ಬಾಲಿವುಡ್ನ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಅಮೀರ್ ಖಾನ್ ಇತ್ತೀಚೆಗೆ ಮುಂಬೈನಲ್ಲಿ ನಡೆದ ಸಂಗೀತ ಕಾರ್ಯಕ್ರಮವೊಂದರಲ್ಲಿ ಭಾವುಕರಾಗಿ ಕಣ್ಣೀರು ಹಾಕಿದ್ದಾರೆ. ತಮ್ಮ ಪುತ್ರ ಜುನೈದ್ ಖಾನ್ ನಟನೆಯ ಮುಂಬರುವ ಚಿತ್ರ ‘ಏಕ್ ದಿನ್’ ನ ಸಂಗೀತ ಬಿಡುಗಡೆ ಸಮಾರಂಭದಲ್ಲಿ ಪಾಲ್ಗೊಂಡಿದ್ದ ಅಮೀರ್, ಮಗನ ಬೆಳವಣಿಗೆಯನ್ನು ಕಂಡು ವೇದಿಕೆಯ ಕೆಳಗೆ ಕುಳಿತಿದ್ದಾಗಲೇ ಭಾವುಕರಾದರು. ನಟಿ ಸಾಯಿ ಪಲ್ಲವಿ ಅಮೀರ್ನ್ನು ಸಮಾಧಾನಪಡಿಸುತ್ತಿರುವ ವೀಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ.
‘ಏಕ್ ದಿನ್’ ಚಿತ್ರವು ಜುನೈದ್ ಖಾನ್ ಮತ್ತು ದಕ್ಷಿಣ ಭಾರತದ ಖ್ಯಾತ ನಟಿ ಸಾಯಿ ಪಲ್ಲವಿ ಬಾಲಿವುಡ್ನಲ್ಲಿ ದೊಡ್ಡ ಮಟ್ಟದ ಬ್ರೇಕ್ ನೀಡುತ್ತಾರೆ ಎಂಬ ನಿರೀಕ್ಷೆಯಿದೆ. ಈ ಚಿತ್ರದಲ್ಲಿ ಜುನೈದ್ ನಾಚಿಕೆ ಸ್ವಭಾವದ ಹಾಗೂ ಅಂತರ್ಮುಖಿ ಪ್ರೇಮಿಯ ಪಾತ್ರವನ್ನು ನಿರ್ವಹಿಸಿದ್ದಾರೆ. ಕಚೇರಿಯಲ್ಲಿ ಜೊತೆಗೆ ಕೆಲಸ ಮಾಡುವ ಸಹೋದ್ಯೋಗಿಯ (ಸಾಯಿ ಪಲ್ಲವಿ) ಮೇಲೆ ಪ್ರೀತಿಯಿದ್ದರೂ ಅದನ್ನು ವ್ಯಕ್ತಪಡಿಸಲು ಪರದಾಡುವ ನಾಯಕನ ಕಥೆ ಇಲ್ಲಿದೆ. ಜಪಾನ್ನಲ್ಲಿ ನಡೆಯುವ ಅಪಘಾತದ ನಂತರ ನಾಯಕಿ ತನ್ನ ನೆನಪನ್ನು ಕಳೆದುಕೊಳ್ಳುವ (TGA) ಸನ್ನಿವೇಶ ಮತ್ತು ಆಕೆಯನ್ನು ಕಾಪಾಡುವ ನಾಯಕನ ನಡುವಿನ ಭಾವನಾತ್ಮಕ ಸಂಬಂಧವೇ ಚಿತ್ರದ ಜೀವಾಳ ಎನ್ನಲಾಗುತ್ತಿದೆ.
ವಿಶೇಷವೆಂದರೆ, ಈ ಚಿತ್ರದ ಮೂಲಕ ಬಾಲಿವುಡ್ನ ಕ್ಲಾಸಿಕ್ ಜೋಡಿ ಅಮೀರ್ ಖಾನ್ ಮತ್ತು ನಿರ್ಮಾಪಕ ಮನ್ಸೂರ್ ಖಾನ್ ಹಲವು ವರ್ಷಗಳ ನಂತರ ಮತ್ತೆ ಒಂದಾಗಿದ್ದಾರೆ. ಈ ಹಿಂದೆ ‘ಖಯಾಮತ್ ಸೆ ಖಯಾಮತ್ ತಕ್’ ಮತ್ತು ‘ಜೋ ಜೀತಾ ವೋಹಿ ಸಿಕಂದರ್’ ನಂತಹ ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ್ದ ಈ ಜೋಡಿ, ಈಗ ‘ಏಕ್ ದಿನ್’ ಚಿತ್ರಕ್ಕೆ ಹಣ ಹೂಡಿದ್ದಾರೆ. ಅಮೀರ್ ಖಾನ್ ಪ್ರೊಡಕ್ಷನ್ಸ್ ಅಡಿಯಲ್ಲಿ ತಯಾರಾಗಿರುವ ಈ ಚಿತ್ರವನ್ನು ಸುನಿಲ್ ಪಾಂಡೆ ನಿರ್ದೇಶಿಸುತ್ತಿದ್ದಾರೆ. ಸುನಿಲ್ ಈ ಹಿಂದೆ ಅಮೀರ್ ಜೊತೆ ‘ದೆಹಲಿ ಬೆಲ್ಲಿ’ ಮತ್ತು ‘ಲಾಲ್ ಸಿಂಗ್ ಚಡ್ಡಾ’ ಚಿತ್ರಗಳಿಗೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು.
ಪರಸ್ಪರ ಅರಿವು, ಪ್ರೇಮ ಮತ್ತು ಮಾನವೀಯ ಸಂಬಂಧಗಳ ಸುತ್ತ ಹೆಣೆಯಲಾದ ಈ ವಿಶಿಷ್ಟ ಕಥೆಯು ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದೆ. ಜುನೈದ್ ಮತ್ತು ಸಾಯಿ ಪಲ್ಲವಿ ಕೆಮಿಸ್ಟ್ರಿಯನ್ನು ತೆರೆಯ ಮೇಲೆ ನೋಡಲು ಫ್ಯಾನ್ಸ್ ಕಾಯುತ್ತಿದ್ದಾರೆ. ತಂದೆಯಾಗಿ ಅಮೀರ್ ಖಾನ್ ಮಗನ ಚಿತ್ರಕ್ಕಾಗಿ ತೋರಿದ ಈ ಭಾವನಾತ್ಮಕ ಬೆಂಬಲ ಅಭಿಮಾನಿಗಳ ಮನ ಗೆದ್ದಿದೆ. ಬಹುನಿರೀಕ್ಷಿತ ‘ಏಕ್ ದಿನ್’ ಚಿತ್ರವು ಇದೇ ಮೇ 1 ರಂದು ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ.
