17 ವರ್ಷದ ವಿದ್ಯಾರ್ಥಿ AI ಆಧಾರಿತ ಶಿಕ್ಷಣ ವೇದಿಕೆ ‘ಲಾಗ್ನೆವರ್ AI’ ಮೂಲಕ ಜಾಗತಿಕ ಮನ್ನಣೆ ಪಡೆದಿದ್ದಾರೆ. ಕೇವಲ ಆರು ತಿಂಗಳಲ್ಲಿ ₹5 ಕೋಟಿ ಮೌಲ್ಯ ತಲುಪಿದ ಸ್ಟಾರ್ಟ್ಅಪ್ ಈಗ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದೆ.
ನವದೆಹಲಿ: ಸೀಮಿತ ಸಂಪನ್ಮೂಲಗಳ ನಡುವೆಯೇ ಅಸಾಧಾರಣ ಸಾಧನೆ ಮಾಡಿ ದೇಶದ ಯುವ ಉದ್ಯಮಿಗಳಿಗೆ ಮಾದರಿಯಾಗಿರುವ ಜಮ್ಮು ಮತ್ತು ಕಾಶ್ಮೀರದ ರಾಜೌರಿ ಜಿಲ್ಲೆಯ ಡೂಂಗಿ ಗ್ರಾಮದ 17 ವರ್ಷದ ವಿದ್ಯಾರ್ಥಿ ಇಮ್ರಾನ್ ಚೌಧರಿ, ಕೃತಕ ಬುದ್ಧಿಮತ್ತೆ (AI) ಆಧಾರಿತ ಶಿಕ್ಷಣ ಕ್ಷೇತ್ರದಲ್ಲಿ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದ್ದಾರೆ.
ಕೇವಲ 17ನೇ ವಯಸ್ಸಿನಲ್ಲೇ ಅವರು ಲಾಗ್ನೆವರ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್ (Lagnever Technologies Pvt. Ltd.) ಸಂಸ್ಥೆಯನ್ನು ಸ್ಥಾಪಿಸಿದ್ದು, ಅದರ ಪ್ರಮುಖ ಉತ್ಪನ್ನವಾದ ಲಾಗ್ನೆವರ್ AI ಶಿಕ್ಷಣ ಕ್ಷೇತ್ರದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಈ AI ಆಧಾರಿತ ಶಿಕ್ಷಣ ವೇದಿಕೆ ಈಗಾಗಲೇ 10,000ಕ್ಕೂ ಹೆಚ್ಚು ಡೌನ್ಲೋಡ್ಗಳನ್ನು ದಾಖಲಿಸಿದ್ದು, ವಿದ್ಯಾರ್ಥಿಗಳಿಂದ ಉತ್ತಮ ಪ್ರತಿಕ್ರಿಯೆ ಪಡೆದಿದೆ.
ಇದನ್ನೂ ಓದಿ: ಪದ್ಮಶ್ರೀ ಪುರಸ್ಕೃತ, ‘ಬ್ರಿಡ್ಜ್ ಮ್ಯಾನ್’ ಖ್ಯಾತಿಯ ಗಿರೀಶ್ ಭಾರದ್ವಜ್ ನಿಧನ
ಗ್ರಾಮೀಣ ಪ್ರದೇಶದಿಂದ ಜಾಗತಿಕ ವೇದಿಕೆಗೆ : ರಾಜೌರಿ ಜಿಲ್ಲೆಯ ಡೂಂಗಿ ಪ್ರದೇಶವು ಗಡಿ ಹಾಗೂ ಗುಡ್ಡಗಾಡು ಪ್ರದೇಶವಾಗಿದ್ದು, ತಾಂತ್ರಿಕ ಮೂಲಸೌಕರ್ಯಗಳು ಮತ್ತು ಅವಕಾಶಗಳು ಸೀಮಿತವಾಗಿವೆ. ಇಂತಹ ಪರಿಸ್ಥಿತಿಯಲ್ಲಿಯೇ ಇಮ್ರಾನ್ ತಮ್ಮ ಆಸಕ್ತಿ, ಪರಿಶ್ರಮ ಮತ್ತು ನವೋದ್ಯಮದ ಮೂಲಕ ದೊಡ್ಡ ಕನಸನ್ನು ನನಸಾಗಿಸಿದ್ದಾರೆ. ದೊಡ್ಡ ನಗರಗಳಲ್ಲಿರುವ ಸೌಲಭ್ಯಗಳಿಲ್ಲದಿದ್ದರೂ, ಶಿಕ್ಷಣವನ್ನು ಸುಲಭ, ವೈಯಕ್ತಿಕ ಮತ್ತು ತಂತ್ರಜ್ಞಾನ ಆಧಾರಿತವಾಗಿಸುವ ಉದ್ದೇಶದಿಂದ AI ವೇದಿಕೆಯನ್ನು ಅಭಿವೃದ್ಧಿಪಡಿಸಿದ್ದಾರೆ.
