ಚಿತ್ರ: ಅಯೋಗ್ಯ 2
ನಿರ್ದೇಶನ: ಎಸ್.ಮಹೇಶ್ ಕುಮಾರ್
ನಿರ್ಮಾಣ: ಮುನೇಗೌಡ
ತಾರಾಗಣ: ಸತೀಶ್ ನೀನಾಸಂ, ರಚಿತಾ ರಾಮ್, ಶಿವರಾಜ್ ಕೆ.ಆರ್ ಪೇಟೆ, ಗಿರಿ, ರವಿಶಂಕರ್, ತಬಲ ನಾಣಿ, ಸಾಧುಕೋಕಿಲ.
ರೇಟಿಂಗ್ಸ್: ⭐⭐⭐⭐☆ (4/5)
-ಗಣೇಶ್ ರಾಣೆಬೆನ್ನೂರು
ಅಯೋಗ್ಯ 2 ಸಿನಿಮಾ ವಿಮರ್ಶೆ: ಸತೀಶ್ ನೀನಾಸಂ ಅಭಿನಯದ ಹಳ್ಳಿ ಸೊಗಡಿನ ಕಾಮಿಡಿ-ಆಕ್ಷನ್ ಚಿತ್ರಕ್ಕೆ 4 ಸ್ಟಾರ್
ಬೆಂಗಳೂರು: ಮೊದಲ ಭಾಗದ ಭರ್ಜರಿ ಯಶಸ್ಸಿನ ನಂತರ ಸಾಕಷ್ಟು ನಿರೀಕ್ಷೆ ಹುಟ್ಟಿಸಿದ್ದ ‘ಅಯೋಗ್ಯ 2’ ಚಿತ್ರ ಇಂದು ರಾಜ್ಯಾದ್ಯಂತ ಬಿಡುಗಡೆಯಾಗಿ ಸಿನಿಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ. ನಿರ್ದೇಶಕ ಎಸ್. ಮಹೇಶ್ ಕುಮಾರ್ ಮತ್ತೊಮ್ಮೆ ಹಳ್ಳಿ ಸೊಗಡು, ಪಂಚಾಯ್ತಿ ರಾಜಕೀಯ, ಕಾಮಿಡಿ ಹಾಗೂ ಆಕ್ಷನ್‌ಗಳನ್ನು ಸಮತೋಲನವಾಗಿ ಬೆರೆಸಿ ಮನರಂಜನೆಯ ಪ್ಯಾಕೇಜ್ ಕಟ್ಟಿಕೊಟ್ಟಿದ್ದಾರೆ.
ನಿರ್ಮಾಪಕ ಮುನೇಗೌಡ ಅವರ ನಿರ್ಮಾಣದಲ್ಲಿ ಮೂಡಿಬಂದಿರುವ ಈ ಚಿತ್ರದಲ್ಲಿ ಸತೀಶ್ ನೀನಾಸಂ, ರಚಿತಾ ರಾಮ್, ಶಿವರಾಜ್ ಕೆ.ಆರ್. ಪೇಟೆ, ಗಿರಿ, ರವಿಶಂಕರ್, ತಬಲ ನಾಣಿ ಹಾಗೂ ಸಾಧು ಕೋಕಿಲ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
ಮೊದಲ ಭಾಗದ ಕೊನೆಯಲ್ಲಿ ಕೇವಲ ಒಂದೇ ಮತದ ಅಂತರದಿಂದ ಪಂಚಾಯ್ತಿ ಅಧ್ಯಕ್ಷನಾಗಿ ಆಯ್ಕೆಯಾಗಿದ್ದ ಸಿದ್ದೇಗೌಡ ಅಲಿಯಾಸ್ ‘ಅಯೋಗ್ಯ’ನ ಬದುಕಿನ ಮುಂದಿನ ಅಧ್ಯಾಯವೇ ಈ ಚಿತ್ರದ ಕಥೆ.
