ಸ್ಟ್ಯಾನ್ಫೋರ್ಡ್ನಲ್ಲಿ ಸುಂದರ್ ಪಿಚೈ ಪ್ರೇರಣಾದಾಯಕ ಭಾಷಣ: ‘ಮುಂದುವರಿಯಲು ದಾರಿ ಕಂಡುಕೊಳ್ಳಿ’ – ನಿಮ್ಮನ್ನು ರೋಮಾಂಚನಗೊಳಿಸುವ ಕೆಲಸವನ್ನು ಆರಿಸಿ, ‘ಆಶಾವಾದ, ಕಠಿಣ ಪರಿಶ್ರಮ ಮತ್ತು ಉತ್ಸಾಹವೇ ಯಶಸ್ಸಿನ ಗುಟ್ಟು’
ಅಮೆರಿಕದ ಪ್ರತಿಷ್ಠಿತ ಸ್ಟ್ಯಾನ್ಫೋರ್ಡ್ 135ನೇ ಪದವಿ ಪ್ರದಾನ ಸಮಾರಂಭದಲ್ಲಿ ಸುಂದರ್ ಪಿಚೈ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿ, ಜೀವನದಲ್ಲಿ ಎದುರಾಗುವ ಸವಾಲುಗಳ ನಡುವೆಯೂ ಆಶಾವಾದವನ್ನು ಕಾಪಾಡಿಕೊಳ್ಳುವುದು, ಕಠಿಣ ಕೆಲಸಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಹಾಗೂ ಮನಸ್ಸಿಗೆ ಉತ್ಸಾಹ ನೀಡುವ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುವುದು ಯಶಸ್ಸಿನ ಪ್ರಮುಖ ಸೂತ್ರಗಳಾಗಿವೆ ಎಂದು ಹೇಳಿದರು.
2026ರ ಪದವೀಧರರನ್ನು ಅಭಿನಂದಿಸಿದ ಪಿಚೈ, ತಮ್ಮ ಜೀವನದ ಅನುಭವಗಳನ್ನು ಹಂಚಿಕೊಳ್ಳುತ್ತಾ, ಎಲ್ಲ ನಿರ್ಧಾರಗಳೂ ಪರಿಪೂರ್ಣವಾಗಿರಬೇಕೆಂಬ ಅವಶ್ಯಕತೆ ಇಲ್ಲ. ಆದರೆ ಮುಂದೆ ಸಾಗಲು ದಾರಿ ಕಂಡುಕೊಳ್ಳುವುದು ಅತ್ಯಂತ ಮುಖ್ಯ ಎಂದು ತಿಳಿಸಿದರು.
‘ಜೀವನದ ಸಾವಿರಾರು ಕ್ಷಣಗಳು ನಿಮ್ಮ ಮುಂದೆ ಇವೆ’ : ಭಾಷಣದ ಆರಂಭದಲ್ಲೇ ಪಿಚೈ, ಜೀವನದಲ್ಲಿ ಕೆಲವು ನಿರ್ಧಾರಗಳು ಮಾತ್ರ ಅತ್ಯಂತ ಮಹತ್ವದ್ದಾಗಿರುತ್ತವೆ ಎಂದು ಹೇಳಿದರು. ಸಂಗಾತಿಯನ್ನು ಆಯ್ಕೆ ಮಾಡುವುದು, ಕುಟುಂಬವನ್ನು ಆರಂಭಿಸುವ ನಿರ್ಧಾರ, ವೃತ್ತಿಜೀವನದ ಪ್ರಮುಖ ತಿರುವುಗಳು ಇಂತಹ ನಿರ್ಧಾರಗಳಿಗೆ ಸಮಯ ಮತ್ತು ಚಿಂತನೆಯ ಅಗತ್ಯವಿದೆ ಎಂದರು.
ಆದರೆ ಬಹುತೇಕ ಸಂದರ್ಭಗಳಲ್ಲಿ ಜನರು ದೊಡ್ಡದಾಗಿ ಕಾಣುವ ಅನೇಕ ನಿರ್ಧಾರಗಳ ಬಗ್ಗೆ ಅತಿಯಾದ ಒತ್ತಡಕ್ಕೆ ಒಳಗಾಗುತ್ತಾರೆ ಎಂದು ಅವರು ಹೇಳಿದರು.