ವಿದ್ಯಾರ್ಥಿಗಳಿಗೆ AI ಆಧಾರಿತ ಕಲಿಕೆ : ಲಾಗ್ನೆವರ್ AI ವಿದ್ಯಾರ್ಥಿಗಳ ಕಲಿಕೆಯನ್ನು ಸುಲಭಗೊಳಿಸುವ ಉದ್ದೇಶದಿಂದ ವಿನ್ಯಾಸಗೊಳಿಸಲಾಗಿದೆ. ಈ ವೇದಿಕೆಯಲ್ಲಿ AI ಆಧಾರಿತ ವೈಯಕ್ತಿಕ ಕಲಿಕೆ, ಅಧ್ಯಯನ ಮಾರ್ಗದರ್ಶನ, ವಿಷಯವಾರು ಪುನರಾವರ್ತನೆ (Revision Tools), ರಸಪ್ರಶ್ನೆಗಳು (Quiz), ವೈಯಕ್ತಿಕ ಅಧ್ಯಯನ ಸಹಾಯ, ಶೈಕ್ಷಣಿಕ ಸಲಹೆಗಳು ಇವುಗಳನ್ನು ಒದಗಿಸಲಾಗುತ್ತಿದೆ.
ಇದನ್ನೂ ಓದಿ: ‘PDO ಕಿರುಕುಳದಿಂದ ಬೇಸತ್ತು ಆತ್ಮಹತ್ಯೆ’– ಡೆತ್ನೋಟ್ನಲ್ಲಿ ಆರೋಪ
ಇಮ್ರಾನ್ ಅವರ ಪ್ರಕಾರ, ಈ AI ವ್ಯವಸ್ಥೆ ಶಿಕ್ಷಕರಿಗೆ ಪರ್ಯಾಯವಲ್ಲ; ಬದಲಿಗೆ ತರಗತಿ ಶಿಕ್ಷಣವನ್ನು ಮತ್ತಷ್ಟು ಪರಿಣಾಮಕಾರಿಯಾಗಿಸುವ ಸಹಾಯಕ ಸಾಧನವಾಗಿದೆ.
ಆರು ತಿಂಗಳಲ್ಲಿ ₹5 ಕೋಟಿ ಮೌಲ್ಯ : ಸ್ಥಾಪನೆಯಾದ ಕೇವಲ ಆರು ತಿಂಗಳಲ್ಲೇ ಲಾಗ್ನೆವರ್ ಟೆಕ್ನಾಲಜೀಸ್ ಸುಮಾರು ₹5 ಕೋಟಿ ಮೌಲ್ಯಮಾಪನ ತಲುಪಿರುವುದು ವಿಶೇಷವಾಗಿದೆ. ಭಾರತದ ಎಡ್ಟೆಕ್ ಕ್ಷೇತ್ರದಲ್ಲಿ ಯುವ ಉದ್ಯಮಿಯೊಬ್ಬನ ಈ ಸಾಧನೆ ಹೊಸ ಭರವಸೆಯನ್ನು ಮೂಡಿಸಿದೆ.
ಇದನ್ನೂ ಓದಿ: ಬರಗಾಲ, ರೈತರ ಸಂಕಷ್ಟದತ್ತ ಸರ್ಕಾರದ ಗಮನ: CM ಡಿ.ಕೆ. ಶಿ ಭರವಸೆ
12 ಸದಸ್ಯರ ತಂಡದ ಪರಿಶ್ರಮ : ಕಂಪನಿಯ ಯಶಸ್ಸಿನ ಹಿಂದೆ 12 ಸದಸ್ಯರ ತಂಡದ ಪರಿಶ್ರಮವಿದೆ ಎಂದು ಇಮ್ರಾನ್ ತಿಳಿಸಿದ್ದಾರೆ. ಕಂಪನಿಯ ಮುಖ್ಯ ಮಾರ್ಕೆಟಿಂಗ್ ಅಧಿಕಾರಿ ಮೋಹಿಬ್ ಅಲ್ತಾಫ್, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (COO) ಅನೀಸ್ ಅಜೀಜ್, ನಿರ್ದೇಶಕ ಸರ್ಫರಾಜ್ ಹುಸೇನ್, ಸಾಮಾಜಿಕ ಜಾಲತಾಣಗಳ ನಿರ್ವಹಣೆಯ ಜವಾಬ್ದಾರಿ ವಹಿಸಿರುವ ಅರ್ನಾಬ್ ಬಲ್ಗೋತ್ರಾ, ತಂಡದ ಸದಸ್ಯ ಶೋಯೆಬ್ ಕುರೇಶಿ ಸೇರಿದಂತೆ ಹಲವರು ಸಂಸ್ಥೆಯ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.
