ನವದೆಹಲಿ: ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರಿಗೆ ಒಬ್ಬ ಅಣ್ಣನಿದ್ದ ಎಂಬ ಅಚ್ಚರಿಯ ಸಂಗತಿಯನ್ನು ಸೋನಿಯಾ ಗಾಂಧಿ ಅವರ ತಾಯ್ತನದ ನೋವಿನ ನೆನಪಿನೊಂದಿಗೆ ತಮ್ಮ ಹೊಸ ಆತ್ಮಕಥನ ‘Belonging: A Journey of Love’ನಲ್ಲಿ ಈ ನೋವಿನ ಘಟನೆಯನ್ನು ಅವರು ಹಂಚಿಕೊಂಡಿದ್ದಾರೆ.
1969ರ ಜನವರಿ 18ರಂದು ಸೋನಿಯಾ ಗಾಂಧಿ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಆದರೆ, ಮಗು ಅವಧಿಗೂ ಎರಡು ತಿಂಗಳು ಮುಂಚಿತವಾಗಿ ಜನಿಸಿದ್ದರಿಂದ ಆರೋಗ್ಯ ಸಮಸ್ಯೆ ಎದುರಿಸಿತ್ತು. ದಪ್ಪ ಕಪ್ಪು ಕೂದಲು ಮತ್ತು ಉದ್ದನೆಯ ತೆಳ್ಳಗಿನ ಬೆರಳುಗಳನ್ನು ಹೊಂದಿದ್ದ ಮಗುವನ್ನು ಮೊದಲ ನೋಟದಲ್ಲೇ ಅಪಾರವಾಗಿ ಪ್ರೀತಿಸಿದ್ದಾಗಿ ಅವರು ಹೇಳಿಕೊಂಡಿದ್ದಾರೆ.
ಆದರೆ, ವಿಧಿಯಾಟ ಬೇರೆಯೇ ಇತ್ತು. ಜನಿಸಿದ ಮರುದಿನ ಮುಂಜಾನೆಯೇ ಮಗು ಮೃತಪಟ್ಟಿತ್ತು. ಈ ಘಟನೆಯಿಂದ ಸೋನಿಯಾ ಗಾಂಧಿ ತೀವ್ರ ಆಘಾತಕ್ಕೊಳಗಾಗಿದ್ದರು. ಪತಿ ರಾಜೀವ್ ಗಾಂಧಿ ಕೂಡ ಮಗುವಿನ ಸಾವಿನಿಂದ ಕುಸಿದು ಹೋಗಿದ್ದರು.
ಆ ಸಂದರ್ಭದಲ್ಲಿ ದೇಶದ ಪ್ರಧಾನಿಯಾಗಿದ್ದ ತಮ್ಮ ಅತ್ತೆ ಇಂದಿರಾ ಗಾಂಧಿ ಅವರು ಕೂಡ ಪ್ರವಾಸವನ್ನು ಅರ್ಧಕ್ಕೆ ಮೊಟಕುಗೊಳಿಸಿ ಆಸ್ಪತ್ರೆಗೆ ಧಾವಿಸಿದ್ದರು. ಸೊಸೆಯನ್ನು ಅಪ್ಪಿಕೊಂಡು ಕಣ್ಣೀರಿಟ್ಟಿದ್ದರು ಎಂದು ಸೋನಿಯಾ ಗಾಂಧಿ ಭಾವುಕವಾಗಿ ನೆನಪಿಸಿಕೊಂಡಿದ್ದಾರೆ.
“ನೀವು ನನ್ನನ್ನು ರಾಜಕೀಯ ನಾಯಕಿಯಾಗಿ ನೋಡಿದ್ದೀರಿ. ಆದರೆ, ಆ ಮಗುವನ್ನು ಕಳೆದುಕೊಂಡ ನೋವು ಇಂದಿಗೂ ನನ್ನ ಎದೆಯಲ್ಲಿ ಹಾಗೆಯೇ ಉಳಿದಿದೆ” ಎಂಬ ಅವರ ಮಾತುಗಳು ತಾಯಿಯೊಬ್ಬಳ ನೋವಿನ ಆಳವನ್ನು ತೆರೆದಿಟ್ಟಿವೆ.
