಿನ ಸಂಬಂಧಗಳು, ಭಾವನಾತ್ಮಕ ಸಂಘರ್ಷಗಳು ಮತ್ತು ಬಗೆಹರಿಯದ ವಿಚಾರಗಳನ್ನು ರೂಬಿಕ್ಸ್ ಕ್ಯೂಬ್ ರೂಪಕದ ಮೂಲಕ ಚಿತ್ರ ಅನಾವರಣಗೊಳಿಸುತ್ತದೆ.

ಅಭಿಷೇಕ್ ನಿರ್ದೇಶನದ ‘ಉಳಿದಿದ್ದು ಸಂಪಿಗೆ ಮಾತ್ರ’ ಕಿರುಚಿತ್ರವು ಭಾವನಾತ್ಮಕ ಕಥಾವಸ್ತುವನ್ನು ಹೊಂದಿದೆ. ತಮ್ಮ ಪ್ರೀತಿಪಾತ್ರರ ಹಾನಿಗೊಳಗಾದ ಭಾವಚಿತ್ರವನ್ನು ಮರುಸೃಷ್ಟಿಸಲು ಕಲಾವಿದರೊಬ್ಬರ ನೆರವು ಕೋರುವ ವ್ಯಕ್ತಿ ಹಾಗೂ ಅವರ ಬದುಕಿನಲ್ಲಿ ಅನಿರೀಕ್ಷಿತವಾಗಿ ಎದುರಾಗುವ ಅಪರಿಚಿತರೊಬ್ಬರ ಭೇಟಿಯ ಸುತ್ತ ಕಥೆ ಸಾಗುತ್ತದೆ.

ಇನ್ನು ಡಾ. ಪ್ರದೀಪ್ ಕುಮಾರ್ ಶೆಟ್ಟಿ ಕೆ. ನಿರ್ದೇಶನದ ‘ದಿ ಹಗ್ ಆಫ್ ಎಂಪ್ಟಿನೆಸ್’ ಸಾಕ್ಷ್ಯಚಿತ್ರವು ಆಸ್ತಿ ಸ್ವಾಧೀನ ಮತ್ತು ಸುದೀರ್ಘ ಕಾನೂನು ಹೋರಾಟದ ವಾಸ್ತವ ಕಥೆಯನ್ನು ದಾಖಲಿಸುತ್ತದೆ. 2003ರಲ್ಲಿ ಸಾಲ ಮರುಪಾವತಿಸಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ ಆಸ್ತಿ ಸ್ವಾಧೀನಗೊಂಡ ನಂತರ, ನ್ಯಾಯಕ್ಕಾಗಿ ಎರಡು ದಶಕಗಳ ಕಾಲ ನಡೆದ ಹೋರಾಟವನ್ನು ಈ ಸಾಕ್ಷ್ಯಚಿತ್ರ ಕಟ್ಟಿಕೊಡುತ್ತದೆ.

ತುಳು ಚಿತ್ರ ‘ಪಿಲಿ ಚನ್ನೆ’ಗೂ ರಾಷ್ಟ್ರೀಯ ವೇದಿಕೆ : ಕನ್ನಡ ಚಿತ್ರಗಳ ಜತೆಗೆ ಅನೂಪಮಾ ಶರಧಿ ನಿರ್ದೇಶನದ ತುಳು ಸಿನಿಮಾ ‘ಪಿಲಿ ಚನ್ನೆ’ ಕೂಡ ಭಾರತೀಯ ಪನೋರಮಾದಲ್ಲಿ ಆಯ್ಕೆಯಾಗಿದೆ. ಅಜ್ಜಿಯಿಂದ ಸಾಂಪ್ರದಾಯಿಕ ಗಿಡಮೂಲಿಕೆ ವೈದ್ಯಕೀಯ ಜ್ಞಾನವನ್ನು ಕಲಿಯುವ ಬುಡಕಟ್ಟು ಸಮುದಾಯದ ಮಹಿಳೆಯ ಕಥೆಯನ್ನು ಈ ಚಿತ್ರ ಒಳಗೊಂಡಿದೆ.

