ಮುಂಬಯಿ: ಪ್ರತಿಷ್ಠಿತ ʻಟೈಮ್ʼ ನಿಯತಕಾಲಿಕೆಯು ತನ್ನ ಮೊದಲ ಅಂತಾರಾಷ್ಟ್ರೀಯ ʻಟೈಮ್ 100 ನೆಕ್ಸ್ಟ್ʼ (TIME100 Next) ಪಟ್ಟಿಯನ್ನು ಪ್ರಕಟಿಸಿದ್ದು, ವ್ಯಾಪಾರ, ವಿಜ್ಞಾನ, ಕ್ರೀಡೆ ಮತ್ತು ಕಲೆಯಂತಹ ವಿವಿಧ ಕ್ಷೇತ್ರಗಳಲ್ಲಿ ಭರವಸೆ ಮೂಡಿಸುತ್ತಿರುವ 100 ಉದಯೋನ್ಮುಖ ಭಾರತೀಯ ಸಾಧಕರನ್ನು ಹೆಸರಿಸಿದೆ.
ಪ್ರಮುಖ ಪಾಲುದಾರ ಸಂಸ್ಥೆಯಾದ ರಿಲಯನ್ಸ್ ಸಹಯೋಗದೊಂದಿಗೆ ರೂಪುಗೊಂಡಿರುವ ಈ ಚೊಚ್ಚಲ ಸಂಚಿಕೆಯ ಮೂರು ಜಾಗತಿಕ ಮುಖಪುಟಗಳ ಪೈಕಿ ಎರಡರಲ್ಲಿ ಬಾಲಿವುಡ್ ನಟಿ ಆಲಿಯಾ ಭಟ್ ಮತ್ತು ʻಸ್ಕೈರೂಟ್ ಏರೋಸ್ಪೇಸ್ʼ ಮುಖ್ಯಸ್ಥ ಪವನ್ ಕುಮಾರ್ ಚಂದನ ಕಾಣಿಸಿಕೊಂಡಿದ್ದಾರೆ.
ಟೈಮ್ ಗುರುವಾರ ಬಿಡುಗಡೆ ಮಾಡಿರುವ ಪತ್ರಿಕಾ ಪ್ರಕಟಣೆಯ ಪ್ರಕಾರ, ʻಟೈಮ್ 100 ನೆಕ್ಸ್ಟ್ ಇಂಡಿಯಾʼ ಪಟ್ಟಿಯು ʻಟೈಮ್ 100 ನೆಕ್ಸ್ಟ್ʼ ಸರಣಿಯ ಮೊದಲ ಅಂತಾರಾಷ್ಟ್ರೀಯ ಪಟ್ಟಿಯಾಗಿದೆ. ತಮ್ಮ ಕೆಲಸ ಮತ್ತು ದೂರದೃಷ್ಟಿಯ ಮೂಲಕ ಭಾರತದ ಭವಿಷ್ಯವನ್ನು ರೂಪಿಸುತ್ತಿರುವ 100 ಯುವ ನಾಯಕರನ್ನು ಇದು ಗುರುತಿಸಿದೆ. ಭಾರತ ಮತ್ತು ಪ್ರಪಂಚದಾದ್ಯಂತ ಕಾರ್ಯನಿರ್ವಹಿಸುತ್ತಿರುವ ಟೈಮ್ ಪತ್ರಕರ್ತರು ಈ ಪಟ್ಟಿಯನ್ನು ಆಯ್ಕೆ ಮಾಡಿದ್ದಾರೆ. ವ್ಯಾಪಾರ, ಮನರಂಜನೆ, ವಿಜ್ಞಾನ, ಕ್ರೀಡೆ, ಸಾಮಾಜಿಕ ಹೋರಾಟ ಸೇರಿದಂತೆ ನಾನಾ ಕ್ಷೇತ್ರಗಳ ಈ ಸಾಧಕರ ಯಶೋಗಾಥೆಯನ್ನು ಜಾಗತಿಕ ಮಟ್ಟದಲ್ಲಿ ಜನತೆಗೆ ತಲುಪಿಸುವುದು ಇದರ ಉದ್ದೇಶವಾಗಿದೆ.
