ಐಚಿ–ನಗೋಯಾ: ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಆರ್ಚರಿ ತಂಡ ಐತಿಹಾಸಿಕ ಸಾಧನೆ ಮಾಡಿದೆ. ಮಹಿಳೆಯರ ರಿಕರ್ವ್ ತಂಡ ಸ್ಪರ್ಧೆಯಲ್ಲಿ ಭಾರತ ಮೊದಲ ಬಾರಿಗೆ ಚಿನ್ನದ ಪದಕ ಗೆದ್ದಿದ್ದು, ಫೈನಲ್‌ನಲ್ಲಿ ವಿಶ್ವ ಚಾಂಪಿಯನ್ ದಕ್ಷಿಣ ಕೊರಿಯಾವನ್ನು 5–3 ಅಂತರದಿಂದ ಮಣಿಸಿದೆ.
ಅಂಕಿತಾ ಭಕತ್, ಕೀರ್ತಿ ಶರ್ಮಾ ಹಾಗೂ ಕುಂಕುಮ್ ಮೊಹೋಡ್ ಅವರನ್ನೊಳಗೊಂಡ ಭಾರತೀಯ ತಂಡ ಗಾಳಿಯ ವೇಗದ ನಡುವೆಯೂ ಅಪಾರ ಹಿಡಿತ ಪ್ರದರ್ಶಿಸಿ 10 ಬಾರಿ ಒಲಿಂಪಿಕ್ ಚಾಂಪಿಯನ್ ಆಗಿರುವ ದಕ್ಷಿಣ ಕೊರಿಯಾ ತಂಡದ ಸವಾಲನ್ನು ಮೀರಿಸಿತು.
ಮೊದಲ ಎರಡು ಸೆಟ್‌ಗಳು ಸಮಬಲದಲ್ಲಿ ಅಂತ್ಯಗೊಂಡ ಬಳಿಕ ಭಾರತ ಮೂರನೇ ಸೆಟ್‌ನಲ್ಲಿ ಮುನ್ನಡೆ ಸಾಧಿಸಿತು. ಭಾರತ 55 ಅಂಕ ಗಳಿಸಿದರೆ, ಕೊರಿಯಾ 52 ಅಂಕಗಳಿಗೆ ಸೀಮಿತವಾಯಿತು. ನಾಲ್ಕನೇ ಸೆಟ್‌ನಲ್ಲಿ ಕೀರ್ತಿ ಶರ್ಮಾ ಬಾರಿಸಿದ ಬಾಣದ ಅಂಕವನ್ನು 8ರಿಂದ 9ಕ್ಕೆ ತಿದ್ದುಪಡಿ ಮಾಡಲಾಯಿತು. ಇದರೊಂದಿಗೆ ಭಾರತ 54 ಅಂಕ ಗಳಿಸಿ ಪಂದ್ಯವನ್ನು 5–3ರಿಂದ ತನ್ನದಾಗಿಸಿಕೊಂಡಿತು.
ಇದಕ್ಕೂ ಮುನ್ನ ಸೆಮಿಫೈನಲ್‌ನಲ್ಲಿ ಭಾರತ ಚೀನಾವನ್ನು 5–1ರಿಂದ ಸೋಲಿಸಿ ಮಹಿಳಾ ರಿಕರ್ವ್ ವಿಭಾಗದ ತನ್ನ ಮೊದಲ ಏಷ್ಯನ್ ಗೇಮ್ಸ್ ಫೈನಲ್‌ಗೆ ಪ್ರವೇಶಿಸಿತ್ತು. ಫೈನಲ್‌ನ ಗೆಲುವಿನೊಂದಿಗೆ ಈ ವಿಭಾಗದಲ್ಲಿ ಭಾರತದ ಚಿನ್ನದ ಪದಕದ ಬರ ಅಂತ್ಯಗೊಂಡಿದೆ.
