Virat Kohli: ರನ್ ಮಷಿನ್ ವಿರಾಟ್ ಕೊಹ್ಲಿ ಮೈದಾನಕ್ಕಿಳಿದರೆ ದಾಖಲೆಗಳು ಪುಡಿಪುಡಿಯಾಗುವುದು ಸಾಮಾನ್ಯ. ಇದೀಗ ಅವರು ಚುಟುಕು ಕ್ರಿಕೆಟ್ (ಟಿ20) ಮಾದರಿಯಲ್ಲಿ ಜಗತ್ತಿನ ಯಾವೊಬ್ಬ ಬ್ಯಾಟ್ಸ್ಮನ್ಗೂ ಇದುವರೆಗೆ ಸಾಧ್ಯವಾಗದಂತಹ ಅಭೂತಪೂರ್ವ ವಿಶ್ವ ದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಹೌದು, ‘ಒಂದೇ ದೇಶದಲ್ಲಿ’ ಅತಿ ಹೆಚ್ಚು ಅಂದರೆ 10,000 ಟಿ20 ರನ್ಗಳನ್ನು ಕಲೆಹಾಕಿದ ವಿಶ್ವದ ಮೊಟ್ಟಮೊದಲ ಹಾಗೂ ಏಕೈಕ ಕ್ರಿಕೆಟಿಗ ಎಂಬ ಹೆಗ್ಗಳಿಕೆಗೆ ಕಿಂಗ್ ಕೊಹ್ಲಿ ಪಾತ್ರರಾಗಿದ್ದಾರೆ.
ದಾಖಲೆ ನಿರ್ಮಾಣವಾಗಿದ್ದು ಎಲ್ಲಿ?: ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಇತ್ತೀಚೆಗೆ ಗುಜರಾತ್ ಟೈಟನ್ಸ್ ವಿರುದ್ಧ ನಡೆದ ಐಪಿಎಲ್ ಪಂದ್ಯದಲ್ಲಿ ಕೊಹ್ಲಿ ತಮ್ಮ ಬ್ಯಾಟಿಂಗ್ ವೈಭವ ಮೆರೆದರು. ಕೇವಲ 44 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸರ್ ಹಾಗೂ 8 ಬೌಂಡರಿಗಳ ನೆರವಿನಿಂದ 81 ರನ್ ಸಿಡಿಸಿ ಅಬ್ಬರಿಸಿದರು.
ಇದೇ ಇನ್ನಿಂಗ್ಸ್ನ ಮೂಲಕ ಅವರು ಭಾರತದ ನೆಲದಲ್ಲಿ ತಮ್ಮ 10,000 ಟಿ20 ರನ್ಗಳ ಮೈಲಿಗಲ್ಲನ್ನು ತಲುಪಿದರು. ಜಗತ್ತಿನಾದ್ಯಂತ ಈವರೆಗೆ 19 ಬ್ಯಾಟರ್ಗಳು ಟಿ20 ಕ್ರಿಕೆಟ್ನಲ್ಲಿ 10,000 ರನ್ಗಳ ಗಡಿ ದಾಟಿದ್ದರೂ, ‘ಸ್ವದೇಶದಲ್ಲಿ ಮಾತ್ರ’ ಇಷ್ಟು ದೊಡ್ಡ ಮೊತ್ತವನ್ನು ಕಲೆಹಾಕಿದ್ದು ವಿರಾಟ್ ಕೊಹ್ಲಿ ಮಾತ್ರ!
10,000 ರನ್ಗಳ ಲೆಕ್ಕಾಚಾರ ಹೀಗಿದೆ : ಕೊಹ್ಲಿ ಭಾರತದ ನೆಲದಲ್ಲಿ ಬಾರಿಸಿದ ಈ 10,000 ರನ್ಗಳು ಕೇವಲ ಒಂದೇ ಟೂರ್ನಿಗೆ ಸೀಮಿತವಾಗಿಲ್ಲ.
ಐಪಿಎಲ್ನಲ್ಲಿ (IPL): ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡುತ್ತಾ ಅವರು ಭಾರತದಲ್ಲಿ 7,933 ರನ್ ಗಳಿಸಿದ್ದಾರೆ.
ಟೀಮ್ ಇಂಡಿಯಾ ಪರ: ಭಾರತೀಯ ಪಿಚ್ಗಳಲ್ಲಿ ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಆಡಿ 1,577 ರನ್ ಕಲೆಹಾಕಿದ್ದಾರೆ.
ಚಾಂಪಿಯನ್ಸ್ ಟ್ರೋಫಿ (CLT20): ಇದರಲ್ಲಿ 311 ರನ್ ಸಿಡಿಸಿದ್ದಾರೆ.
ದೇಶೀಯ ಟೂರ್ನಿ: ಸೈಯದ್ ಮುಷ್ತಾಕ್ ಅಲಿ ಟಿ20 ಟೂರ್ನಿಯಲ್ಲಿ 179 ರನ್ ಬಾರಿಸಿದ್ದಾರೆ.
ಟಿ20 ರನ್ಗಳ ಸರದಾರ: ಒಟ್ಟಾರೆಯಾಗಿ ನೋಡಿದರೆ, ವಿರಾಟ್ ಕೊಹ್ಲಿ ತಮ್ಮ ವೃತ್ತಿಜೀವನದಲ್ಲಿ ಇದುವರೆಗೆ 403 ಟಿ20 ಇನ್ನಿಂಗ್ಸ್ಗಳನ್ನು ಆಡಿದ್ದು, ಒಟ್ಟು 13,790 ರನ್ಗಳನ್ನು ಕಲೆಹಾಕಿದ್ದಾರೆ. ಇದರೊಂದಿಗೆ ಟಿ20 ಕ್ರಿಕೆಟ್ನಲ್ಲಿ ಜಗತ್ತಿನ ಅತಿ ಹೆಚ್ಚು ರನ್ ಗಳಿಸಿದ ಬ್ಯಾಟರ್ಗಳ ಪಟ್ಟಿಯಲ್ಲಿ 6ನೇ ಸ್ಥಾನವನ್ನು ಅಲಂಕರಿಸಿದ್ದಾರೆ. ಈ ಬೃಹತ್ ಮೊತ್ತದಲ್ಲಿ 10 ಸಾವಿರ ರನ್ಗಳನ್ನು ಕೇವಲ ತಮ್ಮ ತಾಯ್ನಾಡಿನಲ್ಲೇ ಗಳಿಸಿರುವುದು ಅವರ ಸ್ಥಿರತೆ ಹಾಗೂ ಅದ್ಭುತ ಫಾರ್ಮ್ಗೆ ಕನ್ನಡಿ ಹಿಡಿದಿದೆ.
