ಗಣೇಶೋತ್ಸವ ಮೆರವಣಿಗೆಯಲ್ಲಿ ಡಿಜೆ ಅಬ್ಬರ ನಿಯಂತ್ರಣಕ್ಕೆ ನೂತನ ಕಮೀಶನರ್ ಸ್ಮಾರ್ಟ್ ಪೊಲೀಸಿಂಗ್

ಹುಬ್ಬಳ್ಳಿ: ಮದುವೆ, ಮೆರವಣಿಗೆ, ಧಾರ್ಮಿಕ ಕಾರ್ಯಕ್ರಮ ಸೇರಿದಂತೆ ವಿವಿಧ ಸಮಾರಂಭಗಳಲ್ಲಿ ಡಿಜೆ ಸಿಸ್ಟಂ ಮೂಲಕ ಅತಿಯಾದ ಶಬ್ದ ಮಾಡುವ ಪ್ರವೃತ್ತಿ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿರುವ ನಡುವೆಯೇ, ಇದರ ಆರೋಗ್ಯದ ದುಷ್ಪರಿಣಾಮಗಳ ಕುರಿತು ಹುಬ್ಬಳ್ಳಿ-ಧಾರವಾಡ ಮಹಾನಗರ ಪೊಲೀಸ್ ಆಯುಕ್ತ ಭೂಷಣ ಜಿ. ಬೋರಸೆ ಸಾರ್ವಜನಿಕರಿಗೆ ಮಹತ್ವದ ಜಾಗೃತಿ ಸಂದೇಶ ನೀಡಿದ್ದಾರೆ.

ನಗರಗಳಿಗೆ ಮಾತ್ರ ಸೀಮಿತವಾಗಿದ್ದ ಡಿಜೆ ಅಬ್ಬರ ಇದೀಗ ಪಟ್ಟಣಗಳು ಹಾಗೂ ಗ್ರಾಮೀಣ ಪ್ರದೇಶಗಳಿಗೂ ವ್ಯಾಪಿಸುತ್ತಿದೆ. ಸಂಭ್ರಮದ ಹೆಸರಿನಲ್ಲಿ ಮಿತಿಮೀರಿದ ಶಬ್ದ ಬಳಕೆ ಮಾಡುವುದು ಇತರರಿಗೆ ತೊಂದರೆ ಉಂಟುಮಾಡುವುದಷ್ಟೇ ಅಲ್ಲದೆ, ಆರೋಗ್ಯದ ಮೇಲೂ ಗಂಭೀರ ಪರಿಣಾಮ ಬೀರಬಹುದು ಎಂದು ಕಮೀಶನರ್ ಎಚ್ಚರಿಸಿದ್ದಾರೆ.

ಇತ್ತೀಚಿನ ಹೈದರಾಬಾದ್ ಘಟನೆ ಮತ್ತೆ ಆತಂಕ ಮೂಡಿಸಿದೆ : ಡಿಜೆ ಸದ್ದಿನ ಅಪಾಯದ ಬಗ್ಗೆ ಕಮೀಶನರ್ ಜಾಗೃತಿ ಮೂಡಿಸುತ್ತಿರುವ ಸಂದರ್ಭದಲ್ಲೇ, ಸೋಮವಾರ ಹೈದರಾಬಾದ್‌ನಲ್ಲಿ ಗಣೇಶ ಮೆರವಣಿಗೆಯ ವೇಳೆ 19 ವರ್ಷದ ಬಿಟೆಕ್ ವಿದ್ಯಾರ್ಥಿ ಮೃತಪಟ್ಟ ಘಟನೆ ವರದಿಯಾಗಿದೆ. ವಿದ್ಯಾರ್ಥಿ ಮೆರವಣಿಗೆಯಲ್ಲಿ ಕುಸಿದು ಬಿದ್ದು ಮೃತಪಟ್ಟಿದ್ದು, ಅತಿಯಾದ ಡಿಜೆ ಶಬ್ದವೇ ಸಾವಿಗೆ ಕಾರಣವಾಗಿರಬಹುದು ಎಂದು ಕುಟುಂಬದವರು ಆರೋಪಿಸಿದ್ದಾರೆ. ಘಟನೆ ಕುರಿತು ತನಿಖೆ ನಡೆಯಬೇಕಿರುವುದರಿಂದ ಡಿಜೆ ಶಬ್ದವೇ ಸಾವಿಗೆ ನೇರ ಕಾರಣ ಎಂದು ಅಂತಿಮವಾಗಿ ಹೇಳಲು ಸಾಧ್ಯವಿಲ್ಲ.