“ಮೊದಲ ಉದ್ಯೋಗ, ಯಾವ ನಗರದಲ್ಲಿ ವಾಸಿಸಬೇಕು, ಒಂದು ಪ್ರವಾಸಕ್ಕೆ ಹೋಗಬೇಕೇ ಬೇಡವೇ ಎಂಬ ನಿರ್ಧಾರಗಳು ಜೀವನದ ದಿಕ್ಕನ್ನು ಸಂಪೂರ್ಣವಾಗಿ ನಿರ್ಧರಿಸುವುದಿಲ್ಲ. ಮುಖ್ಯವಾದುದು ಎಂದರೆ ಮುಂದುವರಿಯುವ ದಾರಿ ಹುಡುಕುವುದು,” ಎಂದು ಅವರು ಹೇಳಿದರು.
ಮೊದಲ ಪಾಠ – ಆಶಾವಾದವನ್ನು ಆಯ್ಕೆ ಮಾಡಿ : ಜಗತ್ತು ಯುದ್ಧಗಳು, ಆರ್ಥಿಕ ಅನಿಶ್ಚಿತತೆ, ತಂತ್ರಜ್ಞಾನ ಬದಲಾವಣೆಗಳು ಮತ್ತು ಮಾಹಿತಿ ಪ್ರವಾಹದಂತಹ ಅನೇಕ ಸವಾಲುಗಳನ್ನು ಎದುರಿಸುತ್ತಿರುವುದನ್ನು ಉಲ್ಲೇಖಿಸಿದ ಪಿಚೈ, ಪ್ರತಿಯೊಂದು ಪೀಳಿಗೆಯೂ ತನ್ನದೇ ರೀತಿಯ ಕಷ್ಟಗಳನ್ನು ಎದುರಿಸಿದೆ ಎಂದು ನೆನಪಿಸಿದರು.
ತಮ್ಮ ಬಾಲ್ಯದ ನೆನಪುಗಳನ್ನು ಹಂಚಿಕೊಂಡ ಅವರು, ಭಾರತದಲ್ಲಿ ಬೆಳೆದಾಗ ಸಿಲಿಕಾನ್ ವ್ಯಾಲಿಯಲ್ಲಿ ಕೆಲಸ ಮಾಡುವ ಕನಸು ಕಂಡಿದ್ದನ್ನು ಹೇಳಿದರು. ಸ್ಟ್ಯಾನ್ಫೋರ್ಡ್ನಲ್ಲಿ ಪ್ರವೇಶ ದೊರೆತಾಗ ತಮ್ಮ ತಂದೆ ವಿಮಾನ ಟಿಕೆಟ್ ಖರೀದಿಸಲು ಒಂದು ವರ್ಷದ ಸಂಬಳದಷ್ಟು ಹಣ ಖರ್ಚು ಮಾಡಿದ್ದರು ಎಂದು ಅವರು ಸ್ಮರಿಸಿದರು.
“ನಾನು ಮೊದಲ ಬಾರಿಗೆ ವಿಮಾನದಲ್ಲಿ ಪ್ರಯಾಣ ಮಾಡಿದ್ದು ಸ್ಟ್ಯಾನ್ಫೋರ್ಡ್ಗೆ ಬರುತ್ತಿದ್ದಾಗಲೇ,” ಎಂದು ಅವರು ಹೇಳಿದರು.
ಎರಡನೇ ಪಾಠ – ಕಠಿಣ ಕೆಲಸಗಳತ್ತ ಆಕರ್ಷಿತರಾಗಿ : ಸ್ಟ್ಯಾನ್ಫೋರ್ಡ್ನಿಂದ ಹೊರಬಂದ ತಕ್ಷಣವೇ ಯಶಸ್ಸು ಸಿಕ್ಕಿರಲಿಲ್ಲ ಎಂದು ಪಿಚೈ ಒಪ್ಪಿಕೊಂಡರು. ತಮ್ಮ ವೃತ್ತಿಜೀವನದಲ್ಲಿ ಹಲವು ವರ್ಷಗಳ ಕಾಲ ಸರಿಯಾದ ದಾರಿಯಲ್ಲಿದ್ದೇನೆ ಎಂಬ ಭರವಸೆ ಕೂಡ ಇರಲಿಲ್ಲ ಎಂದರು.
