ಚೆನ್ನೈ: ತಮಿಳುನಾಡು ಮುಖ್ಯಮಂತ್ರಿ ಹಾಗೂ ನಟ ದಳಪತಿ ವಿಜಯ್ ಭಾರತದ ಖ್ಯಾತ ಚೆಸ್ ಗ್ರಾಂಡ್ಮಾಸ್ಟರ್ ಆರ್. ಪ್ರಜ್ಞಾನಂದ ಅವರನ್ನು ವಿಶೇಷವಾಗಿ ಸನ್ಮಾನಿಸಿದ್ದಾರೆ. ಇತ್ತೀಚೆಗೆ ನಡೆದ ಪ್ರತಿಷ್ಠಿತ ‘ನಾರ್ವೆ ಚೆಸ್ 2026’ ಟೂರ್ನಿಯಲ್ಲಿ ಚಾಂಪಿಯನ್ ಆಗಿ ಐತಿಹಾಸಿಕ ಸಾಧನೆ ಮಾಡಿದ ಗೌರವಾರ್ಥವಾಗಿ, ಪ್ರಜ್ಞಾನಂದ ಅವರಿಗೆ ಸಿಎಂ ವಿಜಯ್ 50 ಲಕ್ಷ ರೂಪಾಯಿಗಳ ನಗದು ಬಹುಮಾನವನ್ನು ನೀಡಿ ಪ್ರೋತ್ಸಾಹಿಸಿದ್ದಾರೆ.
ಈ ಭೇಟಿಯ ವೇಳೆ ಒಂದು ವಿಶೇಷ ಪ್ರಸಂಗ ಜರುಗಿತು. ಮುಖ್ಯಮಂತ್ರಿಗಳ ಕಚೇರಿಯಿಂದ ತಮಗೆ ಚೆಸ್ ಬೋರ್ಡ್ನೊಂದಿಗೆ ಬರುವಂತೆ ಸೂಚಿಸಲಾಗಿತ್ತು ಎಂದು ಪ್ರಜ್ಞಾನಂದ ತಿಳಿಸಿದ್ದಾರೆ. ಸಿಎಂ ವಿಜಯ್ ತಮ್ಮೊಂದಿಗೆ ಸ್ವತಃ ಚೆಸ್ ಆಡುತ್ತಾರೆ ಎಂದು ತಾವು ಊಹಿಸಿರಲಿಲ್ಲ ಎಂದು, ಇಬ್ಬರ ನಡುವೆ ಸುಮಾರು 15 ನಿಮಿಷಗಳ ಕಾಲ ರೋಚಕ ಚೆಸ್ ಪಂದ್ಯ ನಡೆಯಿತು ಎಂದು ಸಂತಸ ಹಂಚಿಕೊಂಡಿದ್ದಾರೆ. “ನಾವು 15 ನಿಮಿಷಗಳ ಕಾಲ ಚೆಸ್ ಆಡಿದೆವು ಮತ್ತು ಆ ಪಂದ್ಯದಲ್ಲಿ ನಾನೇ ಗೆದ್ದೆ. ಸಿಎಂ ವಿಜಯ್ ಅತ್ಯಂತ ಸರಳ ಹಾಗೂ ಪ್ರೋತ್ಸಾಹದಾಯಕ ವ್ಯಕ್ತಿಯಾಗಿದ್ದಾರೆ,” ಎಂದು ಪ್ರಜ್ಞಾನಂದ ಮಾಧ್ಯಮಗಳ ಎದುರು ತಮ್ಮ ಅಪೂರ್ವ ಅನುಭವವನ್ನು ಬಿಚ್ಚಿಟ್ಟಿದ್ದಾರೆ.
ಈ ಕುರಿತು ತಮಿಳುನಾಡು ಮುಖ್ಯಮಂತ್ರಿ ಕಚೇರಿ (CMO) ಅಧಿಕೃತವಾಗಿ ಟ್ವೀಟ್ ಮಾಡಿದ್ದು, ನಾರ್ವೆ ಚೆಸ್ 2026ರಲ್ಲಿ ಇತಿಹಾಸ ನಿರ್ಮಿಸಿದ ತಮಿಳುನಾಡಿನ ಹೆಮ್ಮೆಯ ಯುವ ಪ್ರತಿಭೆ ಪ್ರಜ್ಞಾನಂದ ಅವರಿಗೆ ಸರ್ಕಾರದಿಂದ 50 ಲಕ್ಷ ರೂ. ಪ್ರೋತ್ಸಾಹ ಧನ ನೀಡಿ ಗೌರವಿಸಲಾಗಿದೆ ಎಂದು ಪ್ರಕಟಿಸಿದೆ. ಮುಖ್ಯಮಂತ್ರಿಗಳ ಈ ನಡೆ ಕ್ರೀಡಾಪಟುಗಳಿಗೆ ಸಿಕ್ಕ ದೊಡ್ಡ ಬೆಂಬಲ ಎಂದು ಪ್ರಶಂಸೆ ವ್ಯಕ್ತವಾಗುತ್ತಿದೆ.
