ಚೆಸ್‌ನಲ್ಲಿ ಭಾರತಕ್ಕೆ ಐತಿಹಾಸಿಕ ಸಾಧನೆ: 100ನೇ ಗ್ರ್ಯಾಂಡ್‌ಮಾಸ್ಟರ್ ಆದ ಅನುಜ್ ಶ್ರೀವತ್ರಿ; ಮಧ್ಯಪ್ರದೇಶದ ಮೊದಲಿಗ!
ಫಿಲಿಪೈನ್ಸ್: ಭಾರತೀಯ ಚೆಸ್ ಇತಿಹಾಸದಲ್ಲಿ ಮತ್ತೊಂದು ಮಹತ್ವದ ಮೈಲಿಗಲ್ಲು ದಾಖಲಾಗಿದೆ. ಮಧ್ಯಪ್ರದೇಶದ 22 ವರ್ಷದ ಅಂತಾರಾಷ್ಟ್ರೀಯ ಮಾಸ್ಟರ್ (IM) ಅನುಜ್ ಶ್ರೀವತ್ರಿ ಅವರು ಫಿಲಿಪೈನ್ಸ್‌ನಲ್ಲಿ ನಡೆದ 7ನೇ ಆಸಿಯಾನ್ ಪ್ಲಸ್ ವೈಯಕ್ತಿಕ ಓಪನ್ ಚೆಸ್ ಚಾಂಪಿಯನ್‌ಶಿಪ್ ಗೆಲ್ಲುವ ಮೂಲಕ ಭಾರತದ 100ನೇ ಗ್ರ್ಯಾಂಡ್‌ಮಾಸ್ಟರ್ (GM) ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಇದೇ ವೇಳೆ ಗ್ರ್ಯಾಂಡ್‌ಮಾಸ್ಟರ್ ಪಟ್ಟ ಪಡೆದ ಮಧ್ಯಪ್ರದೇಶದ ಮೊದಲ ಚೆಸ್ ಆಟಗಾರ ಎಂಬ ದಾಖಲೆಯನ್ನೂ ನಿರ್ಮಿಸಿದ್ದಾರೆ. ದೀಪಾವಳಿ ಸಂದರ್ಭದಲ್ಲಿ ದೊರೆತ ಈ ಸಾಧನೆ ಭಾರತೀಯ ಚೆಸ್ ವಲಯದಲ್ಲಿ ಸಂಭ್ರಮ ಮೂಡಿಸಿದೆ.
ಮೊದಲ ಪಂದ್ಯದಲ್ಲಿ ಸೋಲು, ಬಳಿಕ ಭರ್ಜರಿ ಕಮ್‌ಬ್ಯಾಕ್ : ನವೆಂಬರ್ 3ರಿಂದ 8ರವರೆಗೆ ಫಿಲಿಪೈನ್ಸ್‌ನ ಮಿಸಾಮಿಸ್ ಒಕ್ಸಿಡೆಂಟಲ್ ಪ್ರದೇಶದಲ್ಲಿ ನಡೆದ ಈ ಟೂರ್ನಿಯಲ್ಲಿ ಅನುಜ್ ಆರಂಭಿಕ ಪಂದ್ಯದಲ್ಲೇ ಸೋಲು ಕಂಡಿದ್ದರು. ಆದರೆ ಆ ಸೋಲಿನಿಂದ ಕುಗ್ಗದೆ ಮುಂದಿನ ಪಂದ್ಯಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದರು. ಉಳಿದ ಎಂಟು ಪಂದ್ಯಗಳಲ್ಲಿ ಏಳು ಅಂಕಗಳನ್ನು ಗಳಿಸಿ, ಒಟ್ಟು 9 ಸುತ್ತುಗಳಿಂದ 7 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆದರು. ವಿಯೆಟ್ನಾಂನ ಗ್ರ್ಯಾಂಡ್‌ಮಾಸ್ಟರ್ ನ್ಗುಯೆನ್ ಡಕ್ ಹೋವಾ 6.5 ಅಂಕಗಳೊಂದಿಗೆ ಎರಡನೇ ಸ್ಥಾನ ಪಡೆದರು.