“ಮನೆಗೆ ಮಾರಿ, ಊರಿಗೆ ಉಪಕಾರಿ” ಎನ್ನುವ ಮಾತಿನಂತೆ, ತನ್ನ ವೈಯಕ್ತಿಕ ಹಿತಾಸಕ್ತಿಗಿಂತ ಊರಿನ ಅಭಿವೃದ್ಧಿಗೆ ಹೆಚ್ಚು ಮಹತ್ವ ನೀಡುವ ನಾಯಕ ಹಲವು ಸವಾಲುಗಳನ್ನು ಎದುರಿಸುತ್ತಾನೆ. ಅಧ್ಯಕ್ಷನಾದ ಬಳಿಕ ಎದುರಾಗುವ ರಾಜಕೀಯ ಕುತಂತ್ರಗಳು, ವಿರೋಧಿಗಳ ಆಟಗಳು, ಗ್ರಾಮಾಭಿವೃದ್ಧಿಯ ಕನಸುಗಳು ಹಾಗೂ ಅವುಗಳನ್ನು ಸಾಕಾರಗೊಳಿಸುವ ಪ್ರಯತ್ನಗಳ ಸುತ್ತ ಕಥೆ ಸಾಗುತ್ತದೆ.
ನಿರ್ದೇಶಕರು ಇಡೀ ಕಥೆಯನ್ನು ಕಾಮಿಡಿ, ಭಾವನಾತ್ಮಕ ದೃಶ್ಯಗಳು ಹಾಗೂ ಮಾಸ್ ಎಲಿಮೆಂಟ್‌ಗಳೊಂದಿಗೆ ಪ್ರೇಕ್ಷಕರಿಗೆ ಮನರಂಜನಾತ್ಮಕವಾಗಿ ಕಟ್ಟಿಕೊಟ್ಟಿದ್ದಾರೆ.
ಮೊದಲ ಭಾಗದ ನೆನಪು : ಚಿತ್ರ ಆರಂಭದಲ್ಲೇ ಮೊದಲ ಭಾಗದ ಪ್ರಮುಖ ಕ್ಷಣಗಳನ್ನು ನೆನಪಿಸುವ ದೃಶ್ಯಗಳನ್ನು ತೋರಿಸಲಾಗುತ್ತದೆ. ಇದರಿಂದ ಮೊದಲ ಭಾಗ ನೋಡಿದ ಪ್ರೇಕ್ಷಕರಿಗೆ ಕಥೆಯ ಸಂಪರ್ಕ ಸುಲಭವಾಗುತ್ತದೆ. ನಂತರ ಎರಡನೇ ಭಾಗ ತನ್ನದೇ ಆದ ಹೊಸ ಕಥೆಯೊಂದಿಗೆ ಸಾಗುತ್ತದೆ.
ಹಳ್ಳಿ ಸೊಗಡಿನ ಮನರಂಜನೆ : ಹಳ್ಳಿಯ ಜೀವನ, ಪಂಚಾಯ್ತಿ ರಾಜಕೀಯ, ಸ್ಥಳೀಯ ಭಾಷೆ, ಗ್ರಾಮೀಣ ಸಂಸ್ಕೃತಿ ಹಾಗೂ ಹಾಸ್ಯಮಯ ಸನ್ನಿವೇಶಗಳು ಚಿತ್ರದ ಪ್ರಮುಖ ಆಕರ್ಷಣೆಯಾಗಿದೆ. ಸಂಭಾಷಣೆಗಳು, ಪಾತ್ರಗಳ ನಿರ್ವಹಣೆ, ಸಂಗೀತ ಹಾಗೂ ಹಿನ್ನೆಲೆ ಸಂಗೀತ ಚಿತ್ರಕ್ಕೆ ಮತ್ತಷ್ಟು ಜೀವ ತುಂಬಿವೆ. ಯಾವುದೇ ಅತಿಯಾದ ಲಾಜಿಕ್ ಹುಡುಕದೆ ಮನರಂಜನೆಯ ದೃಷ್ಟಿಯಿಂದ ನೋಡಿದರೆ ಸಿನಿಮಾ ಖಂಡಿತವಾಗಿ ರಂಜಿಸುತ್ತದೆ.
