ಮುಂಬೈ: ‘OMG 2’ ಚಿತ್ರದ ಮೂಲಕ ರಾಷ್ಟ್ರವ್ಯಾಪಿ ಮೆಚ್ಚುಗೆ ಪಡೆದ ನಿರ್ದೇಶಕ ಅಮಿತ್ ರೈ ತಮ್ಮ ಹೊಸ ಸಿನಿಮಾ ‘ಓಹ್ ಮೈ ಡಾಗ್’ ಮೂಲಕ ಮತ್ತೆ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಮಾನವ ಮತ್ತು ನಾಯಿಗಳ ನಡುವಿನ ಭಾವನಾತ್ಮಕ ಬಾಂಧವ್ಯವನ್ನು ವಿಭಿನ್ನ ರೀತಿಯಲ್ಲಿ ಕಟ್ಟಿಕೊಡುವ ಈ ಚಿತ್ರವು ಆಗಸ್ಟ್ 7, 2026ರಂದು ದೇಶಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
ಚಿತ್ರದ ಬಿಡುಗಡೆಗೂ ಮುನ್ನ ಚಿತ್ರತಂಡ ಮತ್ತೊಂದು ವಿಶೇಷ ಅಚ್ಚರಿ ನೀಡಿದೆ. 1990ರ ದಶಕದಲ್ಲಿ ಭಾರೀ ಜನಪ್ರಿಯತೆ ಪಡೆದ ‘ಚೋಟಾ ಬಚ್ಚಾ’ ಹಾಡನ್ನು ‘ಚೋಟಾ ಬಚ್ಚಾ 2.0’ ಹೆಸರಿನಲ್ಲಿ ಹೊಸ ಸಂಗೀತ ಮತ್ತು ಆಧುನಿಕ ಶೈಲಿಯೊಂದಿಗೆ ಮರುಸೃಷ್ಟಿಸಲಾಗಿದೆ. ಈ ಹಾಡು ಈಗಾಗಲೇ ಟಿಪ್ಸ್ ಯೂಟ್ಯೂಬ್ ಚಾನೆಲ್ ಮೂಲಕ ಬಿಡುಗಡೆಯಾಗಿ ಸಂಗೀತ ಪ್ರಿಯರ ಗಮನ ಸೆಳೆಯುತ್ತಿದೆ.
ಹಳೆಯ ಹಾಡಿನ ನೆನಪುಗಳನ್ನು ಉಳಿಸಿಕೊಂಡು ಹೊಸ ತಲೆಮಾರಿನ ಅಭಿರುಚಿಗೆ ತಕ್ಕಂತೆ ಅದನ್ನು ಮರುರೂಪಿಸಿರುವ ಪ್ರಯತ್ನಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.
‘ಓಹ್ ಮೈ ಡಾಗ್’ ಚಿತ್ರವನ್ನು ಅಮಿತ್ ರೈ ಅವರೇ ಬರೆದು ನಿರ್ದೇಶಿಸಿದ್ದು, ಕುಟುಂಬ ಸಮೇತ ವೀಕ್ಷಿಸಬಹುದಾದ ಮನರಂಜನಾ ಚಿತ್ರವಾಗಿ ರೂಪುಗೊಂಡಿದೆ. ಚಿತ್ರದ ಪ್ರಮುಖ ಪಾತ್ರದಲ್ಲಿ ಪಂಕಜ್ ತ್ರಿಪಾಠಿ ಅಭಿನಯಿಸಿದ್ದು, ಅವರೊಂದಿಗೆ ಪವನ್ ಮಲ್ಹೋತ್ರಾ, ಮಾಹಿ ರೈ, ರಾಜೇಶ್ ಕುಮಾರ್, ಗೀತಾ ಅಗ್ರವಾಲ್ ಶರ್ಮಾ, ವಿಜಯ್ ಮಿಶ್ರಾ ಮತ್ತು ಸುಲಕ್ಷಣಾ ಬರುವಾ ಸೇರಿದಂತೆ ಹಲವು ಕಲಾವಿದರು ನಟಿಸಿದ್ದಾರೆ.