ಇಂತಹ ಘಟನೆಗಳು ಸಂಭ್ರಮದ ಸಂದರ್ಭಗಳಲ್ಲಿ ಧ್ವನಿ ಮಟ್ಟದ ನಿಯಂತ್ರಣ ಮತ್ತು ಸಾರ್ವಜನಿಕ ಸುರಕ್ಷತೆಯ ಬಗ್ಗೆ ಮತ್ತೊಮ್ಮೆ ಗಂಭೀರವಾಗಿ ಯೋಚಿಸುವಂತೆ ಮಾಡಿವೆ.

ಹಲವು ಘಟನೆಗಳನ್ನು ಉಲ್ಲೇಖಿಸಿದ ಕಮೀಶನರ್ : ಭೂಷಣ ಬೋರಸೆ ಅವರು ದೇಶದ ವಿವಿಧ ಭಾಗಗಳಲ್ಲಿ ಡಿಜೆ ಅಥವಾ ಅತಿಯಾದ ಶಬ್ದಕ್ಕೆ ಸಂಬಂಧಿಸಿ ವರದಿಯಾಗಿರುವ ಹಲವು ಘಟನೆಗಳನ್ನು ಸಾರ್ವಜನಿಕರ ಗಮನಕ್ಕೆ ತಂದಿದ್ದಾರೆ. ಬರೇಲಿ, ಅಲಿಗಂಜ್, ಭುವನೇಶ್ವರ, ಸುಲ್ತಾನ್‌ಪುರ ಸೇರಿದಂತೆ ವಿವಿಧೆಡೆ ನಡೆದ ಘಟನೆಗಳನ್ನು ಅವರು ಉಲ್ಲೇಖಿಸಿದ್ದಾರೆ.

ಕಳೆದ ಆಗಸ್ಟ್ 25 ರಂದು ಬರೇಲಿಯಲ್ಲಿ 60 ವರ್ಷದ ಮಹಿಳೆ ಹಠಾತ್ ಸಾವು, DJ ಶಬ್ದವೇ ಕಾರಣ ಎಂದು ದೂರು ದಾಖಲಾಗಿರುವುದು, ಅಲಿಗಂಜ್ (ಯುಪಿ), ಆಗಸ್ಟ್ 25 ರಂದು ದೇವಸ್ಥಾನಕ್ಕೆ ಹೋಗುವಾಗ ವೃದ್ಧೆ ಸಾವು, DJ ನಿಂದ ಎದೆನೋವು ಬಂದಿತ್ತು ಎಂಬ ಆರೋಪ ಮಾಡಿರುವುದು, ಭುವನೇಶ್ವರ ದಲ್ಲಿ ಜೂನ್ 20 ರಂದು DJ ಸಂಗೀತ ಕೇಳಿದ ನಂತರ ಹೃದ್ರೋಗಿ ಸಾವನ್ನಪ್ಪಿರುವುದು, ಸುಲ್ತಾನ್‌ಪುರ (ಯುಪಿ) ದಲ್ಲಿ ಎಪ್ರಿಲ್ 30 ರಂದು ಮದುವೆ ಮೆರವಣಿಗೆಯಲ್ಲಿ DJ ಸದ್ದಿಗೆ 140 ಕೋಳಿಗಳು ಸಾವನ್ನಪಿದ ಬಗ್ಗೆ ಪ್ರಕರಣ ದಾಖಲಾಗಿರುವುದನ್ನು ಉಲ್ಲೇಖಿಸಿದ್ದಾರೆ.

