ನವದೆಹಲಿ: ಕ್ರಿಕೆಟ್ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದ 2027ರ ಪುರುಷರ ಏಕದಿನ ವಿಶ್ವಕಪ್‌ನ ಸಂಪೂರ್ಣ ವೇಳಾಪಟ್ಟಿ ಬಿಡುಗಡೆಯಾಗಿದೆ. ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಹಾಗೂ ನಮೀಬಿಯಾ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಈ ಮಹತ್ವದ ಟೂರ್ನಿಯಲ್ಲಿ ಒಟ್ಟು 14 ತಂಡಗಳು ಪ್ರಶಸ್ತಿಗಾಗಿ ಸೆಣಸಲಿವೆ.
ಟೀಮ್ ಇಂಡಿಯಾ ತನ್ನ ವಿಶ್ವಕಪ್ ಅಭಿಯಾನವನ್ನು ಅಕ್ಟೋಬರ್ 7ರಂದು ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ವಿರುದ್ಧ ಆರಂಭಿಸಲಿದೆ. ಕೇಪ್‌ಟೌನ್‌ನಲ್ಲಿ ನಡೆಯಲಿರುವ ಈ ಪಂದ್ಯ 2023ರ ವಿಶ್ವಕಪ್ ಫೈನಲ್‌ನ ಮರುಪಂದ್ಯದಂತೆ ಗಮನ ಸೆಳೆಯಲಿದೆ.
ಇದಾದ ಕೇವಲ ಮೂರು ದಿನಗಳ ಬಳಿಕ ಅಂದರೆ ಅಕ್ಟೋಬರ್ 10ರಂದು ಭಾರತ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಜೋಹಾನ್ಸ್‌ಬರ್ಗ್‌ನಲ್ಲಿ ಎದುರಿಸಲಿದೆ. ಹೀಗಾಗಿ ವಿಶ್ವಕಪ್ ಆರಂಭದಲ್ಲೇ ಭಾರತಕ್ಕೆ ಎರಡು ಪ್ರಮುಖ ಪಂದ್ಯಗಳು ಎದುರಾಗಲಿವೆ.
ಭಾರತದ ಪ್ರಮುಖ ಪಂದ್ಯಗಳು: ಭಾರತದ ಆರಂಭಿಕ ಪಂದ್ಯವೇ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿದ್ದು, ಬಳಿಕ ಪಾಕಿಸ್ತಾನ ವಿರುದ್ಧದ ಬಹುನಿರೀಕ್ಷಿತ ಕದನ ನಡೆಯಲಿದೆ. ಗ್ರೂಪ್ ಹಂತದ ಅಂತಿಮ ಪಂದ್ಯದಲ್ಲಿ ಭಾರತ ಜಿಂಬಾಬ್ವೆಯನ್ನು ಎದುರಿಸಲಿದೆ.
ವಿಶ್ವಕಪ್‌ನ ಗ್ರೂಪ್ ಹಂತ ಅಕ್ಟೋಬರ್ 7ರಿಂದ ಆರಂಭವಾಗಲಿದ್ದು, ಕೇಪ್‌ಟೌನ್‌ನಲ್ಲಿ ಭಾರತ-ಆಸ್ಟ್ರೇಲಿಯಾ ಪಂದ್ಯವೇ ಉದ್ಘಾಟನಾ ಕದನವಾಗಲಿದೆ.
14 ತಂಡಗಳು, 12 ತಂಡಗಳಿಗೆ ಗ್ರೂಪ್ ಹಂತ: 2027ರ ವಿಶ್ವಕಪ್‌ನಲ್ಲಿ 14 ತಂಡಗಳು ಭಾಗವಹಿಸಲಿವೆ. ಆತಿಥೇಯ ರಾಷ್ಟ್ರಗಳಾದ ದಕ್ಷಿಣ ಆಫ್ರಿಕಾ ಮತ್ತು ಜಿಂಬಾಬ್ವೆ ನೇರ ಅರ್ಹತೆ ಪಡೆದಿವೆ. 2026ರ ಸೆಪ್ಟೆಂಬರ್ 30ರ ಐಸಿಸಿ ಏಕದಿನ ರ‍್ಯಾಂಕಿಂಗ್‌ ಕಟ್‌ಆಫ್ ಆಧಾರದ ಮೇಲೆ ಇನ್ನೂ ಎಂಟು ತಂಡಗಳು ನೇರವಾಗಿ ಅರ್ಹತೆ ಪಡೆದಿವೆ.
