ನವದೆಹಲಿ: ಸಕ್ಕರೆಯ ಬೆಲೆ ಹಾಗೂ ಕಬ್ಬು ಬೆಳೆಗಾರರಿಗೆ ಪಾವತಿಸುವ ದರದ ಕುರಿತು ಚರ್ಚೆ ನಡೆಯುತ್ತಿರುವ ನಡುವೆಯೇ, ಕೇಂದ್ರ ಆಹಾರ ಮತ್ತು ಗ್ರಾಹಕ ವ್ಯವಹಾರಗಳ ಸಚಿವ ಪ್ರಲ್ಹಾದ್ ಜೋಶಿ ಅವರು ಸಕ್ಕರೆಯ ₹31ರ MSP ಕುರಿತು ಸ್ಪಷ್ಟನೆ ನೀಡಿದ್ದಾರೆ. ಸಕ್ಕರೆಗೆ ನಿಗದಿಪಡಿಸಿರುವ MSP ಎಂದರೆ Minimum Support Price ಅಲ್ಲ, ಅದು Minimum Selling Price (ಕನಿಷ್ಠ ಮಾರಾಟ ಬೆಲೆ) ಎಂದು ಅವರು ಹೇಳಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಸಂದೇಶ ನೀಡಿದ್ದು. ಸಕ್ಕರೆ ಕಾರ್ಖಾನೆಗಳು ಸರ್ಕಾರ ನಿಗದಿಪಡಿಸಿರುವ ₹31 ಪ್ರತಿ ಕೆ.ಜಿ.ಗಿಂತ ಕಡಿಮೆ ದರದಲ್ಲಿ ಸಕ್ಕರೆಯನ್ನು ಮಾರಾಟ ಮಾಡಬಾರದು. ಆದರೆ ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆ ದೊರೆಯುತ್ತಿದ್ದರೆ ಕಾರ್ಖಾನೆಗಳು ₹31ಕ್ಕಿಂತ ಹೆಚ್ಚಿನ ದರಕ್ಕೆ ಸಕ್ಕರೆಯನ್ನು ಮಾರಾಟ ಮಾಡಬಹುದು. ಅಂದರೆ ₹31 ಎನ್ನುವುದು ಮಾರುಕಟ್ಟೆಯ ಗರಿಷ್ಠ ಅಥವಾ ನಿಗದಿತ ಮಾರಾಟ ದರವಲ್ಲ; ಅದು ಕಾರ್ಖಾನೆ ಮಟ್ಟದಲ್ಲಿ ಸಕ್ಕರೆ ಮಾರಾಟಕ್ಕೆ ಸರ್ಕಾರ ನಿಗದಿಪಡಿಸಿರುವ ಕನಿಷ್ಠ ಮಿತಿಯಾಗಿದೆ.
ಕೇಂದ್ರ ಸರ್ಕಾರದ ಅಧಿಕೃತ ಸಕ್ಕರೆ ನೀತಿ ಪ್ರಕಾರ, ಸಕ್ಕರೆಯ Minimum Selling Price ವ್ಯವಸ್ಥೆಯನ್ನು 2018ರ ಜೂನ್‌ನಲ್ಲಿ ಜಾರಿಗೆ ತರಲಾಯಿತು. ಆರಂಭದಲ್ಲಿ ₹29 ಪ್ರತಿ ಕೆ.ಜಿ. ಇದ್ದ ಈ ದರವನ್ನು 2019ರ ಫೆಬ್ರವರಿ 14ರಿಂದ ₹31ಕ್ಕೆ ಹೆಚ್ಚಿಸಲಾಯಿತು. ಈ ದರವನ್ನು ಸಕ್ಕರೆ ಕಾರ್ಖಾನೆಗಳ ಉತ್ಪಾದನಾ ವೆಚ್ಚ ಹಾಗೂ ಕಬ್ಬಿನ FRP ಸೇರಿದಂತೆ ವಿವಿಧ ಅಂಶಗಳನ್ನು ಪರಿಗಣಿಸಿ ನಿಗದಿಪಡಿಸಲಾಗಿದೆ.
MSP ಮತ್ತು FRP ನಡುವೆ ವ್ಯತ್ಯಾಸ : ಇಲ್ಲಿ ಪ್ರಮುಖವಾಗಿ ಗಮನಿಸಬೇಕಾದ ಅಂಶವೆಂದರೆ ಸಕ್ಕರೆಯ MSP ಮತ್ತು ಕಬ್ಬಿನ FRP ಎರಡೂ ವಿಭಿನ್ನವಾಗಿವೆ. FRP ಎಂದರೆ Fair and Remunerative Price. ಇದು ಸಕ್ಕರೆ ಕಾರ್ಖಾನೆಗಳು ಕಬ್ಬು ಬೆಳೆಗಾರರಿಗೆ ಪಾವತಿಸಬೇಕಾದ ಕನಿಷ್ಠ ದರಕ್ಕೆ ಸಂಬಂಧಿಸಿದೆ. ಮತ್ತೊಂದೆಡೆ, ಸಕ್ಕರೆಯ MSP ಎನ್ನುವುದು ಕಾರ್ಖಾನೆಗಳಿಂದ ಸಕ್ಕರೆಯನ್ನು ಮಾರಾಟ ಮಾಡುವ ಕನಿಷ್ಠ ದರವಾಗಿದೆ. ಕೇಂದ್ರದ ಸಕ್ಕರೆ ನೀತಿಯಲ್ಲಿಯೂ ಈ ಎರಡನ್ನೂ ಪ್ರತ್ಯೇಕವಾಗಿ ವಿವರಿಸಲಾಗಿದೆ.