ಸಾಂಗ್ಲಿ ಯಲ್ಲಿ 2023 ರಲ್ಲಿ ಗಣೇಶ ವಿಸರ್ಜನೆ ಮೆರವಣಿಗೆಯಲ್ಲಿ ಅತಿಯಾದ ಸದ್ದಿನಿಂದ ಇಬ್ಬರ ಸಾವನ್ನಪ್ಪಿರುವುದು, ಮಧ್ಯಪ್ರದೇಶ ದಲ್ಲಿ 2024 ರಲ್ಲಿ DJ ಕಂಪನದಿಂದ ಗೋಡೆ ಕುಸಿದು 9 ಮಕ್ಕಳ ಸಾವನ್ನಪ್ಪಿರುವುದು, ಆಂಧ್ರಪ್ರದೇಶದ ಅಮಲಾಪುರಂ ನಲ್ಲಿ 2024 ರ ಅಕ್ಟೋಬರ್ ನಲ್ಲಿ ಡಿಜೆ ಸದ್ದಿನಿಂದ ಹೃದಯಾಘಾತವಾಗಿ ಯುವಕ ಸಾವನ್ನಪ್ಪಿರುವುದು, ಅಲ್ಲದೇ, 2024ರ ಸೆ.10 ರಂದು ಡಿಜೆ ಸದ್ದಿನಿಂದ 40 ವರ್ಷದ ಇಬ್ಬರು ವ್ಯಕ್ತಿಗಳಿಗೆ ಮೆದುಳಿನಲ್ಲಿ ರಕ್ತಸ್ರಾವ ಆಗಿರುವುದರ ಬಗ್ಗೆ ಮಾಧ್ಯಮಗಳಲ್ಲಿ ಬಂದ ವರದಿಗಳ ಉಲ್ಲೇಖಿಸಿ ಗಮನ ಸೆಳೆದಿದ್ದಾರೆ. 85 ಡೆಸಿಬಲ್‌ಗಿಂತ ಹೆಚ್ಚಿನ ಶಬ್ದ ಹೃದಯಾಘಾತ, ಮೆದುಳಿನ ರಕ್ತಸ್ರಾವ ಮತ್ತು ಪ್ಯಾನಿಕ್ ಅಟ್ಯಾಕ್‌ಗೆ ಕಾರಣವಾಗಬಹುದು ಎಂದು ವೈದ್ಯರು ನೀಡಿದ ಎಚ್ಚರಿಕೆಗಳನ್ನು ಕಮೀಶನರ್ ಸಾರ್ವಜನಿಕರ ಗಮನಕ್ಕೆ ತಂದಿದ್ದಾರೆ.

ಆದರೆ ಇಂತಹ ಪ್ರಕರಣಗಳಲ್ಲಿ ಡಿಜೆ ಶಬ್ದವೇ ಸಾವಿಗೆ ನೇರ ಮತ್ತು ಏಕೈಕ ಕಾರಣ ಎಂದು ಪ್ರತಿಯೊಂದು ಘಟನೆಯಲ್ಲೂ ವೈದ್ಯಕೀಯ ಅಥವಾ ತನಿಖಾ ವರದಿಯಿಂದ ದೃಢಪಟ್ಟಿದೆ ಎಂದು ಹೇಳಲಾಗದು. ಹೀಗಾಗಿ ಅವುಗಳನ್ನು ಕಮೀಶನರ್ ಉಲ್ಲೇಖಿಸಿರುವ ಎಚ್ಚರಿಕೆಯ ಘಟನೆಗಳಾಗಿ ನೋಡಬೇಕಾಗಿದೆ.

