ಪಶ್ಚಿಮ ಬಂಗಾಳದ ರಾಜಕೀಯ ಇತಿಹಾಸದಲ್ಲಿ ಇಂದು ಬರಿ ಅಧಿಕಾರ ಹಸ್ತಾಂತರದ ದಿನವಾಗಿ ಉಳಿಯಲಿಲ್ಲ, ಬದಲಾಗಿ ಮೌಲ್ಯ ಮತ್ತು ಗೌರವದ ಸಂಗಮಕ್ಕೆ ವೇದಿಕೆಯಾಯಿತು. ಕೋಲ್ಕತ್ತಾದ ಬ್ರಿಗೇಡ್ ಪರೇಡ್ ಮೈದಾನದಲ್ಲಿ ಸುವೇಂದು ಅಧಿಕಾರಿ ಅವರು ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸುವ ಮುನ್ನ, ಇಡೀ ದೇಶದ ಗಮನ ಸೆಳೆದಿದ್ದು ಪ್ರಧಾನಿ ನರೇಂದ್ರ ಮೋದಿ ಅವರು ತೋರಿದ ಒಂದು ಅಪೂರ್ವ ಗೌರವದ ನಡವಳಿಕೆ.
ಕಾರ್ಯಕ್ರಮದ ವೇದಿಕೆಯ ಮೇಲೆ ಪ್ರಧಾನಿ ಮೋದಿ ಅವರು 98 ವರ್ಷದ ಹಿರಿಯ ಬಿಜೆಪಿ ಕಾರ್ಯಕರ್ತ ಮಾಖನ್ ಲಾಲ್ ಸರ್ಕಾರ್ ಅವರನ್ನು ಕಂಡೊಡನೆ, ಅವರ ಪಾದಕ್ಕೆ ನಮಸ್ಕರಿಸಿ ಆಶೀರ್ವಾದ ಪಡೆದರು. ಈ ಒಂದು ದೃಶ್ಯ ಮೈದಾನದಲ್ಲಿ ನೆರೆದಿದ್ದ ಸಹಸ್ರಾರು ಜನರ ಕಣ್ಣಾಲಿಗಳನ್ನು ತೇವಗೊಳಿಸಿತು. ಮಾಖನ್ ಲಾಲ್ ಸರ್ಕಾರ್ ಅವರು ಕೇವಲ ಒಬ್ಬ ಕಾರ್ಯಕರ್ತರಲ್ಲ, ಬದಲಾಗಿ ಭಾರತೀಯ ಜನಸಂಘದ ಕಾಲದಿಂದಲೂ ಪಕ್ಷಕ್ಕಾಗಿ ದುಡಿದವರು. 1953ರಲ್ಲಿ ಶ್ಯಾಮ್ ಪ್ರಸಾದ್ ಮುಖರ್ಜಿ ಅವರೊಂದಿಗೆ ಕಾಶ್ಮೀರದಲ್ಲಿ ರಾಷ್ಟ್ರಧ್ವಜ ಹಾರಿಸುವ ಹೋರಾಟದಲ್ಲಿ ಪಾಲ್ಗೊಂಡು ಜೈಲು ಸೇರಿದ್ದ ಇವರು, ರಾಷ್ಟ್ರೀಯತೆಯ ಹೋರಾಟದ ಜೀವಂತ ಸಾಕ್ಷಿಯಾಗಿದ್ದಾರೆ. ಅಂತಹ ಹಿರಿಯ ಜೀವವನ್ನು ತಬ್ಬಿಕೊಂಡು ಮೋದಿ ಅವರು ಗೌರವಿಸಿದ್ದು, ಬಿಜೆಪಿಯ ಸಂಘಟನಾ ಶಕ್ತಿ ಮತ್ತು ಹಿರಿಯರ ಮೇಲಿರುವ ಮಮತೆಯನ್ನು ಎತ್ತಿ ತೋರಿಸಿತು.
ಇಡೀ ಬ್ರಿಗೇಡ್ ಪರೇಡ್ ಮೈದಾನ ಇಂದು ಕೇಸರಿ ಮಯವಾಗಿತ್ತು. ಜಾರ್ಖಂಡ್ನಿಂದ ಹಿಡಿದು ಕೆನಡಾದವರೆಗೂ ಅಭಿಮಾನಿಗಳು ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಗಲು ಬಂದಿದ್ದರು. ಬಂಗಾಳದ ಸಾಂಸ್ಕೃತಿಕ ಪರಂಪರೆಯನ್ನು ಬಿಂಬಿಸುವ ಛೌ ನೃತ್ಯ ಮತ್ತು ಬುಡಕಟ್ಟು ಕಲಾತಂಡಗಳ ಪ್ರದರ್ಶನವು ಮೈದಾನಕ್ಕೆ ಹಬ್ಬದ ಕಳೆ ತಂದಿತ್ತು. ವಿಶೇಷವೆಂದರೆ, ಪ್ರಧಾನಿ ಮೋದಿ ಅವರು ಚುನಾವಣಾ ಪ್ರಚಾರದ ವೇಳೆ ಸವಿದು ಪ್ರಸಿದ್ಧಿಯಾಗಿದ್ದ ಬಂಗಾಳದ ಜನಪ್ರಿಯ ತಿನಿಸು ‘ಝಾಲ್ ಮುರಿ’ಯನ್ನು ಬಂದಿದ್ದ ಅಭಿಮಾನಿಗಳಿಗೆ ಹಂಚಲಾಯಿತು.
15 ವರ್ಷಗಳ ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ ಆಡಳಿತಕ್ಕೆ ಮುಕ್ತಿ ಹಾಡಿ, 207 ಸ್ಥಾನಗಳ ಭರ್ಜರಿ ಬಹುಮತದೊಂದಿಗೆ ಮೊದಲ ಬಾರಿಗೆ ಬಿಜೆಪಿ ಸರ್ಕಾರ ರಚನೆಯಾಗಿರುವುದು ಒಂದು ಕಡೆಯಾದರೆ, ಮತ್ತೊಂದೆಡೆ ಬಂಗಾಳದ ನೆಲದ ಅಸ್ಮಿತೆ ಮತ್ತು ಸಾಂಸ್ಕೃತಿಕ ಮೌಲ್ಯಗಳನ್ನು ಗೌರವಿಸುವ ಮೂಲಕ ಬಿಜೆಪಿ ತನ್ನ ನೂತನ ಪಯಣವನ್ನು ಆರಂಭಿಸಿದೆ. ರವೀಂದ್ರ ಜಯಂತಿಯ ಈ ಶುಭ ಸಂದರ್ಭದಲ್ಲಿ ನಡೆದ ಈ ಸಮಾರಂಭವು ಬಂಗಾಳದ ಜನರ ಆಶಯ ಮತ್ತು ರಾಷ್ಟ್ರದ ನಾಯಕತ್ವದ ನಡುವಿನ ಅವಿನಾಭಾವ ಸಂಬಂಧಕ್ಕೆ ಕನ್ನಡಿ ಹಿಡಿಯಿತು.
