ಜನರನ್ನು ಮೂರ್ಖರನ್ನಾಗಿ ಮಾಡುವವರನ್ನು ನಾನು ವಿರೋಧಿಸುತ್ತೇನೆ: ನಿಜವಾದ ಕಲ್ಯಾಣ ರಾಜ್ಯ ನಿರ್ಮಾಣದ ಭರವಸೆಯೇ TVK
ಸೇಲಂ: ತಮಿಳುನಾಡಿನಲ್ಲಿ ವಿಧಾನಸಭಾ ಚುನಾವಣೆಯ ಕಾವು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ನಡುವೆಯೇ, ಇದೇ ಮೊದಲ ಬಾರಿಗೆ ರಾಜಕೀಯ ಕಣಕ್ಕೆ ಇಳಿದಿರುವ ತಮಿಳಿಗ ವೆಟ್ರಿ ಕಳಗಂ ಪಕ್ಷದ ಸಂಸ್ಥಾಪಕ ಹಾಗೂ ನಟ ವಿಜಯ್ ಅವರು ಸೇಲಂನಲ್ಲಿ ನಡೆದ ಚುನಾವಣಾ ಪ್ರಚಾರ ಸಭೆಯಲ್ಲಿ ಆಡಳಿತಾರೂಢ ಡ್ರಾವಿಡ ಮುನ್ನೇತ್ರ ಕಳಗಂ (ಡಿಎಂಕೆ) ಹಾಗೂ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು.
ಸರ್ಕಾರದ ಯೋಜನೆಯಡಿ ಮಹಿಳೆಯರ ಬ್ಯಾಂಕ್ ಖಾತೆಗಳಿಗೆ ₹3,000 ಮುಂಗಡ ಹಣ ಮತ್ತು ಬೇಸಿಗೆ ವಿಶೇಷ ಅನುದಾನವಾಗಿ ₹2,000 ಸೇರಿ ಒಟ್ಟು ₹5,000 ಜಮಾ ಮಾಡಿರುವ ಕ್ರಮವನ್ನು ಗುರಿಯಾಗಿಸಿಕೊಂಡ ವಿಜಯ್, ಇದನ್ನು “ಚುನಾವಣೆಯಲ್ಲಿ ಮತ ಖರೀದಿಸುವ ಪ್ರಯತ್ನ” ಎಂದು ಕಟುವಾಗಿ ಟೀಕಿಸಿದರು. ಡಿಎಂಕೆ ಪಕ್ಷವನ್ನು ‘ದುಷ್ಟ ಪಕ್ಷ’ ಎಂದು ಕರೆದ ವಿಜಯ್, “ನೀವು ಒಳ್ಳೆಯ ತಮಿಳಿಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷಕ್ಕೆ ಮತ ಹಾಕುತ್ತೀರಾ, ಅಥವಾ ದುಷ್ಟ ಡಿಎಂಕೆಗೆ ಮತ ಹಾಕುತ್ತೀರಾ?” ಎಂದು ಜನರಿಗೆ ಪ್ರಶ್ನಿಸಿದರು.
ಇದನ್ನೂ ಓದಿ: ಕೆನಡಾ ಶೂಟೌಟ್ ಪ್ರಕರಣ: ಕನ್ನಡಿಗ ಚಂದನ್ ಕುಮಾರ್ ಪಾರ್ಥಿವ ಶರೀರ ಭಾರತಕ್ಕೆ
‘ಹಣ ತೆಗೆದುಕೊಳ್ಳಿ, ಆದರೆ ವಿಸಿಲ್ಗೆ ಮತ ಹಾಕಿ’: ಪ್ರಚಾರ ಭಾಷಣದಲ್ಲಿ ಮಾತನಾಡಿದ ವಿಜಯ್, “ಸರ್ಕಾರ ಕೊಡುವ ಹಣವನ್ನು ತೆಗೆದುಕೊಳ್ಳಿ. ಆದರೆ ಮತ ಹಾಕುವಾಗ ನಮ್ಮ ಪಕ್ಷದ ಚಿಹ್ನೆಯಾದ ವಿಸಿಲ್ಗೆ ಮತ ಹಾಕಿ” ಎಂದು ಕರೆ ನೀಡಿದರು. ಈ ಮೂಲಕ ಮತದಾರರನ್ನು ಪ್ರಭಾವಿತರಾಗಿಸುವ ಸರ್ಕಾರಿ ಕ್ರಮಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.
