ದಾಂಬೂಲ: ಶ್ರೀಲಂಕಾ ‘ಎ’ ವಿರುದ್ಧದ ಏಕದಿನ ಪಂದ್ಯದಲ್ಲಿ ಭಾರತ ‘ಎ’ ತಂಡವು ಬೌಲಿಂಗ್ ಹಾಗೂ ಬ್ಯಾಟಿಂಗ್ ಎರಡರಲ್ಲೂಅದ್ಭುತ ಪ್ರದರ್ಶನ ನೀಡುವ ಮೂಲಕ 66 ರನ್ಗಳ ಭರ್ಜರಿ ಜಯ ಸಾಧಿಸಿತು.
ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಭಾರತ ‘ಎ’ 50 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 377 ರನ್ಗಳ ಬೃಹತ್ ಮೊತ್ತ ದಾಖಲಿಸಿತು. ಪ್ರತಿಯಾಗಿ ಶ್ರೀಲಂಕಾ ‘ಎ’ 47.1 ಓವರ್ಗಳಲ್ಲಿ 311 ರನ್ಗಳಿಗೆ ಆಲೌಟ್ ಆಯಿತು.
ಭಾರತ ‘ಎ’ ಪರ ಯುವ ಆಟಗಾರ ವೈಭವ್ ಸೂರ್ಯವಂಶಿ ಸ್ಫೋಟಕ ಆರಂಭ ನೀಡಿದರು. ಕೇವಲ 29 ಎಸೆತಗಳಲ್ಲಿ 10 ಬೌಂಡರಿ ಮತ್ತು 8 ಸಿಕ್ಸರ್ಗಳ ನೆರವಿನಿಂದ 94 ರನ್ಗಳ ಸಿಡಿಲಬ್ಬರದ ಇನ್ನಿಂಗ್ಸ್ ಆಡಿದ ಅವರು ಶತಕದ ಅಂಚಿನಲ್ಲಿ ನಿರ್ಗಮಿಸಿದರು. ಪ್ರಿಯಾಂಶ್ ಆರ್ಯ 39 ರನ್ಗಳ ಕೊಡುಗೆ ನೀಡಿದರು.
ಮಧ್ಯಮ ಕ್ರಮಾಂಕದಲ್ಲಿ ತಿಲಕ್ ವರ್ಮಾ ನಾಯಕನ ಇನ್ನಿಂಗ್ಸ್ ಆಡಿ 90 ಎಸೆತಗಳಲ್ಲಿ 67 ರನ್ ಗಳಿಸಿದರೆ, ರುತುರಾಜ್ ಗಾಯಕ್ವಾಡ್ 40, ಕುಮಾರ್ ಕುಶಾಗ್ರ 36 ಹಾಗೂ ವಿಪ್ರಜ್ ನಿಗಮ್ 27 ರನ್ಗಳ ನೆರವು ನೀಡಿದರು. ಕೊನೆಯಲ್ಲಿ ಅನುಕುಲ್ ರಾಯ್ ಕೇವಲ 15 ಎಸೆತಗಳಲ್ಲಿ 39 ರನ್ಗಳ ಅಬ್ಬರದ ಆಟವಾಡಿ ತಂಡದ ಮೊತ್ತವನ್ನು 377ಕ್ಕೆ ಏರಿಸಿದರು.
378 ರನ್ಗಳ ಕಠಿಣ ಗುರಿ ಬೆನ್ನಟ್ಟಿದ ಶ್ರೀಲಂಕಾ ‘ಎ’ ತಂಡಕ್ಕೆ ಆರಂಭದಲ್ಲೇ ಆಘಾತ ಎದುರಾಯಿತು. ಆದರೂ ಸದೀರ ಸಮರವಿಕ್ರಮ 52 ರನ್, ವನುಜ ಸಹನ್ 62 ರನ್, ಸಹನ್ ಅರಚ್ಚಿಗೆ 38 ರನ್ ಹಾಗೂ ವಿಜಯಕಾಂತ್ ವಿಯಾಸಕಾಂತ್ 39 ರನ್ಗಳ ಹೋರಾಟದ ಹೊರತಾಗಿಯೂ ತಂಡವನ್ನು ಗೆಲುವು ದಡಕ್ಕೆ ತಲುಪಿಸಲಾಗಲಿಲ್ಲ.
ಭಾರತದ ಬೌಲರ್ಗಳು ನಿಯಮಿತವಾಗಿ ವಿಕೆಟ್ಗಳನ್ನು ಕಬಳಿಸಿ ಶ್ರೀಲಂಕಾ ಬ್ಯಾಟರ್ಗಳ ಮೇಲೆ ಒತ್ತಡ ಹೇರಿದರು. ಯಶ್ ಠಾಕೂರ್ ಪ್ರಮುಖ ವಿಕೆಟ್ಗಳನ್ನು ಕಬಳಿಸಿ ಮಿಂಚಿದರೆ, ವಿಪ್ರಜ್ ನಿಗಮ್ ಹಾಗೂ ಅನುಕುಲ್ ರಾಯ್ ಕೂಡ ನಿರ್ಣಾಯಕ ಹಂತದಲ್ಲಿ ವಿಕೆಟ್ಗಳನ್ನು ಪಡೆದು ಶ್ರೀಲಂಕಾದ ಹೋರಾಟಕ್ಕೆ ತೆರೆ ಎಳೆದರು.
ಈ ಮೂಲಕ ಭಾರತ ‘ಎ’ ತಂಡ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಸಂಪೂರ್ಣ ಮೇಲುಗೈ ಸಾಧಿಸಿ 66 ರನ್ಗಳ ಅಂತರದ ಗೆಲುವು ದಾಖಲಿಸಿತು.
ಸ್ಕೋರ್ ವಿವರ:
ಭಾರತ ‘ಎ’ – 377/9 (50 ಓವರ್)
ವೈಭವ್ ಸೂರ್ಯವಂಶಿ 94 (29), ತಿಲಕ್ ವರ್ಮಾ 67 (90), ರುತುರಾಜ್ ಗಾಯಕ್ವಾಡ್ 40 (51), ಅನುಕುಲ್ ರಾಯ್ 39 (15), ಪ್ರಿಯಾಂಶ್ ಆರ್ಯ 39 (29).
ಶ್ರೀಲಂಕಾ ‘ಎ’ – 311 ಆಲೌಟ್ (47.1 ಓವರ್)
ವನುಜ ಸಹನ್ 62 (69), ಸದೀರ ಸಮರವಿಕ್ರಮ 52 (44), ವಿಜಯಕಾಂತ್ ವಿಯಾಸಕಾಂತ್ 39 (34), ಸಹನ್ ಅರಚ್ಚಿಗೆ 38 (40).