ಮಿಶ್ರ ರಿಕರ್ವ್ ತಂಡಕ್ಕೂ ಬೆಳ್ಳಿ
ಇದೇ ದಿನ ರಿಕರ್ವ್ ಮಿಶ್ರ ತಂಡ ಸ್ಪರ್ಧೆಯಲ್ಲೂ ಭಾರತ ಪದಕ ಗೆದ್ದಿದೆ. ಕುಂಕುಮ್ ಮೊಹೋಡ್ ಮತ್ತು ಧೀರಜ್ ಬೊಮ್ಮದೇವರಾ ಜೋಡಿ ಫೈನಲ್‌ನಲ್ಲಿ ಚೀನಾವನ್ನು ಎದುರಿಸಿ 3–5 ಅಂತರದಿಂದ ಸೋಲುವ ಮೂಲಕ ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟಿತು. ಆದರೆ ಈ ಬೆಳ್ಳಿ ಪದಕವೂ ಭಾರತದ ಪಾಲಿಗೆ ಮಹತ್ವದ್ದಾಗಿದೆ. 2018ರ ಏಷ್ಯನ್ ಗೇಮ್ಸ್‌ನಲ್ಲಿ ರಿಕರ್ವ್ ಮಿಶ್ರ ತಂಡ ಸ್ಪರ್ಧೆ ಸೇರ್ಪಡೆಯಾದ ಬಳಿಕ, ಈ ವಿಭಾಗದಲ್ಲಿ ಭಾರತ ಗೆದ್ದಿರುವ ಮೊದಲ ಪದಕ ಇದಾಗಿದೆ.
ಸೆಮಿಫೈನಲ್‌ನಲ್ಲಿ ಆತಿಥೇಯ ಜಪಾನ್ ವಿರುದ್ಧ ಹಿನ್ನಡೆಯಿಂದ ಅದ್ಭುತವಾಗಿ ಪುಟಿದೆದ್ದ ಕುಂಕುಮ್–ಧೀರಜ್ ಜೋಡಿ ಫೈನಲ್‌ಗೆ ಪ್ರವೇಶಿಸಿತ್ತು.
ಒಂದೇ ದಿನ ಚಿನ್ನ–ಬೆಳ್ಳಿ ಗೆದ್ದ ಕುಂಕುಮ್ : 17 ವರ್ಷದ ಕುಂಕುಮ್ ಮೊಹೋಡ್ ಈ ಸಾಧನೆಯ ಪ್ರಮುಖ ಆಕರ್ಷಣೆಯಾಗಿದ್ದಾರೆ. ಕೆಲವೇ ಗಂಟೆಗಳ ಅಂತರದಲ್ಲಿ ಅವರು ಮಹಿಳಾ ರಿಕರ್ವ್ ತಂಡದೊಂದಿಗೆ ಚಿನ್ನದ ಪದಕ ಹಾಗೂ ಮಿಶ್ರ ರಿಕರ್ವ್ ತಂಡದೊಂದಿಗೆ ಬೆಳ್ಳಿ ಪದಕ ಗೆದ್ದಿದ್ದಾರೆ.
ಇದರೊಂದಿಗೆ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಆರ್ಚರಿ ಅಭಿಯಾನಕ್ಕೆ ಮತ್ತೊಂದು ಐತಿಹಾಸಿಕ ಅಧ್ಯಾಯ ಸೇರ್ಪಡೆಯಾಗಿದೆ. ಮಹಿಳಾ ರಿಕರ್ವ್ ತಂಡದ ಚಿನ್ನ ಹಾಗೂ ಮಿಶ್ರ ತಂಡದ ಬೆಳ್ಳಿ ಭಾರತದ ರಿಕರ್ವ್ ಆರ್ಚರಿಯ ಬೆಳವಣಿಗೆಯನ್ನು ಮತ್ತಷ್ಟು ಗಮನ ಸೆಳೆದಿದೆ.