ಡಿಸೆಂಬರ್ 7 ರಂದು ʻಟೈಮ್ 100 ನೆಕ್ಸ್ಟ್ ಇಂಡಿಯಾʼ ವಿಶೇಷ ಸಂಚಿಕೆ ಜಾಗತಿಕವಾಗಿ ಬಿಡುಗಡೆಯಾಗಲಿದೆ. ಇದು ಮೂರು ಜಾಗತಿಕ ಮುಖಪುಟಗಳು ಮತ್ತು ವಿಶೇಷ ವ್ಯಕ್ತಿಚಿತ್ರಗಳನ್ನು ಒಳಗೊಂಡಿರಲಿದ್ದು, TIME.com ವೆಬ್ಸೈಟ್ನಲ್ಲಿಯೂ ಹೆಚ್ಚಿನ ವಿವರಗಳು ಲಭ್ಯವಿರಲಿವೆ.
ಮುಖಪುಟಗಳಲ್ಲಿ ನಟಿ ಆಲಿಯಾ ಭಟ್: ಸ್ಕೈರೂಟ್ ಸಹ-ಸಂಸ್ಥಾಪಕ, ಸಿಇಒ ಮತ್ತು ಸಿಟಿಒ ಪವನ್ ಕುಮಾರ್ ಚಂದನ ಹಾಗೂ ಯುವ ನಿರ್ದೇಶಕರಾದ ಆರ್ಯನ್ ಖಾನ್, ಪಾಯಲ್ ಕಪಾಡಿಯಾ ಮತ್ತು ತೇಜಾ ರಿಯೊ ಅವರ ಸಮೂಹ ಚಿತ್ರ ರಾರಾಜಿಸಲಿದೆ.
ಸಾಧಕರ ಬಗ್ಗೆ ಗಣ್ಯರ ಬರಹ: ಟೈಮ್ 100 ಸಂಪ್ರದಾಯದಂತೆ, ಈ ಪಟ್ಟಿಯಲ್ಲಿ ಸ್ಥಾನ ಪಡೆದವರ ಬಗ್ಗೆ ಖ್ಯಾತ ಗಣ್ಯರು ವಿಶೇಷ ಲೇಖನಗಳನ್ನು ಬರೆದಿದ್ದಾರೆ. ಆಲಿಯಾ ಭಟ್ ಬಗ್ಗೆ ಖ್ಯಾತ ನಿರ್ದೇಶಕ ಎಸ್.ಎಸ್. ರಾಜಮೌಳಿ, ನಟ ವೇದಾಂಗ್ ರೈನಾ ಬಗ್ಗೆ ನಿರ್ದೇಶಕ ಇಮ್ತಿಯಾಜ್ ಅಲಿ, ನಟಿ ಪಾರ್ವತಿ ತಿರುವೋತ್ತು ಬಗ್ಗೆ ನಟಿ ರಿಚಾ ಚಡ್ಡಾ, ನಿರ್ದೇಶಕ ಆರ್ಯನ್ ಖಾನ್ ಬಗ್ಗೆ ಚಿತ್ರನಿರ್ಮಾಪಕ ವಿಶಾಲ್ ಭಾರದ್ವಾಜ್, ಗಾಯಕ ಫಹೀಮ್ ಅಬ್ದುಲ್ಲಾ ಬಗ್ಗೆ ಆಸ್ಕರ್ ವಿಜೇತ ಎ.ಆರ್. ರೆಹಮಾನ್, ಸಂಗೀತ ಸಂಯೋಜಕ ಅನಿರುದ್ಧ್ ರವಿಚಂದರ್ ಬಗ್ಗೆ ನಟ ಅಲ್ಲು ಅರ್ಜುನ್, ಯುವ ಕ್ರಿಕೆಟಿಗ ವೈಭವ್ ಸೂರ್ಯವಂಶಿ ಬಗ್ಗೆ ನಟ ಆಯುಷ್ಮಾನ್ ಖುರಾನಾ ಹಾಗೂ ನಟಿ ಕನಿ ಕುಸ್ರುತಿ ಬಗ್ಗೆ ನಿರ್ಮಾಪಕಿ ಶ್ರುತಿ ಗಂಗೂಲಿ ಲೇಖನಗಳನ್ನು ಬರೆದಿದ್ದಾರೆ.
