ಹೈದರಾಬಾದ್ನ ಆ ಒಂದು ತುಂಬಿದ ಕುಟುಂಬದಲ್ಲಿ ಎಲ್ಲವೂ ಸರಿಯಾಗಿಯೇ ಇದೆ ಎಂದು ಮೇಲ್ನೋಟಕ್ಕೆ ಅನ್ನಿಸುತ್ತಿತ್ತು. ಆದರೆ ಆ ಮನೆಯ ಗೋಡೆಗಳ ನಡುವೆ ಹಗೆತನದ ಕಿಚ್ಚು ಹೊಗೆಯಾಡುತ್ತಿತ್ತು. ಸಾಮಾನ್ಯವಾಗಿ ನಾವು ಸೀರಿಯಲ್ಗಳಲ್ಲಿ ಅಣ್ಣತಮ್ಮಂದಿರ ಮಕ್ಕಳ ನಡುವೆ ಮನೆಯ ಹಿರಿಯರು ತಾರತಮ್ಯ ಮಾಡುವುದನ್ನು, ಒಬ್ಬ ಮಗುವನ್ನು ಅತಿಯಾಗಿ ಪ್ರೀತಿಸಿ ಇನ್ನೊಬ್ಬನನ್ನು ನಿರ್ಲಕ್ಷಿಸುವುದನ್ನು ನೋಡಿರುತ್ತೇವೆ. ಆದರೆ ತೆಲಂಗಾಣದ ರಾಜಧಾನಿಯಲ್ಲಿ ನಡೆದ ಈ ಘಟನೆ ಸೀರಿಯಲ್ ಕಥೆಯನ್ನೂ ಮೀರಿಸುವಂತಹ ವಾಸ್ತವದ ಭೀಕರತೆಯನ್ನು ಅನಾವರಣಗೊಳಿಸಿದೆ. ಆ ಮನೆಯಲ್ಲಿ ಇಬ್ಬರು ಓರಗಿತ್ತಿಯರ ನಡುವೆ ಇದ್ದ ಸಣ್ಣ ಅಸೂಯೆ, ಕೊನೆಗೆ ಒಂದು ಪುಟ್ಟ ಮಗುವಿನ ಜೀವವನ್ನು ಬಲಿ ಪಡೆಯುವ ಹಂತಕ್ಕೆ ತಲುಪಿದ್ದು ಯಾರೂ ಊಹಿಸಿರದ ಸಂಗತಿ.
ಆ ಮನೆಯ ಹಿರಿಯರಾದ ಅಜ್ಜ ಮತ್ತು ಅಜ್ಜಿ, ಮನೆಯ ಇಬ್ಬರು ಮೊಮ್ಮಕ್ಕಳಲ್ಲಿ ಒಬ್ಬನ ಮೇಲೆ ಅತೀವವಾದ ಮಮಕಾರ ಹೊಂದಿದ್ದರು. ದೂರುದಾರ ಮಹಿಳೆಯ ಮಗನ ಮೇಲೆ ಅವರಿಗೆ ಎಲ್ಲಿಲ್ಲದ ಪ್ರೀತಿ. ಆ ಮಗು ಅಂಗಳದಲ್ಲಿ ಓಡಾಡಿದರೆ ಸಾಕು ಅಜ್ಜ ಮೈಮರೆಯುತ್ತಿದ್ದರು. ಇತ್ತೀಚೆಗಂತೂ ಆ ಮಗುವಿನ ಮೇಲಿದ್ದ ಅತಿಯಾದ ಪ್ರೀತಿಯಿಂದಾಗಿ ಅಜ್ಜ ತನ್ನ ಮೊಮ್ಮಗನ ಹೆಸರನ್ನೇ ಮೈಮೇಲೆ ಟ್ಯಾಟೂ ಹಾಕಿಸಿಕೊಂಡಿದ್ದರು. ಈ ಒಂದು ಘಟನೆ ಆರೋಪಿ ಮಹಿಳೆಯ ಮನಸ್ಸಿನಲ್ಲಿ ಮತ್ಸರದ ಜ್ವಾಲೆ ಏಳುವಂತೆ ಮಾಡಿತು. ತನ್ನ ಮಗುವೂ ಅದೇ ಮನೆಯ ಮೊಮ್ಮಗನಾಗಿದ್ದರೂ, ಹಿರಿಯರು ಅವನನ್ನು ಬಿಟ್ಟು ಇನ್ನೊಬ್ಬ ಮೊಮ್ಮಗನಿಗೆ ಇಷ್ಟೊಂದು ಪ್ರಾಧಾನ್ಯತೆ ನೀಡುತ್ತಿರುವುದನ್ನು ಅವಳಿಗೆ ಸಹಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ತನ್ನ ಮಗುವಿಗೆ ಸಿಗಬೇಕಾದ ಪ್ರೀತಿಯನ್ನು ಈ ಮಗು ಕಸಿದುಕೊಳ್ಳುತ್ತಿದ್ದಾನೆ ಎಂಬ ಕ್ರೂರ ಆಲೋಚನೆ ಅವಳ ತಲೆಯಲ್ಲಿ ಮನೆಮಾಡಿತು.