ಆರೋಗ್ಯದ ಮೇಲೆ ಏನು ಪರಿಣಾಮ? : ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಅತಿಯಾದ ಹಾಗೂ ದೀರ್ಘಕಾಲದ ಶಬ್ದಕ್ಕೆ ಒಡ್ಡಿಕೊಳ್ಳುವುದರಿಂದ ನಿದ್ರಾಭಂಗ, ಒತ್ತಡ, ಶ್ರವಣದೋಷ, ಕಿವಿಯಲ್ಲಿ ಶಬ್ದ ಕೇಳಿಸುವಿಕೆ ಹಾಗೂ ಹೃದಯ ಸಂಬಂಧಿ ಆರೋಗ್ಯದ ಅಪಾಯಗಳು ಹೆಚ್ಚಾಗಬಹುದು.

ವಿಶೇಷವಾಗಿ ಹೆಚ್ಚು ಶಬ್ದ ಮತ್ತು ದೀರ್ಘಕಾಲದ exposure ಕಿವಿಯ ಒಳಗಿನ ಸೂಕ್ಷ್ಮ ಕೋಶಗಳಿಗೆ ಹಾನಿ ಉಂಟುಮಾಡಿ ಶಾಶ್ವತ ಶ್ರವಣದೋಷಕ್ಕೂ ಕಾರಣವಾಗಬಹುದು ಎಂದು WHO 2026ರ ಸುರಕ್ಷಿತ ಆಲಿಸುವಿಕೆ ಮಾರ್ಗದರ್ಶನದಲ್ಲಿ ತಿಳಿಸಿದೆ. ಶಬ್ದದ ಪ್ರಮಾಣ ಹೆಚ್ಚಾದಷ್ಟೂ ಸುರಕ್ಷಿತವಾಗಿ ಕೇಳಬಹುದಾದ ಸಮಯ ಕಡಿಮೆಯಾಗುತ್ತದೆ.

ಹೀಗಾಗಿ ಹೃದ್ರೋಗಿಗಳು, ವೃದ್ಧರು, ಮಕ್ಕಳು ಹಾಗೂ ಶಬ್ದಕ್ಕೆ ಹೆಚ್ಚು ಸಂವೇದನಾಶೀಲರಾಗಿರುವವರು ಅತಿಯಾದ ಡಿಜೆ ಸದ್ದಿನಿಂದ ದೂರವಿರುವುದು ಸೂಕ್ತ.

ನಿಯಮ ಏನು ಹೇಳುತ್ತದೆ? : ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿಯ Noise Pollution (Regulation and Control) Rules, 2000 ಪ್ರಕಾರ ಲೌಡ್‌ಸ್ಪೀಕರ್ ಅಥವಾ ಪಬ್ಲಿಕ್ ಅಡ್ರೆಸ್ ಸಿಸ್ಟಂ ಬಳಸಲು ಸಂಬಂಧಪಟ್ಟ ಪ್ರಾಧಿಕಾರದಿಂದ ಲಿಖಿತ ಅನುಮತಿ ಪಡೆಯಬೇಕು. ರಾತ್ರಿ 10ರಿಂದ ಬೆಳಗ್ಗೆ 6ರವರೆಗೆ ಇದರ ಬಳಕೆಗೆ ಸಾಮಾನ್ಯವಾಗಿ ನಿರ್ಬಂಧವಿದೆ; ಕೆಲವು ನಿರ್ದಿಷ್ಟ ಸಾಂಸ್ಕೃತಿಕ ಅಥವಾ ಧಾರ್ಮಿಕ ಸಂದರ್ಭಗಳಲ್ಲಿ ರಾಜ್ಯ ಸರ್ಕಾರ ನಿಯಮಾನುಸಾರ ಸೀಮಿತ ವಿನಾಯಿತಿ ನೀಡಬಹುದು.

