ಮುಂದ್ರಾಗೆ ಭಾರೀ ತೈಲ ಸಾಗಣೆ: ಇಂಧನ ಭದ್ರತೆಗೆ ದೊಡ್ಡ ಬಲ
ಗುಜರಾತ್: ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಹೆಚ್ಚುತ್ತಿರುವ ನಡುವೆಯೇ, ಭಾರತದ ಇಂಧನ ಭದ್ರತೆಗೆ ಮಹತ್ವದ ಬೆಳವಣಿಗೆಯಾಗಿ, ಭಾರತೀಯ ಧ್ವಜ ಹೊತ್ತ ಕಚ್ಚಾ ತೈಲ ಟ್ಯಾಂಕರ್ ‘ಜಗ್ ಲಾಡ್ಕಿ’ Jag Ladki ಸುರಕ್ಷಿತವಾಗಿ ಗುಜರಾತ್ನ ಮುಂದ್ರಾ (Mundra Port) ಬಂದರನ್ನು ತಲುಪಿದೆ.
ಮಾರ್ಚ್ 18, 2026 ರಂದು ಈ ಹಡಗು ಸುಮಾರು 80,000 ರಿಂದ 81,000 ಮೆಟ್ರಿಕ್ ಟನ್ ಕಚ್ಚಾ ತೈಲವನ್ನು ಹೊತ್ತು ಬಂದಿಳಿದಿದೆ. ಈ ತೈಲವನ್ನು ಯುನೈಟೆಡ್ ಅರಬ್ ಎಮಿರೇಟ್ಸ್ನ Fujairah Port ನಲ್ಲಿ ಲೋಡ್ ಮಾಡಲಾಗಿತ್ತು.
ಸುರಕ್ಷಿತ ಪ್ರಯಾಣ : ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಭೀತಿ ನಡುವೆಯೂ, ಹಡಗು ಹಾರ್ಮುಜ್ ಜಲಸಂಧಿ (Strait of Hormuz) ಮೂಲಕ ಸುರಕ್ಷಿತವಾಗಿ ಸಾಗಿದ್ದು, ಭಾರತೀಯ ನೌಕಾಪಡೆಯ ಬೆಂಗಾವಲಿನಲ್ಲಿ ಭಾರತ ತಲುಪಿದೆ. ಸಂಘರ್ಷಪೀಡಿತ ಪ್ರದೇಶದಿಂದ ಯಾವುದೇ ಹಾನಿಯಾಗದೇ ಬಂದ ಮೂರನೇ ಭಾರತೀಯ ಹಡಗು ಇದಾಗಿದೆ.
ಈ ಮೊದಲು ‘ಶಿವಾಲಿಕ್’ ಮತ್ತು ‘ನಂದಾದೇವಿ’ ಹೆಸರಿನ ಇಂಧನ ಸಾಗಣೆ ಹಡಗುಗಳು ಕೂಡ ಯಶಸ್ವಿಯಾಗಿ ಭಾರತ ತಲುಪಿದ್ದವು.
ಇಂಧನ ಪೂರೈಕೆಗೆ ಬಲ : ಮುಂದ್ರಾ ಬಂದರು ದೇಶದ ಪ್ರಮುಖ ಇಂಧನ ಹಬ್ ಆಗಿದ್ದು, ಈ ತೈಲವು ಪೈಪ್ಲೈನ್ ಜಾಲದ ಮೂಲಕ ದೇಶದ ವಿವಿಧ ಭಾಗಗಳಿಗೆ ಪೂರೈಸಲಾಗುತ್ತದೆ.
ಪ್ರಮುಖ ಪೂರೈಕೆ ಪ್ರದೇಶಗಳು: ರಾಜಸ್ಥಾನ & ಪಂಜಾಬ್: ಬಟಿಂಡಾದ ಗುರು ಗೋಬಿಂದ್ ಸಿಂಗ್ ರಿಫೈನರಿ ಹಾಗೂ ಬಾರ್ಮರ್ ರಿಫೈನರಿ, ಹರಿಯಾಣ & ಉತ್ತರ ಭಾರತ: ಮುಂದ್ರಾ–ಪಾನಿಪತ್ ಪೈಪ್ಲೈನ್ ಮೂಲಕ ಪಾನಿಪತ್ ರಿಫೈನರಿ, ಗುಜರಾತ್: ಸ್ಥಳೀಯ ಕೈಗಾರಿಕೆಗಳು ಮತ್ತು ಪೆಟ್ರೋಕೆಮಿಕಲ್ ಘಟಕಗಳು
ರಾಷ್ಟ್ರೀಯ ಇಂಧನ ಭದ್ರತೆ: ಪಶ್ಚಿಮ ಏಷ್ಯಾದ ಉದ್ವಿಗ್ನತೆಯ ನಡುವೆ ಇಂತಹ ದೊಡ್ಡ ಪ್ರಮಾಣದ ತೈಲ ಸಾಗಣೆ ಭಾರತಕ್ಕೆ ಮಹತ್ವದ ಬಲ ನೀಡುತ್ತದೆ. ಇದು ಪೆಟ್ರೋಲ್, ಡೀಸೆಲ್ ಮತ್ತು LPG ಪೂರೈಕೆಯಲ್ಲಿ ವ್ಯತ್ಯಯವಾಗದಂತೆ ನೋಡಿಕೊಳ್ಳಲು ಸಹಕಾರಿಯಾಗಲಿದೆ. ನೇರವಾಗಿ ಕರ್ನಾಟಕಕ್ಕೆ ಈ ತೈಲ ಬಾರದಿದ್ದರೂ, ದೇಶದ ಒಟ್ಟು ಇಂಧನ ಲಭ್ಯತೆ ಹೆಚ್ಚುವುದರಿಂದ ರಾಜ್ಯಕ್ಕೂ ಪರೋಕ್ಷವಾಗಿ ಲಾಭವಾಗಲಿದೆ.
ಇನ್ನಷ್ಟು ತೈಲ ಟ್ಯಾಂಕರ್ಗಳಿಗೆ ಭಾರತೀಯ ನೌಕಾಪಡೆಯ ಭದ್ರತಾ ವ್ಯವಸ್ಥೆ ಬಲಪಡಿಸಲಾಗಿದೆ
ಈ ಬೆಳವಣಿಗೆ, ಯುದ್ಧ ಪರಿಸ್ಥಿತಿಯಲ್ಲೂ ಭಾರತ ತನ್ನ ಇಂಧನ ಪೂರೈಕೆಯನ್ನು ಸುರಕ್ಷಿತವಾಗಿಡುವ ಸಾಮರ್ಥ್ಯವನ್ನು ತೋರಿಸುತ್ತದೆ. ಸಮುದ್ರ ಮಾರ್ಗಗಳ ಭದ್ರತೆ ಮತ್ತು ನೌಕಾಪಡೆಯ ಪಾತ್ರ ಮತ್ತೊಮ್ಮೆ ಮಹತ್ವ ಪಡೆದುಕೊಂಡಿದೆ.