ಅಕ್ಟೋಬರ್ 1, 2026ರಿಂದ ಆರಂಭವಾಗಿರುವ ಹೊಸ ಸಕ್ಕರೆ ಋತುವಿನಲ್ಲಿ ಕಬ್ಬಿನ FRP ₹365 ಪ್ರತಿ ಕ್ವಿಂಟಲ್ ಆಗಿದೆ. ಕೇಂದ್ರ ಸರ್ಕಾರವು ರೈತರಿಗೆ ಕಬ್ಬಿಗೆ ಸಮರ್ಪಕ ಬೆಲೆ ದೊರೆಯುವಂತೆ FRP ನಿಗದಿಪಡಿಸುವುದರ ಜೊತೆಗೆ, ಸಕ್ಕರೆ ಉದ್ಯಮದ ಆರ್ಥಿಕ ಸ್ಥಿರತೆ ಮತ್ತು ಗ್ರಾಹಕರಿಗೆ ಸಮಂಜಸ ಬೆಲೆ ದೊರೆಯುವ ನಡುವಿನ ಸಮತೋಲನವನ್ನು ಕಾಯ್ದುಕೊಳ್ಳುವ ನೀತಿಗಳನ್ನು ಜಾರಿಗೊಳಿಸುತ್ತಿದೆ.
ಸಕ್ಕರೆಯ ಬೆಲೆ ಏರಿಳಿತದ ನಡುವೆ ಸ್ಪಷ್ಟನೆ : ಇತ್ತೀಚಿನ ತಿಂಗಳುಗಳಲ್ಲಿ ದೇಶೀಯ ಸಕ್ಕರೆ ಮಾರುಕಟ್ಟೆಯಲ್ಲಿ ಬೆಲೆ ಏರಿಳಿತ ಕಂಡುಬಂದಿದೆ. ಹಬ್ಬದ ಅವಧಿಯಲ್ಲಿ ಸಕ್ಕರೆಯ ಬೆಲೆ ಮತ್ತಷ್ಟು ಏರದಂತೆ ನೋಡಿಕೊಳ್ಳಲು ಕೇಂದ್ರ ಸರ್ಕಾರ ಸಕ್ಕರೆ ಕಾರ್ಖಾನೆಗಳಿಗೆ ಸಮರ್ಪಕ ಪ್ರಮಾಣದಲ್ಲಿ ಸಕ್ಕರೆ ಲಭ್ಯವಾಗುವಂತೆ ಮತ್ತು ಸಮಂಜಸ ದರದಲ್ಲಿ ಮಾರಾಟ ಮಾಡುವಂತೆ ಸೂಚಿಸಿದೆ. ಜೊತೆಗೆ ಸಕ್ಕರೆ ದಾಸ್ತಾನು ಹಾಗೂ ಮಾರುಕಟ್ಟೆ ಬೆಲೆಗಳ ಮೇಲೂ ನಿಗಾ ವಹಿಸಲಾಗಿದೆ.
ಸೆಪ್ಟೆಂಬರ್‌ನಲ್ಲಿ ಕೇಂದ್ರ ಸರ್ಕಾರ ನೀಡಿದ ಮಾಹಿತಿಯ ಪ್ರಕಾರ, ಎಕ್ಸ್-ಮಿಲ್ ಸಕ್ಕರೆ ಬೆಲೆಯಲ್ಲಿ ಸುಮಾರು 25% ಇಳಿಕೆ ಕಂಡುಬಂದಿದ್ದರೂ, ಅದರ ಸಂಪೂರ್ಣ ಲಾಭ ಚಿಲ್ಲರೆ ಗ್ರಾಹಕರಿಗೆ ಇನ್ನೂ ತಲುಪಿಲ್ಲ. ಇದೇ ಕಾರಣಕ್ಕೆ ವ್ಯಾಪಾರಿಗಳು, ಸಗಟು ಮಾರಾಟಗಾರರು ಮತ್ತು ಚಿಲ್ಲರೆ ವ್ಯಾಪಾರಿಗಳು ಬೆಲೆ ಇಳಿಕೆಯ ಪ್ರಯೋಜನವನ್ನು ಗ್ರಾಹಕರಿಗೆ ತಲುಪಿಸುವಂತೆ ಸರ್ಕಾರ ಮನವಿ ಮಾಡಿತ್ತು.
ಹೀಗಾಗಿ, ₹31ರ ಸಕ್ಕರೆ MSP ಅನ್ನು ಕಬ್ಬು ರೈತರಿಗೆ ನೀಡುವ ಕನಿಷ್ಠ ಬೆಲೆಯೆಂದು ಪರಿಗಣಿಸಬಾರದು. ಅದು ಸಕ್ಕರೆ ಕಾರ್ಖಾನೆಗಳು ದೇಶೀಯ ಮಾರುಕಟ್ಟೆಯಲ್ಲಿ ಸಕ್ಕರೆಯನ್ನು ಮಾರಾಟ ಮಾಡಬಹುದಾದ ಕನಿಷ್ಠ ಮಾರಾಟ ಬೆಲೆಯಾಗಿದ್ದು, ರೈತರಿಗೆ ಕಬ್ಬಿನ ದರಕ್ಕೆ ಸಂಬಂಧಿಸಿದಂತೆ FRP ಪ್ರತ್ಯೇಕ ವ್ಯವಸ್ಥೆಯಾಗಿದೆ.
ಪ್ರತಿ ಹೊಸ ಅಪ್‌ಡೇಟ್‌ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್‌ಡೇಟ್‌ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