ಈ ಸ್ಪರ್ಧೆಯ ವಿಶೇಷ ನಿಯಮದ ಪ್ರಕಾರ ವಿಜೇತರಿಗೆ ನೇರವಾಗಿ ಗ್ರ್ಯಾಂಡ್‌ಮಾಸ್ಟರ್ ಪಟ್ಟ ನೀಡುವ ಅವಕಾಶವಿತ್ತು. ಅಗತ್ಯವಿರುವ ಅಂತಾರಾಷ್ಟ್ರೀಯ ಆಟಗಾರರ ಪಾಲ್ಗೊಳ್ಳುವಿಕೆ ಸೇರಿದಂತೆ ಫಿಡೆ (FIDE) ನಿಗದಿಪಡಿಸಿದ ಅರ್ಹತಾ ಷರತ್ತುಗಳನ್ನು ಪೂರೈಸಿದ ಈ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದ ಅನುಜ್‌ಗೆ ನೇರ GM ಪಟ್ಟ ದೊರೆಯಿತು. ಇದು ಸಾಮಾನ್ಯವಾಗಿ ಮೂರು GM ನಾರ್ಮ್‌ಗಳು ಮತ್ತು 2,500 ಎಲೋ ರೇಟಿಂಗ್ ಸಾಧಿಸುವ ಸಾಂಪ್ರದಾಯಿಕ ಮಾರ್ಗಕ್ಕಿಂತ ಭಿನ್ನವಾಗಿದೆ.
ವಿಶ್ವನಾಥನ್ ಆನಂದ್ ಬಳಿಕ 38 ವರ್ಷಗಳ ಸಾಧನೆ : ಭಾರತದ ಮೊದಲ ಗ್ರ್ಯಾಂಡ್‌ಮಾಸ್ಟರ್ ಎಂಬ ಹೆಗ್ಗಳಿಕೆಗೆ 1988ರಲ್ಲಿ ವಿಶ್ವನಾಥನ್ ಆನಂದ್ ಪಾತ್ರರಾಗಿದ್ದರು. ಇದೀಗ ಸುಮಾರು 38 ವರ್ಷಗಳ ಬಳಿಕ ಭಾರತೀಯ ಚೆಸ್ 100ನೇ ಗ್ರ್ಯಾಂಡ್‌ಮಾಸ್ಟರ್ ಮೈಲಿಗಲ್ಲು ತಲುಪಿದೆ. 2026ರ ಜುಲೈನಿಂದ ನವೆಂಬರ್‌ವರೆಗಿನ ಐದು ತಿಂಗಳ ಅವಧಿಯಲ್ಲಿ ಭಾರತದ 96ರಿಂದ 100ನೇ ಗ್ರ್ಯಾಂಡ್‌ಮಾಸ್ಟರ್‌ಗಳವರೆಗೆ ಐವರು ಆಟಗಾರರು ಈ ಗೌರವ ಪಡೆದಿರುವುದು ವಿಶೇಷ.
ಸಾಫ್ಟ್‌ವೇರ್ ಉದ್ಯೋಗ ಬಿಟ್ಟು ಚೆಸ್ ಕನಸಿನ ಬೆನ್ನತ್ತಿದ ಅನುಜ್ : ಮಧ್ಯಪ್ರದೇಶದ ಕಟ್ನಿ ಮೂಲದ ಅನುಜ್, ಏಳನೇ ವಯಸ್ಸಿನಲ್ಲೇ ಚೆಸ್ ಆಟ ಆರಂಭಿಸಿದ್ದರು. 2020ರಲ್ಲಿ ಅಂತಾರಾಷ್ಟ್ರೀಯ ಮಾಸ್ಟರ್ ಪಟ್ಟ ಪಡೆದಿದ್ದ ಅವರು, ಲವ್ಲಿ ಪ್ರೊಫೆಷನಲ್ ವಿಶ್ವವಿದ್ಯಾಲಯದಲ್ಲಿ ಕೃತಕ ಬುದ್ಧಿಮತ್ತೆ ಮತ್ತು ಯಂತ್ರ ಕಲಿಕೆ ವಿಷಯದಲ್ಲಿ ಬಿ.ಟೆಕ್ ಪದವಿ ಪಡೆದಿದ್ದರು. ಬಳಿಕ ಜರ್ಮನಿಯ ಕಂಪನಿಯೊಂದರಲ್ಲಿ ಸಾಫ್ಟ್‌ವೇರ್ ಎಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದರು.