ಸತೀಶ್ ನೀನಾಸಂ ಮತ್ತೊಮ್ಮೆ ತಮ್ಮ ನೈಜ ಅಭಿನಯದಿಂದ ಗಮನ ಸೆಳೆಯುತ್ತಾರೆ. ಡಾನ್ಸ್, ಫೈಟ್ ಹಾಗೂ ಭಾವನಾತ್ಮಕ ದೃಶ್ಯಗಳಲ್ಲಿ ಅವರು ಉತ್ತಮ ಪ್ರದರ್ಶನ ನೀಡಿದ್ದಾರೆ. ರಚಿತಾ ರಾಮ್ ತಮ್ಮ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದು, ನಾಯಕಿಯ ಪಾತ್ರದಲ್ಲಿ ಮುದ್ದಾದ ಅಭಿನಯ ನೀಡಿದ್ದಾರೆ. ಶಿವರಾಜ್ ಕೆ.ಆರ್. ಪೇಟೆ, ಗಿರಿ, ತಬಲ ನಾಣಿ, ಸಾಧು ಕೋಕಿಲ ಹಾಗೂ ರವಿಶಂಕರ್ ತಮ್ಮ ಪಾತ್ರಗಳ ಮೂಲಕ ನಗುವಿನ ರಸದೌತಣ ನೀಡಿದ್ದಾರೆ.
ತಾಂತ್ರಿಕ ವಿಭಾಗ : ನಿರ್ದೇಶಕ ಎಸ್. ಮಹೇಶ್ ಕುಮಾರ್ ಕಥೆಯನ್ನು ಸರಳವಾಗಿ, ಮನರಂಜನಾ ಶೈಲಿಯಲ್ಲಿ ಕಟ್ಟಿಕೊಡುವಲ್ಲಿ ಯಶಸ್ವಿಯಾಗಿದ್ದಾರೆ. ಸಂಗೀತ, ಛಾಯಾಗ್ರಹಣ ಹಾಗೂ ನಿರ್ಮಾಣ ಮೌಲ್ಯಗಳು ಚಿತ್ರದ ಗುಣಮಟ್ಟವನ್ನು ಹೆಚ್ಚಿಸಿವೆ. ಹಳ್ಳಿ ವಾತಾವರಣವನ್ನು ಪರಿಣಾಮಕಾರಿಯಾಗಿ ತೆರೆ ಮೇಲೆ ಮೂಡಿಸಲಾಗಿದೆ.
ಯಾವುದೇ ಲಾಜಿಕ್ ಇಟ್ಟುಕೊಳ್ಳದೇ ಕಣ್ತುಂಬಿಕೊಂಡರೆ, ‘ಅಯೋಗ್ಯ’ ಭಾಗಶಃ ‘ಯೋಗ್ಯ’ನಂತೆ ಕಾಣಿಸುವ ಸಾಧ್ಯತೆಗಳಿವೆ. ‘ಅಯೋಗ್ಯ 2’ ಸಂಪೂರ್ಣ ಕಮರ್ಷಿಯಲ್ ಮನರಂಜನಾ ಚಿತ್ರವಾಗಿದೆ. ಹಳ್ಳಿ ಸೊಗಡು, ಕಾಮಿಡಿ, ಆಕ್ಷನ್ ಹಾಗೂ ಕುಟುಂಬ ಸಮೇತ ನೋಡಬಹುದಾದ ಮನರಂಜನೆಯ ಚಿತ್ರವನ್ನು ನಿರೀಕ್ಷಿಸುವವರಿಗೆ ಇದು ಉತ್ತಮ ಆಯ್ಕೆಯಾಗಿದೆ.
- ವಿಮಾನದ ಶೌಚಾಲಯದಲ್ಲಿ ಸಿಕ್ತು ಹೈಜಾಕ್ ಪತ್ರ: ವಿಮಾನ ತುರ್ತು ಭೂಸ್ಪರ್ಶ
- ಹಾಸನ ಡಿಸಿ ಕಚೇರಿಯಲ್ಲಿ ಲಂಚದ ವ್ಯವಹಾರ? ಸರ್ಕಾರದ ವಿರುದ್ಧ ಎಚ್‌ಡಿಕೆ ಗಂಭೀರ ಆರೋಪ
- ಫಲಾನುಭವಿಗಳಿಗೆ ಆಟೋರಿಕ್ಷಾ ವಿತರಿಸಿದ ಸಚಿವ ಪ್ರಲ್ಹಾದ ಜೋಶಿ
- ʻಹೌದು, ನಾವು ಬಲಿತ ದಲಿತರು’ – ಬೆಂಗಳೂರಿನಲ್ಲಿ ಪೋಸ್ಟರ್ ವಾರ್
- ಬಡವರ ಜೇಬಿಗೆ ಕಾಂಗ್ರೆಸ್ ಕತ್ತರಿ: ನ. 11ಕ್ಕೆ ಬಿಜೆಪಿಯಿಂದ ಬೃಹತ್ ಪ್ರತಿಭಟನೆ
