ಕೆಲಸದ ಅವಧಿ ನಿಯಮ ಉಲ್ಲಂಘನೆ: ಫ್ರಾನ್ಸ್‌ನಲ್ಲಿ ಇನ್ಫೋಸಿಸ್‌ಗೆ ದಂಡ!

ಫ್ರಾನ್ಸ್‌ನಲ್ಲಿ ಇನ್ಫೋಸಿಸ್‌ಗೆ ದಂಡ: ಮತ್ತೆ ಚರ್ಚೆಗೆ ಬಂತು ಮೂರ್ತಿ 70 ಗಂಟೆಗಳ ಹೇಳಿಕೆ!

ನವದೆಹಲಿ/ಪ್ಯಾರಿಸ್ : ಭಾರತದ ಐಟಿ ದೈತ್ಯ ಇನ್ಫೋಸಿಸ್ (Infosys) ಫ್ರಾನ್ಸ್‌ನಲ್ಲಿ ಕಾರ್ಮಿಕ ಕಾನೂನುಗಳಿಗೆ ಸಂಬಂಧಿಸಿದ ಪ್ರಕರಣ ಕುರಿತಂತೆ ಸುದ್ದಿಯಲ್ಲಿದೆ. ಪ್ಯಾರಿಸ್ ಪ್ರದೇಶದ ಕಾರ್ಮಿಕ ಪ್ರಾಧಿಕಾರ DRIEETS Île-de-France ಸಂಸ್ಥೆಯ ಸಮಯ (Time Recording) ದಾಖಲೆ ವ್ಯವಸ್ಥೆಯಲ್ಲಿ ಕಂಡುಬಂದ ಲೋಪಗಳ ಹಿನ್ನೆಲೆಯಲ್ಲಿ ಇನ್ಫೋಸಿಸ್‌ಗೆ ದಂಡ ವಿಧಿಸಿದೆ.

ಜುಲೈ 24, 2026ರಂದು ಹೊರಡಿಸಲಾದ ಆದೇಶದ ಪ್ರಕಾರ, ಕಂಪನಿಯ ಸಮಯ ದಾಖಲಿಸುವ ವ್ಯವಸ್ಥೆಯು ಕೆಲವು ಉದ್ಯೋಗಿಗಳ ಕೆಲಸದ ಅವಧಿಯನ್ನು ಸಂಪೂರ್ಣ ವಿಶ್ವಾಸಾರ್ಹವಾಗಿ, ಲೆಕ್ಕಪರಿಶೋಧನೆಗೆ ಅನುಕೂಲವಾಗುವ ರೀತಿಯಲ್ಲಿ ಹಾಗೂ ಸಮರ್ಪಕ ಮೇಲ್ವಿಚಾರಣೆಯೊಂದಿಗೆ ದಾಖಲಿಸಲು ವಿಫಲವಾಗಿದೆ ಎಂದು ಪ್ರಾಧಿಕಾರ ತಿಳಿಸಿದೆ.

ಇದನ್ನೂ ಓದಿ: ಚುನಾವಣೆಗೆ ಸಿದ್ದರಾಮಯ್ಯ ಗುಡ್‌ ಬೈ: ಜನ ನಾಯಕನಾಗಿ ಜೈ!

35 ಗಂಟೆಗಳ ಕೆಲಸದ ವಾರದ ನಿಯಮಕ್ಕೆ ಸಂಬಂಧಿಸಿದ ವಿಚಾರ : ಫ್ರಾನ್ಸ್‌ನಲ್ಲಿ ವಾರಕ್ಕೆ 35 ಗಂಟೆಗಳ ಕೆಲಸದ ಅವಧಿ ಕಾರ್ಮಿಕ ಕಾನೂನಿನ ಪ್ರಮುಖ ನಿಯಮಗಳಲ್ಲಿ ಒಂದಾಗಿದೆ. ಹೆಚ್ಚುವರಿ ಸಮಯ (Overtime) ಮಾಡಿದರೆ ಅದರ ಪ್ರತ್ಯೇಕ ದಾಖಲೆ ಮತ್ತು ನಿಯಮಾನುಸಾರ ಪರಿಹಾರ ನೀಡುವುದು ಕಡ್ಡಾಯವಾಗಿದೆ. ಕಾರ್ಮಿಕ ಪ್ರಾಧಿಕಾರದ ಪ್ರಕಾರ, ಇನ್ಫೋಸಿಸ್‌ನ ಕೆಲವು ಉದ್ಯೋಗಿಗಳ ಸಮಯ ದಾಖಲಿಸುವ ವ್ಯವಸ್ಥೆ ಈ ನಿಯಮಗಳಿಗೆ ಅಗತ್ಯವಿರುವ ಮಟ್ಟದ ಪಾರದರ್ಶಕತೆ ಮತ್ತು ಪರಿಶೀಲನಾ ಮಾನದಂಡಗಳನ್ನು ಪೂರೈಸಲಿಲ್ಲ.