ಅಜ್ಜಿ ಸಾವಿನ ಮುನ್ನ ಆಕೆಗೆ ಕಾಡಿನ ಚಿಕಿತ್ಸಾ ಜ್ಞಾನವನ್ನು ಹೊಂದಿದೆ ಎಂದು ನಂಬಲಾದ ಪವಿತ್ರ ಕಲ್ಲೊಂದನ್ನು ನೀಡುತ್ತಾಳೆ. ಅದನ್ನು ತನ್ನ ಸಮುದಾಯದ ಜನರ ನೆರವಿಗೆ ಬಳಸುವ ಮಹಿಳೆಯ ಪ್ರಯತ್ನ, ಆ ಕಲ್ಲನ್ನು ತಮ್ಮದಾಗಿಸಿಕೊಳ್ಳಲು ಯತ್ನಿಸುವವರ ವಿರುದ್ಧದ ಹೋರಾಟ ಚಿತ್ರದ ಪ್ರಮುಖ ಅಂಶವಾಗಿದೆ.

ಗಿರೀಶ್ ಕಾಸರವಳ್ಳಿ ಅವರ ಐದು ದಶಕಗಳ ಸಿನಿಮಾ ಪಯಣಕ್ಕೆ ಗೌರವ : ಈ ಬಾರಿಯ IFFIಯಲ್ಲಿ ಕನ್ನಡ ಚಿತ್ರರಂಗದ ಹಿರಿಯ ನಿರ್ದೇಶಕ ಗಿರೀಶ್ ಕಾಸರವಳ್ಳಿ ಅವರ ಐದು ದಶಕಗಳ ಸಿನಿಮಾ ಪಯಣಕ್ಕೂ ವಿಶೇಷ ಗೌರವ ಸಲ್ಲಿಸಲಾಗುತ್ತಿದೆ.

ನವೆಂಬರ್ 21ರಂದು ‘ದಿ ಮೋರಲ್ ಯೂನಿವರ್ಸ್ ಆಫ್ ಪ್ಯಾರಲಲ್ ಸಿನಿಮಾ: 50 ಇಯರ್ಸ್ ಆಫ್ ಗಿರೀಶ್ ಕಾಸರವಳ್ಳಿ’ ಎಂಬ ವಿಶೇಷ ಸಂವಾದ ಕಾರ್ಯಕ್ರಮ ಆಯೋಜಿಸಲಾಗಿದೆ. ಅವರ ಚಿತ್ರಯಾನ, ಸಮಾನಾಂತರ ಸಿನಿಮಾದ ಬೆಳವಣಿಗೆ ಹಾಗೂ ಭಾರತೀಯ ಚಿತ್ರರಂಗಕ್ಕೆ ನೀಡಿದ ಕೊಡುಗೆಯನ್ನು ಈ ಕಾರ್ಯಕ್ರಮದಲ್ಲಿ ಚರ್ಚಿಸಲಾಗುತ್ತದೆ.

ಒಟ್ಟಿನಲ್ಲಿ, ವಾಣಿಜ್ಯ ಯಶಸ್ಸು ಪಡೆದ ‘ಕಾಂತಾರ’ದಿಂದ ಹಿಡಿದು ಕುಟುಂಬ ಸಂಬಂಧಗಳು, ಮಾನವೀಯ ಭಾವನೆಗಳು ಮತ್ತು ಸಾಮಾಜಿಕ ಹೋರಾಟಗಳನ್ನು ದಾಖಲಿಸುವ ಚಿತ್ರಗಳವರೆಗೆ ಕನ್ನಡದ ವಿಭಿನ್ನ ಕಥನಗಳಿಗೆ ಈ ಬಾರಿಯ ಚಲನಚಿತ್ರೋತ್ಸವದಲ್ಲಿ ಅವಕಾಶ ಸಿಕ್ಕಿದೆ.

ತುಳು ಚಿತ್ರಕ್ಕೂ ದೊರೆತಿರುವ ಮನ್ನಣೆ ಕರಾವಳಿಯ ಪ್ರಾದೇಶಿಕ ಭಾಷಾ ಸಿನಿಮಾಗಳಿಗೆ ಮತ್ತಷ್ಟು ಗುರುತನ್ನು ತಂದುಕೊಡುವ ನಿರೀಕ್ಷೆಯಿದೆ. ನವೆಂಬರ್ 20ರಿಂದ ಆರಂಭವಾಗುವ ಉತ್ಸವದಲ್ಲಿ ಈ ಚಿತ್ರಗಳ ಪ್ರದರ್ಶನದ ಮೂಲಕ ಕನ್ನಡ ಮತ್ತು ತುಳು ಸಿನಿಮಾಗಳು ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಪ್ರೇಕ್ಷಕರ ಗಮನ ಸೆಳೆಯುವ ಅವಕಾಶ ಪಡೆದಿವೆ.