14 ಶಿಖರಗಳ ದಾಖಲೆ ಬರೆದ ನಿಮ್ಸ್ ದಾಯ್ ಇನ್ನು ನೆನಪು: ಬ್ರಾಡ್ ಪೀಕ್ ಹಿಮಪಾತದಲ್ಲಿ ನಿರ್ಮಲ್ ಪುರ್ಜಾ ಸೇರಿ ಹಲವರ ಸಾವು
ಕಠ್ಮಂಡು : ವಿಶ್ವದ ಅತ್ಯಂತ ಸಾಹಸಿ ಪರ್ವತಾರೋಹಿಗಳಲ್ಲಿ ಒಬ್ಬರೆಂದು ಗುರುತಿಸಿಕೊಂಡಿದ್ದ ನೇಪಾಳ ಮೂಲದ ಖ್ಯಾತ ಪರ್ವತಾರೋಹಿ ನಿರ್ಮಲ್ “ನಿಮ್ಸ್ ದಾಯ್” ಪುರ್ಜಾ ಅವರು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (PoK) ವ್ಯಾಪ್ತಿಯ ಕಾರಕೋರಂ ಪರ್ವತಶ್ರೇಣಿಯ ಬ್ರಾಡ್ ಪೀಕ್ (8,047 ಮೀಟರ್) ಏರುವ ವೇಳೆ ಸಂಭವಿಸಿದ ಭೀಕರ ಹಿಮಪಾತದಲ್ಲಿ ಮೃತಪಟ್ಟಿರುವುದನ್ನು ಅವರ ದಂಡಯಾತ್ರೆ ಸಂಸ್ಥೆ ಎಲೈಟ್ ಎಕ್ಸ್ಪೆಡ್ ಅಧಿಕೃತವಾಗಿ ದೃಢಪಡಿಸಿದೆ.
ಜುಲೈ 30ರಂದು ಕ್ಯಾಂಪ್-2 ಮತ್ತು ಮೇಲ್ಭಾಗದ ನಡುವೆ ಪರ್ವತಾರೋಹಣ ನಡೆಸುತ್ತಿದ್ದ ವೇಳೆ ಹಿಮಪಾತ ಸಂಭವಿಸಿತ್ತು. ಹಿಮದ ದೊಡ್ಡ ಪದರ ತಂಡದ ಮೇಲೆ ಕುಸಿದ ಪರಿಣಾಮ ಹಲವು ಪರ್ವತಾರೋಹಿಗಳು ಕೊಚ್ಚಿಹೋಗಿದ್ದರು. ಪ್ರತಿಕೂಲ ಹವಾಮಾನ, ಮಂಜು ಮತ್ತು ಮತ್ತಷ್ಟು ಹಿಮಪಾತದ ಅಪಾಯದಿಂದ ರಕ್ಷಣಾ ಕಾರ್ಯಾಚರಣೆ ಎರಡು ದಿನಗಳ ಕಾಲ ಸವಾಲಿನದ್ದಾಗಿತ್ತು. ಅಂತಿಮವಾಗಿ ಶೋಧ ಕಾರ್ಯಾಚರಣೆಯ ಬಳಿಕ 43 ವರ್ಷದ ನಿರ್ಮಲ್ ಪುರ್ಜಾ ಮೃತಪಟ್ಟಿರುವುದನ್ನು ಶನಿವಾರ ಅಧಿಕೃತವಾಗಿ ಘೋಷಿಸಲಾಯಿತು.
ಈ ದುರಂತದಲ್ಲಿ ಪುರ್ಜಾ ಅವರ ಕ್ಲೈಂಬಿಂಗ್ ಪಾಲುದಾರ ಹಾಗೂ ಮಾರ್ಗದರ್ಶಕರಾದ ಪುರ್ ಬಹದ್ದೂರ್ ಗುರುಂಗ್ (ಯುಕ್ತ) ಮತ್ತು ನಿಮಾ ಶೆರ್ಪಾ ಅವರೂ ಮೃತಪಟ್ಟಿದ್ದಾರೆ. ದಂಡಯಾತ್ರೆಯ ಇನ್ನೂ ಕೆಲವು ಸದಸ್ಯರು ಸಹ ಹಿಮಪಾತದಲ್ಲಿ ಸಾವನ್ನಪ್ಪಿರುವುದಾಗಿ ಎಲೈಟ್ ಎಕ್ಸ್ಪೆಡ್ ಸಂಸ್ಥೆ ತಿಳಿಸಿದೆ.
