‘ಪುಲಿಮುರುಗನ್’ ಹಿಂದಿನ ದೃಶ್ಯ ಮಾಂತ್ರಿಕ ಶಾಜಿ ಕುಮಾರ್ ಇನ್ನಿಲ್ಲ

ಮಲಯಾಳಂ ಚಿತ್ರರಂಗದ ಖ್ಯಾತ ಛಾಯಾಗ್ರಾಹಕ ಶಾಜಿ ಕುಮಾರ್ ನಿಧನ: 57ನೇ ವಯಸ್ಸಿನಲ್ಲಿ ಕೊನೆಯುಸಿರು

ಕೊಚ್ಚಿ: ಮಲಯಾಳಂ ಚಿತ್ರರಂಗದ ಖ್ಯಾತ ಛಾಯಾಗ್ರಾಹಕ ಶಾಜಿ ಕುಮಾರ್ (57) ಅವರು ಮಂಗಳವಾರ ಮುಂಜಾನೆ ಕೊಚ್ಚಿಯ ಖಾಸಗಿ ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ. ಮೋಹನ್‌ಲಾಲ್ ಅಭಿನಯದ ಪುಲಿಮುರುಗನ್, ನರನ್, ಒಡಿಯನ್, ತುದರುಮ್ ಸೇರಿದಂತೆ ಹಲವು ಯಶಸ್ವಿ ಚಿತ್ರಗಳಿಗೆ ತಮ್ಮ ಅದ್ಭುತ ಛಾಯಾಗ್ರಹಣದ ಮೂಲಕ ದೃಶ್ಯ ವೈಭವ ನೀಡಿದ್ದ ಅವರು, 50ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಕೆಲಸ ಮಾಡಿದ್ದರು. ಅವರ ನಿಧನಕ್ಕೆ ಮಲಯಾಳಂ ಚಿತ್ರರಂಗದ ಗಣ್ಯರು, ಸಹೋದ್ಯೋಗಿಗಳು ಹಾಗೂ ಅಭಿಮಾನಿಗಳು ಕಂಬನಿ ಮಿಡಿದಿದ್ದಾರೆ.

ದಿಲೀಪ್ ಚಿತ್ರದ ಚಿತ್ರೀಕರಣದ ವೇಳೆ ಅಸ್ವಸ್ಥ : ಶಾಜಿ ಕುಮಾರ್ ಅವರು ಆಲಪ್ಪುಳದಲ್ಲಿ ನಟ ದಿಲೀಪ್ ಅಭಿನಯದ ಮುಂಬರುವ ಚಿತ್ರದ ಚಿತ್ರೀಕರಣದಲ್ಲಿ ತೊಡಗಿಸಿಕೊಂಡಿದ್ದಾಗ ಅಸ್ವಸ್ಥರಾಗಿದ್ದರು. ನವೆಂಬರ್ 7ರ ರಾತ್ರಿ ಹೊಟೇಲ್‌ನಲ್ಲಿ ಅವರಿಗೆ ದೇಹಾರೋಗ್ಯದಲ್ಲಿ ಏರುಪೇರಾಗಿದ್ದು, ತಕ್ಷಣವೇ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಪ್ರಾಥಮಿಕ ಚಿಕಿತ್ಸೆ ನೀಡಲಾಗಿತ್ತು. ಬಳಿಕ ಹೆಚ್ಚಿನ ಚಿಕಿತ್ಸೆಗಾಗಿ ಕೊಚ್ಚಿಯ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿತ್ತು.

ಆರಂಭದಲ್ಲಿ ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡುಬಂದ ಹಿನ್ನೆಲೆಯಲ್ಲಿ ತೀವ್ರ ನಿಗಾ ಘಟಕದಿಂದ ಸಾಮಾನ್ಯ ವಾರ್ಡ್‌ಗೆ ಸ್ಥಳಾಂತರಿಸಲಾಗಿತ್ತು. ಆದರೆ, ಭಾನುವಾರ ರಾತ್ರಿ ಶೌಚಾಲಯಕ್ಕೆ ತೆರಳುತ್ತಿದ್ದ ವೇಳೆ ಮತ್ತೆ ಕುಸಿದುಬಿದ್ದಿದ್ದು, ಆರೋಗ್ಯ ಸ್ಥಿತಿ ಹದಗೆಟ್ಟಿತ್ತು. ಕೊನೆಗೆ ಮಂಗಳವಾರ ಮುಂಜಾನೆ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ ಎಂದು ವರದಿಗಳು ತಿಳಿಸಿವೆ.

