2027ರ ಸೀಸನ್‌ಗೆ ಮುಂಬೈ ಇಂಡಿಯನ್ಸ್ ಹೊಸ ಲುಕ್: ಅಧಿಕೃತ ಕಿಟ್ ಪಾಲುದಾರನಾದ ನೈಕ್
ಮುಂಬೈ: ವಿಶ್ವದ ಪ್ರಮುಖ ಕ್ರೀಡಾ ಉಡುಪುಗಳ ಸಂಸ್ಥೆ ನೈಕ್ ಮತ್ತು ಐಪಿಎಲ್‌ನ ಜನಪ್ರಿಯ ಫ್ರಾಂಚೈಸಿ ಮುಂಬೈ ಇಂಡಿಯನ್ಸ್ ಬಹು-ವರ್ಷಗಳ ಪಾಲುದಾರಿಕೆಯನ್ನು ಘೋಷಿಸಿವೆ. ಈ ಒಪ್ಪಂದದ ಪ್ರಕಾರ, 2027ರ ಸೀಸನ್‌ನಿಂದ ಮುಂಬೈ ಇಂಡಿಯನ್ಸ್‌ನ ಪುರುಷರ ಹಾಗೂ ಮಹಿಳಾ ತಂಡಗಳಿಗೆ ನೈಕ್ ಅಧಿಕೃತ ಕಿಟ್ ಪಾಲುದಾರನಾಗಿ ಕಾರ್ಯನಿರ್ವಹಿಸಲಿದೆ.
ಈ ಪಾಲುದಾರಿಕೆಯಡಿ ಎರಡೂ ತಂಡಗಳ ಆಟಗಾರರು ಹಾಗೂ ಸಿಬ್ಬಂದಿಗೆ ಪಂದ್ಯಗಳ ವೇಳೆ ಧರಿಸುವ ಜೆರ್ಸಿ, ಅಭ್ಯಾಸದ ಉಡುಪುಗಳು ಮತ್ತು ಇತರ ಕ್ರೀಡಾ ಪರಿಕರಗಳನ್ನು ನೈಕ್ ಒದಗಿಸಲಿದೆ. 2027ರ ಸೀಸನ್ ಆರಂಭಕ್ಕೂ ಮುನ್ನ ಎರಡೂ ತಂಡಗಳ ಹೊಸ ಜೆರ್ಸಿಗಳನ್ನು ಅನಾವರಣಗೊಳಿಸಲು ಯೋಜಿಸಲಾಗಿದೆ. ಮುಂಬೈನ ಸಂಸ್ಕೃತಿ ಮತ್ತು ನಗರದ ವಿಶಿಷ್ಟ ಚೈತನ್ಯವನ್ನು ಪ್ರತಿಬಿಂಬಿಸುವ ವಿಶೇಷ ವಿನ್ಯಾಸದ ಉಡುಪುಗಳನ್ನೂ ಅಭಿಮಾನಿಗಳಿಗೆ ಪರಿಚಯಿಸಲಾಗುತ್ತದೆ.
ರಿಲಯನ್ಸ್ ಸ್ಪೋರ್ಟ್ಸ್‌ನ ಮುಖ್ಯಸ್ಥ ದೇವಂಗ್ ಭೀಮ್‌ಜಿಯಾನಿ ಮಾತನಾಡಿ, ಮುಂಬೈ ಇಂಡಿಯನ್ಸ್ ಕೇವಲ ಕ್ರಿಕೆಟ್ ತಂಡವಲ್ಲ, ಆಟಗಾರರು ಮತ್ತು ಅಭಿಮಾನಿಗಳನ್ನು ಒಳಗೊಂಡ ಕುಟುಂಬವಾಗಿದೆ ಎಂದು ಹೇಳಿದ್ದಾರೆ. ನೈಕ್‌ನೊಂದಿಗಿನ ಪಾಲುದಾರಿಕೆಯು ಕ್ರಿಕೆಟ್ ಮತ್ತು ಸಂಸ್ಕೃತಿಯನ್ನು ಬೆಸೆಯಲು, ಯುವ ಪೀಳಿಗೆಗೆ ಸ್ಫೂರ್ತಿ ನೀಡಲು ಹಾಗೂ ಮುಂಬೈ ಇಂಡಿಯನ್ಸ್‌ನ ಗುರುತನ್ನು ಜಾಗತಿಕ ಮಟ್ಟದಲ್ಲಿ ಮತ್ತಷ್ಟು ವಿಸ್ತರಿಸಲು ಅವಕಾಶ ಕಲ್ಪಿಸಲಿದೆ ಎಂದು ತಿಳಿಸಿದ್ದಾರೆ.
