ಲಂಡನ್: ಟೀಮ್ ಇಂಡಿಯಾದ ರನ್ ಮಷಿನ್, ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಅವರು ಲಂಡನ್ನಲ್ಲಿ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರನ್ನು ಸೌಹಾರ್ದಯುತವಾಗಿ ಭೇಟಿಯಾಗಿದ್ದಾರೆ. ಈ ಭೇಟಿಯ ವೇಳೆ ಕೊಹ್ಲಿಯವರ ವಿನಯತೆ ಮತ್ತು ಸರಳತೆ ಡಿಸಿಎಂ ಶಿಂಧೆ ಅವರ ಮನಗೆದ್ದಿದೆ.
ಲಂಡನ್ನಲ್ಲಿ ತಾವಿರುವ ವಿಚಾರ ತಿಳಿದು ಖುದ್ದಾಗಿ ಭೇಟಿಯಾಗಲು ಬಂದ ಕೊಹ್ಲಿಯ ಬಗ್ಗೆ ಶಿಂಧೆ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. “ಇಷ್ಟೊಂದು ಶತಕಗಳನ್ನು ಸಿಡಿಸಿರುವ ಭಾರತದ ಅತಿ ದೊಡ್ಡ ಕ್ರಿಕೆಟಿಗ ಇಷ್ಟೊಂದು ಸರಳವಾಗಿದ್ದಾರೆ (down-to-earth) ಎಂಬುದು ನನಗೆ ತೀವ್ರ ಸಂತಸ ತಂದಿದೆ” ಎಂದು ಅವರು ಹೇಳಿದ್ದಾರೆ.
ಈ ಭೇಟಿಯ ವೇಳೆ ಇಬ್ಬರೂ ಮಹಾರಾಷ್ಟ್ರದ ಮೂಲಸೌಕರ್ಯ ಯೋಜನೆಗಳಾದ ‘ಥರ್ಡ್ ಮುಂಬೈ’, ಅಟಲ್ ಸೇತು ಮತ್ತು ಮೆಟ್ರೋ ಯೋಜನೆಗಳ ಬಗ್ಗೆ ಚರ್ಚಿಸಿದ್ದಾರೆ. ಇದರ ಜೊತೆಗೆ ಯುವ ಕ್ರೀಡಾಪಟುಗಳನ್ನು ಅಂತರರಾಷ್ಟ್ರೀಯ ಮಟ್ಟಕ್ಕೆ ಬೆಳೆಸುವುದು ಹಾಗೂ ಕ್ರೀಡಾ ಪ್ರತಿಭೆಗಳನ್ನು ಪ್ರೋತ್ಸಾಹಿಸುವ ಬಗ್ಗೆ ಕೊಹ್ಲಿ ನೀಡಿದ ಅಮೂಲ್ಯ ಸಲಹೆಗಳನ್ನು ಶಿಂಧೆ ಶ್ಲಾಘಿಸಿದ್ದಾರೆ.
15,000 ರನ್ಗಳ ಐತಿಹಾಸಿಕ ದಾಖಲೆಯತ್ತ ಕೊಹ್ಲಿ!
ಇದೇ ಸೆಪ್ಟೆಂಬರ್ 27ರಿಂದ ವೆಸ್ಟ್ ಇಂಡೀಸ್ ವಿರುದ್ಧ ತವರಿನಲ್ಲಿ ನಡೆಯಲಿರುವ ಏಕದಿನ ಸರಣಿಯಲ್ಲಿ ಕೊಹ್ಲಿ ಕಣಕ್ಕಿಳಿಯಲಿದ್ದಾರೆ. ಏಕದಿನ ಕ್ರಿಕೆಟ್ನಲ್ಲಿ ಇದುವರೆಗೆ 54 ಶತಕಗಳೊಂದಿಗೆ 14,941 ರನ್ ಕಲೆಹಾಕಿರುವ ಅವರು, ಇನ್ನು ಕೇವಲ 59 ರನ್ ಗಳಿಸಿದರೆ ಸಾಕು, ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ನಂತರ 15,000 ಏಕದಿನ ರನ್ ಪೂರೈಸಿದ ವಿಶ್ವದ ಎರಡನೇ ಬ್ಯಾಟರ್ ಎಂಬ ಐತಿಹಾಸಿಕ ದಾಖಲೆ ಬರೆಯಲಿದ್ದಾರೆ. ವಿಂಡೀಸ್ ಸರಣಿಯಲ್ಲಿ ಈ ಮೈಲಿಗಲ್ಲು ತಲುಪುವ ಕಾತರದಲ್ಲಿ ಅಭಿಮಾನಿಗಳಿದ್ದಾರೆ.
