AI image: Google Gemini
ಮನುಷ್ಯ ಮತ್ತು ಪ್ರಾಣಿಗಳ ನಡುವಿನ ಅವಿನಾಭಾವ ಸಂಬಂಧಕ್ಕೆ ಸಾಕ್ಷಿಯಾದ ಹೃದಯಸ್ಪರ್ಶಿ ಘಟನೆಯೊಂದು ಒಡಿಶಾದ ಮಯೂರಭಂಜ್ ಜಿಲ್ಲೆಯ ಪಟಾಪುರ ಗ್ರಾಮದಲ್ಲಿ ನಡೆದಿದೆ. ಗ್ರಾಮದ ಬೀದಿ ಶ್ವಾನವೊಂದು ತನ್ನ ಪ್ರಾಣವನ್ನೇ ಪಣಕ್ಕಿಟ್ಟು ಬರೋಬ್ಬರಿ 30ಕ್ಕೂ ಹೆಚ್ಚು ಶಾಲಾ ಮಕ್ಕಳನ್ನು ಭೀಕರ ವಿಷಸರ್ಪದಿಂದ ರಕ್ಷಿಸಿ, ತಾನು ಮೃತ್ಯುವನ್ನಪ್ಪಿದ ಘಟನೆ ಇಡೀ ಗ್ರಾಮವನ್ನೇ ಕಣ್ಣೀರಲ್ಲಿ ಮುಳುಗಿಸಿದೆ.
ಸೋಮವಾರ ಬೆಳಿಗ್ಗೆ ಸುಮಾರು 8:30ರ ಸಮಯದಲ್ಲಿ ಗ್ರಾಮದ ಶ್ರೀ ಜಗನ್ನಾಥ ಶಿಶು ವಿದ್ಯಾ ಮಂದಿರದ ಆವರಣದಲ್ಲಿ ಮಕ್ಕಳೆಲ್ಲರೂ ಶಾಲಾ ಪ್ರಾರ್ಥನೆಗಾಗಿ ಸಿದ್ಧರಾಗುತ್ತಿದ್ದರು. ಸುಮಾರು 30ಕ್ಕೂ ಹೆಚ್ಚು ಪುಟ್ಟ ಮಕ್ಕಳು ಆಟವಾಡುತ್ತಿದ್ದ ಸಂದರ್ಭದಲ್ಲಿ, ಪೊದೆಗಳ ನಡುವಿನಿಂದ ಬೃಹತ್ ಗಾತ್ರದ ವಿಷಪೂರಿತ ಕಾಳಿಂಗ ಸರ್ಪವೊಂದು ವೇಗವಾಗಿ ಮಕ್ಕಳಿದ್ದ ಜಾಗಕ್ಕೆ ನುಗ್ಗಲು ಪ್ರಯತ್ನಿಸಿತು. ಇದನ್ನು ಗಮನಿಸಿದ ಗ್ರಾಮದ ಬೀದಿ ಶ್ವಾನ ‘ಕಾಳಿ’, ಕ್ಷಣಮಾತ್ರವೂ ವಿಳಂಬ ಮಾಡದೆ ಹಾವಿನ ಮೇಲೆರಗಿತು. ಮಕ್ಕಳ ಮೇಲೆ ದಾಳಿ ಮಾಡಲು ಬಂದ ಹಾವನ್ನು ತಡೆಯಲು ಕಾಳಿ ತನ್ನ ಸರ್ವಶಕ್ತಿಯನ್ನು ಪ್ರಯೋಗಿಸಿತು.