‘ಬೇಸಿಗೆ ವರ್ಷಕ್ಕೊಮ್ಮೆ ಮಾತ್ರವೇ?’: ಬೇಸಿಗೆ ವಿಶೇಷ ಭತ್ಯೆ ಕುರಿತು ವ್ಯಂಗ್ಯವಾಡಿದ ವಿಜಯ್, “ಬೇಸಿಗೆ ಈ ವರ್ಷ ಮಾತ್ರ ಬರುತ್ತದೆಯೇ? ಪ್ರತಿಯೊಂದು ಬೀದಿ ಮತ್ತು ಮನೆಯಲ್ಲಿ ಕೇಳಿಬರುವ ವಿಸಿಲ್ ಶಬ್ದದ ಕಾರಣವೇ ಈ ಹಣ ಘೋಷಣೆ ಮಾಡಲಾಗಿದೆ” ಎಂದು ಸರ್ಕಾರದ ಉದ್ದೇಶವನ್ನು ಪ್ರಶ್ನಿಸಿದರು.
ಇದನ್ನೂ ಓದಿ: ರಾಹುಲ್ ವಿರುದ್ಧ ನಿರ್ಣಯಕ್ಕೆ ಬ್ರೇಕ್: ಸಮಿತಿಗೆ ಒಪ್ಪಿಸುವ ಸಾಧ್ಯತೆ
‘ನಿಜವಾದ ಕಲ್ಯಾಣ ರಾಜ್ಯ ನಿರ್ಮಾಣ’: ಈ ವೇಳೆ ತಮ್ಮ ನಾಯಕತ್ವದಲ್ಲಿ ತಮಿಳುನಾಡನ್ನು ನಿಜವಾದ ಕಲ್ಯಾಣ ರಾಜ್ಯವನ್ನಾಗಿ ಮಾಡುವ ಭರವಸೆ ನೀಡಿದ ವಿಜಯ್, “ಜನರನ್ನು ಮೂರ್ಖರನ್ನಾಗಿ ಮಾಡುವವರನ್ನು ನಾನು ವಿರೋಧಿಸುತ್ತೇನೆ. ಅಧಿಕಾರದಲ್ಲಿರುವವರ ವಿರುದ್ಧ ಹೋರಾಡುತ್ತೇನೆ. ನಾನು ಉತ್ತಮ ಆಡಳಿತ ನೀಡುತ್ತೇನೆ. ನನ್ನನ್ನು ನಂಬಿದವರನ್ನು ಎಂದಿಗೂ ನಿರಾಶೆಗೊಳಿಸುವುದಿಲ್ಲ” ಎಂದು ಹೇಳಿದರು.
ರಾಜಕೀಯ ಕಣ ಮತ್ತಷ್ಟು ರಂಗೇರಿಕೆ: ವಿಜಯ್ ಅವರ ಈ ಭಾಷಣದಿಂದ ತಮಿಳುನಾಡಿನ ಚುನಾವಣಾ ರಾಜಕೀಯ ಮತ್ತಷ್ಟು ತೀವ್ರಗೊಂಡಿದ್ದು, ಡಿಎಂಕೆ ಸರ್ಕಾರದ ಮಹಿಳಾ ನೆರವು ಯೋಜನೆ ಮತ್ತು ಅದರ ರಾಜಕೀಯ ಪರಿಣಾಮಗಳ ಕುರಿತು ರಾಜ್ಯದಲ್ಲಿ ಹೊಸ ಚರ್ಚೆಗೆ ವೇದಿಕೆ ಸಿಕ್ಕಂತಾಗಿದೆ.