ಪಟ್ಟಿಯಲ್ಲಿರುವ ಪ್ರಮುಖರು ಯಾರು?: ಮನರಂಜನಾ ಕ್ಷೇತ್ರದಿಂದ ಅಲಿ ಫಜಲ್, ನಯನತಾರಾ, ಸಾಯಿ ಪಲ್ಲವಿ, ವಿಕ್ಕಿ ಕೌಶಲ್ ಮತ್ತು ಪಾ. ರಂಜಿತ್ ಸ್ಥಾನ ಪಡೆದಿದ್ದಾರೆ. ಸಂಗೀತ ಕ್ಷೇತ್ರದಲ್ಲಿ ದಿಲ್ಜಿತ್ ದೋಸಾಂಜ್, ಪ್ರತೀಕ್ ಕುಹಾಡ್, ಅರಿವು ಮತ್ತು ಜಸ್ಲೀನ್ ರಾಯಲ್ ಮಿಂಚಿದ್ದಾರೆ. ಕ್ರೀಡಾ ಕ್ಷೇತ್ರದಿಂದ ಕ್ರಿಕೆಟರ್ ಹರ್ಮನ್ಪ್ರೀತ್ ಕೌರ್, ಬಾಕ್ಸರ್ ಲವ್ಲಿನಾ ಬೊರ್ಗೊಹೈನ್, ಟೆನಿಸ್ ತಾರೆ ಸಾನಿಯಾ ಮಿರ್ಜಾ, ಹಾಕಿ ಆಟಗಾರ್ತಿ ಸವಿತಾ ಪೂನಿಯಾ ಮತ್ತು ವೈಭವ್ ಸೂರ್ಯವಂಶಿ ಆಯ್ಕೆಯಾಗಿದ್ದಾರೆ.
ವ್ಯಾಪಾರ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಪಿಯೂಷ್ ಬನ್ಸಾಲ್, ರಾಧಿಕಾ ಗುಪ್ತಾ, ತರುಣ್ ಮೆಹ್ತಾ, ಅಲ್ಬಿಂದರ್ ಸಿಂಗ್ ದಿಂಡ್ಸಾ ಮತ್ತು ಕೇಶವ್ ಸೂರಿ ಇದ್ದಾರೆ. ಆರೋಗ್ಯ ಮತ್ತು ವಿಜ್ಞಾನ ಕ್ಷೇತ್ರದ ಸಂಶೋಧಕರಲ್ಲಿ ಶುಭಾಂಶು ಶುಕ್ಲಾ, ನೀನಾ ಗುಪ್ತಾ, ಅಂಜನಾ ಬದ್ರಿನಾರಾಯಣನ್ ಮತ್ತು ಅಕ್ಸಾ ಶೇಖ್ ಸ್ಥಾನ ಪಡೆದಿದ್ದರೆ, ಸಾಮಾಜಿಕ ಹೋರಾಟಗಾರರ ಪಟ್ಟಿಯಲ್ಲಿ ಗ್ರೇಸ್ ಬಾನು, ಕುಲದೀಪ್ ದಂತೇವಾಡಿಯಾ, ಆಕಾಶ್ ಸೇಥಿ ಮತ್ತು ಶಾಹೀನ್ ಮಲಿಕ್ ಗುರುತಿಸಿಕೊಂಡಿದ್ದಾರೆ. ಫ್ಯಾಷನ್, ಕಲೆ, ಮಾಧ್ಯಮ, ಸಾಹಿತ್ಯ ಮತ್ತು ಅಡುಗೆ ವಿಭಾಗದಲ್ಲಿ ಮಸಾಬಾ ಗುಪ್ತಾ, ಮೀನಾ ಕಂದಸಾಮಿ, ಪ್ರತೀಕ್ ಸಾಧು ಮತ್ತು ದೀಪಾ ಬುಲ್ಲರ್-ಖೋಸ್ಲಾ ಮುಂತಾದವರಿದ್ದಾರೆ.
