ರೊಸಾರಿಯೊ: ಅರ್ಜೆಂಟಿನಾ ಫುಟ್ಬಾಲ್ ದಿಗ್ಗಜ ಲಿಯೊನೆಲ್ ಮೆಸ್ಸಿ ಅವರ ತಂದೆ ಹಾಗೂ ಏಜೆಂಟ್ ಜಾರ್ಜ್ ಮೆಸ್ಸಿ (68) ನಿಧನರಾಗಿದ್ದಾರೆ. ದೀರ್ಘಕಾಲದಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು ಅರ್ಜೆಂಟಿನಾದ ರೊಸಾರಿಯೊದಲ್ಲಿ ಕೊನೆಯುಸಿರೆಳೆದಿದ್ದಾರೆ ಎಂದು ವರದಿಯಾಗಿದೆ.
ಜಾರ್ಜ್ ಮೆಸ್ಸಿ ಅವರು ಲಿಯೊನೆಲ್ ಅವರ ಫುಟ್ಬಾಲ್ ವೃತ್ತಿಜೀವನದ ಆರಂಭದಿಂದಲೂ ಪ್ರಮುಖ ಬೆಂಬಲವಾಗಿ ನಿಂತಿದ್ದರು. ಮಗನ ವೃತ್ತಿಜೀವನ ಬೆಳೆಯುತ್ತಿದ್ದಂತೆ ಕ್ಲಬ್ಗಳು ಹಾಗೂ ವಾಣಿಜ್ಯ ಸಂಸ್ಥೆಗಳೊಂದಿಗಿನ ಒಪ್ಪಂದ ಮತ್ತು ಮಾತುಕತೆಗಳನ್ನು ನೋಡಿಕೊಳ್ಳುತ್ತಿದ್ದ ಅವರು, ಮೈದಾನದ ಹೊರಗಿನ ಮೆಸ್ಸಿ ಅವರ ವ್ಯವಹಾರಿಕ ಜವಾಬ್ದಾರಿಗಳನ್ನೂ ನಿರ್ವಹಿಸುತ್ತಿದ್ದರು.
ಬಾಲ್ಯದಲ್ಲಿ ರೊಸಾರಿಯೊದ ನ್ಯೂವೆಲ್ಸ್ ಓಲ್ಡ್ ಬಾಯ್ಸ್ ತಂಡದಲ್ಲಿ ಆಡುತ್ತಿದ್ದ ಮೆಸ್ಸಿಗೆ ಅಗತ್ಯ ವೈದ್ಯಕೀಯ ಚಿಕಿತ್ಸೆ ದೊರೆಯುವಂತೆ ಜಾರ್ಜ್ ನೋಡಿಕೊಂಡಿದ್ದರು. ಬಳಿಕ ಮೆಸ್ಸಿ ಯುರೋಪ್ನಲ್ಲಿ ವೃತ್ತಿಜೀವನ ಮುಂದುವರಿಸಲು ಬಾರ್ಸಿಲೋನಾಗೆ ತೆರಳಿದಾಗಲೂ ಜಾರ್ಜ್ ಅವರೊಂದಿಗೆ ಸ್ಪೇನ್ಗೆ ತೆರಳಿ ಮಗನ ವೃತ್ತಿಜೀವನಕ್ಕೆ ಬೆಂಬಲ ನೀಡಿದ್ದರು.
ಜಾರ್ಜ್ ಅವರು ಪತ್ನಿ ಸೆಲಿಯಾ ಕುಚ್ಚಿಟ್ಟಿನಿ ಹಾಗೂ ಮಕ್ಕಳಾದ ಲಿಯೊನೆಲ್, ರೊಡ್ರಿಗೊ, ಮಟಿಯಾಸ್ ಮತ್ತು ಮರಿಯಾ ಸೋಲ್ ಅವರನ್ನು ಅಗಲಿದ್ದಾರೆ. ದೀರ್ಘಕಾಲದಿಂದ ಅನಾರೋಗ್ಯಕ್ಕೆ ಚಿಕಿತ್ಸೆ ಪಡೆಯುತ್ತಿದ್ದ ಅವರು ರೊಸಾರಿಯೊದಲ್ಲೇ ಕೊನೆಯುಸಿರೆಳೆದಿದ್ದಾರೆ.
ಇತ್ತೀಚೆಗೆ ನಡೆದ ಫಿಫಾ ವಿಶ್ವಕಪ್ನ ಆರಂಭಿಕ ಪಂದ್ಯದಲ್ಲಿ ಅಲ್ಜೀರಿಯಾ ವಿರುದ್ಧ ಹ್ಯಾಟ್ರಿಕ್ ಗಳಿಸಿದ ಬಳಿಕ ಮೆಸ್ಸಿ ಕಣ್ಣೀರಿಟ್ಟಿದ್ದರು. ಆ ಸಂದರ್ಭದಲ್ಲಿ ತಮ್ಮ ಭಾವನಾತ್ಮಕ ಸ್ಥಿತಿಗೆ ಫುಟ್ಬಾಲ್ಗೆ ಸಂಬಂಧಿಸದ ವೈಯಕ್ತಿಕ ಕಾರಣವಿದೆ ಎಂದು ಮೆಸ್ಸಿ ಹೇಳಿದ್ದರು. ಬಳಿಕ ಕುಟುಂಬದವರು ಜಾರ್ಜ್ ಅವರ ಆರೋಗ್ಯ ಪರಿಸ್ಥಿತಿ ಕುರಿತು ಮಾಹಿತಿ ನೀಡಿ, ಅವರು ವೈದ್ಯಕೀಯ ಚಿಕಿತ್ಸೆ ಪಡೆಯುತ್ತಿರುವುದನ್ನು ತಿಳಿಸಿದ್ದರು.
ಜಾರ್ಜ್ ಮೆಸ್ಸಿ ಅವರ ನಿಧನಕ್ಕೆ ದಕ್ಷಿಣ ಅಮೆರಿಕದ ಫುಟ್ಬಾಲ್ ಆಡಳಿತ ಮಂಡಳಿ ಕಾನ್ಮೆಬೊಲ್ ಸಂತಾಪ ಸೂಚಿಸಿದೆ. ಲಿಯೊನೆಲ್ ಮೆಸ್ಸಿ ಹಾಗೂ ಅವರ ಕುಟುಂಬದ ದುಃಖದಲ್ಲಿ ತಾವು ಭಾಗಿಯಾಗಿರುವುದಾಗಿ ತಿಳಿಸಿದೆ.