2004ರಲ್ಲಿ ಗೂಗಲ್ಗೆ ಸಂದರ್ಶನಕ್ಕೆ ಹೋದ ದಿನವೇ Gmail ಆರಂಭವಾದ ದಿನವಾಗಿತ್ತು ಎಂದು ನೆನಪಿಸಿಕೊಂಡ ಅವರು, ಬಳಿಕ Google Chrome ಯೋಜನೆಯ ಬಗ್ಗೆ ವಿವರಿಸಿದರು.
ಅಸಾಧ್ಯವಾದುದನ್ನು 10 ಜನರ ತಂಡ ಸಾಧ್ಯವಾಗಿಸಿತ್ತು: ಆ ಸಮಯದಲ್ಲಿ ವೇಗವಾದ ಮತ್ತು ಶಕ್ತಿಶಾಲಿ ಬ್ರೌಸರ್ ನಿರ್ಮಿಸುವುದು ಅಸಾಧ್ಯವೆಂದು ಹಲವರು ಭಾವಿಸಿದ್ದರು. ನೂರಾರು ಎಂಜಿನಿಯರ್ಗಳ ಅಗತ್ಯವಿದೆ ಎಂಬ ಅಭಿಪ್ರಾಯವಿದ್ದರೂ, ಕೇವಲ ಹತ್ತು ಜನರ ತಂಡ ಆ ಕೆಲಸಕ್ಕೆ ಕೈಹಾಕಿತ್ತು.
2008ರಲ್ಲಿ Chrome ಬಿಡುಗಡೆಯಾದ ಬಳಿಕ ಆರಂಭಿಕ ಯಶಸ್ಸು ಕಂಡರೂ, ನಂತರ ಬಳಕೆದಾರರ ಬೆಳವಣಿಗೆ ನಿಧಾನಗೊಂಡಿತ್ತು. ಒಂದು ಹಂತದಲ್ಲಿ ಬ್ರೌಸರ್ ಮಾರುಕಟ್ಟೆಯಲ್ಲಿ ಕೇವಲ ಎರಡು ಶೇಕಡಾ ಪಾಲು ಮಾತ್ರ ಹೊಂದಿತ್ತು. ಆದರೂ ತಂಡ ಹಿಂತಿರುಗಲಿಲ್ಲ.
ನಿರಂತರ ಸುಧಾರಣೆ ಮತ್ತು ವೇಗದ ಅಭಿವೃದ್ಧಿಯ ಮೂಲಕ Chrome ವಿಶ್ವದ ಅತಿ ಜನಪ್ರಿಯ ಬ್ರೌಸರ್ಗಳಲ್ಲಿ ಒಂದಾಗಿ ಬೆಳೆಯಿತು ಎಂದು ಪಿಚೈ ವಿವರಿಸಿದರು.
“ಕಷ್ಟಕರವಾದ ಕೆಲಸಗಳು ಸಾಮಾನ್ಯವಾಗಿ ಅತ್ಯುತ್ತಮ ಜನರನ್ನು ಆಕರ್ಷಿಸುತ್ತವೆ. ಗುರಿ ತಲುಪದಿದ್ದರೂ, ನೀವು ಉತ್ತಮವಾದ ಸಾಧನೆಯನ್ನು ಮಾಡಿರುತ್ತೀರಿ,” ಎಂದು ಅವರು ಹೇಳಿದರು.
