Virat Kohli: ಇಂದು ಮೇ 12. ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಇದೊಂದು ಭಾವುಕ ದಿನ. ಸರಿಯಾಗಿ ಒಂದು ವರ್ಷದ ಹಿಂದೆ, ಅಂದರೆ 2025ರ ಮೇ 12ರಂದು ‘ರನ್ ಮಷೀನ್’ ವಿರಾಟ್ ಕೊಹ್ಲಿ ಟೆಸ್ಟ್ ಕ್ರಿಕೆಟ್ಗೆ ಅನಿರೀಕ್ಷಿತವಾಗಿ ವಿದಾಯ ಹೇಳುವ ಮೂಲಕ ಕೋಟ್ಯಂತರ ಅಭಿಮಾನಿಗಳಿಗೆ ಆಘಾತ ನೀಡಿದ್ದರು.
ಇಂದು ಅವರ ನಿವೃತ್ತಿಯ ಮೊದಲ ವರ್ಷದ ವಾರ್ಷಿಕೋತ್ಸವದ ಸಂದರ್ಭದಲ್ಲಿ, ಇಡೀ ಕ್ರೀಡಾಲೋಕ ಬಿಳಿ ಉಡುಪಿನಲ್ಲಿ ಕೊಹ್ಲಿ ತೋರುತ್ತಿದ್ದ ಆ ಆಕ್ರಮಣಕಾರಿ ಆಟವನ್ನು ನೆನಪಿಸಿಕೊಳ್ಳುತ್ತಿದೆ.
ಟೆಸ್ಟ್ ಕ್ರಿಕೆಟ್ಗೆ ಹೊಸ ಜೀವ ತುಂಬಿದ್ದ ನಾಯಕ: ಟಿ20 ಕ್ರಿಕೆಟ್ನ ವೇಗದ ಅಬ್ಬರದ ನಡುವೆ ಟೆಸ್ಟ್ ಕ್ರಿಕೆಟ್ ತನ್ನ ಚಮಕನ್ನು ಕಳೆದುಕೊಳ್ಳುತ್ತಿದೆ ಎಂಬ ಮಾತುಗಳು ಕೇಳಿಬರುತ್ತಿದ್ದ ಕಾಲದಲ್ಲಿ, ಕೊಹ್ಲಿ ಈ ಸುದೀರ್ಘ ಮಾದರಿಯ ಕ್ರಿಕೆಟ್ಗೆ ಹೊಸ ಭಾಷ್ಯ ಬರೆದರು.
2011ರಲ್ಲಿ 269ನೇ ಟೆಸ್ಟ್ ಆಟಗಾರನಾಗಿ ಪದಾರ್ಪಣೆ ಮಾಡಿದ ದೆಹಲಿಯ ಈ ಹುಡುಗ, ಮುಂದೆ ಟೆಸ್ಟ್ ಕ್ರಿಕೆಟ್ ಕಂಡ ಶ್ರೇಷ್ಠ ನಾಯಕನಾಗಿ ಬೆಳೆದರು. ಅವರು ಟೆಸ್ಟ್ ಮೈದಾನಕ್ಕೆ ಇಳಿದರೆ ಸಾಕು, ಅಲ್ಲಿ ಬರೀ ಬ್ಯಾಟಿಂಗ್ ಮಾತ್ರವಲ್ಲ, ಒಂದು ಅದ್ಭುತ ಶಕ್ತಿ ಸಂಚಲನವಾಗುತ್ತಿತ್ತು.
ಅಂಕಿಅಂಶಗಳಲ್ಲಿ ಕೊಹ್ಲಿ ಸಾಮ್ರಾಜ್ಯ: ವಿರಾಟ್ ಕೊಹ್ಲಿ ತಮ್ಮ ವೃತ್ತಿಜೀವನದಲ್ಲಿ 123 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, 49.15ರ ಸರಾಸರಿಯಲ್ಲಿ 9,230 ರನ್ ಕಲೆಹಾಕಿದ್ದಾರೆ. ಇದರಲ್ಲಿ 30 ಭರ್ಜರಿ ಶತಕ ಹಾಗೂ 31 ಅರ್ಧಶತಕಗಳು ಸೇರಿವೆ. ದಕ್ಷಿಣ ಆಫ್ರಿಕಾ ವಿರುದ್ಧ ಸಿಡಿಸಿದ ಅಜೇಯ 254 ರನ್ ಇಂದಿಗೂ ಅವರ ವೈಯಕ್ತಿಕ ಗರಿಷ್ಠ ಮೊತ್ತವಾಗಿದೆ.
