ಬೆಂಗಳೂರು: ಕನ್ನಡ ಚಿತ್ರರಂಗದ ನಟಿ ಕೃಷಿ ತಾಪಂಡ ಮನೆಯಲ್ಲಿ ಗೆಳೆಯ ವೈಶಾಖ್ ಆತ್ಮಹತ್ಯೆ ಮಾಡಿಕೊಂಡ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಕೃಷಿ ಕೊನೆಗೂ ಸೋಶಿಯಲ್ ಮೀಡಿಯಾದಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ತಮ್ಮ ಮೊದಲ ಪ್ರತಿಕ್ರಿಯೆ ನೀಡಿದ್ದಾರೆ.
ಪೋಸ್ಟ್ಗೆ ಕಾರಣ: ಈ ಹಿಂದೆ ಕೃಷಿ ತಾಪಂಡ ಬೇರೊಬ್ಬ ಯುವಕನೊಂದಿಗೆ ಅಕ್ರಮ ಸಂಬಂಧ ಇತ್ತು ಎಂಬ ಆರೋಪ ಕೇಳಿಬಂದಿತ್ತು. ತದನಂತರ ವೈಶಾಖ್ ಜೊತೆಗಿನ ಸಂಬಂಧದ ಬಗ್ಗೆಯೂ ಹಲವು ಊಹಾಪೋಹಗಳು ಹರಿದಾಡಿದ್ದವು. ಈ ಘಟನೆಯ ಬಳಿಕ ತಮ್ಮ ಹಾಗೂ ತಮ್ಮ ಕುಟುಂಬದ ಮೇಲೆ ಬರುತ್ತಿರುವ ತೀವ್ರ ಒತ್ತಡ, ನಿರಂತರ ಪ್ರಶ್ನೆಗಳು ಮತ್ತು ಹರಿದಾಡುತ್ತಿರುವ ವದಂತಿಗಳಿಗೆ ಬೇಸತ್ತು ಕೃಷಿ ಈ ಸ್ಪಷ್ಟನೆ ನೀಡಿದ್ದಾರೆ.
ಕೃಷಿ ತಾಪಂಡ ಭಾವನಾತ್ಮಕ ವಿನಂತಿ: “ನನ್ನ ಹೃದಯಕ್ಕೆ ಅತ್ಯಂತ ಹತ್ತಿರವಾಗಿದ್ದ, ಕಷ್ಟಕಾಲದಲ್ಲಿ ನನ್ನ ಪರವಾಗಿ ನಿಂತು ರಕ್ಷಿಸಿದ್ದ ವ್ಯಕ್ತಿಯನ್ನು ನಾನು ಕಳೆದುಕೊಂಡಿದ್ದೇನೆ. ಈ ಸಾವು ನನ್ನ ಜೀವನದಲ್ಲಿ ಎಂದಿಗೂ ತುಂಬಲಾರದ ಶೂನ್ಯತೆಯನ್ನು ಸೃಷ್ಟಿಸಿದೆ. ಇಂತಹ ದೊಡ್ಡ ನಷ್ಟದ ಸಮಯದಲ್ಲಿ ದುಃಖಿಸಲು ಬಿಡದೆ, ಮಾಧ್ಯಮಗಳು ಮತ್ತು ಸಾರ್ವಜನಿಕರು ನಿರಂತರವಾಗಿ ಕಲ್ಪಿತ ಕಥೆಗಳನ್ನು ಸೃಷ್ಟಿಸುತ್ತಿರುವುದು ತಮಗೆ ತೀವ್ರ ನೋವುಂಟು ಮಾಡಿದೆ” ಎಂದು ಕೃಷಿ ಬರೆದುಕೊಂಡಿದ್ದಾರೆ.
ಮಾಧ್ಯಮ ಹಾಗೂ ಸಾರ್ವಜನಿಕರಿಗೆ ಮನವಿ: ಕೆಲವು ಮಾಧ್ಯಮಗಳು ಕೇವಲ ಟಿಆರ್ಪಿ ಅಥವಾ ಮುಖ್ಯಾಂಶಗಳಿಗಾಗಿ ಒಬ್ಬರ ಸಾವನ್ನು ಮನರಂಜನೆ ಮಾಡುತ್ತಿವೆ ಎಂದು ಆಕ್ರೋಶ ಹೊರಹಾಕಿರುವ ನಟಿ, “ಯಾರೋ ಒಬ್ಬರು ಮಗನನ್ನು ಕಳೆದುಕೊಂಡಿದ್ದಾರೆ, ಸ್ನೇಹಿತರು ದುಃಖದಲ್ಲಿದ್ದಾರೆ. ದಯವಿಟ್ಟು ಒಬ್ಬರ ಸಾವನ್ನು ಸುದ್ದಿಯನ್ನಾಗಿ ಮಾಡಬೇಡಿ. ನಮಗೆ ನೆಮ್ಮದಿಯಿಂದ ದುಃಖಿಸಲು ಅಗತ್ಯವಿರುವ ಘನತೆ ಮತ್ತು ಗೌಪ್ಯತೆಯನ್ನು ನೀಡಿ” ಎಂದು ಕೈಮುಗಿದು ವಿನಂತಿಸಿದ್ದಾರೆ.
ಮಾನಸಿಕ ಆರೋಗ್ಯದ ಬಗ್ಗೆ ಸಂದೇಶ: ಕೊನೆಯದಾಗಿ ಮಾನಸಿಕ ಆರೋಗ್ಯದ ಮಹತ್ವವನ್ನು ನೆನಪಿಸಿರುವ ನಟಿ, “ನಿಮಗೆ ಯಾರ ಮುಖದಲ್ಲೂ ಮುಗುಳ್ನಗೆ ತರಲು ಸಾಧ್ಯವಾಗದಿದ್ದರೆ, ಕನಿಷ್ಠ ಪಕ್ಷ ಅವರ ಕಣ್ಣೀರಿಗೆ ನೀವೇ ಕಾರಣವಾಗಬೇಡಿ. ದಯವಿಟ್ಟು ಮೃತರ ಕುಟುಂಬ ಹಾಗೂ ನಮ್ಮೆಲ್ಲರ ಪರಿಸ್ಥಿತಿಯನ್ನು ಅರ್ಥಮಾಡಿಕೊಂಡು ದಯೆ ತೋರಿ” ಎಂದು ಭಾವುಕರಾಗಿ ಕೇಳಿಕೊಂಡಿದ್ದಾರೆ.