ಏಪ್ರಿಲ್ 9ರ ಆ ದುರ್ದಿನದಂದು ಮತ್ಸರದ ಈ ಕಿಚ್ಚು ವಿನಾಶದ ರೂಪ ಪಡೆಯಿತು. ಮನೆಯವರೆಲ್ಲರೂ ತಮ್ಮ ಕೆಲಸಗಳಲ್ಲಿ ಮಗ್ನರಾಗಿದ್ದಾಗ, ಆರೋಪಿ ಮಹಿಳೆ ಅಡುಗೆ ಮನೆಯಲ್ಲಿ ಒಂದು ಭೀಕರ ಸಂಚು ರೂಪಿಸಿದಳು. ತನ್ನ ಓರಗಿತ್ತಿಯ ಮಗುವನ್ನು ಕರೆದು, ಅತ್ಯಂತ ಪ್ರೀತಿಯಿಂದ ಮಾತನಾಡಿಸುವಂತೆ ನಟಿಸಿದಳು. ಮಗುವಿನ ಮುಂದೆ ಹಣ್ಣಿನ ಜ್ಯೂಸ್ನ ಲೋಟವನ್ನಿಟ್ಟ ಆಕೆ, ಆ ಜ್ಯೂಸ್ ಕುಡಿದರೆ ನಿನಗೆ ಚಾಕೋಲೇಟ್ ಕೊಡುತ್ತೇನೆ ಎಂದು ಆಮಿಷ ಒಡ್ಡಿದಳು. ಆ ಮುಗ್ಧ ಮಗುವಿಗೆ ತನ್ನ ಸ್ವಂತ ಚಿಕ್ಕಮ್ಮ ಕೊಡುತ್ತಿರುವ ಜ್ಯೂಸ್ನಲ್ಲಿ ಪ್ರೀತಿಯ ಬದಲು ಆಸಿಡ್ ಬೆರೆತಿದೆ ಎಂಬ ಕಿಂಚಿತ್ತೂ ಅರಿವಿರಲಿಲ್ಲ. ಚಾಕೋಲೇಟ್ ಸಿಗುತ್ತದೆ ಎಂಬ ಸಂಭ್ರಮದಲ್ಲಿ ಮಗು ಆ ವಿಷಪೂರಿತ ಪಾನೀಯವನ್ನು ಗುಟುಕರಿಸಿತು.
ಜ್ಯೂಸ್ ಕುಡಿಯುತ್ತಿದ್ದಂತೆಯೇ ಮಗು ತೀವ್ರವಾಗಿ ಅಸ್ವಸ್ಥಗೊಂಡು ಕಿರುಚಾಡಲು ಶುರುಮಾಡಿತು. ತಕ್ಷಣ ಮಗುವನ್ನು ಆಸ್ಪತ್ರೆಗೆ ದಾಖಲಿಸಿದ ಕಾರಣ ಆ ಪುಟ್ಟ ಜೀವ ಸಾವಿನ ದವಡೆಯಿಂದ ಪಾರಾಯಿತು. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದ ನಂತರ ಬಾಲಕ ಚೇತರಿಸಿಕೊಂಡಿದ್ದಾನೆ ಎಂದು ಮೆಡಿಪಲ್ಲಿ ಪೊಲೀಸರು ತಿಳಿಸಿದ್ದಾರೆ. ಮಗುವಿನ ತಾಯಿ ನೀಡಿದ ದೂರಿನ ಮೇರೆಗೆ ಪೊಲೀಸರು ತನಿಖೆ ಕೈಗೊಂಡಾಗ, ಅಸೂಯೆಯ ಈ ಕರಾಳ ಮುಖ ಬಯಲಿಗೆ ಬಂದಿದೆ. ಹಿರಿಯರು ತೋರಿದ ತಾರತಮ್ಯದ ಪ್ರೀತಿ ಹೇಗೆ ಒಂದು ಸುಂದರ ಕುಟುಂಬವನ್ನು ಛಿದ್ರಗೊಳಿಸಿತು ಮತ್ತು ಒಬ್ಬ ಮಹಿಳೆಯನ್ನು ಹಂತಕಿಯನ್ನಾಗಿ ಮಾಡಿತು ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಸದ್ಯ ಪೊಲೀಸರು ಆಕೆಯನ್ನು ಬಂಧಿಸಿ ಕೊಲೆಯತ್ನದ ಪ್ರಕರಣ ದಾಖಲಿಸಿದ್ದಾರೆ.