“ಭಾರತವು ಅಸಾಧಾರಣ ಪೀಳಿಗೆಯ ನಾಯಕರ ತವರೂರಾಗಿದೆ. ಅವರ ಆಲೋಚನೆಗಳು ಮತ್ತು ಪ್ರಭಾವವು ಆಯಾ ಉದ್ಯಮಗಳನ್ನು ಹಾಗೂ ದೇಶದ ಭವಿಷ್ಯವನ್ನು ರೂಪಿಸುವುದರ ಜೊತೆಗೆ ಜಾಗತಿಕ ಮಟ್ಟದಲ್ಲೂ ಪ್ರಭಾವ ಬೀರುತ್ತಿದೆ. ಮುಂದಿನ ಭವಿಷ್ಯವನ್ನು ನಿರ್ಧರಿಸುವವರನ್ನು ಗುರುತಿಸಲು ಈ ಪಟ್ಟಿ ನಮಗೆ ಉತ್ತಮ ಅವಕಾಶ ನೀಡಿದೆ” ಎಂದು ಟೈಮ್ ಸಿಇಒ ಜೆಸ್ಸಿಕಾ ಸಿಬ್ಲಿ ಹೇಳಿದ್ದಾರೆ. ಅಲ್ಲದೆ, ಟೈಮ್ 100 ಸಮುದಾಯದ ಈ ಹೊಸ ಅಧ್ಯಾಯಕ್ಕೆ ಕೈಜೋಡಿಸಿದ ರಿಲಯನ್ಸ್ ಸಂಸ್ಥೆಗೆ ಅವರು ಧನ್ಯವಾದ ಅರ್ಪಿಸಿದ್ದಾರೆ.
ಪ್ರಧಾನ ಸಂಪಾದಕ ಸ್ಯಾಮ್ ಜೇಕಬ್ಸ್ ಓದುಗರಿಗೆ ಬರೆದ ಪತ್ರದಲ್ಲಿ, “ಜಾಗತಿಕ ಮಟ್ಟದ 100 ಜನರ ಪಟ್ಟಿಯು ಭಾರತದಂತಹ ವಿಶ್ವದ ಅತಿದೊಡ್ಡ ಮತ್ತು ಅತ್ಯಂತ ಯುವ ಜನಸಂಖ್ಯೆಯನ್ನು ಹೊಂದಿರುವ ದೇಶದ ಪ್ರತಿಭೆಯ ಕೇವಲ ಒಂದು ಸಣ್ಣ ಝಲಕ್ ಮಾತ್ರ. ಈ ಪೀಳಿಗೆಯ ಆಲೋಚನೆಗಳು, ಮಹತ್ವಾಕಾಂಕ್ಷೆಗಳು ಮತ್ತು ನಾಯಕತ್ವವು ಇಡೀ ಜಗತ್ತನ್ನೇ ರೂಪಿಸಲಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದವರನ್ನು ಮಾತ್ರವಲ್ಲದೆ, ದೇಶದೊಳಗೆ ತಮ್ಮದೇ ಆದ ಛಾಪು ಮೂಡಿಸುತ್ತಿರುವವರನ್ನೂ ಗುರುತಿಸುವುದು ‘ಟೈಮ್ 100 ನೆಕ್ಸ್ಟ್ ಇಂಡಿಯಾ’ದ ಉದ್ದೇಶವಾಗಿದೆ” ಎಂದು ಬಣ್ಣಿಸಿದ್ದಾರೆ.