ಉಳಿದ ನಾಲ್ಕು ಸ್ಥಾನಗಳು ಕ್ವಾಲಿಫೈಯರ್ ಮೂಲಕ ನಿರ್ಧಾರವಾಗಲಿವೆ. ಕ್ವಾಲಿಫೈಯರ್‌ನಲ್ಲಿ ಅಗ್ರಸ್ಥಾನ ಪಡೆಯುವ ತಂಡ ನೇರವಾಗಿ ವಿಶ್ವಕಪ್ ಗ್ರೂಪ್ ಹಂತಕ್ಕೆ ಪ್ರವೇಶಿಸಲಿದೆ. ಉಳಿದ ಮೂರು ತಂಡಗಳು ವಿಂಡ್‌ಹೋಕ್‌ನಲ್ಲಿ ನಡೆಯಲಿರುವ ಸೂಪರ್ ಸೀರೀಸ್‌ನಲ್ಲಿ ಸೆಣಸಲಿವೆ. ಅಲ್ಲಿನ ಅಗ್ರ ತಂಡ 12ನೇ ತಂಡವಾಗಿ ಗ್ರೂಪ್ ಹಂತ ಪ್ರವೇಶಿಸಲಿದೆ. ಗ್ರೂಪ್ ಹಂತದಲ್ಲಿ 12 ತಂಡಗಳನ್ನು ತಲಾ ಆರು ತಂಡಗಳಂತೆ ಎರಡು ಗುಂಪುಗಳಾಗಿ ವಿಂಗಡಿಸಲಾಗುತ್ತದೆ.
‘ಸೂಪರ್ 7’ ವಿಶೇಷ: 2027ರ ವಿಶ್ವಕಪ್‌ನ ಪ್ರಮುಖ ಬದಲಾವಣೆಯೆಂದರೆ ‘ಸೂಪರ್ 7’ ಹಂತ. ಎರಡು ಗುಂಪುಗಳಿಂದ ತಲಾ ಮೂರು ತಂಡಗಳು ಹಾಗೂ ಉತ್ತಮ ಪ್ರದರ್ಶನ ನೀಡಿದ ನಾಲ್ಕನೇ ಸ್ಥಾನದಲ್ಲಿರುವ ಒಂದು ತಂಡ ಸೇರಿ ಒಟ್ಟು ಏಳು ತಂಡಗಳು ಈ ಹಂತಕ್ಕೆ ಪ್ರವೇಶಿಸಲಿವೆ.
ಸೂಪರ್ 7 ಹಂತಕ್ಕೆ ಪ್ರವೇಶಿಸುವ ತಂಡಗಳು ಗ್ರೂಪ್ ಹಂತದಲ್ಲಿ ಗಳಿಸಿದ ಅಂಕಗಳನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವುದಿಲ್ಲ. ಅಂದರೆ, ಎಲ್ಲ ತಂಡಗಳೂ ಶೂನ್ಯ ಅಂಕದಿಂದಲೇ ಸೂಪರ್ 7 ಹಂತ ಆರಂಭಿಸಲಿವೆ.
ಅಕ್ಟೋಬರ್ 25ರಿಂದ ನವೆಂಬರ್ 14ರವರೆಗೆ ನಡೆಯುವ ಈ ಹಂತದಲ್ಲಿ ಪ್ರತಿಯೊಂದು ತಂಡವೂ ತಲಾ ಆರು ಪಂದ್ಯಗಳನ್ನು ಆಡಲಿದೆ.
ಭಾರತಕ್ಕೆ A1 ಸ್ಥಾನ:
A1 – ಭಾರತ
A2 – ಆಸ್ಟ್ರೇಲಿಯಾ
A3 – ಪಾಕಿಸ್ತಾನ
A4 – ಇಂಗ್ಲೆಂಡ್
B1 – ನ್ಯೂಜಿಲೆಂಡ್
B2 – ದಕ್ಷಿಣ ಆಫ್ರಿಕಾ
B3 – ಶ್ರೀಲಂಕಾ
ಸೂಪರ್ 7 ಹಂತಕ್ಕೆ ಸೀಡೆಡ್ ತಂಡಗಳ ಬದಲಿಗೆ ಬೇರೆ ತಂಡ ಅರ್ಹತೆ ಪಡೆದರೆ, ಹೊರಬಿದ್ದ ಸೀಡೆಡ್ ತಂಡದ ಸ್ಥಾನವನ್ನು ಆ ತಂಡ ಪಡೆದುಕೊಳ್ಳಲಿದೆ.
ಸೆಮಿಫೈನಲ್-ಫೈನಲ್ ಎಲ್ಲಿ?: ಸೂಪರ್ 7 ಹಂತದ ಬಳಿಕ ಅಗ್ರ ನಾಲ್ಕು ತಂಡಗಳು ಸೆಮಿಫೈನಲ್‌ಗೆ ಅರ್ಹತೆ ಪಡೆಯಲಿವೆ.
ನ.17: ಮೊದಲ ಸೆಮಿಫೈನಲ್ – ಕೇಪ್‌ಟೌನ್
ನ.18: ಎರಡನೇ ಸೆಮಿಫೈನಲ್ – ಷ್ವಾನೆ
ನ.21: ಫೈನಲ್ – ಜೋಹಾನ್ಸ್‌ಬರ್ಗ್
ಎರಡೂ ಸೆಮಿಫೈನಲ್ ಪಂದ್ಯಗಳಿಗೆ ಮೀಸಲು ದಿನ ಇರಲಿದ್ದು, ಫೈನಲ್ ಪಂದ್ಯಕ್ಕೆ ನವೆಂಬರ್ 22 ಮೀಸಲು ದಿನವಾಗಿದೆ.
