ತಂದೆ-ಮಗಳ ಭಾವನಾತ್ಮಕ ಬಾಂಧವ್ಯ; ‘ಪ್ಯಾರ್’ ಚಿತ್ರದ ಟೀಸರ್ ಬಿಡುಗಡೆ – ಎಮೋಷನ್, ಆ್ಯಕ್ಷನ್, ಕೌಟುಂಬಿಕ ಸಂಘರ್ಷ – ಟೀಸರ್ ಹೇಗಿದೆ ಗೊತ್ತಾ?
ಬೆಂಗಳೂರು: ಕನ್ನಡದ ಬಹುನಿರೀಕ್ಷಿತ ಚಿತ್ರ ‘ಪ್ಯಾರ್’ (Pyaar) ಚಿತ್ರದ ಅಧಿಕೃತ ಟೀಸರ್ ಇಂದು ಬಿಡುಗಡೆಯಾಗಿದ್ದು, ತಂದೆ-ಮಗಳ ನಡುವಿನ ಅಪಾರ ಪ್ರೀತಿ, ಕೌಟುಂಬಿಕ ಭಾವನೆಗಳ ಜೊತೆಗೆ ಆ್ಯಕ್ಷನ್ ಹಾಗೂ ಸಂಘರ್ಷದ ಝಲಕ್ ಮೂಲಕ ಗಮನ ಸೆಳೆಯುತ್ತಿದೆ.
ಟೀಸರ್ನ ಪ್ರಮುಖ ಆಕರ್ಷಣೆಯೇ ತಂದೆ-ಮಗಳ ನಡುವಿನ ಗಾಢವಾದ ಬಾಂಧವ್ಯ. “ನನ್ನ ಪ್ರೀತಿ ಲೋಕದಲ್ಲಿರೋ ನನ್ನ ಜೀವ ನನ್ನ ಮಗಳು…” ಹಾಗೂ “ನಮ್ಮಪ್ಪನಿಗಿಂತ ಪ್ರೀತಿ ಏನು ದೊಡ್ಡದಲ್ಲ ಕಣೋ…” ಎಂಬ ಸಂಭಾಷಣೆಗಳು ಮಗಳ ಮೇಲಿನ ತಂದೆಯ ಪ್ರೀತಿಯನ್ನು ಮನಮುಟ್ಟುವ ರೀತಿಯಲ್ಲಿ ಕಟ್ಟಿಕೊಟ್ಟಿವೆ.
ಮಗಳ ಪ್ರೀತಿಯನ್ನು ಕಂಡು ಹೆಮ್ಮೆಪಡುವ ತಂದೆಯ ಪಾತ್ರದಲ್ಲಿ ಹಿರಿಯ ನಟ ವಿ. ರವಿಚಂದ್ರನ್ ಅವರು ಕಾಣಿಸಿಕೊಂಡಿದ್ದು ಅವರ ಸಂಭಾಷಣೆ ಟೀಸರ್ನಲ್ಲಿ ವಿಶೇಷ ಗಮನ ಸೆಳೆಯುತ್ತದೆ.
ಆದರೆ ‘ಪ್ಯಾರ್’ ಕೇವಲ ಭಾವನಾತ್ಮಕ ಕೌಟುಂಬಿಕ ಕಥೆಯಷ್ಟೇ ಅಲ್ಲ ಎಂಬುದನ್ನೂ ಟೀಸರ್ ಸೂಚಿಸಿದೆ.“ನಿನಗೆ ಸಿಗೋದು ಪ್ರೀತಿ ಅಲ್ಲ, ಬರಿ ನೋವು ಮಾತ್ರ” ಎಂಬ ಸಂಭಾಷಣೆಯ ಮೂಲಕ ಚಿತ್ರದಲ್ಲಿ ಸಂಘರ್ಷ, ಆ್ಯಕ್ಷನ್ ಹಾಗೂ ಎದುರಾಳಿಗಳ ನಡುವಿನ ತಿಕ್ಕಾಟವೂ ಇರಲಿದೆ ಎಂಬ ಸುಳಿವು ನೀಡಲಾಗಿದೆ.
