ಪೇಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಯಲ್ಲಿ ಭಾರಿ ಕುಸಿತ ಮುಂದುವರಿದಿದ್ದು, ಶುಕ್ರವಾರ ಬಂಗಾರದ ದರ ಕಳೆದ 15 ತಿಂಗಳ ಕನಿಷ್ಠ ಮಟ್ಟಕ್ಕೆ ತಲುಪಿದೆ. ಮಲ್ಟಿ ಕಮಾಡಿಟಿ ಎಕ್ಸ್ಚೇಂಜ್ (MCX) ಮಾರುಕಟ್ಟೆಯಲ್ಲಿ ಡಿಸೆಂಬರ್ ತಿಂಗಳ ಚಿನ್ನದ ಫ್ಯೂಚರ್ಸ್ ದರ ಒಂದೇ ದಿನ ರೂ.4,891 ಕುಸಿದು 10 ಗ್ರಾಂಗೆ ರೂ.1,22,561ಕ್ಕೆ ತಲುಪಿದೆ.
ಕಳೆದ 9 ವಹಿವಾಟು ಅವಧಿಗಳಲ್ಲಿ ಚಿನ್ನದ ಬೆಲೆ ಬರೋಬ್ಬರಿ ಶೇ. 15ರಷ್ಟು ಇಳಿಕೆಯಾಗಿದೆ. ಮತ್ತೊಂದೆಡೆ ಬೆಳ್ಳಿ ದರವೂ ಒಂದೇ ದಿನ ರೂ.9,432 ಕುಸಿತ ಕಂಡು ಪ್ರತಿ ಕೆ.ಜಿ.ಗೆ ರೂ.1,48,050ಕ್ಕೆ ಇಳಿದಿದ್ದು, ಕಳೆದ 7 ದಿನಗಳಲ್ಲಿ ಶೇ. 20ರಷ್ಟು ಪತನವಾಗಿದೆ.
ಪ್ರಧಾನಿ ಮೋದಿ ಮನವಿ ಮತ್ತು ಹಬ್ಬದ ಸಂಪ್ರದಾಯದ ನಡುವೆ ಗೊಂದಲ: ಒಂದೆಡೆ ಬಂಗಾರದ ಬೆಲೆ ಗಣನೀಯವಾಗಿ ಇಳಿಕೆಯಾಗಿರುವುದು ಆಭರಣ ಪ್ರಿಯರಿಗೆ ಖುಷಿ ತಂದಿದ್ದರೆ, ಮತ್ತೊಂದೆಡೆ ಪ್ರಧಾನಿ ನರೇಂದ್ರ ಮೋದಿ ಅವರ ಮನವಿ ಜನರನ್ನು ಚಿಂತನೆಗೆ ಹಚ್ಚಿದೆ.
ಇರಾನ್ ಯುದ್ಧದ ಆರ್ಥಿಕ ಪರಿಣಾಮಗಳ ಹಿನ್ನೆಲೆಯಲ್ಲಿ ದೇಶದ ವಿದೇಶಿ ವಿನಿಮಯ ಮೀಸಲು ಉಳಿಸಲು, ಅನಿವಾರ್ಯವಲ್ಲದ ಚಿನ್ನದ ಖರೀದಿಯನ್ನು ಒಂದು ವರ್ಷ ಮುಂದೂಡುವಂತೆ ಪ್ರಧಾನಿ ಮೋದಿ ಮೇ ಮತ್ತು ಸೆಪ್ಟೆಂಬರ್ನಲ್ಲಿ ದೇಶವಾಸಿಗಳಿಗೆ ಕರೆ ನೀಡಿದ್ದರು. ಭಾರತ ತನ್ನ ಒಟ್ಟು ಬೇಡಿಕೆಯ ಶೇ. 82ರಷ್ಟು ಚಿನ್ನವನ್ನು ಆಮದು ಮಾಡಿಕೊಳ್ಳುವುದರಿಂದ, ಭೌತಿಕ ಚಿನ್ನದ ಖರೀದಿ ಹೆಚ್ಚಾದರೆ ಡಾಲರ್ ಹೊರಹರಿವು ಹೆಚ್ಚಾಗುತ್ತದೆ ಎಂಬುದು ಸರ್ಕಾರದ ಕಳವಳವಾಗಿದೆ.
ಹಬ್ಬ ಮತ್ತು ಮದುವೆ ಸೀಸನ್ ಹಿನ್ನೆಲೆಯಲ್ಲಿ ಗ್ರಾಹಕರು ಭಾರಿ ಪ್ರಮಾಣದ ಹೊಸ ಆಭರಣಗಳ ಬದಲು ಹಗುರವಾದ ಆಭರಣಗಳು, ಹಳೆಯ ಚಿನ್ನದ ವಿನಿಮಯ (Exchange) ಅಥವಾ ಗೋಲ್ಡ್ ಇಟಿಎಫ್ (Gold ETF) ಹೂಡಿಕೆಯತ್ತ ಮುಖ ಮಾಡುತ್ತಿರುವುದು ಕಂಡುಬಂದಿದೆ.
ಬಂಗಾರ-ಬೆಳ್ಳಿ ಬೆಲೆ ದಿಢೀರ್ ಕುಸಿಯಲು 3 ಪ್ರಮುಖ ಕಾರಣಗಳು:
ಅಮೆರಿಕದ ಫೆಡ್ ಬ್ಯಾಂಕ್ ಎಚ್ಚರಿಕೆ: ಹಣದುಬ್ಬರ ನಿಯಂತ್ರಿಸಲು ಬಡ್ಡಿದರವನ್ನು ಮತ್ತಷ್ಟು ಏರಿಕೆ ಮಾಡುವ ಸುಳಿವನ್ನು ಅಮೆರಿಕದ ಫೆಡರಲ್ ರಿಸರ್ವ್ ಅಧಿಕಾರಿಗಳು ನೀಡಿರುವುದರಿಂದ ಬಂಗಾರದ ಮೇಲಿನ ಹೂಡಿಕೆ ಆಕರ್ಷಣೆ ಕಳೆದುಕೊಂಡಿದೆ.
ಬಾಂಡ್ ಯೀಲ್ಡ್ ಏರಿಕೆ: ಅಮೆರಿಕದ 10 ವರ್ಷಗಳ ಟ್ರೆಷರಿ ಬಾಂಡ್ ಯೀಲ್ಡ್ 2007ರ ಬಳಿಕ ಮೊದಲ ಬಾರಿಗೆ ಸತತವಾಗಿ ಶೇ. 5ಕ್ಕಿಂತ ಮೇಲಿದ್ದು, ಹೂಡಿಕೆದಾರರು ಬಡ್ಡಿ ಬರುವ ಬಾಂಡ್ಗಳತ್ತ ಮುಖ ಮಾಡಿದ್ದಾರೆ.
ಬಲಿಷ್ಠ ಅಮೆರಿಕನ್ ಡಾಲರ್: ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಡಾಲರ್ ಮೌಲ್ಯ ಮತ್ತಷ್ಟು ಬಲಗೊಂಡಿರುವುದು ಚಿನ್ನ ಮತ್ತು ಬೆಳ್ಳಿ ದರದ ಮೇಲೆ ತೀವ್ರ ಒತ್ತಡ ಹೇರಿದೆ.





