ಈ ಸಂಭ್ರಮವನ್ನು ಆಚರಿಸಲು, ಟೈಮ್ ಮತ್ತು ರಿಲಯನ್ಸ್ ಸಂಸ್ಥೆಗಳು ಡಿಸೆಂಬರ್ 12 ರಂದು ಮುಂಬೈನ ಜಿಯೋ ವರ್ಲ್ಡ್ ಕನ್ವೆನ್ಷನ್ ಸೆಂಟರ್ನಲ್ಲಿ ಚೊಚ್ಚಲ ‘ಟೈಮ್ 100 ನೆಕ್ಸ್ಟ್ ಇಂಡಿಯಾ ಗಾಲಾ’ (ಸಮಾರಂಭ) ಆಯೋಜಿಸಿವೆ. ಆಲಿಯಾ ಭಟ್, ಪವನ್ ಚಂದನ, ಪಾಯಲ್ ಕಪಾಡಿಯಾ, ಆರ್ಯನ್ ಖಾನ್ ಮತ್ತು ತೇಜಾ ರಿಯೊ ಸೇರಿದಂತೆ ಅನೇಕ ಗಣ್ಯರು ಇದರಲ್ಲಿ ಭಾಗವಹಿಸಲಿದ್ದು, ಫಹೀಮ್ ಅಬ್ದುಲ್ಲಾ ವಿಶೇಷ ಸಂಗೀತ ಕಾರ್ಯಕ್ರಮ ನೀಡಲಿದ್ದಾರೆ.
ಪಟ್ಟಿಯಲ್ಲಿ ಸ್ಥಾನ ಪಡೆದವರ ಸಂಪೂರ್ಣ ವಿವರ: ವ್ಯಾಪಾರ ಮತ್ತು ತಂತ್ರಜ್ಞಾನ (Business & Technology): ಅಜೈತಾ ಶಾ, ಅಲ್ಬಿಂದರ್ ಸಿಂಗ್ ದಿಂಡ್ಸಾ, ಅವೈಸ್ ಅಹ್ಮದ್, ಕ್ಲೇರ್ ಮಜುಂದಾರ್, ಕೇಶವ್ ಸೂರಿ, ಲಿಯೋ ಮಾವೆಲಿ, ಪವನ್ ಕುಮಾರ್ ಚಂದನ, ಪಿಯೂಷ್ ಬನ್ಸಾಲ್, ಪ್ರತ್ಯೂಷ್ ಕುಮಾರ್, ರಾಧಿಕಾ ಗುಪ್ತಾ, ಶ್ರೇ ಅಗರ್ವಾಲ್, ಶ್ರೇಯಾ ಮಿಶ್ರಾ, ಶಿವನ್ ಸಂತೋಷ್, ತಾನ್ಯಾ ಸಿಂಘಾಲ್, ತರುಣ್ ಮೆಹ್ತಾ
ಆರೋಗ್ಯ ಮತ್ತು ವಿಜ್ಞಾನ ಸಂಶೋಧಕರು (Health & Science Innovators): ಅನಿಶ್ ಮಾಲ್ಪಾನಿ, ಅಂಜನಾ ಬದ್ರಿನಾರಾಯಣನ್, ಅಕ್ಸಾ ಶೇಖ್, ಆರಾಧನಾ ರಾಯ್ ಗುಪ್ತಾ, ಆಶಿಮ್ ಸತ್ತಾರ್, ನೀನಾ ಗುಪ್ತಾ, ನೇಹಾ ಕಾಳೆ, ರೇವಂತ್ ಹಿಮತ್ಸಿಂಗ್ಕಾ, ಶುಭಾಂಶು ಶುಕ್ಲಾ, ಸೌಮ್ಯಾ ದಬ್ರಿವಾಲ್