2001ರಲ್ಲಿ ಸ್ವತಂತ್ರ ಛಾಯಾಗ್ರಾಹಕರಾಗಿ ಪಯಣ ಆರಂಭ : ಖ್ಯಾತ ಛಾಯಾಗ್ರಾಹಕ ವಿಪಿನ್ ಮೋಹನ್ ಅವರ ಬಳಿ ಸಹಾಯಕರಾಗಿ ವೃತ್ತಿಜೀವನ ಆರಂಭಿಸಿದ್ದ ಶಾಜಿ ಕುಮಾರ್, 2001ರಲ್ಲಿ ಬಿಡುಗಡೆಯಾದ ಉತ್ತಮನ್ ಚಿತ್ರದ ಮೂಲಕ ಸ್ವತಂತ್ರ ಛಾಯಾಗ್ರಾಹಕರಾಗಿ ಗುರುತಿಸಿಕೊಂಡರು. ಫಿಲ್ಮ್ ಕ್ಯಾಮೆರಾ ಯುಗದಿಂದ ಡಿಜಿಟಲ್ ಚಿತ್ರರಂಗದವರೆಗೂ ತಮ್ಮ ತಾಂತ್ರಿಕ ಕೌಶಲವನ್ನು ಬೆಳೆಸಿಕೊಂಡಿದ್ದ ಅವರು, ಬೆಳಕು, ಬಣ್ಣಗಳ ಸಂಯೋಜನೆ ಮತ್ತು ದೃಶ್ಯ ಚೌಕಟ್ಟಿನ ಮೂಲಕ ಪ್ರೇಕ್ಷಕರ ಗಮನ ಸೆಳೆದಿದ್ದರು.

ಶಾಜಿ ಕೈಲಾಸ್, ಜೋಶಿ, ವಿನಯನ್, ವೈಶಾಖ್, ಎಂ. ಪದ್ಮಕುಮಾರ್ ಹಾಗೂ ತರುಣ್ ಮೂರ್ತಿ ಸೇರಿದಂತೆ ಹಲವು ನಿರ್ದೇಶಕರೊಂದಿಗೆ ಅವರು ಕೆಲಸ ಮಾಡಿದ್ದಾರೆ. ಪುಲಿಮುರುಗನ್, ನರನ್, ಒಡಿಯನ್, ನರಸಿಂಹಂ, ಮಧುರ ರಾಜಾ, ಪೊಕ್ಕಿರಿ ರಾಜಾ, ರಾಮಲೀಲಾ, ತುದರುಮ್ ಸೇರಿದಂತೆ 50ಕ್ಕೂ ಹೆಚ್ಚು ಚಿತ್ರಗಳು ಅವರ ವೃತ್ತಿಜೀವನದ ಪ್ರಮುಖ ಕೃತಿಗಳಾಗಿವೆ. ಮಲಯಾಳಂ ಮಾತ್ರವಲ್ಲದೆ ತಮಿಳು ಮತ್ತು ಹಿಂದಿ ಚಿತ್ರಗಳಿಗೂ ಅವರು ಛಾಯಾಗ್ರಹಣ ಮಾಡಿದ್ದಾರೆ.

ಬಿಡುಗಡೆಗೆ ಕಾಯುತ್ತಿರುವ ಕೊನೆಯ ಚಿತ್ರಗಳು : ಶಾಜಿ ಕುಮಾರ್ ಅವರ ಛಾಯಾಗ್ರಹಣದ ಕೊನೆಯ ಚಿತ್ರಗಳ ಪೈಕಿ ಮೋಹನ್‌ಲಾಲ್ ಅಭಿನಯದ ಅತಿಮನೋಹರಂ ಮತ್ತು ಸುರೇಶ್ ಗೋಪಿ ಅಭಿನಯದ ಒಟ್ಟಕ್ಕೊಂಬನ್ ಸೇರಿವೆ. ಅತಿಮನೋಹರಂ ಚಿತ್ರವು ಡಿಸೆಂಬರ್ 24ರಂದು ಕ್ರಿಸ್ಮಸ್ ಬಿಡುಗಡೆಗೆ ಸಿದ್ಧವಾಗುತ್ತಿದೆ ಎಂದು ವರದಿಯಾಗಿದೆ. ತಮ್ಮ ಕಲೆ ಮೂಲಕ ಚಿತ್ರರಂಗದಲ್ಲಿ ವಿಶಿಷ್ಟ ಛಾಪು ಮೂಡಿಸಿದ್ದ ಛಾಯಾಗ್ರಾಹಕರ ನಿಧನವು ಮಲಯಾಳಂ ಚಿತ್ರರಂಗಕ್ಕೆ ತುಂಬಲಾರದ ನಷ್ಟವಾಗಿದೆ.

• ಲಸಿಕೆಯೇ ಜೀವ ರಕ್ಷಣೆಯ ಕವಚ: ಲಸಿಕೆ ತಪ್ಪಿಸದಿರಲು ಜಾಗೃತಿ ಅಗತ್ಯ
• ಅನಕ್ಷರಸ್ಥರಿಗೆ ಎಡಗೈಯಿಂದ ಅರ್ಜಿ ಬರೆದುಕೊಡುವ ಪುಣ್ಯಾತ್ಮ..
• ‘ಪುಲಿಮುರುಗನ್’ ಹಿಂದಿನ ದೃಶ್ಯ ಮಾಂತ್ರಿಕ ಶಾಜಿ ಕುಮಾರ್ ಇನ್ನಿಲ್ಲ
• ಗ್ರಾಮ ಸ್ವಾವಲಂಬನೆಯ ಕನಸಿಗೆ ಜೀವ ತುಂಬಿದ ಬಂಕರ್ ರಾಯ್ ನಿಧನ
• ಕೋಟೆನಗರಿ ದೀಪಾವಳಿಯ ಕಳೆ ಹೆಚ್ಚಿಸುವ ಕ್ವಾಟಿ..!