ಮೂರನೇ ಪಾಠ – ನಿಮ್ಮನ್ನು ರೋಮಾಂಚನಗೊಳಿಸುವ ಕೆಲಸವನ್ನು ಆರಿಸಿ : ತಮ್ಮ ಜೀವನದಲ್ಲಿ ತಂತ್ರಜ್ಞಾನದ ಮೇಲಿನ ಆಸಕ್ತಿಯೇ ದೊಡ್ಡ ಪ್ರೇರಣೆಯಾಗಿದೆ ಎಂದು ಪಿಚೈ ಹೇಳಿದರು. ಸ್ಟ್ಯಾನ್ಫೋರ್ಡ್ಗೆ ಬರುವವರೆಗೂ ಕಂಪ್ಯೂಟರ್ ಬಳಸುವ ಅವಕಾಶವೇ ಹೆಚ್ಚು ಸಿಕ್ಕಿರಲಿಲ್ಲ. ಆದರೆ ವಿಶ್ವವಿದ್ಯಾಲಯದಲ್ಲಿ ಕಂಪ್ಯೂಟರ್ಗಳ ಸಾಲುಗಳನ್ನು ಕಂಡ ಕ್ಷಣವೇ ತಂತ್ರಜ್ಞಾನದ ಭವಿಷ್ಯವನ್ನು ಅರ್ಥಮಾಡಿಕೊಂಡಿದ್ದೆ ಎಂದು ಅವರು ಹೇಳಿದರು.
“ಇಂಟರ್ನೆಟ್ ಮಾನವ ಪ್ರಗತಿಗೆ ಮೂಲಭೂತ ಸಾಧನವಾಗಲಿದೆ ಎಂಬ ವಿಶ್ವಾಸ ನನ್ನಲ್ಲಿತ್ತು. ಅದನ್ನು ಹೆಚ್ಚು ಜನರಿಗೆ ತಲುಪಿಸುವ ಕೆಲಸದಲ್ಲಿ ಭಾಗಿಯಾಗಬೇಕು ಎಂಬ ಉತ್ಸಾಹವೇ ನನ್ನನ್ನು ಗೂಗಲ್ಗೆ ಕರೆತಂದಿತು,” ಎಂದು ಹೇಳಿದರು. ಆಂಡ್ರಾಯ್ಡ್ ಸ್ಮಾರ್ಟ್ಫೋನ್ಗಳ ಮೂಲಕ ಗ್ರಾಮೀಣ ಭಾರತದ ಮಹಿಳೆಯರು ಹೊಸ ಕೌಶಲ್ಯಗಳನ್ನು ಕಲಿಯುವುದು ಮತ್ತು ತಮ್ಮ ಕುಟುಂಬದವರೊಂದಿಗೆ ಸಂಪರ್ಕದಲ್ಲಿರುವುದನ್ನು ಕಂಡ ಅನುಭವವನ್ನು ಅವರು ನೆನಪಿಸಿಕೊಂಡರು.
ವಿದ್ಯಾರ್ಥಿಗಳಿಗೆ ಅಂತಿಮ ಸಂದೇಶ : ತಮ್ಮ ಭಾಷಣದ ಕೊನೆಯಲ್ಲಿ ಪಿಚೈ, ಜೀವನದಲ್ಲಿ ಎಲ್ಲವನ್ನೂ ಪರಿಪೂರ್ಣವಾಗಿ ಮಾಡಲು ಯತ್ನಿಸುವುದಕ್ಕಿಂತ, ಮುಂದುವರಿಯುವ ದಾರಿಯನ್ನು ಕಂಡುಕೊಳ್ಳುವುದು ಮುಖ್ಯ ಎಂದು ಹೇಳಿದರು. “ಆಶಾವಾದವನ್ನು ಆರಿಸಿ, ಕಠಿಣ ಕೆಲಸಗಳತ್ತ ಹೆಜ್ಜೆ ಇಡಿ ಮತ್ತು ನಿಮ್ಮ ಹೃದಯವನ್ನು ಬೆಳಗುವಂತೆ ಮಾಡುವ ಕೆಲಸವನ್ನು ಆಯ್ಕೆ ಮಾಡಿ. ನಿಮ್ಮ ಮುಂದೆ ಸಾವಿರಾರು ಅವಕಾಶಗಳಿವೆ,” ಎಂದು ಅವರು ಪದವೀಧರರಿಗೆ ಕರೆ ನೀಡಿದರು.