ನಾಯಕನಾಗಿ ಅವರು ಮಾಡಿದ ಸಾಧನೆ ಅದ್ವಿತೀಯ 68 ಪಂದ್ಯಗಳಲ್ಲಿ ಭಾರತವನ್ನು ಮುನ್ನಡೆಸಿದ ಕೊಹ್ಲಿ, 40 ಪಂದ್ಯಗಳಲ್ಲಿ ಜಯ ತಂದುಕೊಟ್ಟಿದ್ದಾರೆ. ಶೇ. 60ರಷ್ಟು ಗೆಲುವಿನ ಸರಾಸರಿ ಹೊಂದಿರುವ ಕೊಹ್ಲಿ, ಭಾರತದ ಅತ್ಯಂತ ಯಶಸ್ವಿ ಟೆಸ್ಟ್ ನಾಯಕ ಎನಿಸಿಕೊಂಡಿದ್ದಾರೆ.
ವಿದೇಶಿ ಮಣ್ಣಲ್ಲಿ ಭಾರತದ ಪಾರುಪತ್ಯ: ಕೊಹ್ಲಿ ನಾಯಕತ್ವದ ಅವಧಿಯಲ್ಲಿ ಭಾರತ ತಂಡ ವಿದೇಶಿ ಮಣ್ಣಿನಲ್ಲಿ ಸಿಂಹಸ್ವಪ್ನವಾಗಿತ್ತು. ವಿಶೇಷವಾಗಿ 2018-19ರ ಅವಧಿಯಲ್ಲಿ ಆಸ್ಟ್ರೇಲಿಯಾ ಮಣ್ಣಿನಲ್ಲಿ ಚೊಚ್ಚಲ ಬಾರಿಗೆ ಟೆಸ್ಟ್ ಸರಣಿ ಗೆದ್ದು ಇತಿಹಾಸ ನಿರ್ಮಿಸಿದ್ದು ಕೊಹ್ಲಿ ನಾಯಕತ್ವದ ಹೆಗ್ಗಳಿಕೆ. ಸತತ 42 ತಿಂಗಳುಗಳ ಕಾಲ ಐಸಿಸಿ ಟೆಸ್ಟ್ ಶ್ರೇಯಾಂಕದಲ್ಲಿ ಟೀಮ್ ಇಂಡಿಯಾವನ್ನು ನಂಬರ್ 1 ಸ್ಥಾನದಲ್ಲಿರಿಸಿದ ಸಾಧನೆ ಇವರ ಹೆಸರಲ್ಲಿದೆ.
ಅಭಿಮಾನಿಗಳ ಹಂಬಲ ಮತ್ತು ಕಂಬ್ಯಾಕ್ ವದಂತಿ: “ವೈಟ್ಸ್ನಲ್ಲಿ ಕಿಂಗ್ ಬಂದಾಗ ಸಿಗುವ ಕಿಕ್ಕೇ ಬೇರೆ” ಎನ್ನುತ್ತಾರೆ ಅಭಿಮಾನಿಗಳು. ಕೊಹ್ಲಿಯ ಆ ಜಿದ್ದಾಜಿದ್ದಿ, ವಿಕೆಟ್ ಬಿದ್ದಾಗ ಅವರು ಮಾಡುತ್ತಿದ್ದ ಸಂಭ್ರಮಾಚರಣೆ ಇಂದಿಗೂ ಮಿಸ್ಸಿಂಗ್. ಇತ್ತೀಚೆಗೆ ಭಾರತ ತಂಡ ಟೆಸ್ಟ್ ಕ್ರಿಕೆಟ್ನಲ್ಲಿ ಸಂಕಷ್ಟ ಎದುರಿಸಿದಾಗಲೆಲ್ಲಾ ಕೊಹ್ಲಿ ಮರಳಿ ಬರಲಿ ಎಂಬ ಕೂಗು ಕೇಳಿಬರುತ್ತಿದೆ.
ಆದರೆ, ಸದ್ಯಕ್ಕೆ ಅವರು ಏಕದಿನ ಮತ್ತು ಐಪಿಎಲ್ ಮೇಲೆ ಗಮನ ಹರಿಸಿದ್ದು, ಟೆಸ್ಟ್ ಕ್ರಿಕೆಟ್ಗೆ ಕಂಬ್ಯಾಕ್ ಮಾಡುವ ಸಾಧ್ಯತೆಗಳು ವಾಸ್ತವಕ್ಕೆ ದೂರವಾದ ಮಾತಾಗಿದೆ. ಆದರೂ, ಕ್ರಿಕೆಟ್ ಪ್ರೇಮಿಗಳ ಹೃದಯದಲ್ಲಿ ಕೊಹ್ಲಿ ಬಿಟ್ಟು ಹೋದ ಆ ‘ಬಿಳಿ ಉಡುಪಿನ ಸಿಂಹಾಸನ’ ಇಂದಿಗೂ ಹಾಗೆಯೇ ಖಾಲಿ ಇದೆ.
