ಕಾರವಾರ: ಪ್ರಧಾನಿ ನರೇಂದ್ರ ಮೋದಿ ಅವರು ಭಾನುವಾರ ತಮ್ಮ ಜನಪ್ರಿಯ ರೇಡಿಯೋ ಕಾರ್ಯಕ್ರಮ `ಮನ್ ಕಿ ಬಾತ್’ನಲ್ಲಿ ರವೀಂದ್ರನಾಥ ಟ್ಯಾಗೋರ್ ಬೀಚ್‌ನಲ್ಲಿರುವ ಐಎನ್‌ಎಸ್ ಚಾಪಲ್ ಯುದ್ಧನೌಕೆ ಮತ್ತು ಟುಪಲೋವ್ ಟಿ-142ಎಂ ಪ್ರಸ್ತಾಪಿಸಿದ್ದಾರೆ.
ಐಎನ್‌ಎಸ್ ಚಾಪಲ್ ಒಂದು ಕ್ಷಿಪಣಿ ಬೋಟ್ ಆಗಿದ್ದು, 1971ರ ಇಂಡೋ-ಪಾಕ್ ಯುದ್ಧದಲ್ಲಿ ನೌಕಾಪಡೆಯು ನಡೆಸಿದ ಐತಿಹಾಸಿಕ ‘ಆಪರೇಷನ್ ಟ್ರೈಡೆಂಟ್’ ನಲ್ಲಿ ಭಾಗವಹಿಸಿತ್ತು. ಕರಾಚಿ ಬಂದರನ್ನು ಗುರಿಯಾಗಿಸಿ ನಡೆಸಿದ ಈ ಯಶಸ್ವಿ ಕಾರ್ಯಾಚರಣೆಯು ಭಾರತದ ನೌಕಾ ಶೌರ್ಯದ ಪ್ರತೀಕವಾಗಿದೆ. 2005ರಲ್ಲಿ ಸೇವಾ ನಿವೃತ್ತಿಯ ನಂತರ, ಈ ಯುದ್ಧ ನೌಕೆಯನ್ನು ಕಾಂಕ್ರೀಟ್ ವೇದಿಕೆಯ ಮೇಲೆ ಸ್ಥಾಪಿಸಿ, 2006ರಲ್ಲಿ ಸಾರ್ವಜನಿಕ ವೀಕ್ಷಣೆಗೆ ಇಡಲಾಗಿದೆ. 1971ರ ಯುದ್ಧದ ಮಾಹಿತಿಗಳು ಮತ್ತು ಕ್ಷಿಪಣಿಗಳ ಪ್ರತಿಕೃತಿಗಳು ಇಲ್ಲಿ ಲಭ್ಯವಿದೆ.
ಟುಪಲೋವ್ ಟಿ-142ಎಂ: ಐಎನ್‌ಎಸ್ ಚಾಪಲ್ ನೌಕೆಯ ಪಕ್ಕದಲ್ಲಿ ನಿಂತಿರುವ ಟುಪಲೋವ್ ಟಿ-142ಎಂ ವಿಮಾನವು ಭಾರತೀಯ ನೌಕಾಪಡೆಯ ದೀರ್ಘ-ಶ್ರೇಣಿಯ ಕಡಲ ಗಸ್ತು ಮತ್ತು ಜಲಾಂತರ್ಗಾಮಿ ನಿರೋಧಕ ಯುದ್ಧ ಕಾರ್ಯಾಚರಣೆಗಳ ಬೆನ್ನೆಲುಬಾಗಿತ್ತು. ರಷ್ಯನ್ ನಿರ್ಮಿತ ಟರ್ಬೊ-ಪ್ರೊಪೆಲ್ಲರ್ ವಿಮಾನವು 29 ವರ್ಷಗಳ ಕಾಲ (1988-2017) ಯಾವುದೇ ಅಪಘಾತವಿಲ್ಲದೆ ನಿರಂತರವಾಗಿ ಸೇವೆ ಸಲ್ಲಿಸಿದೆ.