ನೈಕ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ತರುಣ್‌ದೀಪ್ ಸಿಂಗ್ ಕೂಡ ಈ ಸಹಭಾಗಿತ್ವದ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ. ಕ್ರಿಕೆಟ್ ಭಾರತೀಯರ ಜೀವನದ ಅವಿಭಾಜ್ಯ ಭಾಗವಾಗಿದ್ದು, ಮುಂಬೈ ಇಂಡಿಯನ್ಸ್ ಮಹತ್ವಾಕಾಂಕ್ಷೆ ಮತ್ತು ಕ್ರೀಡಾ ಮನೋಭಾವವನ್ನು ಪ್ರತಿನಿಧಿಸುತ್ತದೆ. ಕ್ರೀಡಾಪಟುಗಳಿಗೆ ಬೆಂಬಲ ನೀಡುವುದು ಹಾಗೂ ಯುವ ಪ್ರತಿಭೆಗಳಿಗೆ ಪ್ರೇರಣೆ ನೀಡುವುದು ಈ ಪಾಲುದಾರಿಕೆಯ ಉದ್ದೇಶವಾಗಿದೆ ಎಂದು ಹೇಳಿದ್ದಾರೆ.
ಮುಂಬೈ ಇಂಡಿಯನ್ಸ್ ಆಟಗಾರ ಹಾಗೂ ನೈಕ್ ಅಥ್ಲೀಟ್ ತಿಲಕ್ ವರ್ಮಾ ಅವರಿಗೆ ಈ ಒಪ್ಪಂದ ವಿಶೇಷವಾಗಿದೆ. ಮುಂಬೈ ಇಂಡಿಯನ್ಸ್ ತಮ್ಮ ಪ್ರತಿಭೆಯನ್ನು ದೊಡ್ಡ ವೇದಿಕೆಯಲ್ಲಿ ಪ್ರದರ್ಶಿಸಲು ಅವಕಾಶ ನೀಡಿದೆ. ನೈಕ್ ಕೂಡ ತಮ್ಮ ಕ್ರೀಡಾ ಪಯಣದ ಭಾಗವಾಗಿದೆ. ಹೀಗಾಗಿ ಎರಡೂ ಸಂಸ್ಥೆಗಳು ಒಂದಾಗಿರುವುದು ವೈಯಕ್ತಿಕವಾಗಿ ಸಂತಸ ತಂದಿದೆ ಎಂದು ಅವರು ಹೇಳಿದ್ದಾರೆ.
ಹೊಸ ಜೆರ್ಸಿಗಳ ವಿನ್ಯಾಸ, ಅಭಿಮಾನಿಗಳಿಗಾಗಿ ವಿಶೇಷ ಉಡುಪುಗಳ ಮಾರಾಟ ಮತ್ತು ಲಭ್ಯತೆಯ ಕುರಿತು ಹೆಚ್ಚಿನ ವಿವರಗಳನ್ನು ಮುಂದಿನ ದಿನಗಳಲ್ಲಿ ಪ್ರಕಟಿಸುವ ನಿರೀಕ್ಷೆಯಿದೆ. ಈ ಒಪ್ಪಂದವು ಮುಂಬೈ ಇಂಡಿಯನ್ಸ್‌ನ ಪುರುಷರ ಮತ್ತು ಮಹಿಳಾ ತಂಡಗಳೆರಡನ್ನೂ ಒಳಗೊಂಡಿದ್ದು, 2027ರ ಸೀಸನ್‌ನಿಂದ ಜಾರಿಗೆ ಬರಲಿದೆ.
- ಮುಂಬೈ ಇಂಡಿಯನ್ಸ್‌ಗೆ ನೈಕ್ ಸಾಥ್: 2027ರಿಂದ ಅಧಿಕೃತ ಕಿಟ್ ಪಾಲುದಾರ
- ಬಿಗ್‌ ಬಾಸ್ ಫಿನಾಲೆ ಲೆಕ್ಕಾಚಾರ ಶುರು: ವೀಕ್ಷಕರ ಪ್ರಕಾರ ಟಾಪ್ 3 ಸ್ಪರ್ಧಿಗಳು ಇವರೇ; ಇಲ್ಲಿದೇ ಡಿಟೇಲ್ಸ್
- Jio Platforms IPO ಇತಿಹಾಸ ಸೃಷ್ಟಿ: 1 ಕೋಟಿ ಅರ್ಜಿ ದಾಟಿದ ವಿಶ್ವದ ಮೊದಲ IPO, ಸಂಜೆ 7 ಗಂಟೆವರೆಗೆ ಬಿಡ್ಡಿಂಗ್
- ರೈತರಿಗೆ ವರುಣನ ಕೃಪೆ: ಜೋಳ ಬೆಳೆದ ರೈತರ ಮೊಗದಲ್ಲಿ ಮಂದಹಾಸ
- ಸತ್ಯ ಸನ್‌ ಆಫ್‌ ಹರಿಶ್ಚಂದ್ರ ಚಿತ್ರದಲ್ಲಿ ಶಿವರಾಜ್‌ಕುಮಾರ್ ಅತಿಥಿ ಪಾತ್ರ: ನಿರೂಪ್ ಭಂಡಾರಿಗೆ ಕರುನಾಡ ಚಕ್ರವರ್ತಿ ಸಾಥ್