ಚಿತ್ರದ ಮತ್ತೊಂದು ಪ್ರಮುಖ ಆಕರ್ಷಣೆ ಎಂದರೆ 250ಕ್ಕೂ ಹೆಚ್ಚು ನಾಯಿಗಳು ಚಿತ್ರದ ವಿವಿಧ ದೃಶ್ಯಗಳಲ್ಲಿ ಕಾಣಿಸಿಕೊಂಡಿರುವುದು. ಅವುಗಳಲ್ಲಿ ಬ್ರೂನೋ ಮತ್ತು ಆಸ್ಕರ್ ಎಂಬ ನಾಯಿ ತಾರೆಗಳು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವುದು ವಿಶೇಷವಾಗಿದೆ. ಪ್ರಾಣಿಗಳ ಮೇಲಿನ ಪ್ರೀತಿ, ಮಾನವೀಯ ಮೌಲ್ಯಗಳು ಮತ್ತು ಮನರಂಜನೆಯನ್ನು ಒಟ್ಟುಗೂಡಿಸುವ ಪ್ರಯತ್ನವನ್ನು ಚಿತ್ರತಂಡ ಮಾಡಿದೆ.
ಈ ಚಿತ್ರವನ್ನು ಬಾಬುಲಾಲ್ ಬಿಸ್ಕೋಪ್ ಮತ್ತು ಥಿಂಕಿಂಗ್ ಹ್ಯಾಟ್ಸ್ ಎಂಟರ್ಟೈನ್ಮೆಂಟ್ ಬ್ಯಾನರ್ಗಳ ಅಡಿಯಲ್ಲಿ ಅಮಿತ್ ರೈ, ಸನಾ ವಾರ್ಸಿ ಹಾಗೂ ರಾಜೇಶ್ ಭಾರದ್ವಾಜ್ ನಿರ್ಮಿಸಿದ್ದಾರೆ.
‘ಓಎಂಜಿ 2’ ಚಿತ್ರದ ಯಶಸ್ಸಿನ ಬಳಿಕ ಅಮಿತ್ ರೈ ನಿರ್ದೇಶನದ ಮುಂದಿನ ಸಿನಿಮಾ ಎಂಬ ಕಾರಣಕ್ಕೂ, ಜೊತೆಗೆ ಪಂಕಜ್ ತ್ರಿಪಾಠಿ ಅಭಿನಯ ಮತ್ತು ವಿಭಿನ್ನ ಕಥಾಹಂದರದ ಹಿನ್ನೆಲೆಯಲ್ಲಿಯೂ ‘ಓಹ್ ಮೈ ಡಾಗ್’ ಮೇಲೆ ಸಿನಿಪ್ರಿಯರ ನಿರೀಕ್ಷೆ ಹೆಚ್ಚಾಗಿದೆ. ‘ಚೋಟಾ ಬಚ್ಚಾ 2.0’ ಹಾಡಿನ ಮೂಲಕ ಚಿತ್ರದ ಪ್ರಚಾರ ಆರಂಭವಾಗಿದ್ದು, ಆಗಸ್ಟ್ 7ರಂದು ಸಿನಿಮಾ ಪ್ರೇಕ್ಷಕರ ಮುಂದೆ ಯಾವ ರೀತಿಯ ಅನುಭವ ನೀಡಲಿದೆ ಎಂಬ ಕುತೂಹಲ ಹೆಚ್ಚಾಗಿದೆ.
- ಉತ್ತರ ಕರ್ನಾಟಕದ ಪ್ರಭಾವಿ ನಾಯಕ ಸಂತೋಷ್ ಲಾಡ್ಗೆ ಮತ್ತೆ ಸಚಿವ ಸ್ಥಾನ
- ಹಿಟ್ನಾಳಗೆ ತಪ್ಪಿದ ಸಚಿವ ಸ್ಥಾನ: ಕೊಪ್ಪಳದಲ್ಲಿ ಟೈರ್ ಸುಟ್ಟು ಬೆಂಬಲಿಗರ ಪ್ರತಿಭಟನೆ!
- ‘ಚೋಟಾ ಬಚ್ಚಾ 2.0’ ಹಾಡಿನೊಂದಿಗೆ ಬಂದ ‘ಓಹ್ ಮೈ ಡಾಗ್
- ದುನಿಯಾ ವಿಜಯ್ ಪುತ್ರಿಯ ‘ಸಿಟಿ ಲೈಟ್ಸ್’ ಸೆಪ್ಟೆಂಬರ್ 18ಕ್ಕೆ ದರ್ಶನ
- ಕರ್ನಾಟಕ ಸಚಿವ ಸಂಪುಟ ವಿಸ್ತರಣೆ: 20 ನೂತನ ಸಚಿವರ ಪಟ್ಟಿ ಪ್ರಕಟ