ಮನರಂಜನೆ ಮತ್ತು ಪ್ರದರ್ಶನ ಕಲೆಗಳು (Entertainment & Performing Arts): ಅಲಿ ಫಜಲ್, ಅನುಪರ್ಣಾ ರಾಯ್, ಆರುಷಿ ಮುದ್ಗಲ್, ಇಪ್ಸಿತಾ ಚಕ್ರವರ್ತಿ ಸಿಂಗ್, ಇಶಾನ್ ಖಟ್ಟರ್, ನಯನತಾರಾ, ಪಾ. ರಂಜಿತ್, ಸಾಯಿ ಪಲ್ಲವಿ, ವೇದಾಂಗ್ ರೈನಾ, ವಿಕ್ಕಿ ಕೌಶಲ್, ಜಹಾನ್ ಕಪೂರ್
ಸಂಗೀತಜ್ಞರು (Musicians): ಅನಿರುದ್ಧ್ ರವಿಚಂದರ್, ಅರಿವು, ದಿಲ್ಜಿತ್ ದೋಸಾಂಜ್, ಫಹೀಮ್ ಅಬ್ದುಲ್ಲಾ, ಇಶಾನ್ ಘೋಷ್, ಜಸ್ಲೀನ್ ರಾಯಲ್, ಪ್ರತೀಕ್ ಕುಹಾಡ್
ಕ್ರೀಡಾಪಟುಗಳು (Athletes): ಹರ್ಮನ್ಪ್ರೀತ್ ಕೌರ್, ಲವ್ಲಿನಾ ಬೊರ್ಗೊಹೈನ್, ಸಾನಿಯಾ ಮಿರ್ಜಾ, ಸವಿತಾ ಪೂನಿಯಾ, ವೈಭವ್ ಸೂರ್ಯವಂಶಿ, ವಿತ್ಯಾ ರಾಮ್ರಾಜ್
ಫ್ಯಾಷನ್, ಕಲೆ, ಮಾಧ್ಯಮ ಮತ್ತು ಅಡುಗೆ (Fashion, Arts, Media & Culinary): ಅನಂತ್ ಗೋಯೆಂಕಾ ಮತ್ತು ಅನಂತ್ ನಾಥ್, ಭವಿತಾ ಮಂಡವ ಮತ್ತು ಭವ್ಯಾ ರಮೇಶ್, ಚಿಂತನ್ ಪಾಂಡ್ಯ ಮತ್ತು ಪ್ರತೀಕ್ ಸಾಧು, ದೇವಿ ಸೀತಾರಾಮ್ ಮತ್ತು ರಿತಿಕಾ ಮರ್ಚೆಂಟ್, ದೀಪಾ ಬುಲ್ಲರ್-ಖೋಸ್ಲಾ ಮತ್ತು ದಿಯಾ ಜೌಕಾನಿ, ಹುಸೇನ್ ಶಹಜಾದ್, ಮಸಾಬಾ ಗುಪ್ತಾ, ಮಯೂರ್ ವಯೇದಾ ಮತ್ತು ತುಷಾರ್ ವಯೇದಾ, ಮೀನಾ ಕಂದಸಾಮಿ ಮತ್ತು ಮೀರಾ ದೇವಿ,ಪದ್ಮಾ ಯಾಂಗ್ಚನ್ ಮತ್ತು ಸ್ಕಾರ್ಮಾ ಸೋನಮ್ ತಾಶಿ, ರಿತಿಕಾ ಚೋಪ್ರಾ ಮತ್ತು ಜೆಯಾದ್ ಮಸ್ರೂರ್ ಖಾನ್, ವಿಕ್ರಾಂತ್ ಭಿಸೆ






