ಸುಮಾರು ಹದಿನೈದು ನಿಮಿಷಗಳ ಕಾಲ ಶ್ವಾನ ಮತ್ತು ಹಾವಿನ ನಡುವೆ ಭೀಕರ ಕಾಳಗ ನಡೆಯಿತು. ಈ ಹೋರಾಟದ ವೇಳೆ ಹಾವಿನ ವಿಷಪೂರಿತ ಹಲ್ಲುಗಳು ಕಾಳಿಯ ದೇಹವನ್ನು ಹತ್ತಾರು ಬಾರಿ ಚುಚ್ಚಿದವು. ವಿಷದ ತೀವ್ರತೆಗೆ ಕಾಳಿಯ ದೇಹ ನಿತ್ರಾಣಗೊಳ್ಳುತ್ತಿದ್ದರೂ, ಅದು ಹಾವನ್ನು ಮಾತ್ರ ಬಿಡಲಿಲ್ಲ. ಅಂತಿಮವಾಗಿ ಹಾವನ್ನು ಕಚ್ಚಿ ಕೊಂದ ಬೀದಿ ಶ್ವಾನ ಕಾಳಿ, ಮಕ್ಕಳತ್ತ ಸಾವು ಸುಳಿಯದಂತೆ ನೋಡಿಕೊಂಡಿತು. ಆದರೆ, ಹಾವನ್ನು ಕೊಂದ ಕೆಲವೇ ನಿಮಿಷಗಳಲ್ಲಿ ಹಾವಿನ ತೀವ್ರ ವಿಷವು ಕಾಳಿಯ ದೇಹವನ್ನಾವರಿಸಿ, ಆ ನಾಯಿ ಶಾಲಾ ಆವರಣದಲ್ಲೇ ಕುಸಿದು ಬಿದ್ದು ಕೊನೆಯುಸಿರೆಳೆಯಿತು.
ಇದನ್ನು ಓದಿ: http://ಬೇಸಿಗೆಯ ಬಿಸಿಲಿಗೆ ತಂಪು ನೀಡುವ ಅಮೃತ: ಆರೋಗ್ಯವರ್ಧಕ ‘ಮಾವಿನಕಾಯಿ ಮಜ್ಜಿಗೆ’
ಮಕ್ಕಳ ಜೀವ ಉಳಿಸಿದ ಈ ಮೂಕ ಪ್ರಾಣಿಯ ಸಾಹಸಕ್ಕೆ ಗ್ರಾಮಸ್ಥರು ತಲೆಬಾಗಿದ್ದಾರೆ. ಕಾಳಿಯ ದೇಹಕ್ಕೆ ಹೂವಿನ ಹಾರಗಳನ್ನು ಹಾಕಿ, ಹೊಸ ಬಟ್ಟೆ ಹೊದಿಸಿ ಇಡೀ ಗ್ರಾಮದಾದ್ಯಂತ ಮೆರವಣಿಗೆ ಮಾಡಲಾಯಿತು. ಶಾಲೆಯ ಮಕ್ಕಳು ಮತ್ತು ಪೋಷಕರು ಕಣ್ಣೀರು ಸುರಿಸುತ್ತಾ ತಮ್ಮ ನೆಚ್ಚಿನ ಶ್ವಾನಕ್ಕೆ ಅಂತಿಮ ವಿದಾಯ ಸಲ್ಲಿಸಿದರು. “ಕಾಳಿ ಇಂದು ನಮ್ಮ ಪಾಲಿಗೆ ಕೇವಲ ನಾಯಿಯಲ್ಲ, ಅವಳು ನಮ್ಮ ಮಕ್ಕಳ ಪ್ರಾಣ ಉಳಿಸಿದ ದೇವತೆ” ಎಂದು ಗ್ರಾಮಸ್ಥರು ಭಾವುಕರಾಗಿ ನುಡಿದರು.
ಇಂದಿನ ಕಾಲದಲ್ಲಿ ಬೀದಿ ನಾಯಿಗಳನ್ನು ಕಂಡರೆ ಕಲ್ಲು ಹೊಡೆಯುವ ಅಥವಾ ಹಿಂಸಿಸುವ ಜನರ ನಡುವೆ, ಕಾಳಿಯ ಈ ನಿಸ್ವಾರ್ಥ ಬಲಿದಾನ ಪ್ರಾಣಿ ಸಂಕುಲದ ಮೇಲಿನ ಗೌರವವನ್ನು ಹೆಚ್ಚಿಸಿದೆ. ಶಾಲಾ ಆವರಣಗಳಲ್ಲಿ ಸ್ವಚ್ಛತೆ ಮತ್ತು ಮಕ್ಕಳ ಸುರಕ್ಷತೆಯ ಬಗ್ಗೆ ಈ ಘಟನೆ ಎಚ್ಚರಿಕೆ ನೀಡುವಂತಿದ್ದರೂ, ಕಾಳಿಯ ಧೈರ್ಯ ಮಾತ್ರ ಇತಿಹಾಸದ ಪುಟಗಳಲ್ಲಿ ಶಾಶ್ವತವಾಗಿ ಉಳಿಯುವಂತದ್ದಾಗಿದೆ.