ಚೆಸ್‌ನಲ್ಲಿ ಉನ್ನತ ಸಾಧನೆ ಮಾಡುವ ಗುರಿಯಿಂದ ಉದ್ಯೋಗ ತೊರೆದು ಸಂಪೂರ್ಣ ಸಮಯವನ್ನು ಆಟಕ್ಕೆ ಮೀಸಲಿಟ್ಟರು. ಕುಟುಂಬದ ಬೆಂಬಲ, ನಿರಂತರ ಅಭ್ಯಾಸ ಮತ್ತು ಸ್ಪರ್ಧಾತ್ಮಕ ಮನೋಭಾವ ಅವರ ಈ ಸಾಧನೆಗೆ ನೆರವಾಗಿದೆ ಎಂದು ತಿಳಿದುಬಂದಿದೆ.
ಅನುಜ್ ಅವರ ಈ ಸಾಧನೆಯು ಮಧ್ಯಪ್ರದೇಶದ ಚೆಸ್ ಇತಿಹಾಸಕ್ಕೆ ಹೊಸ ಅಧ್ಯಾಯ ಸೇರಿಸಿದೆ. ಭಾರತದ ಚೆಸ್ ಪ್ರತಿಭೆಗಳು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆಯ ಹಾದಿಯಲ್ಲಿ ಮುನ್ನಡೆಯುತ್ತಿರುವುದಕ್ಕೆ ಇದು ಮತ್ತೊಂದು ಸಾಕ್ಷಿಯಾಗಿದೆ. ದೇಶದ 100ನೇ ಗ್ರ್ಯಾಂಡ್‌ಮಾಸ್ಟರ್ ಆಗಿ ದಾಖಲೆ ಬರೆದಿರುವ ಅನುಜ್‌ಗೆ ಚೆಸ್ ಅಭಿಮಾನಿಗಳು ಹಾಗೂ ಕ್ರೀಡಾ ವಲಯದಿಂದ ಅಭಿನಂದನೆಗಳ ಮಹಾಪೂರವೇ ಹರಿದುಬರುತ್ತಿದೆ.
- ಭಾರತದ ಚೆಸ್ ಇತಿಹಾಸದಲ್ಲಿ ಶತಕದ ಸಂಭ್ರಮ: 100ನೇ ಗ್ರ್ಯಾಂಡ್‌ಮಾಸ್ಟರ್ ಆದ ಅನುಜ್ ಶ್ರೀವತ್ರಿ!
- ಬಿಗ್ ಬಾಸ್ ಕುಮಾರಿ ಉಡುಪಿನ ಟ್ರೋಲ್‌ಗೆ ಕಿಚ್ಚ ಸುದೀಪ್ ಸಾಂತ್ವನ: ಸೀತೆಯನ್ನೇ ಬಿಟ್ಟಿಲ್ಲ ಇವರು!
- ‘ಪಾರ್ಟ್ನರ್’ಗೆ ಸೆನ್ಸಾರ್ ಗ್ರೀನ್ ಸಿಗ್ನಲ್: 2027ರ ಆರಂಭದಲ್ಲಿ ಬಿಡುಗಡೆ ನಿರೀಕ್ಷೆ
- ‘ಬಿಗ್ ಬಾಸ್ 13’: ಮನೆಗೆ ‘ಮಾಡರ್ನ್ ಮಹಾಕವಿ’ ಮಂಜು ಎಂಟ್ರಿ: ಬೆಳ್ಳಂಬೆಳಗ್ಗೆ ಕಸ ಚೆಲ್ಲಿ ರಾದ್ಧಾಂತ!
- ‘ಬಿಗ್ ಬಾಸ್ ಕನ್ನಡ 13’: ಮನೆಯೊಳಗೆ ಮಂಜ ರೀ-ಎಂಟ್ರಿ; ಕಿಚ್ಚ ಬಿಗ್ ಟ್ವಿಸ್ಟ್!
