ಬೆಳಗಾವಿ: ಹಗಲಿಡೀ ಮೊಳಗಿದ ಧಿಕ್ಕಾರದ ಘೋಷಣೆಗಳು, ರಾತ್ರಿ ಮೊಳಗಿದ ಹಾಡು–ಭಜನೆಗಳು… ಕಬ್ಬಿಗೆ ಸೂಕ್ತ ಬೆಲೆ ನಿಗದಿಪಡಿಸುವಂತೆ ಆಗ್ರಹಿಸಿ ಬೆಳಗಾವಿ ಜಿಲ್ಲೆಯ ಮೂರು ಟೋಲ್‌ ನಾಕಾಗಳಲ್ಲಿ ರೈತರು ಹೋರಾಟವನ್ನು ತೀವ್ರಗೊಳಿಸಿದ್ದಾರೆ. ಬೇಡಿಕೆ ಈಡೇರುವವರೆಗೂ ಸ್ಥಳದಿಂದ ಕದಲುವುದಿಲ್ಲ ಎಂಬ ಸಂಕಲ್ಪದೊಂದಿಗೆ ಹಿರೇಬಾಗೇವಾಡಿ, ಹತ್ತರಗಿ ಹಾಗೂ ನಿಪ್ಪಾಣಿ ಸಮೀಪದ ಕೊಗನೊಳ್ಳಿ ಟೋಲ್‌ ನಾಕಾಗಳಲ್ಲಿ ಅಹೋರಾತ್ರಿ ಧರಣಿ ಆರಂಭಿಸಿದ್ದಾರೆ.
ದಿನವಿಡೀ ಬೇಡಿಕೆಗಳ ಈಡೇರಿಕೆಗೆ ಘೋಷಣೆಗಳನ್ನು ಕೂಗಿದ ರೈತರು, ರಾತ್ರಿ ಕತ್ತಲು ಆವರಿಸಿದರೂ ಪ್ರತಿಭಟನಾ ಸ್ಥಳವನ್ನು ತೊರೆಯಲಿಲ್ಲ. ಬದಲಾಗಿ, ಹೋರಾಟದ ಕಾವನ್ನು ಕಾಯ್ದುಕೊಳ್ಳಲು ಹಾಡು, ಭಜನೆ ಹಾಗೂ ಏಕಪಾತ್ರಾಭಿನಯದ ಮೂಲಕ ಪ್ರತಿಭಟನೆಯನ್ನು ಮುಂದುವರಿಸಿದರು.
ಹಾಡು–ಭಜನೆಗಳ ಮೂಲಕ ಹೋರಾಟಕ್ಕೆ ಚೈತನ್ಯ: ಹಗಲಿನಲ್ಲಿ ಆಕ್ರೋಶದ ಘೋಷಣೆಗಳಿಗೆ ಸಾಕ್ಷಿಯಾಗಿದ್ದ ಪ್ರತಿಭಟನಾ ವೇದಿಕೆಗಳು ರಾತ್ರಿ ಸಾಂಸ್ಕೃತಿಕ ಕಾರ್ಯಕ್ರಮಗಳ ಕೇಂದ್ರವಾದವು. ಕಲಾವಿದರು ನಡೆಸಿಕೊಟ್ಟ ಏಕಪಾತ್ರಾಭಿನಯ ಹಾಗೂ ಹಾಡುಗಳು ರೈತರ ಗಮನ ಸೆಳೆದರೆ, ಭಜನೆಗಳು ಪ್ರತಿಭಟನಾ ಸ್ಥಳದಲ್ಲಿ ಹೊಸ ಉತ್ಸಾಹ ತುಂಬಿದವು. ಹಾಡುಗಳಿಗೆ ರೈತರು ದನಿಗೂಡಿಸಿ, ಭಜನೆಗೆ ತಾಳ ಹಾಕುತ್ತ ಒಗ್ಗಟ್ಟಿನಿಂದ ಪಾಲ್ಗೊಂಡರು.
ದಿನವಿಡೀ ಹೋರಾಟದಲ್ಲಿ ತೊಡಗಿಸಿಕೊಂಡಿದ್ದ ರೈತರಿಗೆ ಈ ಕಾರ್ಯಕ್ರಮಗಳು ಹೊಸ ಚೈತನ್ಯ ನೀಡಿದವು. ಕಬ್ಬಿಗೆ ಸೂಕ್ತ ಬೆಲೆ ನೀಡಬೇಕೆಂಬ ಒಂದೇ ಬೇಡಿಕೆಯೊಂದಿಗೆ ಟೋಲ್‌ ನಾಕಾಗಳಲ್ಲಿ ಜಮಾಯಿಸಿರುವ ರೈತರು, ಮನರಂಜನೆಯೊಂದಿಗೆ ಹೋರಾಟದ ಉತ್ಸಾಹವನ್ನೂ ಉಳಿಸಿಕೊಂಡರು.
ಬೇಡಿಕೆ ಈಡೇರುವವರೆಗೂ ಹೋರಾಟದ ಹಾದಿ: ರಾತ್ರಿ ಕಳೆದರೂ ಪ್ರತಿಭಟನೆಯ ಕಾವು ಕಡಿಮೆಯಾಗಲಿಲ್ಲ. ಮೂರು ಟೋಲ್‌ ನಾಕಾಗಳಲ್ಲೂ ರೈತರು ಸ್ಥಳದಲ್ಲೇ ಉಳಿದು ಅಹೋರಾತ್ರಿ ಧರಣಿ ಮುಂದುವರಿಸಿದರು. ಹಗಲಿನಲ್ಲಿ ಘೋಷಣೆಗಳ ಮೂಲಕ ಆಕ್ರೋಶ ವ್ಯಕ್ತಪಡಿಸಿದ ರೈತರು, ರಾತ್ರಿ ಹಾಡು–ಭಜನೆಗಳ ಮೂಲಕ ಒಗ್ಗಟ್ಟು ಪ್ರದರ್ಶಿಸಿದರು.
ಕಬ್ಬಿಗೆ ಸೂಕ್ತ ಬೆಲೆ ನಿಗದಿಪಡಿಸಬೇಕೆಂಬ ಬೇಡಿಕೆಯನ್ನು ಮುಂದಿಟ್ಟುಕೊಂಡು ಆರಂಭವಾದ ಹೋರಾಟ, ರಾತ್ರಿ ಇಡೀ ಮುಂದುವರಿದಿದ್ದು, ರೈತರ ದೃಢ ನಿಲುವಿಗೆ ಸಾಕ್ಷಿಯಾಯಿತು.
