ಬಸ್ತರ್: ದೇಶದಲ್ಲಿ ನಕ್ಸಲ್‌ವಾದದ ಪ್ರಭಾವ ಗಣನೀಯವಾಗಿ ಕಡಿಮೆಯಾಗಿದ್ದು, ಈ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಛತ್ತೀಸ್‌ಗಢದ ಬಸ್ತರ್‌ನಲ್ಲಿ ನಿಯೋಜನೆಗೊಂಡಿರುವ ಭದ್ರತಾ ಪಡೆಗಳೊಂದಿಗೆ ದೀಪಾವಳಿ ಹಬ್ಬವನ್ನು ಆಚರಿಸಿದರು.
ನಕ್ಸಲ್ ವಿರೋಧಿ ಕಾರ್ಯಾಚರಣೆಯಲ್ಲಿ ತೊಡಗಿರುವ ಯೋಧರೊಂದಿಗೆ ಹಬ್ಬದ ಸಂಭ್ರಮ ಹಂಚಿಕೊಂಡ ಅವರು, ದೇಶದ ಭದ್ರತಾ ಸವಾಲುಗಳ ಕುರಿತು ಮಾತನಾಡಿ, ಅರಣ್ಯ ಪ್ರದೇಶಗಳಲ್ಲಿ ಸಕ್ರಿಯವಾಗಿದ್ದ ಸಶಸ್ತ್ರ ನಕ್ಸಲ್ ಚಟುವಟಿಕೆಗಳು ಬಹುತೇಕ ಅಂತ್ಯಗೊಂಡಿದ್ದರೂ, ನಗರ ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸುವ ʻದಿಮಾಗಿ ನಕ್ಸಲರು’ ಇನ್ನೂ ಆತಂಕಕಾರಿಯಾಗಿದ್ದಾರೆ ಎಂದು ಎಚ್ಚರಿಸಿದರು. ವಿವಿಧ ಸಂಘಟನೆಗಳ ಒಳಗೆ ಪ್ರವೇಶಿಸಿ ತಮ್ಮ ಪ್ರಭಾವ ವಿಸ್ತರಿಸುವ ಇಂತಹ ಶಕ್ತಿಗಳಿಂದ ದೇಶಕ್ಕೆ ಅಪಾಯವಿದೆ ಎಂದರು.
2026ರ ದೀಪಾವಳಿ ದೇಶದ ಪಾಲಿಗೆ ಐತಿಹಾಸಿಕ ಕ್ಷಣವಾಗಿದೆ. ದಶಕಗಳಿಂದ ದೇಶವನ್ನು ಕಾಡುತ್ತಿದ್ದ ನಕ್ಸಲಿಸಂ ಮತ್ತು ಮಾವೋವಾದಿ ಹಿಂಸಾಚಾರದ ವಿರುದ್ಧದ ಹೋರಾಟದಲ್ಲಿ ಮಹತ್ವದ ಜಯ ಸಾಧಿಸಿದ ಬಳಿಕ ಬರುತ್ತಿರುವ ಮೊದಲ ದೀಪಾವಳಿ ಇದಾಗಿದೆ ಎಂದು ಪ್ರಧಾನಿ ಅಭಿಪ್ರಾಯಪಟ್ಟರು.
ಒಂದು ಕಾಲದಲ್ಲಿ ನಕ್ಸಲ್‌ವಾದದ ಭೀತಿಯಿಂದ ತತ್ತರಿಸಿದ್ದ ದೇಶದ ಹಲವು ಪ್ರದೇಶಗಳಲ್ಲಿ ಇಂದು ಜನರು ಭಯಮುಕ್ತವಾಗಿ ಹಬ್ಬ ಆಚರಿಸುವ ವಾತಾವರಣ ನಿರ್ಮಾಣವಾಗಿದೆ. ದೇಶದ ಪ್ರತಿಯೊಂದು ಜಿಲ್ಲೆಯಲ್ಲೂ ನಕ್ಸಲ್ ಹಾವಳಿಯಿಲ್ಲದೆ ದೀಪಾವಳಿ ಸಂಭ್ರಮಿಸುವಂತಾಗಿದೆ. ಕೋಟ್ಯಂತರ ಜನರು ಆತಂಕವಿಲ್ಲದೆ ಹಬ್ಬ ಆಚರಿಸುತ್ತಿರುವುದು ಭದ್ರತಾ ಪಡೆಗಳ ನಿರಂತರ ಪರಿಶ್ರಮದ ಫಲವಾಗಿದೆ ಎಂದು ಯೋಧರ ಸೇವೆಯನ್ನು ಶ್ಲಾಘಿಸಿದರು.
ಆದರೆ, ನಕ್ಸಲ್‌ವಾದದ ವಿರುದ್ಧದ ಹೋರಾಟ ಸಂಪೂರ್ಣವಾಗಿ ಮುಗಿದಿದೆ ಎಂದು ಭಾವಿಸುವಂತಿಲ್ಲ. ಅದರ ಉಳಿದಿರುವ ಸೈದ್ಧಾಂತಿಕ ಮತ್ತು ಸಂಘಟನಾತ್ಮಕ ಬೆದರಿಕೆಗಳನ್ನು ಎದುರಿಸಲು ನಿರಂತರ ಎಚ್ಚರಿಕೆ ಅಗತ್ಯ ಎಂದು ಮೋದಿ ತಿಳಿಸಿದರು.