ಚಿತ್ರದಲ್ಲಿ ವಿ. ರವಿಚಂದ್ರನ್, ರಿಶ್ವಿನ್ ಹಾಗೂ ರಾಶಿಕಾ ಶೆಟ್ಟಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇವರೊಂದಿಗೆ ಅಚ್ಯುತ್ ಕುಮಾರ್, ಶ್ರೀನಿವಾಸ ಮೂರ್ತಿ, ಶೋಭ್ರಾಜ್, ಶಂಕರ್ ಅಶ್ವಥ್, ವಿಜಯ್ ಸೂರ್ಯ, ವಿಶ್ವ, ಅದ್ವಿಕ್ ಭಾರದ್ವಾಜ್ ಹಾಗೂ ಶಿವಿನ್ ಆರ್. ಸೇರಿದಂತೆ ಹಲವು ಕಲಾವಿದರು ಪ್ರಮುಖ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ತಾಂತ್ರಿಕ ವಿಭಾಗದಲ್ಲೂ ಅನುಭವಿ ಕಲಾವಿದರ ತಂಡವಿದೆ. ಕೆ.ಎಸ್. ಚಂದ್ರಶೇಖರ್ ಛಾಯಾಗ್ರಹಣ ನಿರ್ವಹಿಸಿದ್ದು, ಪಲಾನಿ ಡಿ. ಸೇನಾಪತಿ ಸಂಗೀತ ಹಾಗೂ ಹಿನ್ನೆಲೆ ಸಂಗೀತ ಸಂಯೋಜಿಸಿದ್ದಾರೆ. ಸಾಹಸ ನಿರ್ದೇಶನವನ್ನು ಟೈಗರ್ ಶಿವು ನಿರ್ವಹಿಸಿದರೆ, ನೃತ್ಯ ಸಂಯೋಜನೆಯನ್ನು ರಾಹುಲ್ ಹಾಗೂ ವಿ. ನಾಗೇಶ್ ಮಾಡಿದ್ದಾರೆ.
ಇನ್ನು ಚಿತ್ರದ ಸಂಗೀತ ವಿಭಾಗದಿಂದಲೂ ಹೊಸ ಅಪ್ಡೇಟ್ ಹೊರಬಿದ್ದಿದೆ. ‘ರಾಯಭಾರಿಯಾಗಿ ನಾನಿರುವೆ’ ಎಂಬ ಹಾಡನ್ನು ಖ್ಯಾತ ಗಾಯಕರಾದ ವಿಜಯ್ ಪ್ರಕಾಶ್ ಹಾಗೂ ಅನಿತಾ ಸಾರಾ ಮಹೇಶ್ ಹಾಡಿದ್ದಾರೆ. ಈ ಹಾಡು ಆನಂದ್ ಆಡಿಯೋ ಯೂಟ್ಯೂಬ್ ಚಾನೆಲ್ ಸೇರಿದಂತೆ ಪ್ರಮುಖ ಆಡಿಯೋ ಪ್ಲಾಟ್ಫಾರ್ಮ್ಗಳಲ್ಲಿ ಲಭ್ಯವಿದೆ.
ಒಟ್ಟಾರೆಯಾಗಿ, ‘ಪ್ಯಾರ್’ ಚಿತ್ರದ ಟೀಸರ್ ತಂದೆ-ಮಗಳ ಭಾವನಾತ್ಮಕ ಸಂಬಂಧದ ಜೊತೆಗೆ ಕೌಟುಂಬಿಕ ಸಂಘರ್ಷ, ಆ್ಯಕ್ಷನ್ ಹಾಗೂ ಕಮರ್ಷಿಯಲ್ ಅಂಶಗಳನ್ನು ಒಳಗೊಂಡ ಎಮೋಷನಲ್ ಎಂಟರ್ಟೈನರ್ ಆಗಿ ಚಿತ್ರ ಮೂಡಿಬರುವ ನಿರೀಕ್ಷೆ ಮೂಡಿಸಿದೆ.
ಪ್ರತಿ ಹೊಸ ಅಪ್ಡೇಟ್ಗಾಗಿ ಇಲ್ಲಿ ಕ್ಲಿಕ್ ಮಾಡಿರಿ 👉 ಇಂದಿನ ಪ್ರಮುಖ ಲೈವ್ ಅಪ್ಡೇಟ್ಗಳನ್ನು ‘ಸಂಯುಕ್ತ ಕರ್ನಾಟಕ’ ಜಾಲತಾಣದಲ್ಲಿ ನಿರಂತರವಾಗಿ ಓದಿರಿ.