ಇನ್ಫೋಸಿಸ್ ಪ್ರತಿಕ್ರಿಯೆ : ದಂಡದ ಮಾಹಿತಿ ಬಹಿರಂಗಪಡಿಸಿದ ಇನ್ಫೋಸಿಸ್, ಈ ವಿಷಯವು ಕಂಪನಿಯ ಹಣಕಾಸು ಅಥವಾ ಕಾರ್ಯಾಚರಣೆಗಳ ಮೇಲೆ ಯಾವುದೇ ಮಹತ್ವದ ಪರಿಣಾಮ ಬೀರುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಕಂಪನಿಯು ಸಂಬಂಧಿತ ತಾಂತ್ರಿಕ ಹಾಗೂ ಆಡಳಿತಾತ್ಮಕ ಲೋಪಗಳನ್ನು ಸರಿಪಡಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಿದ್ದು, ದೊಡ್ಡ ಮಟ್ಟದ ವ್ಯವಸ್ಥಾತ್ಮಕ ಬದಲಾವಣೆಗಳ ಅಗತ್ಯವಿಲ್ಲ ಎಂದು ಹೇಳಿದೆ.

ಇದನ್ನೂ ಓದಿ: ಕೇಂದ್ರ ಶಿಕ್ಷಣ ಸಚಿವರಾಗಿ ಅಧಿಕಾರ ವಹಿಸಿಕೊಂಡ ಪ್ರಲ್ಹಾದ್ ಜೋಶಿ

ನಾರಾಯಣ ಮೂರ್ತಿ ಹೇಳಿಕೆ ಮತ್ತೆ ಚರ್ಚೆಗೆ : ಈ ಬೆಳವಣಿಗೆ ಇನ್ಫೋಸಿಸ್ ಸಹ-ಸಂಸ್ಥಾಪಕ ಎನ್.ಆರ್. ನಾರಾಯಣ ಮೂರ್ತಿ ಅವರು ಈ ಹಿಂದೆ ಭಾರತದಲ್ಲಿ ವಾರಕ್ಕೆ 70–72 ಗಂಟೆಗಳ ಕೆಲಸದ ಸಂಸ್ಕೃತಿ ಬಗ್ಗೆ ನೀಡಿದ್ದ ಹೇಳಿಕೆಗಳ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೊಮ್ಮೆ ಚರ್ಚೆಗೆ ಕಾರಣವಾಗಿದೆ.

ಒಂದು ವಲಯ ಈ ಬೆಳವಣಿಗೆಯನ್ನು ಆ ಹೇಳಿಕೆಗಳಿಗೆ ಹೋಲಿಕೆ ಮಾಡಿ ಚರ್ಚಿಸುತ್ತಿದ್ದರೆ, ಇನ್ನೊಂದು ವಲಯ ಇದು ಬಹುರಾಷ್ಟ್ರೀಯ ಕಂಪನಿಗಳು ವಿವಿಧ ದೇಶಗಳ ಕಾರ್ಮಿಕ ಕಾನೂನುಗಳಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸುವ ಸಂದರ್ಭದಲ್ಲಿ ನಡೆಯುವ ಸಾಮಾನ್ಯ ಅನುಸರಣೆ (Compliance) ಪ್ರಕ್ರಿಯೆಯ ಭಾಗ ಎಂದು ಅಭಿಪ್ರಾಯಪಟ್ಟಿದೆ.

ಇದನ್ನೂ ಓದಿ: ಏಷ್ಯನ್ ಜೂನಿಯರ್ ಪಿಕಲ್ಬಾಲ್‌ಗೆ ಭರ್ಜರಿ ಸಿದ್ಧತೆ: ಜೆರ್ಸಿ ಅನಾವರಣ

ದೇಶದಿಂದ ದೇಶಕ್ಕೆ ಬದಲಾಗುವ ಕಾರ್ಮಿಕ ನಿಯಮಗಳು : ಜಾಗತಿಕ ಮಟ್ಟದಲ್ಲಿ ಕಾರ್ಯನಿರ್ವಹಿಸುವ ಕಂಪನಿಗಳು ಪ್ರತಿ ದೇಶದ ಸ್ಥಳೀಯ ಕಾರ್ಮಿಕ ಕಾನೂನುಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕಾಗುತ್ತದೆ. ಫ್ರಾನ್ಸ್‌ನಂತಹ ದೇಶಗಳಲ್ಲಿ ಕೆಲಸದ ಅವಧಿ, ಹೆಚ್ಚುವರಿ ಸಮಯದ ದಾಖಲೆ, ಉದ್ಯೋಗಿಗಳ ಹಕ್ಕುಗಳು ಹಾಗೂ ಮೇಲ್ವಿಚಾರಣೆಗೆ ಸಂಬಂಧಿಸಿದ ನಿಯಮಗಳು ಅತ್ಯಂತ ಕಠಿಣವಾಗಿದ್ದು, ಅವುಗಳನ್ನು ಉಲ್ಲಂಘಿಸಿದರೆ ದಂಡ ಸೇರಿದಂತೆ ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ.

ಈ ಪ್ರಕರಣವೂ ಅದೇ ರೀತಿಯ ನಿಯಮ ಪಾಲನೆಗೆ ಸಂಬಂಧಿಸಿದ ಆಡಳಿತಾತ್ಮಕ ವಿಷಯವಾಗಿದ್ದು, ಕಂಪನಿಯು ಅಗತ್ಯ ತಿದ್ದುಪಡಿಗಳನ್ನು ಕೈಗೊಳ್ಳುವುದಾಗಿ ತಿಳಿಸಿದೆ.