ನಿರ್ಮಲ್ ಪುರ್ಜಾ ವಿಶ್ವ ಪರ್ವತಾರೋಹಣ ಕ್ಷೇತ್ರದಲ್ಲಿ ಅಪರೂಪದ ಸಾಧನೆ ಮಾಡಿದ ವ್ಯಕ್ತಿಯಾಗಿದ್ದರು. 2019ರಲ್ಲಿ ಅವರು ವಿಶ್ವದ 8,000 ಮೀಟರ್ಗಿಂತ ಎತ್ತರದ ಎಲ್ಲಾ 14 ಶಿಖರಗಳನ್ನು ಕೇವಲ 6 ತಿಂಗಳು 6 ದಿನಗಳಲ್ಲಿ ಏರಿ ವಿಶ್ವದಾಖಲೆ ನಿರ್ಮಿಸಿದ್ದರು. ಇದಕ್ಕೂ ಮೊದಲು ಇದ್ದ ಏಳು ವರ್ಷಕ್ಕೂ ಅಧಿಕ ಅವಧಿಯ ದಾಖಲೆಯನ್ನು ಅವರು ಭರ್ಜರಿಯಾಗಿ ಮುರಿದಿದ್ದರು. ಬಳಿಕ ಪೂರಕ ಆಮ್ಲಜನಕವಿಲ್ಲದೆ ಎಲ್ಲಾ 14 ಶಿಖರಗಳನ್ನು ಅತ್ಯಂತ ವೇಗವಾಗಿ ಏರಿದ ಸಾಧನೆಯನ್ನೂ ತಮ್ಮ ಹೆಸರಿಗೆ ದಾಖಲಿಸಿದ್ದರು.
ಬ್ರಿಟಿಷ್ ಗೂರ್ಖಾ ರೆಜಿಮೆಂಟ್ ಹಾಗೂ ವಿಶೇಷ ದೋಣಿ ಸೇವೆ (Special Boat Service) ಯಲ್ಲಿ ಸೇವೆ ಸಲ್ಲಿಸಿದ್ದ ಪುರ್ಜಾ, 2012ರಲ್ಲಿ ಪರ್ವತಾರೋಹಣ ಕ್ಷೇತ್ರಕ್ಕೆ ಪ್ರವೇಶಿಸಿದರು. ಅವರ ಐತಿಹಾಸಿಕ ಸಾಧನೆಯನ್ನು ಆಧರಿಸಿ ನಿರ್ಮಿಸಲಾದ ನೆಟ್ಫ್ಲಿಕ್ಸ್ನ “14 Peaks: Nothing Is Impossible” ಸಾಕ್ಷ್ಯಚಿತ್ರ ಅವರಿಗೆ ಜಾಗತಿಕ ಖ್ಯಾತಿ ತಂದುಕೊಟ್ಟಿತ್ತು.
2021ರಲ್ಲಿ ಚಳಿಗಾಲದಲ್ಲಿ ಮೊದಲ ಬಾರಿಗೆ ಕೆ2 ಶಿಖರವನ್ನು ಯಶಸ್ವಿಯಾಗಿ ಏರಿದ ನೇಪಾಳಿ ತಂಡದ ಪ್ರಮುಖ ಸದಸ್ಯರಾಗಿದ್ದ ಅವರು, ಬಳಿಕ Elite Exped ಸಂಸ್ಥೆ ಹಾಗೂ Nimsdai Foundation ಸ್ಥಾಪಿಸಿ ನೇಪಾಳಿ ಶೆರ್ಪಾಗಳು ಮತ್ತು ಎತ್ತರ ಪ್ರದೇಶದ ಕಾರ್ಮಿಕರ ಕಲ್ಯಾಣಕ್ಕಾಗಿ ಶ್ರಮಿಸಿದ್ದರು.
- ಮೈಸೂರು: ಸ್ವಾಮಿ ವಿವೇಕಾನಂದ ಸಾಂಸ್ಕೃತಿಕ ಕೇಂದ್ರ ಲೋಕಾರ್ಪಣೆ
- ದೇವಸ್ಥಾನ ಪ್ರವೇಶ: ಯುವಕರ ಮೇಲೆ ಹಲ್ಲೆ, 42 ಮಂದಿ ವಿರುದ್ಧ ಕೇಸ್
- 14 ಶಿಖರಗಳ ದಾಖಲೆ ಸರದಾರ ನಿರ್ಮಲ್ ಪುರ್ಜಾ ಹಿಮಪಾತಕ್ಕೆ ಬಲಿ
- 6 ವರ್ಷಗಳ ಬಳಿಕ ಭಾರತ-ಚೀನಾ ಗಡಿ ವ್ಯಾಪಾರ ಪುನರಾರಂಭ
- CWG 2026 : ಮಹಿಳೆಯರ ಬಾಕ್ಸಿಂಗ್ನಲ್ಲಿ ಭಾರತದ ಪ್ರೀತಿಗೆ ಚಿನ್ನ