ಶಬ್ದದ ಅನುಮತಿಸಬಹುದಾದ ಮಟ್ಟವು ಪ್ರದೇಶದ ವರ್ಗಕ್ಕೆ ಅನುಗುಣವಾಗಿ ಬದಲಾಗುತ್ತದೆ. ವಸತಿ ಪ್ರದೇಶದಲ್ಲಿ ಹಗಲು 55 ಮತ್ತು ರಾತ್ರಿ 45 dB(A), ವಾಣಿಜ್ಯ ಪ್ರದೇಶದಲ್ಲಿ ಹಗಲು 65 ಮತ್ತು ರಾತ್ರಿ 55 dB(A), ಕೈಗಾರಿಕಾ ಪ್ರದೇಶದಲ್ಲಿ ಹಗಲು 75 ಮತ್ತು ರಾತ್ರಿ 70 dB(A), ಸೈಲೆನ್ಸ್ ಝೋನ್‌ನಲ್ಲಿ ಹಗಲು 50 ಮತ್ತು ರಾತ್ರಿ 40 dB(A) ಮಿತಿಗಳನ್ನು ನಿಯಮಗಳು ನಿಗದಿಪಡಿಸಿವೆ.

‘ಸಂಭ್ರಮ ಇರಲಿ, ಶಬ್ದದ ಅಬ್ಬರ ಬೇಡ’ : ಡಿಜೆ ಪ್ರಿಯರು ಹಾಗೂ ಕಾರ್ಯಕ್ರಮ ಆಯೋಜಕರು ಸಂಭ್ರಮದ ಹೆಸರಿನಲ್ಲಿ ಅತಿಯಾದ ಶಬ್ದ ಮಾಡದೆ, ಸಾರ್ವಜನಿಕರ ಆರೋಗ್ಯ ಮತ್ತು ನೆಮ್ಮದಿಯನ್ನು ಗಮನದಲ್ಲಿಟ್ಟುಕೊಳ್ಳಬೇಕು ಎಂಬುದು ಕಮೀಶನರ್ ಭೂಷಣ ಬೋರಸೆ ಅವರ ಸಂದೇಶದ ಪ್ರಮುಖ ಅಂಶವಾಗಿದೆ.

ಮದುವೆ ಇರಲಿ, ಮೆರವಣಿಗೆ ಇರಲಿ ಅಥವಾ ಧಾರ್ಮಿಕ ಕಾರ್ಯಕ್ರಮವಾಗಿರಲಿ—ಸಂಭ್ರಮ ಇತರರ ಆರೋಗ್ಯ ಮತ್ತು ನೆಮ್ಮದಿಗೆ ಧಕ್ಕೆಯಾಗದ ರೀತಿಯಲ್ಲಿ ಇರಬೇಕು. ನಿಯಮ ಉಲ್ಲಂಘನೆಯಾಗುತ್ತಿರುವುದು ಕಂಡುಬಂದರೆ ಸಾರ್ವಜನಿಕರು ಪೊಲೀಸ್ ಸಹಾಯವಾಣಿ 112 ಅಥವಾ ಸ್ಥಳೀಯ ಪೊಲೀಸ್ ಠಾಣೆಯನ್ನು ಸಂಪರ್ಕಿಸಿ ದೂರು ನೀಡಬಹುದು.

ಡಿಜೆ ಸದ್ದು ಹೆಚ್ಚಿಸುವುದೇ ಸಂಭ್ರಮದ ಸಂತಸವು ಸೂತಕವಾಗದಿರಲಿ ಮಿತವಾದ ಶಬ್ದದಲ್ಲಿ ಸುರಕ್ಷಿತವಾಗಿ ಆಚರಿಸುವುದೇ ಜವಾಬ್ದಾರಿಯುತ ಸಂಭ್ರಮ ಎಂಬ ಸಂದೇಶವನ್ನು ಹು-ಧಾ ಪೊಲೀಸ್ ಆಯುಕ್ತರ ಜಾಗೃತಿ ಅಭಿಯಾನ ಸಾರುತ್ತಿದೆ.

ಪ್ರತಿ ಹೊಸ ಅಪ್‌ಡೇಟ್‌ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್‌ಡೇಟ್‌ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.